50 KAQ YACHAKUNËKIPAQ

¿Imatan teytakunata y wamrakunata yanapanqa kushishqa kawakuyänampaq?

KICHË

Wamrakunaqa Jehoväpa qarëninmi kayan. Jehoväqa munan teytakuna wamrankunata cuidayänantam. Tsëmi Palabran Bibliachö consëjukunata qellqatsimushqa. Wamrakunatapis consejanmi familiachö yanapakuyänampaq, tsëta cäsukurmi kushishqa kawakuyanqa.

1 KAQ: ¿Imatataq Jehoväqa papäkunata y mamakunata mandan?

Jehoväqa munan teytakuna y mamakuna wamrankunata kuyayänanta, pëkunawan tiemputa pasayänanta, peligrukunapita cuidayänanta y Bibliachö këkaq consëjukunata yachatsiyänantam (Proverbius 1:8). Bibliachömi teytakunata kënö nin: “Jehovä munanqannö [wamrëkikunata] shumaq corregiyë y consejayë” (leyi Efesius 6:4). Jehoväqa alläpam kushikun Bibliachö ninqannölla wamrankunata yachatsiyaptin y cuidayaptin. Tsëtaqa kikinkunam rurayänan y manam jukkunapa makinchöqa dejayänantsu.

2 KAQ: ¿Ima nintan Jehovä wamrakunata?

Jehovämi wamrakunata kënö nin: “Papänikikunata llapanchö cäsukuyë” (leyi Colosensis 3:20). Tsëmi wamrakunaqa cäsukoq kar y respetakoq kar, papäninta, mamanta y Jehoväta kushitsiyan (Proverbius 23:22-25). Wamrakunaqa Jesuspitam yachakuyanman. Pëqa Diospa Tsurin këkarpis, papäninta y mamanintam cäsukurqan y respetarqanmi llapantsiknö jutsa ruraq kayaptimpis (Lücas 2:51, 52).

3 KAQ: ¿Imatataq familiakuna rurayänan Jehoväta mas kuyayänampaq?

Teytakuna, Jehovä Diosta qamkuna kuyayanqëkinö wamrëkikunapis kuyayänampaqqa, kë consëjutam cäsukuyänëki: “Mana qonqëpam wamrëkikunata yachatsiyänëki wayikikunachö këkar, nänikunapa purir, punukur y shärikurpis” (Deuteronomiu 6:7). Kë textuchö ninqannöpis, wamrakunaqa kutin kutin yachatsishqaran imatapis yarpäyan. Tsëmi Jehoväpita cada junaq wamrëkikunata yachatsiyänëkipaq kallpachakuyänëki. Semänachö familiëkiwan Diosta adorayänëkipaqmi tiemputa rakiyänëki. Tsëtaqa mana wamrayoq kaqkunapis rurayänanmi.

MASLLA YACHAKUSHUN

Familiakuna kushishqa kayänampaq imata rurayänampaq kaqtam yachakushun.

4 KAQ: Wamrëkikunata kuyëpa yachatsiyë

Wamrakunata yachatsiqa höraqa manam fäciltsu. Bibliachö consëjukunaqa, ¿imanöraq yanapashunkiman? Leyiyë Santiägu 1:19, 20 ima ninqanta y këkunapaq parlayë:

¿Imanötan papäkuna y mamakuna kuyakoq kayanman wamrankuna parlapäyanqan höra?
Cölerashqa kayanqan höraqa, ¿imanirtan papäkuna y mamakuna wamrankunata corregiyänantsu? a

5 KAQ: Wamrëkikunata alli cuidayë

Mana fäcil kaptimpis, warmiwan ollqu oqllanakuyanqan asuntupaq wamrëkikunata parlapäyë, tsëmi yanapanqa ima peligrupitapis cuidakuyänampaq. VIDEUTA rikäyë y këkunapaq parlayë:

VIDEU: ‘Mana alli kaqkunapita’ wamrantsikkunata cuidashun (2:58)

¿Imanirtan wakin papäkunapaq y mamakunapaqqa fäciltsu warmiwan ollqu oqllanakuyanqan asuntupaq wamrankunata parlapäyänan?
¿Imatan wakin papäkunata y mamakunataqa yanapashqa wamrankunata tsë asuntupaq parlapäyänampaq?

