MUTU 50
Mungacite Tyani Kuti Banja Yanu Inkhale Yacimwemwe?—Mbali Yaciŵili
Ŵana ni mphaso yofumila kwa Yehova. Yove ofuna kuti makolo akoisamalila bwino mphaso iyi. Yehova wapeleka malangizo anzelu amene angayavye makolo kucita izi. Wapeleka soti malangizo amene angayavye ŵana kuziŵa zaangacite kuti apangishe banja kunkhala yacimwemwe.
1. Kansi Yehova wapeleka malangizo otyani ku makolo?
Yehova ofuna kuti makolo akokonda ŵana ŵao, nopatula nthawi yotandala nao. Ofuna soti kuti makolo akoteteza ŵana ŵao, noseŵenzesha mfundo za m’Baibo poŵaphunzisa. (Miyambo 1:8) Opasa atata malangizo akuti: “Mulele [ŵana ŵanu] m’malangizo a Yehova noŵaphunzisa kaganizidwe kake.” (Ŵelengani Aefeso 6:4.) Yehova okondwela ngati makolo oseŵenzesha malangizo ŵake polela ŵana ŵao. Okondwela soti ngati makolo opasa lini ŵanthu ayakine udindo woŵalelela ŵana.
2. Kansi Yehova wapeleka malangizo otyani ku ŵana?
Yehova olangiza ŵana kuti: “Mukomvwila makolo ŵanu.” (Ŵelengani Akolose 3:20.) Ngati ŵana olemekeza makolo ŵao noŵamvwila, okondwelesha Yehova pamozi na makolo ŵao. (Miyambo 23:22-25) Yesu eonesha cisanzo cabwino peenze mwana. Olo kuti enze wangwilo ndipo makolo ŵake enze lini angwilo, enzoŵamvwila noŵalemekeza.—Luka 2:51, 52.
3. Mungacitenji kuti munkhale pa ushamwali wotang’a na Mulungu monga banja?
Ngati nimwe kolo, mosakaikila mufunishisha kuti ŵana ŵanu akokonda Yehova monga ni mwamucitila mweo. Mungacite tyani kuti muŵayavye kukonda Yehova? Mwa kukonkha malangizo a m’Baibo akuti: “Ukokhomeleza [mau a Yehova] mu ŵana ŵako. Ukolaŵila nao za mau aŵa ukankhala pansi m’ng’anda mwako [na] poyenda pamseu.” (Deuteronomo 6:7) Mau akuti “kukhomeleza” otanthauza kuphunzisa mowelezhyawelezhya. Mosakaikila, muziŵa kuti mufunika kuphunzisa ŵana ŵanu mowelezhyawelezhya kuti akokumbukila zinthu zamuŵaphunzisa. Lemba iyi yutanthauza kuti mufunika kupeza mipata yosiyanasiyana yophunzisa ŵana ŵanu za Yehova. Banja yonse yufunika kupatula nthawi yophunzila Baibo pamozi wiki iliyonse. Olo kuti muliye ŵana, mufunika mphela kupatula nthawi yophunzila Mau a Mulungu pamweka wiki iliyonse. Kucita izi kukupindulisheni.
PHUNZILANI ZINYINJI
Onani malangizo ayakine amene angayavye banja kunkhala yacimwemwe koma soti yotetezeka.
4. Phunzisani ŵana ŵanu mwacikondi
Kuphunzisa mwana ni nchito ikulu. Kansi Baibo ingakuyavyeni tyani? Ŵelengani Yakobo 1:19, 20, nokambilana makonsho aŵa:
-
Kansi makolo angaoneshe tyani kuti okonda ŵana ŵao ngati okamba nao?
-
Ndaŵa yanji kolo yufunika lini kulanga mwana pa nthawi yakuti ni yokalipa? a
5. Tetezani ŵana ŵanu
Kuti muteteze ŵana ŵanu, n’cinthu cofunika ngako kuti mukokambilana nao nkhani zokhuza kulalana. Kukambilana na ŵana nkhani zokhuza kulalana kungankhale kocitisha nsoni. Onelelani VIDYO, nokambilana makonsho aŵa:
-
Ndaŵa yanji makolo ayakine ovutika kukambilana na ŵana ŵao nkhani zokhuza kulalana?
-
Kansi makolo ayakine aseŵenzesha njila zotyani pokambilana na ŵana ŵao nkhani zokhuza kulalana?
Monga ni mweyeloselela Baibo, calo ca Satana cuipilaipila. Ŵelengani 2 Timoteyo 3:1, 13, nokambilana konsho iyi:
-
Ayakine mwa ŵanthu aipa amene otomolewa m’vesi 13, ocitila ŵana nkhanza. Tetyo, ndaŵa yanji makolo ofunika kuphunzisa ŵana ŵao nkhani zokhuza kulalana, na mwaangazitetezele ku ŵanthu amene ofuna kuŵacitila nkhanza?
