LECCIÓN 50
¿Chajariik ne nabʼan reh chi ne inwihʼik suqkiil kʼuxliis pan afamilia? (reʼ rukabʼ)
Reʼ taqeh halakʼun kooch taqeh iruyeew i Jehová. Eh reʼ Jehová iraaj chi reʼ taqeh ajabʼees ne inkikʼax i kooch wilih, eh ruum aj reʼ iruyeew kinaʼojbʼal reh nikʼwach rubʼanariik. Eh iruyeew woʼ kinaʼojbʼal taqeh halakʼun reh chi suq kikʼux pan familia.
1. ¿Chajariik taqeh naʼojbʼal iruyeew i Jehová keh taqeh ajabʼees?
Reʼ Jehová iraaj chi reʼ taqeh ajabʼees eh taqeh tutbʼees ne inkaaj wach i kihalakʼuun, ne inkisaj kiqʼiij reh wihʼik kuukʼ eh iraaj woʼ chi ne kikoʼljiik chuwach taqeh kʼaxkilal ne inchalik eh chi ne kikʼuhbʼaljik ruukʼ taqeh naʼojbʼal inkitijej pan Santo Laj Huuj (Proverbios 1:8). Ruum aj reʼ i Dios iruqʼor keh taqeh kʼamal bʼeeh pan familia: «Maʼ akanaaʼ laʼ taq kikʼihsjiik [...] ruukʼ taqeh naʼojbʼal iruyeew i Jehová» (chawil Efesios 6:4, TNM). Reʼ Jehová imponik chuwach chi reʼ taqeh ajabʼees inkikoj pan ruman taqeh runaʼojbʼal noq inkikʼihsaj i kihalakʼuun eh noq maʼ inkiyeew ta qʼabʼ chi tokoom ne inkʼihsanik reh i kihalakʼuun.
2. ¿Chajariik taqeh naʼojbʼal iruyeew i Jehová keh taqeh halakʼun?
Reʼ Jehová iruqʼor keh taqeh halakʼun «juneliik chanimaj taq atuut awajaaw» (chawil Colosenses 3:20, TNM). Mi jenoʼ halakʼun iruyeew kiloqʼil taqeh rajaaw eh irunimaj taqeh ne irusuqbʼisaj kikʼux eh ne woʼ irusuqbʼisaj rukʼux i Jehová (Proverbios 23:22-25). Reʼ Jesús holohik i ehtalil xukanaaʼ noq kʼisiin, atoobʼ ta manlik naq wach i rukʼachariik irunimaj naq taqeh rajaaw eh iruyeew naq kiloqʼil, atoobʼ ta reʼ keh maʼ manlik ta naq kiwach (Lucas 2:51, 52).
3. ¿Chajariik nakibʼanam taqeh familia reh chi kow i kamigohiil ruukʼ i Jehová?
Mi wilik ahalakʼun mareh inawaaj chi ne inkikʼax i Jehová jeʼ rukabʼ inakʼax i hat. ¿Nikʼwach ne nabʼan reh chi ne inkikʼax i Jehová? Noq ne inakʼam naah i naʼojbʼal wilih reh i Santo Laj Huuj: «Kʼih pech taq naa achʼobʼom rubʼehel [taqeh ruqʼorbʼal i Jehová] keh awakʼuun awixqʼuun noq wilkaat taq panapaat, noq bʼehik taq i naʼ aʼn» (Deuteronomio 6:7). Ruchʼobʼariik rubʼehel iraaj ruqʼorom rukʼuhtjiik kʼih pech jenoʼ naʼojbʼal. Mareh i hat awehtʼal, chi kʼih pech inaqʼor jenoʼ naʼojbʼal keh ahalakʼuun reh chi ne inkʼulik pan kikʼux. Jeʼ reʼ noq reʼ texto wilih iraaj ruqʼorom chi reʼ hat naʼasikʼim ajunkʼaam reh qʼorik chi riij i Jehová kuukʼ ahalakʼuun. Eh qʼeʼ woʼ atoobʼ chi reʼ afamilia ne irusikʼ jenoʼ qʼiij rajlaal xamaano reh ruloqʼjiik wach i Jehová reh tijinik chi riij i Santo Laj Huuj pan chuʼnchel. Eh atoobʼ ta maʼxta ahalakʼuun, reʼ tijinik chi riij i ruqʼorbʼal i Dios chawutkeel rajlaal xamaano ne tirutobʼeej.
CHATZʼIR RIIJ I KʼAHCHIʼ ATIJEM
Qatzʼir riij juʼjun taqeh naʼojbʼal ne inkamanik keh i familia reh chi suq kikʼux eh chi ne inkikʼraaj chi maʼ pan yohbʼaal ta wilkeebʼ.
