EISHOMO 50
Eka Yaawe Neebaasa Kubamu Eta Okushemererwa?—Ekicweka 2
Abaana n’ekiconco kuruga ahari Yehova. Naayenda ngu abazaire bareeberere gye ekiconco ekyo. Yehova naaha obuhabuzi bw’obwengye oburikubaasisa abazaire kukora ekyo. Obuhabuzi bwe nibuhwera n’abaana kwongyera aha kushemererwa kw’eka.
1. Yehova naaha abazaire buhabuzi ki?
Yehova naayenda ngu abazaire bakunde abaana baabo, kandi bamare nabo obwire bwingi. Naayenda ngu abazaire barinde abaana baabo kutahikwaho akabi, kandi bakorese emisingye ya Baibuli omu kubatendeka. (Enfumu 1:8) Naagambira baishebo arikubagira ngu mugumizemu nimuboorora omu kuhana kwa Yehova n’omu kwehanangiriza kwe. (Shoma Abaefeso 6:4.) Yehova naashemererwa abazaire baakuratira obuhabuzi bwe omu kworora abaana baabo, n’okuhamya ngu obujunaanizibwa obwo tibaabuha muntu ondiijo.
2. Yehova naaha abaana buhabuzi ki?
Yehova naaragiira abaana ati: “Mworobere abazaire baanyu.” (Shoma Abakolosai 3:20.) Abaana baaha abazaire baabo ekitiinisa kandi bakaboorobera, nibashemeza Yehova n’abazaire baabo. (Enfumu 23:22-25) Yesu akataho eky’okureeberaho kirungi obu yaabaire akiri muto. N’obu araabe yaabaire ahikiriire, akaba naayorobera abazaire be, kandi arikubaha ekitiinisa.—Luka 2:51, 52.
3. Nimubaasa kwirira haihi Ruhanga muta nk’eka?
Ku oraabe ori omuzaire, hatariho kubangaanisa nooyenda ngu abaana baawe bakunde Yehova nkaiwe. Noobaasa kuhikiiriza ota ekigyendererwa ekyo? Orikukora eki Baibuli erikugamba: ‘Oyezirikye kwegyesa abaana baawe [ebigambo bya Yehova], ogume obigaaniireho oshutami omu nju yaawe, nari noogyenda omu muhanda.’ (Eky’Ebiragiro 6:7) ‘Okwezirika kwegyesa’ nikimanyisa okugarukagaruka omu nshonga. Obundi nookimanya ngu oine kugarukamu ekintu emirundi mingi kugira ngu abaana baawe bakiijukye. Ekyahandiikirwe eki nikimanyisa ngu oine kusherura oburyo bw’okugaaniira n’abaana baawe ebirikukwata ahari Yehova. Ni kirungi kutaho obwire bw’okuramya hamwe nk’eka buri saabiiti. Ku muraabe mutaine baana, nabwo n’eky’omugasho kugira obwire buri saabiiti kwega Ekigambo kya Ruhanga.
SHWIJUMA GYE
Yetegyereze bumwe aha buhabuzi oburikubaasa kuhwera eka kubamu okushemererwa n’oburinzi.
4. Tendeka abaana baawe omu muringo gwa rukundo
Okutendeka omwana nikibaasa kuguma. Baibuli neebaasa kuhwera eta? Shoma Yakobo 1:19, 20, kubaasa kugarukamu ebibuuzo ebi:
-
Abazaire nibabaasa kworeka bata ngu nibakunda abaana baabo baaba nibagaaniira nabo?
-
Ahabw’enki omuzaire atashemereire kuhana abaana be yaaba aine ekiniga? a
5. Rinda abaana baawe
Kubaasa kurinda abaana baawe, ni kikuru munonga kugamba na buri mwana aha bikwatiraine n’okuteerana. Kwonka eki nikibaasa kukugumira. Zaana VIDIYO, kubaasa kugarukamu ebibuuzo ebirikukurataho.
-
Ahabw’enki nikigumira abazaire abamwe kugaaniira n’abaana baabo aha nshonga z’okuteerana?
-
Abazaire abamwe babaasize bata kushoboororera abaana baabo ebikwatiraine n’okuteerana?
Nk’oku kyagambirweho kare omu bunabi, ensi ya Sitaane neeyeyongyera kuba mbi. Shoma 2 Timoseo 3:1, 13, kubaasa kugarukamu ekibuuzo eki:
-
Bamwe aha bantu babi abarikugambwaho omu mushororongo gwa 13 nibatoroboza abaana. Mbwenu shi, ahabw’enki ni kikuru abazaire kushoboororera abaana baabo ebikwatiraine n’okuteerana, n’okubarinda abarikutoroboza?
