ƐZUKOALƐDEƐ 50
Kɛ Ɔkɛyɛ Na Wɔ Abusua Ne Anye Alie Ɛ?—Foa 2
Ngakula le ahyɛlɛdeɛ mɔɔ vi Gyihova ɛkɛ. Ɔkpondɛ kɛ awovolɛ nea ahyɛlɛdeɛ ɛhye kpalɛ. Gyihova tu awovolɛ folɛ kpalɛ mɔɔ bahola aboa bɛ yeamaa bɛayɛ zɔ a. Ye folɛdulɛ ne noko bahola aboa ngakula yeamaa bɛayɛ debie mɔɔ bamaa bɛ abusua ne anye alie la.
1. Folɛ boni a Gyihova tu awovolɛ a?
Gyihova kpondɛ kɛ awovolɛ kulo bɛ mra na bɛnyia mekɛ dɔɔnwo bɛmaa bɛ. Eza ɔkpondɛ kɛ awovolɛ bɔ bɛ mra nwo bane fi esiane nwo na bɛfa Baebolo ngyinlazo bɛtete bɛ. (Mrɛlɛbulɛ 1:8) Ɔka ɔkile selɛma kɛ: “Bɛhɔ zo bɛva Gyihova . . . ngilehilelɛ bɛtete bɛ [mra].” (Kenga Ɛfɛsɛsema 6:4.) Saa awovolɛ di Gyihova adehilelɛ zo wɔ mekɛ mɔɔ bɛlɛtete bɛ mra la, na bɛangyakyi gyima ɛhye bɛammaa awie gyɛne a ɔmaa ɔ nye die.
2. Folɛ boni a Gyihova tu ngakula a?
Gyihova ɛha ɛhile ngakula kɛ: “Bɛdie bɛ awovolɛ.” (Kenga Kɔlɔsaema 3:20.) Saa ngakula bu bɛ awovolɛ na bɛtie bɛ a, bɛmaa Gyihova nee bɛ awovolɛ anye die. (Mrɛlɛbulɛ 23:22-25) Gyisɛse yɛle nwolɛ neazo kpalɛ wɔ ye ngakula nu. Ɛnee ɔdi munli ɛdeɛ, noko ɔdiele ye awovolɛ na ɔbule bɛ.—Luku 2:51, 52.
3. Kɛ ɔkɛyɛ na wɔ abusua ne abikye Nyamenle ɛ?
Saa ɛle awovolɛ a, ɔda ali kɛ ɛkulo kɛ ɛ mra kulo Gyihova kɛ ɛdawɔ la. Kɛ ɔkɛyɛ na wɔayɛ zɔ ɛ? Ɔwɔ kɛ ɛyɛ mɔɔ Baebolo ne ka la: “Ɔwɔ kɛ bɛfa [Gyihova edwɛkɛ ne] bɛwula bɛ mra ahonle nu na bɛka nwolɛ edwɛkɛ wɔ mekɛ mɔɔ bɛde bɛ azua nu anzɛɛ bɛlua adenle zo” la. (Ditilɔnomi 6:7) ‘Bɛva bɛwula’ kile kɛ ɛkilehile debie na wɔazi zolɛ bieko. Bie a wɔnwu ye kɛ fane dɔɔnwo ne ala ɔwɔ kɛ ɛsi debie bie azo bieko ɛmaa ɛ mra amaa bɛahakye. Ngɛlɛlera ɛhye kile kɛ ɔwɔ kɛ dahuu ɛkpondɛ adenle ɛdua zo ɛka Gyihova anwo edwɛkɛ ɛkile ɛ mra. Ɔle kpalɛ kɛ ɛbaye mekɛ wɔazie ɛkɛ ne dapɛne biala wɔamaa abusua ne ayia nu azonle Gyihova. Saa ɛnlɛ ngakula bɔbɔ na ɛnyia mekɛ dapɛne biala ɛsukoa Nyamenle Edwɛkɛ ne a ɔbaboa wɔ.
SUKOA DƆƆNWO
Nea nzuzulɛ kpalɛ mɔɔ maa abusua nye die na bɛnyia banebɔlɛ la.
