50. KAPITEL
Woo kaun june Famielje daut scheen gonen? (Poat 2)
Kjinja sent een Jeschenkj von Jehova, un hee well haben, daut de Elren no dee oppaussen. Jehova haft de Elren doatoo gooden Rot jejäft. Sien Rot wiest uk, waut Kjinja doonen kjennen, daut et enne Famielje fein schauft.
1. Waut von Rot jeft Jehova de Elren?
Jehova well haben, daut de Elren äare Kjinja sellen leewen un soo väl aus afens mäajlich met dee sellen toop sennen. Un hee well uk, daut dee äare Kjinja fa schlajchtet beschitzen un dee met de biblische Gruntsauzen belieren (Spricha 1:8). Hee sajcht to de Vodasch: “Trakjt dee christlich opp un doot dee em christlichen Senn trajchtwiesen” (läs Efeesa 6:4). Jehova freit sikj, wan de Elren sienen Rot nokomen toom de Kjinja opptrakjen un dise Veauntwuatunk nich aundre äwaloten.
2. Waut von Rot jeft Jehova de Kjinja?
Jehova jeft Kjinja dän Rot: “Jehorcht en aules june Elren” (läs Kolossa 3:20). Wan de Kjinja äare Elren respakjten un jehuarsom sent, dan freit Jehova sikj un äare Elren uk (Spricha 23:22-25). Jesus wia een goodet Väabilt: Hee jehorcht un respakjt siene Elren, wan dee uk onvolkomen wieren un hee volkomen (Lukas 2:51-52).
3. Woo kjenn jie aus Famielje Gott noda komen?
Wan jie Kjinja haben, dan well jie secha, daut dee Jehova krakjt soo sea leewen aus jie. Woo kjenn jie daut soo wiet kjrieen? Wan jie daut doonen, waut de Schreft sajcht: “Schoapt june Kjinja opp met dee [met Jehova siene Wieed], rät von dee, wan jie en jun Hus setten, un wan jie reisen, wan jie junt dol lajen, un wan jie oppstonen” (5. Mose 6:7). Oppschoapen meent, de Kjinja eene Sach emma wada to sajen, om dee waut bietobrinjen. Secha sent jie daut enjeworden, daut eena dee foaken dautselwje sajen mott, daut dee daut em Denkj hoolen. Dis Varsch meent, daut jie pinkjlich no Jeläajenheiten sieekjen toom de Kjinja von Jehova vetalen. De Famielje es daut sea toom gooden, jieda Wäakj toop de Schreft to studieren. Un wan jie nich Kjinja haben, dan es daut doawäajen goot, daut jie junt jieda Wäakj Tiet nämen toom de Schreft studieren.
DOLLA UNJASTONEN
Unjasto die mol dän Rot, waut de Famielje halpen kaun, daut dee sikj schaftich un secha feelt.
4. Trakjt june Kjinja met Leew opp
Kjinja opptrakjen kaun noch waut opp sikj haben. Woo kaun de Schreft eenem halpen? Läst Jakobus 1:19-20 un dan got toop dise Froagen derch:
-
Woo kjennen Elren Leew wiesen, wan dee met äare Kjinja räden?
-
Woosoo sellen Elren äare Kjinja kjeenmol dan trajchtwiesen, wan see jroz doll sent? a
5. Beschizt june Kjinja
Toom june Kjinja beschitzen, es daut sea wichtich, daut jie met jieda Kjint von Sex räden. Veleicht felt junt daut schwoa, von soont to räden. Kjikjt daut VIDEO un dan got toop de Froagen derch, waut hia aunjejäft sent.
-
Wuarom es daut fa eenje Elren schwoa, met äare Kjinja von Sex to räden?
-
Woo haben eenje Elren äare Kjinja daut kunt utlajen?
Krakjt soo aus verutjesajcht es, woat dän Soton siene Welt emma schlajchta. Läst 2. Timotäus 3:1, 13 un dan got toop dise Froag derch:
-
Jewesse von de schlajchte Menschen, wua de Varsch 13 von rät, sent soone, waut Kjinja mesbrucken. Wuarom es daut no dit no soo wichtich, daut de Elren äare Kjinja äwa Sex lieren un woo de Kjinja sikj fa soone Menschen beschitzen kjennen?
Hast du daut jewist?