4. Ruukʼ kʼaxooj chakʼuhbʼalej taqeh ahalakʼuun
Rukʼuhbʼaljiik ahalakʼuun mareh ne nakʼaxkileej. ¿Nikʼwach ne tirutobʼeej i Santo Laj Huuj? Chawil taq i Santiago 1:19, 20 eh tiqʼoroq taq chi riij:
-
¿Nikʼwach ne inkikʼuhtaaj i kikʼaxooj taqeh ajabʼees noq kiqʼorik ruukʼ i kihalakʼuun?
-
¿Chaaj woʼ reet maʼ ne ta irubʼan chi jenoʼ ajabʼees ne irukʼuhbʼaleej taqeh ruhalakʼuun noq kʼaah irubʼan? a
5. Chakoʼleej taqeh ahalakʼuun
Reh chi ne inakoʼleej taqeh ahalakʼuun ko ruman chi naʼaqʼoriik kuukʼ chi kijuʼjunaal chi riij i yohkik ruukʼ jenoʼ kʼachareel. Korik, mareh qʼorik chi riij i wilih maʼ suq ta ne irubʼan aweh. Chawil taq i VIDEO eh tiqʼoroq taq chi riij:
-
¿Chaaj woʼ reet kʼaxik naq chi keh taqeh ajabʼees qʼorik ruukʼ taqeh kihalakʼuun chi riij i yohkik ruukʼ jenoʼ kʼachareel?
-
¿Chajariik xtoobʼinik keh juʼjun taqeh ajabʼees reh qʼorik ruukʼ taqeh kihalakʼuun chi riij i wilih?
Jeʼ rukabʼ qʼorooj cho rubʼiral, reʼ wach akʼal wilih ahaʼ wiiʼ intaqʼanik i ajYahm xa chʼuwaʼ chik wach. Chawil taq i 2 Timoteo 3:1, 13 eh tiqʼoroq taq chi riij:
-
Juʼjun taqeh kʼachareel reʼ maʼ holohik ta i kibʼanooj reʼ inqʼorik chi riij i versículo 13 inkichop taqeh halakʼun. Jeʼ reʼ noq, ¿chaaj woʼ reet ko ruman chi reʼ taqeh ajabʼees ne inkikʼuhbʼaleej i kihalakʼuun chi riij i yohkik ruukʼ jenoʼ kʼachareel? ¿Eh chajariik nakibʼanam taqeh ajabʼees, reh chi maʼ ne ta inchoparik i kihalakʼuun?
¿Mi awehtʼal naq?
Reʼ taqeh testigo reh Jehová wilik kʼih kikamambʼal reh chi reʼ taqeh ajabʼees ne inkikʼuhbʼaleej i kihalakʼuun chi riij i yohkik ruukʼ jenoʼ kʼachareel eh jeʼ reʼ ne kikoʼljik chuwach taqeh ajchopol halakʼun. Wilih taqeh juʼjun:
-
Chachaʼjeej taqeh ahalakʼuun (video)
-
«Nikʼwach i qʼorik naʼabʼanam ruukʼ ahalakʼuun chi riij i yohkik ruukʼ jenoʼ kʼachareel» (¡Despertad!, núm. 5 reh 2016)
6. Chayeew ruloqʼil atuut awajaaw
Reʼ taqeh halakʼun eh taqeh kʼijool nakiyeʼem ruloqʼil i kituut kajaaw eh reʼ loqʼil wilih narukʼutiniik ruukʼ nikʼwach inkiqʼoreej i kituut kajaaw. Chawil taq i VIDEO eh tiqʼoroq taq chi riij:
-
¿Chaaj woʼ reet atoobʼ chi jenoʼ kʼijool ne iruqʼoreej taqeh pan rukorkiil i rutuut rajaaw?
-
¿Chajariik ne intooʼbʼinik reh jenoʼ kʼijool reh chi ne ruqʼoreej taqeh pan rukorkiil i rutuut rajaaw?
Chawil taq i Proverbios 1:8 eh tiqʼoroq taq chi riij:
-
¿Chajariik naq ne irubʼan jenoʼ kʼijool noq inqʼorarik reh ruum taqeh rajaaw i narubʼanam?
7. Chaloqʼej taq i Jehová pan familia
Reʼ taqeh testigo reh Jehová inkisaj kiqʼiij rajlaal xamaano reh ruloqʼjiik wach i Dios pan familia. ¿Eh nikʼwach i loqʼinik pan familia? Chawil taq i VIDEO eh tiqʼoroq taq chi riij:
-
¿Chajariik ne intoobʼinik aweh reh chi ne nabʼan aloqʼinik pan familia rajlaal xamaano?