4. Tete ɛ mra wɔ ɛlɔlɛ nu
Kakula ɛtetelɛ ɛnla aze. Kɛzi Baebolo ne bahola aboa ɛ? Kenga Gyemise 1:19, 20, na akee bɛzuzu kpuya ɛhye mɔ anwo:
-
Kɛ ɔkɛyɛ na awovolɛ adendɛ ahile bɛ mra wɔ ɛlɔlɛ nu ɛ?
-
Duzu ati a awovolɛ fa ɛya a ɔnle kɛ ɔtenrɛ ɔ mra ɛ? a
5. Bɔ ɛ mra nwo bane
Amaa wɔabɔ ɛ mra nwo bane la, ɔhyia kpalɛ kɛ ɛka nla nwo edwɛkɛ ɛkile bɛ nuhua ko biala. Ɛhye ɛyɛlɛ ɛnla aze. Ye VIDIO ne, na akee bɛzuzu kpuya ɛhye mɔ anwo.
-
Duzu ati a ɔyɛ se ɔmaa awovolɛ bie mɔ kɛ bɛbaha nla nwo edwɛkɛ bɛahile bɛ mra a?
-
Adenle boni a awovolɛ bie mɔ ɛlua zo ɛhilehile nla nwo edwɛkɛ nu ɛhile bɛ mra a?
Kɛ mɔɔ bɛhanle bɛdole ɛkɛ ne la, Seetan ewiade ne ɛlɛkɔ ɔ nyunlu wɔ ɛtaneyɛlɛ nu. Kenga 2 Timote 3:1, 13, na akee bɛzuzu kpuya ɛhye anwo:
-
Amumuyɛma mɔɔ bɛha bɛ nwo edwɛkɛ wɔ ngyɛnu 13 la bie mɔ nee ngakula da. Ɔti, duzu ati a ɔhyia kɛ awovolɛ kilehile bɛ mra nla nwo edwɛkɛ nee kɛzi ɔwɔ kɛ ngakula bɔ bɛ nwo bane fi amumuyɛma anwo la anwo debie a?
Asoo ɛze?
Gyihova Alasevolɛ yɛ vidio nee mbuluku dɔɔnwo mɔɔ boa awovolɛ maa bɛkilehile bɛ mra nla nwo debie na bɛbɔ bɛ nwo bane amaa awie nee bɛ anla la. Kɛ neazo la, nea:
-
Bɔ Ɛ Mra Nwo Bane (vidio ne)
-
“Kilehile Ɛ Mra Nla Nwo Debie” (Awake! No. 5 2016)
6. Bu wɔ awovolɛ
Ngakula nee mgbavolɛ yɛɛ mbɛlɛra bahola alua kɛzi bɛtendɛ bɛkile bɛ awovolɛ la azo ahile kɛ bɛbu bɛ. Ye VIDIO ne, na akee bɛzuzu kpuya ɛhye mɔ anwo.
-
Duzu ati a ɔle kpalɛ kɛ kakula nee ye awovolɛ badendɛ wɔ ɛbulɛ nu a?
-
Kɛzi kakula bahola adendɛ ahile ye awovolɛ wɔ adenle mɔɔ kile kɛ ɔdi bɛ eni la azo ɛ?
Kenga Mrɛlɛbulɛ 1:8, na akee bɛzuzu kpuya ɛhye anwo:
-
Duzu a ɔwɔ kɛ kakula yɛ wɔ mekɛ mɔɔ ye awovolɛ kɛhile ye debie mɔɔ ɔwɔ kɛ ɔyɛ la ɛ?
7. Bɛbɔ nu kɛ abusua bɛzonle Gyihova
Gyihova Alasevolɛ mbusua ye mekɛ sie ɛkɛ dapɛne biala na bɛbɔ nu bɛsonle. Ɛnea a kɛzi abusua ɛzonlenlɛ zɛhae bayɛ ɛ? Ye VIDIO ne, na akee bɛzuzu kpuya ɛhye mɔ anwo.
-
Kɛ ɔkɛyɛ na abusua bie ahola ayɛ Abusua Ɛzonlenlɛ dahuu ɛ?