Jehova siene Zeijen haben een deel Help fa Elren, woo dee äare Kjinja kjennen von Sex lieren un woo see dee beschitzen kjennen, daut dee nich mesbrukt woaren. See biejlikj dise:
-
“Lieet june Kjinja von Sex” (Woat waka! Num. 5 2016)
6. Respakjt june Elren
De Kjinja un de Jugentliche kjennen äare Elren doaderch Respakjt wiesen, woo see to dee räden. Kjikjt daut VIDEO un dan got toop de Froagen derch, waut hia aunjejäft sent.
-
Wuarom es daut fa de junge Menschen goot, wan dee met Respakjt to äare Elren räden?
-
Woo kaun een junga Mensch wiesen, daut hee siene Elren ieet, wan hee met dee rät?
Läst Spricha 1:8 un dan got toop dise Froag derch:
-
Waut saul een junga Mensch doonen, wan siene Elren dän sajen, waut dee doonen saul?
7. Aus Famielje toop Jehova deenen
De Famieljes bie Jehova siene Zeijen nämen sikj jieda Wäakj de Tiet toom een Famieljenstudium haben. Woo kaun soon Studium sennen? Kjikjt daut VIDEO un dan got toop de Froagen derch, waut hia aunjejäft sent.
-
Woo kaun eene Famielje pinkjlich äa Famieljenstudium haben?
-
Woo kjennen Elren daut Famieljenstudium scheen un intressaunt moaken? (See daut Bilt aum Aunfank von dit Kapitel.)
-
Waut kunn daut bie junt schwoa moaken, toop to studieren?
Von daut ieeschtemmasche Israel velangd Jehova, daut de Famieljes sullen pinkjlich toop äwa de Schreft räden. Läst 5. Mose 6:6-7 un dan got toop dise Froag derch:
-
Woo kjenn jie disen Rot nokomen?
Iedeeen fa daut Famieljenstudium:
-
Doot fa een Toopkomen väastudieren.
-
Läst un rät äwa eene biblische Jeschicht, waut de Famielje jleicht.
-
Wan jie Kjinja haben, dan doot junt von jw.org fa de Kjinja Oabeitsbläda raufloden ooda utdrekjen.
-
Wan jie Jugentliche tus haben, dan rät äwa eenen Artikjel von jw.org, waut fa Jugentliche es.
-
Spält eene biblische Jeschicht met june Kjinja no.
-
Kjikjt een Video von jw.org un rät toop doaräwa.
WAUT EENJE SAJEN: “Kjinja motten nich aules weeten, waut enne Schreft es.”
-
Waut wurscht du dan sajen?
KAPITEL TOOPJEFOT
Jehova well haben, daut de Elren äare Kjinja sellen leewen, belieren un beschitzen. Hee well, daut de Kjinja de Elren respakjten un jehorchen un daut de Famieljes am toop deenen.
Waut hast du jelieet?
-
Woo kjennen Elren äare Kjinja belieren un beschitzen?
-
Woo kjennen de Kjinja wiesen, daut see äare Elren ieren?
-
Woo kjemt de Famielje daut togood, wan dee sikj jieda Wäakj Tiet nämen toom toop studieren?
MEA NOSIEEKJEN
Waut vonne Sachen kaun eena de Kjinja bie kjlien lieren, waut dee bie groot woat halpen?
“Sas Sachen, waut Kjinja lieren motten” (Woat waka! Num. 2 2019)
De Schreft jeft gooden Rot fa dee, waut äare Elren besorjen.
“Waut sajcht Gott äwa Elren besorjen, waut aul ella sent?” (Artikjel opp jw.org)
See mol, woo een Maun kunn een feina Voda woaren, wan hee ieeschtlich uk nich wist, woo hee Kjinja opptrakjen sull.
Derch Jehova siene Belierunk kunn wie onse Kjinja opptrakjen (5:58)
Unjasto die daut, woo Vodasch kjennen jratre Frind woaren met äare Säns.
“Woo kjennen Vodasch met äare Säns veeent bliewen?” (De Woaktorm, 1. Nowamba 2011)
a Wan de Schreft von belieren ooda trajchtwiesen rät, dan meent daut, de Kjinja to lieren, daut dee rajcht denkjen un sikj fein oppstalen. Daut meent kjeenmol, dee hunjsch ooda groff to behaundlen (Spricha 4:1).
Veleicht jleichst du uk dit
WAUT FOAKEN JEFROACHT WOAT
Woo es een Bibelstudium met Jehova siene Zeijen?
Wan Jehova siene Zeijen emsonst met die de Bibel studieren, dan kaust du soone Bibel brucken, aus du west. Doa kaun diene gaunze Famielje met bie sennen un uk Frind, wan du dee enloden west.