Bibliachö ninqannöpis, kanan witsanqa imëka mana allikunam kan. Leyiyë 2 Timoteu 3:1, 13 ima ninqanta y këpaq parlayë:

Versïculu 13 kaqchömi nin kanan witsanqa nunakuna alläpa mana alli kayanqanta. Tsëqa, ¿imanirtan papäkuna y mamakunaqa warmiwan ollqu oqllanakuyanqan asuntupaq wamrankunata parlapäyänan? Y ¿imatataq rurayänan mana alli nunakunapita cuidayänampaq?

¿Musyarqëkiku?

Warmiwan ollqu oqllanakuyanqan asuntupaq teytakuna wamrankunata shumaq parlapäyänampaq y cuidayänampaqmi Jehoväpa testïgunkunaqa atska videukunata y leyinapaq kaqkunata rurayämushqa. Wakinqa këkunam kayan:

Wamrëkikunata cuidayë (videu)
Alli Yachatsikoqpita yachakushun, 10 y 32 kaq yachakunapaq
“¿Imanötan wamrakunata parlapashwan warmiwan ollqu oqllanakuyanqampaq?” (¡Musyatsikoq!, 5 kaq 2016)

6 KAQ: Wamrakuna, papänikita y mamëkita respetar cäsukuyë

Wamrakuna y jövinkunaqa teytanta y mamanta respetarmi shumaq parlapäyänan. VIDEUTA rikäyë y këkunapaq parlayë:

VIDEU: ¿Imanötaq imatapis teytëkikunawan parlankiman? (2:19)

¿Imanirtan jövinkunaqa teytanta y mamanta respëtuwan parlapäyänan?
¿Imanötan jövinkunaqa teytanta y mamanta respetayanman?

Leyiyë Proverbius 1:8 ima ninqanta y këpaq parlayë:

¿Imanirtan jövinkunaqa teytan o maman ninqanta cäsukuyänan?

7 KAQ: Familiëkiwan juntu Jehoväta adorayë

Cada semäna Diosta adorayänampaqmi Jehoväpa testïgunkunaqa tiempunkunata patsätsiyan. ¿Imanötan rurayan? VIDEUTA rikäyë y këkunapaq parlayë:

VIDEU: Familiachö Diosta imanö adorayanqan: mana fäcil karpis yanapakunmi (8:04)

¿Imaraq familiakunata yanapanman cada semäna Diosta adorayänampaq?
¿Imataraq teytakuna rurayanman familiachö Diosta adorayanqan höra llapankuna kushishqa kayänampaq? (Qallananchö fötuta rikäyë).
Qampaqqa, ¿fäcilku familiëkiwan cada semäna Diospita yachakuyänëki?

Jehoväqa munarqan, wamrankunata israelïtakuna pëpita yachatsiyänantam. Leyiyë Deuteronomiu 6:6, 7 ima ninqanta y këpaq parlayë:

¿Imanötan këchö ninqanta rurankiman?

Familiachö Diosta adoranapaq:

Reunionkunapaq alli yachakuyë.
Familiëkita gustanqan kaq willakuyta Bibliachö leyiyë y imata yachakuyanqëkita parlayë.
Pishi wamrëkikuna kaptinqa, jw.org päginachö “Wamrakuna yachakuyänampaq” neqpita descargayë o imprimiyë.
Jövin wamrëkikuna kaptinqa, jövinkunapaq kaqta jw.org päginachö ashiyë.
Biblia willakunqan unë nunakuna rurayanqanta actuayë.
Jw.org päginachö videukunata rikäyë y imata yachakuyanqëkita parlayë.

WAKIN IMA NIYANQAN: “Wamrakuna Bibliapita yachakuyänampaqqa alläpa difïcilmi”.

¿Qamqa ima ninkitan?

KËTAM YACHAKURQUNKI

Jehoväqa munan papäkuna y mamakuna wamrankunata kuyayänanta, yachatsiyänanta y cuidayänantam. Tsënöllam munan wamrakuna papäninkunata y mamankunata cäsukuyänanta, respetayänanta y llapan familiakuna Pëta adorayänanta.