LESON 50
Wat Nao Iu Savve Duim for Famili blo Iu Hapi?—Part 2
Pikinini hem present from Jehovah. Hem expectim parents for lukaftarem gud pikinini. Jehovah givim olketa wise advaes wea savve helpem parents for duim datwan. Advaes hia savve helpem tu olketa pikinini for savve wat olketa bae duim for mekem famili hapi.
1. Wat nao advaes wea Jehovah givim for parents?
Jehovah laekem parents for lovem olketa pikinini and spendem taem witim olketa. Hem laekem tu for parents protectim olketa pikinini and followim Bible principle for trainim olketa. (Provebs 1:8) Jehovah talem olketa dadi for ‘lukaftarem gud olketa pikinini long wei for trainim olketa followim samting wea hem talem.’ (Readim Ephesus 6:4.) Jehovah hapi taem parents followim advaes blo hem for lukaftarem olketa pikinini and no givim datfala responsibility lo eniwan.
2. Wat nao advaes wea Jehovah givim for olketa pikinini?
Jehovah talem olketa pikinini for “evritaem obeyim dadi and mami.” (Readim Colossae 3:20.) Taem pikinini respectim and obeyim parents, datwan mekem Jehovah hapi and parents tu. (Provebs 23:22-25) Jesus showim gud example taem hem pikinini. Nomata hem perfect, hem obeyim and respectim parents blo hem.—Luke 2:51, 52.
3. Wat nao parents savve duim for famili fren gud witim God?
Olketa parents laekem pikinini for lovem and worshipim Jehovah tu. Hao nao parents savve helpem pikinini for duim datwan? Hem nao for followim wat Bible talem wea sei: “Oltaem, yufala mas tisim [toktok blo Jehovah] long olketa pikinini blong yufala. Taem yufala stap long haos, o yufala gohed fo wakabaot, . . . yufala mas tokabaotem olketa samting ya.” (Diutronomi 6:7) Datfala toktok ‘oltaem tisim’ hem minim for repeatim samting. Iufala parents savve finis for pikinini rememberim samting, iufala mas repeatim lo hem. Disfala scripture helpem iu for luksavve iu mas iusim evri chance wea iu garem for story abaotem Jehovah lo pikinini. Hem important for markem taem each week for duim famili worship. Sapos iu no garem pikinini, bae iu still kasem gud samting if iu markem taem each week for studyim Bible.
DIG GO MOA
Bae iumi storyim samfala samting wea evriwan lo famili savve duim for stap gud and hapi.
4. Love nao shud mekem iu for trainim pikinini
Hem no isi for trainim pikinini. Hao nao Bible savve helpem iu? Readim James 1:19, 20, then discussim tugeta olketa kwestin hia:
-
Hao nao parents savve showim olketa lovem pikinini taem olketa story lo hem?
-
Why nao parents shud no teachim pikinini taem olketa kros? a
5. Protectim pikinini blo iu
For protectim pikinini, hem important tumas for iu story lo hem abaotem sex. Maet hem no isi for duim datwan. Pleim VIDEO, then discussim tugeta olketa kwestin hia.
-
Why nao samfala parents faendem hem no isi for story abaotem sex lo pikinini?
-
Wat nao samfala samting wea parents duim mekem olketa savve storyim sex lo pikinini?
Bible talem finis hao world blo Satan hem nogud tumas. Readim 2 Timothy 3:1, 13, then discussim tugeta disfala kwestin:
-
Samfala nogud pipol wea verse 13 storyim olketa abusim pikinini. So why nao hem important for parents teachim pikinini abaotem sex, and hao for protectim hemseleva from olketa nogud man hia?
Maet iu laek savve
Olketa Jehovah’s Witness garem staka pablikeson wea savve helpem parents for teachim pikinini abaotem sex, and hao for protectim hem from olketa man wea laek abusim hem. For example, lukim:
-
Protectim Pikinini Bilong Iu (video)
-
“Teachim Pikinini blo Iu Abaotem Sex” (Awake! No. 5 2016)
6. Respectim parents
Olketa pikinini and teenager showim olketa respectim parents lo hao olketa story. Pleim VIDEO, then discussim tugeta olketa kwestin hia.
-
Why nao hem important for pikinini or teenager showim respect taem hem story witim parents?
-
Wat nao wanfala young wan savve duim for showim respect taem hem story witim parents?
Readim Provebs 1:8, then discussim tugeta disfala kwestin:
-
Wat nao wanfala young wan shud duim taem parents talem hem wanem for duim?
7. Markem taem for famili worship
Olketa Jehovah’s Witness famili markem taem each week for duim famili worship. Wat nao olketa savve duim lo famili worship? Pleim VIDEO, then discussim tugeta olketa kwestin hia.
-
Wat nao famili savve duim for garem famili worship evri week?
-
Wat nao parents savve duim for evriwan enjoyim famili worship?—Lukim piksa lo start blo disfala leson.
-
Wat nao maet mekem hem hard for iu duim famili worship?
Lo Israel bifor, Jehovah expectim olketa famili for markem taem for storyim olketa Holy Raeting. Readim Diutronomi 6:6, 7, then discussim tugeta disfala kwestin:
-
Hao nao iu savve followim disfala principle?
Olketa Idea for famili worship:
-
Prepare for olketa meeting.
-
Readim and discussim tugeta wanfala story lo Bible wea famili bae enjoyim.
-
If iu garem smol pikinini, daonlodim or printim activity from “Samting for Olketa Pikinini Duim” lo jw.org.
-
If iu garem teenager, discussim tugeta eni article for olketa teenager lo jw.org.
-
Evriwan actim wanfala story lo Bible.
-
Watchim and discussim tugeta eni video lo jw.org.
SAMFALA SAVVE TALEM: “Mifala busy tumas for waka, so mifala no garem taem for teachim pikinini abaotem Bible.”
-
Wat nao bae iu talem?
MAIN POINT
Jehovah laekem parents for lovem, trainim, and protectim olketa pikinini. Hem laekem olketa for respectim and obeyim parents. And tu, for famili worshipim hem tugeta.
Review
-
Hao nao parents savve trainim and protectim pikinini?
-
Wat nao pikinini savve duim for respectim parents?
-
If famili markem taem each week for duim famili worship, hao nao datwan helpem olketa?
FAENDAOT MOA
Wat nao olketa leson iu savve teachim lo pikinini for helpem hem taem hem big?
“Sixfala Important Leson for Teachim Pikinini” (Wekap! No. 2 2019)
Read abaotem olketa advaes lo Bible for olketa wea lukaftarem parents wea olo.
“Wanem Nao Bible Talem Abaotem Wei for Lukaftarem Parents wea Olo?” (Article lo jw.org)
Lukim video abaotem wanfala dadi wea bifor hem no savve hao for trainim pikinini bat hem win for duim datwan.
Read abaotem wat dadi savve duim for fren gud witim son blo hem.
“Wanem Nao Savve Helpem Dadi Fren Gud Witim Son?” (Wastaoa, January 1, 2012)
a Lo Bible, datfala word “tising” hem minim for lukaftarem and stretem pikinini taem hem duim samting wea no stret. Hem no minim for raf lo olketa pikinini.—Provebs 4:1.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
