50 CAJ YACHACUY
¿Imanotaj familiacuna ali cawacärinman? (ishcay caj)
Wamracunaga Jehová goycalämashcanchi regalo japuymi caycan. Paycunata ali ashmanapäga Palabran Bibliacho Jehová achca mandätucuna churamushga. Quiquin wamracunapäpis ali consejucuna caycan.
1. ¿Tayta cajcuna ima ruranantataj Jehová munan?
Taytacunaga wamrancunata cuyapar imaycata rurapäcunantami y Biblia nishganno ima peligrupitapis chapänantami Diosga munan (Proverbios 1:8). Wamracunata ali ashmanapaj Biblia cayno niycan: “Tayta Diosninchipa shiminta wiyacunanpaj alli shimillayquipa piñacunquiman” (leiriy Efesios 6:4, Panao Biblia). Mayraj Jehová cushicun Palabran Bibliapita wamrancunata cutin cutin taytacuna parlapaptin; chayga tayta cajcunapa maquinchomi caycan.
2. ¿Wamra cajcuna ima ruranantataj Jehová munan?
Diosga wamracunata nin: “Mamayquita taytayquita rispitar wiyacuy” (leiriy Colosenses 3:20). Wamracunacush taytanta mamanta respetar cäsucunman, chauraga wasicho caycajcunaga cushicärengami; quiquin Jehovapis mayraj cushicunga (Proverbios 23:22-25). Jesusga yachaj y juchaynaj caycarpis taytancunataga respetaj y cäsucojmi (Lucas 2:51, 52).
3. ¿Imata rurartaj taytacuna wamracunapis Diospita raquicäringachu?
¿Wamrayquicuna caycanchu? Chayno captenga, mayraj munanqui wamrayquicuna Jehovata cuyar winapäcunanta. Yanapäshunquimi Biblia cayno wilacushgan: “Wamrayquicunata [Jehovapa Palabranpita] waran-waran yachachinqui. Willapar yachachinqui wasichöpis, nänicunachöpis” (Deuteronomio 6:7). Waran waran yachachinqui nerga manami juc ratula parlapar jaguiycunapächu niycan. Wamracunaga ima yachachishganchicunatapis gongangachu cutin cutin parlapaptinchirämi, ali tantiachiptinchirämi. Taytacunaga maypa aywarpis o maypita cutimurpis mayna wamrancunata parlapaycanna Jehovapita. Diosta adurapäcunanpaj tiemputapis mayna camacächiycanna; chay lapanga ¡cushicuypämi! Wamrayoj mana cajcunapis tiempuntaga shumaj camacächin mana gongaylapa Bibliapita yachacärinanpaj.
SHUMAJ YACHACURCUNAPAJ
Yachacushun familianchiwan imano ali cawacunapaj Biblia ima nishganpita.
4. Cuyapaylapa wamrayquicunata yachachiy
Wamracunata yachachinapaj sasa captinpis, Bibliaga yanapäshunquimi. Leipäcuy Santiago 1:19, 20 y caycunapita parlapacäriy:
-
¿Cuyacoj taytacunaga imanoparaj wamrancunata parlapanman?
-
¿Imanirtaj mana ali canman pasaypa rabiashga cashgan hora wamrancunata piñapaptin? a
5. Wamrayquicunata cuidayculay
Wamrancunata yachacherga alichi canman tayta cajcuna jucnin jucninta parlapaptin imanir y imayraj pipis majanwan punucunanpaj. VIDEUTA ricapäcuy y caycunapita parlapacäriy:
-
Imanir y imayraj pipis majanwan punucunanpaj, ¿imanirtaj taytacunapäga chaypita wamrancunata parlapänanpaj sasa canman?
-
¿Imataj waquin taytacunata yanapashga chaypita mana pengacuylapa wamrancunata parlapänanpaj?
Unayna Biblia wilacush canan wichan Diablupa munduncho luta ruraycunala cananpaj cajta. Leipäcuy 2 Timoteo 3:1, 13 y caypita parlapacäriy:
-
Biblia wilacushganno, fiyu runacunaga hasta wamracunatapis abusacärinmi. Chaymi, ¿imanirtaj taytacunaga wamrancunata parlapanman cuerpunta pipis mana yatapänanpaj? ¿Y imatataj ruranman abusacojcunapita cuidacärinanpaj?
¿Mayashcanquichu?