Kansi muziŵa?
Mboni za Yehova zafalisa zida zosiyanasiyana zamene zuyavya makolo kuphunzisa ŵana ŵao nkhani zokhuza kulalana noŵateteza ku ŵanthu amene ofuna kuŵacitila nkhanza. Ziyakine mwa izi zida ni:
-
Tetezani Ŵana Ŵanu (vidyo)
-
“Phunzisani Ŵana Ŵanu Nkhani Zokhuza Kulalana” (Galamukani! Na. 5 2016)
6. Mukolemekeza makolo ŵanu
Ŵana angaoneshe kuti olemekeza makolo ŵao kupitila m’zokamba zao. Onelelani VIDYO, nokambilana makonsho okonkhapo.
-
Ndaŵa yanji ŵana ofunika kulaŵila mwaulemu na makolo ŵao?
-
Kansi mwana angalaŵile tyani na makolo ŵake m’njila yoonesha kuti oŵalemekeza?
Ŵelengani Miyambo 1:8, nokambilana konsho iyi:
-
Kansi mwana ofunika kucita tyani ngati makolo ŵake omulangiza?
7. Mukolambila Yehova pamozi monga banja
Mabanja a Mboni za Yehova opatula nthawi wiki iliyonse kuti akolambila Yehova pamozi monga banja. Kansi kulambila kwa pabanja kucitika tyani? Onelelani VIDYO, nokambilana makonsho aŵa:
-
Kansi banja ingacitenji kuti ikonkhala na Kulambila kwa Pabanja wiki iliyonse?
-
Kansi kolo ingacitenji kuti kulambila kwa pabanja kunkhale kopindulisha koma soti kosangalasa?—Onani cithunzithunzi cili koyambilila kwa mutu uno.
-
N’cinji cingacitishe kuti cinkhale covuta kuti banja yanu ikopeza nthawi yocita kulambila kwa pabanja?
M’nthawi ya Aisiraeli, Yehova enzofuna kuti mabanja akonkhala na nthawi yokambilana Malemba. Ŵelengani Deuteronomo 6:6, 7, nokambilana konsho iyi:
-
Kansi mungaseŵenzeshe tyani mfundo ya pa lemba iyi?
Zamungacite pa kulambila kwa pabanja:
-
Mungakonzekele misonkhano ya mpingo pamozi.
-
Mungaŵelenge nokambilana nkhani ya m’Baibo yamene ingasangalase banja yanu.
-
Ngati muli na ŵana atontho-atontho, mungacite daunilodi nopulinta tumbali twa zocita za ŵana pa jw.org.
-
Ngati muli na acilumbwana, mungakambilane nao imozi mwa nkhani zokhuza acilumbwana pa jw.org.
-
Mungacite sewelo ya m’Baibo pamozi na ŵana ŵanu.
-
Mungaonelele nokambilana mavidyo amene opezeka pa jw.org.
ŴANTHU AYAKINE OKAMBA KUTI: “Baibo ni yovuta ngako. Ŵana angaimvwishe lini.”
-
Mungayankhe kuti tyani?
MFUNDO ZACIDULE
Yehova ofuna kuti makolo akokonda, kuphunzisa, noteteza ŵana ŵao; ofuna kuti ŵana akolemekeza makolo ŵao noŵamvwila; ndipo ofuna kuti mabanja akonkhala na kulambila kwa pabanja.
Kuwelezhya mfundo zikulu-zikulu
-
Kansi makolo angacitenji kuti aphunzise noteteza ŵana ŵao?
-
Kansi ŵana angaoneshe tyani kuti olemekeza makolo ŵao?
-
Kansi mabanja opindula tyani ngati opatula nthawi yocita kulambila kwa pabanja wiki iliyonse?
FUFUZANI
Ni zinthu zotyani zamungaphunzise ŵana ŵanu kuti akule bwino?
“Zinthu 6 Zakufunika Kuphunzila Ŵana” (Galamuka! Na. 2 2019)
Onani malangizo yayupeleka Baibo kuli ŵala amene osamalila makolo okalamba.
Onani zeyavya munalume muyakine wamene enzovutika kulela ŵana poyamba kuti akwanishe kusamalila bwino udindo wake.
Onani zaangacite makolo kuti atang’ishe ushamwali na ŵana ŵao.
“Kansi Atata Angacitenji Kuti Akokondana Ngako na Ŵana Ŵao?” (Nsanja ya Olonda, November 1, 2011)
a M’Baibo, mau akuti “cilango” otanthauza kulangiza, kuphunzisa na kuongolela. Mau aŵa otanthauza lini nkhanza.—Miyambo 4:1.
