LISON 50
Kuma ku bu familia pudi sedu filis? — Parti 2
Fijus i un prenda di Jeova. I na spera pa papes kuida ben des prenda. Jeova da bon konsijus ku pudi juda papes pa fasi kila. Si konsijus mostra tambi ke ku fijus dibi di fasi pa juda pa familia sedu filis.
1. Kal konsijus ku Jeova da pa papes?
Jeova misti pa papes ama se fijus, i pa e sforsa na pasa mas tempu ku se fijus. I misti tambi pa papes proteẑi se fijus kontra kusas ku ka bali i usa prinsipius di Biblia pa trena elis. (Ditus 1:8) I fala papes: “Bo kria elis [ku sedu se fijus] na . . . nsinamentu di Siñor.” (Lei Efésius 6:4.) Jeova ta kontenti ora ku papes sigi si orientason ora ke na kria se fijus, sin da utru algin ki responsabilidadi.
2. Kal konsiju ku Jeova da pa fijus?
Jeova fala fijus: “Bo obdisi bo pape ku bo mame”. (Lei Kolosensis 3:20.) Ora ku fijus rispita se pape ku se mame, e ta pui Jeova kontenti i papes tambi ta kontenti. (Ditus 23:22-25) Jesus disa un bon izemplu oca ki seduba mininu. Mesmu manera ki sedu perfeitu, i obdisi i rispita si papes. — Lukas 2:51, 52.
3. Kuma ku bu familia pudi pertusi mas di Deus?
Si bu sedu pape o mame, sin duvida bu na misti pa bu fijus ama Jeova ciu suma bo. Kuma ku bu pudi yangasa es objetivu? I ora ku bu na fasi ke ku Biblia fala: “Nsina elis [ku sedu Palabra di Jeova] pa bu fijus, bu fala aserka delis ora ku bu sta sintadu na bu kasa, o bu na yanda na kamiñu”. (Ripitison di Lei 6:7) “Nsina” signifika ripiti un kusa manga di bias. Suma ku bu sibi, bu pirsisa di ripiti un kusa manga di bias pa bu fijus, asin pa e pudi lembra del. E testu misti mostra di kuma bu dibi di buska sempri opurtunidadi di ba ta papia ku bu fijus aserka di Jeova. I na sedu bon pa ba ta ranja tempu kada semana pa adora Jeova juntu suma familia. Si bu ka tene fijus, i na sedu bon tira tempu kada semana pa ba ta studa Palabra di Deus.
APRINDI MAS
Jubi konsijus pratiku ku pudi juda tudu na familia pa e sta suguru i vivi filis.
4. Trena bu fijus ku amor
Trena un fiju pudi sedu un disafiu garandi. Kuma ku Biblia pudi judau? Lei Tiagu 1:19, 20, dipus bo kombersa aserka des purguntas:
-
Kuma ku papes pudi mostra amor ora ke na kombersa ku se fijus?
-
Ke ku manda papes nunka ka dibi di disiplina se fijus ora ke sta ku raiba? a
5. Proteẑi bu fijus
Pa pudi proteẑi bu fijus, i importanti dimas pa papia ku kada un delis aserka di seksu. Bu pudi ka sta avontadi pa fasi kila. Mostra VIDEO, dipus bo kombersa aserka des purguntas:
-
Ke ku manda pa alguns papes i ta difisil papia ku se fijus aserka di seksu?
-
Di kal manera ku alguns papes ta papia ku se fijus aserka di seksu?
Suma ku Biblia mostraba ja, mundu di Satanas sta na torna kada bias mas pior. Lei 2 Timótiu 3:1, 13, dipus bo kombersa aserka des purgunta:
-
Alguns jintis mau ku faladu del na versikulu 13 ta abusa di mininus seksualmenti. Pa kila, pabia ki importanti papes sina se fijus aserka di seksu i mostra elis kuma ke pudi proteẑi kontra kilis ku misti abusa delis?
Sera ki bu sibiba kuma?
Tustumuñas di Jeova fasi manga di publikasons pa juda papes sina se fijus aserka di seksu i proteẑi elis kontra abusu seksual. Pur izemplu, jubi:
-
Proteẑi bu fijus (video)
-
“Kuma ku bu pudi papia ku bu fijus aserka di seksu” (No Korda! N.° 5 2016)
6. Rispita bu pape ku bu mame
Mininus ku jovens pudi mostra rispitu pa se papes na manera ke ta papia ku elis. Mostra VIDEO, dipus bo kombersa aserka des purguntas:
-
Pabia di ke ku manda i ta difisil pa un mininu o un joven papia ku rispitu pa si pape ku si mame?
-
Kuma ku un joven pudi papia ku rispitu ku si pape i ku si mame?
Lei Ditus 1:8, dipus bo kombersa aserka des purguntas:
-
Kuma ku un mininu o joven dibi di reaẑi ora ku si pape ku si mame dal orientason?
7. Bo adora Jeova juntu suma familia
Familias Tustumuñas di Jeova ta tira tempu kada semana pa adora Jeova juntu. Kuma ku es adorason na familia ta fasidu? Mostra VIDEO, dipus bo kombersa aserka des purguntas:
-
Kuma ku un familia pudi tene un programa di Adorason na Familia kada semana?
-
Ke ku pape ku mame pudi fasi pa torna se adorason na familia mas pratiku i animadu? — Jubi foto na kumsada des lison.
-
Ke ku manda i ta sedu difisil pa bo studa juntu na familia?
Na antigu Israel, Jeova ta misti pa familia papia sempri di si Palabra. Lei Ripitison di Lei 6:6, 7, dipus bo kombersa aserka des purgunta:
-
Kuma ku bu pudi aplika es prinsipiu?
Ideias pa adorason na familia:
-
Purpara pa runions di kongregason.
-
Bo lei i bo kombersa di un storia ku Biblia fala del ku bu familia na gosta del.
-
Si bu tene mininus pikininus, baŝa o mprimi atividadis pa mininus ku sta na jw.org.
-
Si bu tene fijus ku kirsi ja, papia ku elis di un artigu pa adolesentis ku sta na jw.org.
-
Fasi un tiatru basiadu na Biblia ku bu fijus.
-
Bo jubi video ku sta na jw.org i bo kombersa aserka del.
ALGUNS JINTIS TA FALA: “Biblia komplikadu dimas, mininus ka na pudi ntindil.”
-
Ke ku bu na falaba?
RUSUMU
Jeova misti pa papes ama, trena i proteẑi se fijus; pa fijus rispita i obdisi se papes; i pa familias adoral juntu.
Rekapitulason
-
Kuma ku papes pudi trena i proteẑi se fijus?
-
Kuma ku fijus pudi mostra rispitu pa se pape ku se mame?
-
Kal ku na sedu rusultadu si bo ta tira tempu kada semana pa adora Deus juntu suma familia?
TENE MAS INFORMASON
Kal lisons ku pudi purpara bu fijus ora ke bin kirsi?
“Seis Lisons ku Mininus Pirsisa di Aprindi” (No Korda! N.° 2 2019)
Jubi kuma ku un omi ku ka sibi kuma di kria fijus bin sedu un bon pape.
Jubi kuma ku papes pudi fortalisi se amizadi ku se fijus.
“Kuma ku papes pudi tene un relason forti ku se fijus?” (Sintinela di 1 di novembru di 2011)