-
Duzu a awovolɛ bahola ayɛ amaa bɛ abusua ɛzonlenlɛ ne aboa bɛ na yeayɛ anyelielɛ a?—Nea ɛzukoalɛdeɛ ɛhye mɔlebɛbo nvoninli ne.
-
Duzu a bahola amaa yeayɛ se kɛ wɔ abusua ne babɔ nu azukoa debie a?
Wɔ tete Yizilayɛ, ɛnee Gyihova kpondɛ kɛ mbusua ka Ngɛlɛlera ne anwo edwɛkɛ dahuu. Kenga Ditilɔnomi 6:6, 7, na akee bɛzuzu kpuya ɛhye anwo:
-
Kɛzi ɛbava ngyinlazo ɛhye wɔali gyima ɛ?
Abusua ɛzonlenlɛ nwo nzuzulɛ:
-
Siezie ɛ nwo maa asafo debiezukoalɛ.
-
Kenga na suzu Baebolo nu edwɛkɛ bie mɔɔ wɔ abusua ne anye balie nwo la anwo.
-
Saa ɛlɛ ngakula a, twe gyimayɛlɛ maa ngakula anzɛɛ pelente bie wɔ jw.org azo.
-
Saa ɛlɛ mgbavolɛ nee mbɛlɛra a, bɛzuzu edwɛkɛ mɔɔ bɛhɛlɛ bɛmaa mgbavolɛ nee mbɛlɛra mɔɔ wɔ jw.org azo la bie anwo.
-
Ɛ nee ɛ mra ne mɔ ɛyɛ Baebolo nu edwɛkɛ bie anwo yɛkile.
-
Bɛnlea vidio mɔɔ wɔ jw.org azo la bie na bɛzuzu nwolɛ.
BIE MƆ KA KƐ: “Ɔyɛ se kɛ ngakula bade Baebolo ne abo.”
-
Duzu a ɛbaha a?
EDWƐKƐ TITILI
Gyihova kpondɛ kɛ awovolɛ kulo bɛ mra, bɛtete bɛ, na bɛbɔ bɛ nwo bane; ɔkulo kɛ ngakula bu bɛ awovolɛ na bɛtie bɛ; yɛɛ ɔkulo kɛ mbusua bɔ nu sonle ye.
Ndinu
-
Kɛ ɔkɛyɛ na awovolɛ atete bɛ mra na bɛabɔ bɛ nwo bane ɛ?
-
Kɛ ɔkɛyɛ na ngakula ahile kɛ bɛdi bɛ awovolɛ eni ɛ?
-
Saa bɛye mekɛ bɛsie ɛkɛ dapɛne biala na bɛbɔ nu kɛ abusua bɛsonle a nvasoɛ boni a wɔ zo a?
KPONDƐ DƆƆNWO
Ninyɛne boni mɔ a ɛ ra sukoa na ɔnyi a ɔbaboa ye a?
“Ninyɛne Nsia Mɔɔ Ɔwɔ Kɛ Ngakula Sukoa La” (Awake! No. 2 2019)
Sukoa folɛ kpalɛ mɔɔ Baebolo ne tu menli mɔɔ ɛlɛnea bɛ awovolɛ mɔɔ bɛyɛ mgbanyinli la.
Nea kɛzi nrenyia bie mɔɔ ɛnze kɛzi bɛtete ngakula la rayɛle selɛ mɔɔ ze ngakula tete la.
Sukoa kɛzi selɛma bahola amaa agɔnwolɛvalɛ mɔɔ bɛ nee bɛ mra mrenyia lɛ la anu amia la anwo debie.
“Kɛ Ɔkɛyɛ Na Selɛma Ava Bɛ Mra Mrenyia Agɔnwolɛ Kyengye Ɛ?” (Ɛzinzalɛ Arane nu edwɛkɛ)
a Wɔ Baebolo ne anu, “ɛdenrɛdenrɛlɛ” kile ngilehilelɛ yɛɛ adehilelɛ. Ɔngile aholoba nee ɛbolɛ mgbane mgbane anzɛɛ atisesebɛyɛlɛ fee.—Mrɛlɛbulɛ 4:1.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