Tayta mamacunapäga achca publicaciuncunatami jorgushcanchi, wamrancunata yachachinanpaj sexualidäpita y abusacojcunapitapis imano cuidacärinanpaj. Caycuna caycan:
-
Aprendamos del Gran Maestro nishgan libro, capituluncuna 10 y 32
-
“Imanotaj sexupita wamrayquita parlapanquiman” (¡Ricchayna!, núm. 5 2016)
6. Taytayquicunata respetay
Wamracunapis mozucunapis respetanman taytancunata, imalatapis parlapaptenga respetulawanmi ruranman. VIDEUTA ricapäcuy y caycunapita parlapacäriy:
-
¿Imanirtaj wamrapis mozupis respetulawan taytancunata parlapanman?
-
¿Imacunata rurartaj pipis taytanta respetanman?
Leipäcuy Proverbios 1:8 y caypita parlapacäriy:
-
¿Imatataj jovincuna rurapäcunman imalatapis rurananpaj taytancuna mandaptin?
7. Familiayquiwan juntacarcur Diosta adurapäcuy
Jehovapa testiguncunaga mana gongaylapami tiempunta camacächin familianwan juntacarcur Diosta adurapäcunanpaj. ¿Imatataj chaycho rurapäcun? VIDEUTA ricapäcuy y caycunapita parlapacäriy:
-
Familianchiwan juntacarcur Diosta aduranapäga, ¿imanotaj alistacushwan ali yargunanpaj?
-
¿Imatataj taytacuna rurapäcunman Diosta adurapäcushgan hora cushi cushila lapancuna carcaycänanpaj? (Galanancho caycaj fotuta ricay).
-
Gamtaga, ¿imalapis michaycäshunquichu familiayquiwan juntacarcur Diosta aduranayquipaj? ¿Wilacamunquimanchuraj ima cashganta?
Unay wichanga Jehová munajmi israelitacuna familianwan Palabranta mana gongaylapa yachacärinanta. Leipäcuy Deuteronomio 6:6, 7 y caypita parlapacäriy:
-
¿Imanotaj gampis Biblia nishgannola ruranquiman?
Familianchiwan Diosta aduranapaj horacho imacunata ruranapaj:
-
Reuniunpaj preparacäriy.
-
Bibliacho ima wilacuylatapis leipäcuy y nircur familiayquiwan parlapacäriy.
-
Ichic wamrayquicuna captenga, jw.org paginapita jorgunayquipaj caycan ali yachachicuycuna.
-
Wamrayquicuna mozuna captenga, jw.org paginacho yanapacuycuna caycan.
-
Bibliapita ima actuaciunlatapis rurapäcuy.
-
Ima videulatapis ricapäcuy jw.org paginacho.
WAQUINCUNA NIPÄCUN: “Aruptinchiraj micuy caycan. Tiempö canchu wamräcunata Bibliapita parlapänäpaj”.
-
¿Chaynochu gampis yarpanqui?
ICHIC YACHACUY
Jehovaga munan taytacuna wamrancunata cuyananta, yachachinanta y cuidananta; jina munan wamracunapis taytancunata respetar cäsucärinanta. Diosninchega cushicunmi familianchiwan juntacarcur payta aduraptinchi.
Yarpänapaj
-
¿Imacunata rurartaj taytacunaga wamrancunapaj yarpachacur ali yachachinman?
-
¿Imanotaj wamracunapis taytancunata respetar cäsucärinman?
-
¿Imanoraj ima familiapis caycanga Diosta adurapäcunanpaj tiempuncunata shumaj camacächiptin?
MASLATA YACHACUNAYQUIPAJ
¿Imacunataj wamracunata yanapanman tiempuwanga ali runa cananpaj?
“Wamrayquicunapaj sojta yachacuycuna” (¡Ricchayna!, núm. 2 2019)
Caycho caycan ali consejucuna edayashgacunata täpajcunapaj.
“¿Ima nintaj Dios edayashga taytanchicunata cuidanapaj?” (jw.org paginapita yachachicuy)
Yachacuy imanotaj juc runa wamra ashmayta mana yachaycarpis, shumaj yachacur ali taytaman ticrargan.
Yachacuy imanotaj maygan taytapis wamranpa amigunman ticranman.
a Biblia “shumaj corriginqui” niptenga, cuyacuywan yachachinayquipämi niycan, mana fiyuparaj astanayquipärächu (Proverbios 19:18).