Eki waaba nookimanya?
Abajurizi ba Yehova nibashohoza ebikoreso bingi kuhwera abazaire kushoboororera abaana baabo ebikwatiraine n’okuteerana, n’okubarinda kutatorobozibwa. Nk’eky’okureeberaho, reeba:
-
Rinda Abaana Baawe (vidiyo)
-
“Okwegyesa Omwana Waawe aha Nshonga y’Okuteerana” (Awake! Na. 5 2016)
6. Ha Abazaire baawe ekitiinisa
Abaana bato hamwe n’emishogoyo nibabaasa kworeka ngu nibaha abazaire baabo ekitiinisa, kurugiirira aha muringo ogu barikugamba nabo. Zaana VIDIYO, kubaasa kugarukamu ebibuuzo ebirikukurataho.
-
Ahabw’enki kiri eky’obwengye abato kugaaniira n’abazaire baabo omu muringo gw’ekitiinisa?
-
Omwana naabaasa kugaaniira ata n’abazaire be omu muringo gw’ekitiinisa?
Shoma Enfumu 1:8, kubaasa kugarukamu ekibuuzo eki:
-
Omwana ashemereire kutwaza ata abazaire be baamuha eby’okukuratira?
7. Muramye Yehova nk’eka
Amaka g’Abajurizi ba Yehova nigagira obwire buri saabiiti kuramya hamwe Yehova. Okuramya oku nikubaasa kutwariramu ki? Zaana VIDIYO, kubaasa kugarukamu ebibuuzo ebirikukurataho.
-
Eka neebaasa kugira eta Okuramya kw’Eka etarikwosha?
-
Abazaire nibabaasa kukora ki kureetera okuramya kw’eka kuba kurungi kandi okurikushemeza?—Reeba ekishushani ky’okubanza omu ishomo eri.
-
Ahabw’enki murikubaasa kugumirwa kwega hamwe?
Omu Israeli eya ira, Yehova akaba naayenda ngu amaka gagume nigagaaniira hamwe aha Byahandiikirwe. Shoma Eky’Ebiragiro 6:6, 7, kubaasa kugarukamu ekibuuzo eki:
-
Noobaasa kugyendera ota aha musingye ogu?
Bimwe eby’okwega omu kuramya kw’eka:
-
Okutebeekanisa enteerane z’ekibiina.
-
Okushoma ebiri omu Baibuli ebirikushemeza eka yaawe n’okubigaaniiraho.
-
Waaba oine abaana bato, noobaasa kwiha aha jw.org eby’okukora eby’abaana.
-
Waaba oine emishogoyo, mugaaniire aha kicweka ky’eminyeeto ekiri aha jw.org/nyn.
-
Iwe n’abaana baawe, eby’omu Baibuli mubizaanemu emizaano.
-
Okureeba emwe ahari vidiyo eziri aha jw.org/nyn n’okugigaaniiraho.
ABAMWE NIBAGIRA NGU: “Baibuli egumire munonga abaana tibarikubaasa kugyetegyereza.”
-
Noobaasa kugarukamu ota?
OMU BUGUFU
Yehova naayenda ngu abazaire baakunde abaana baabo, babatendeke, kandi babarinde. Naayenda ngu n’abaana bahe abazaire baabo ekitiinisa, kandi baboorobere. Kandi naayenda ngu n’amaka garamye hamwe.
Okweijutsya
-
Abazaire nibabaasa kutendeka bata abaana baabo n’okubarinda?
-
Abaana nibabaasa kworeka bata ngu nibaha abazaire baabo ekitiinisa?
-
Ni birungi ki ebirikuruga omu kutaho obwire buri saabiiti kuramya hamwe nk’eka?
JUMBURA EBINDI
Ni mashomo ki agarikubaasa kuhwera abaana baawe omu kukura kwabo?
“Amashomo Mukaaga Agu Abaana Baine Kwega” (Awake! Na. 2 2019)
Manya obuhabuzi obu Baibuli erikuha abarikureeberera abakaikwire.
“Baibuli Neegamba ki aha Kureeberera Abazaire Abakaikwire” (Eky’aha mukura)
Reeba oku omushaija owaabaire atarikumanya kworora abaana yaabaire omuzaire omusinguzi.
Yetegyereze oku baishe abaana barikubaasa kuhamya omukago gwabo na batabani baabo.
a Omu Baibuli, ‘okuhana’ nikimanyisa okutaho eby’okukuratira, okwegyesa, n’okuhabura. Tikirikumanyisa okwitsa omwana omwaga, nari okumutwariza kubi.—Enfumu 15:5.
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