-
¿Chajariik ne inkibʼan taqeh ajabʼees reh chi reʼ kiloqʼinik pan familia holohik eh chi wilik i ne inkitijej eh ne inkisuqkileej? (Chawil taq i ehtalil reʼ intohqʼik wiiʼ i tijinik wilih).
-
Raaj i hat, ¿inakapaaj na chi wilik i ne inqatwik aweh reh tijinik pan afamilia? ¿Ahaʼ wilik inaqʼor i hat chi ne tiruqʼat?
Najtir cho qʼiij, reʼ Jehová iraaj naq chi reʼ taqeh familia israelita ne naq kiqʼorik chi riij i ruqʼorbʼal pan kipaat. Chawil taq i Deuteronomio 6:6, 7 eh tiqʼoroq taq chi riij:
-
¿Nikʼwach naq ne nakʼam naah i naʼojbʼal wilih?
Juʼjun naʼojbʼal reh chi ne nabʼan aloqʼinik pan afamilia:
-
Chatijej taq awiibʼ reh i na taq awilom pan moloj iibʼ reh i molaabʼ.
-
Pan aloqʼinik ruukʼ afamilia, chawil taq wach eh tiqʼoroq taq chi riij jenoʼ ehtalil xponik taq chawach reh i Santo Laj Huuj.
-
Mi wilik ahalakʼuun kokʼ taq, chaqahsaj oon chawisaj chi huuj jenoʼ kamanik reh taqeh halakʼun reh jw.org.
-
Mi wilik taqeh akʼijool, chachih jenoʼ naʼojbʼal ahaʼ wiiʼ iruqʼor reʼ taqeh kʼijool, reh jw.org.
-
Chasikʼ taq jenoʼ ehtalil pan Santo Laj Huuj eh chayeew taq rukʼachariik.
-
Chawil taq eh tiqʼoroq taq chi riij jenoʼ video reh jw.org.
REʼ INKIQʼOR I JUʼJUN: «Reʼ taqeh nuhalakʼuun, ko kʼisiin taqeh reh chi ne inkireq chi riij i Santo Laj Huuj».
-
¿Chajariik inaqʼor i hat?
KʼOLOQ PAN AKʼUX
Reʼ Jehová iraaj chi reʼ taqeh ajabʼees ne inkaaj wach i kihalakʼuun, ne inkikʼuhbʼaleej eh ne inkikoʼleej. Iraaj woʼ chi reʼ taqeh halakʼun ne inkiyeew ruloqʼil i kituut kajaaw eh ne inkinimaj eh chi chuʼnchel i wilkeebʼ pan familia ne inkiyeew ruloqʼil i Jehová.
Reʼ xkahnik pan akʼux
-
¿Nikʼwach ne inkibʼan taqeh ajabʼees reh rukʼuhbʼaljiik eh rukoʼljiik i kihalakʼuun?
-
¿Nikʼwach ne inkikʼuhtaaj taqeh halakʼun chi inkiyeew ruloqʼil i kituut kajaaw?
-
¿Ahaʼ wilik taqeh kooch inchalik noq reʼ taqeh ajabʼees inkisaj kiqʼiij rajlaal xamaano reh ruloqʼjiik i Dios pan familia?
CHAREQ RUMAN
¿Chajariik chi naʼojbʼal ko ruman chi ne inkitijej taqeh halakʼun eh ne inkamanik keh pan kikʼachariik?
«Waqiibʼ chi naʼojbʼal ko ruman chi ne inkitijej taqeh halakʼun» (¡Despertad!, núm. 2 reh 2019)
Chawil juʼjun naʼojbʼal ne intoobʼinik keh taqeh inkichaʼjeej i kituut kajaaw nim kihabʼul.
Chawil chi riij jenaj winaq maʼ inchol ta naq rukʼihsjiik taqeh ruhalakʼuun, xchol kikʼihsjiik.
Reʼ Jehová xukʼuhtaaj qeh rukʼuhbʼaljiik taqeh qahalakʼuun (5:58)
Chanabʼeej nikʼwach jenoʼ ajabʼees ne irukʼam riibʼ chi korik ruukʼ taqeh ruhalakʼuun.
a Noq reʼ Santo Laj Huuj inqʼorik chi riij i ruqʼilariik taqeh halakʼun iraaj ruqʼorom chi kʼahchiʼ rukojariik kinaʼojbʼal reh chi ne kikʼachariik pan rukorkiil. Maʼ iraaj ta ruqʼorom chi naruqʼojariik chi maʼxta rubʼehel oon narubʼajariik i halakʼun (Proverbios 4:1).
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
