LECCIÓN 50
Cushi aillu charingahua ¿imara rurana angui? (parti 2)
Huahuauna Jehová Dios partimanda cuyashcaunami. Jehová munanmi yayauna huahuaunara ali cuirachu. Chiraigu ali camachishcaunara cun chita pactachingahua shinallara huahuaunamas camachishcaunara cun familiaguna cushi causanuchu.
1. ¿Ima camachishcaunara Jehová cun yayaunama?
Jehová Dios munanmi yayauna mamauna paiguna huahuaunara llaquinuchu paigunahua timpus pasanuchu. Ima tunu llaqui pasanamandas cuirachu munan, Biblia yachachishcasna yachachichu munan (Proverbios 1:8). Aillui uma ajcunara nin canguna huahuaunara ‘ali iñachichi [Jehová] shimira yachachisha’ (leai Efesios 6:4). Jehová Dios ali ricun yayauna pai camachishcaunara casusha huahuaunara iñachinuchu shinallara huahuaunara cuiranara mana shujcuna maquii saquinuchu.
2. ¿Ima camachishcaunara Jehová cun huahuaunama?
Jehová huahuaunara nin “canguna yayaunara uyaichi” nisha (leai Colosenses 3:20). Churi ushushiuna paiguna yayaunara casusha respetashas yayauna Jehová Diospas cushiyanunga (Proverbios 23:22-25). Jesús ali casuj Churi aca, ucha illaj ashas paihua yayauna uchayuj anujpis casuca, respetaca (Lucas 2:51, 52).
3. ¿Imara tucui ailluuna rurana ushanun Jehová Diospajma mas llutaringahua?
Huahuaunara charishaga paigunas can cuinta Jehová Diosta llaquichu munangui ¿manzhu? ¿Imasnara caita pactachina ushangui? Biblia camachishcara catisha: “Camba huahuaunara alira yachachina angui caigunamanda [Jehová shimiunamanda] rimana angui camba huasii tiaushcai, ñambira puriushcai” (Deuteronomio 6:7). Alira yachachina nisha nin yachachishcara cuti cuti rimasha intindichina ashcara. Chiraigu cai texto nin lugarda mascana angui caran punzha Jehovamanda camba huahuaunara yachachingaj. Astaumbas alimi intiru familia lugarda llucchichu caran semana pariju Bibliamanda estudiasha Jehová Diosta adurangahua. Huahuaunara mana charishas caran semana sapalla Bibliara estudiana canda yanapangami.
MAS YACHAI
Huaquin camachishcaunara ricushun familiagunara cuirangahua cushiyachingahuas.
4. Camba huahuaunara llaquihua yachachi
Huahuara ali iñachingaj shinzhi an. ¿Imasnara Biblia yanapana ushanga? Leaichi Santiago 1:19, 20, huasha catij tapuigunamanda rimaichi:
-
¿Imasnara yayauna paiguna huahuaunahua cuintanuushcai llaquinara ricuchina anun?
-
¿Imarasha mana ima huras yayauna libachina anun paiguna huahuaunahua piñarishca huras? a
5. Camba huahuaunara cuirai
Camba huahuaunara cuirangaj carihua huarmihua puñunamanda cuintana ministirishcami. Huaquimbi caimanda rimangahua shinzhi tucungami. VIDEORA ricuichi, huasha catij tapuigunamanda rimaichi:
-
¿Imarasha carihua huarmihua puñunamanda rimangaj yayaunaj shinzhi tucun paiguna huahuaunahua?
-
¿Imara huaquin yayaunara yanapashca paiguna huahuaunahua cai temamanda rimangahua?
Bibliai quillcashca shina Satanaspa mundu mas mas huajliriun. Leaichi 2 Timoteo 3:1, 13, huasha catij tapuimanda rimaichi:
-
Versículo 13 rimashca shina maican manali runaunas huahuaunara huajlichinun. Chiraigu ¿imarasha ministirishca an yayauna paiguna huahuaunara carihua huarmihua puñunamanda rimana? ¿Imara rurana ushanun huajlichij runaunamanda cuirangahua?
¿Yachanguichu?
Jehovahuaj testigoguna ashca quillcaunara videogunaras llucchinushca yayauna huahuaunara carihua huarmihua puñunamanda yachachingaj huajlichij runaunamandas cuirangaj. Cai anmi:
-
Canguna huahuaunara cuiraichi (video)
-
Aprendamos del Gran Maestro, capítulo 10 shinallara 32
-
“Huahuaunara carihua huarmihuas puñunamanda imasna rimana” (¡Despertad!, núm. 5 2016)
6. Camba yayaunara respetai
Huahuauna shunguyujcunas paiguna yayaunara respetana anun, paiguna respetashcara ricuchina anun paiguna rimanais. VIDEORA ricuichi, huasha catij tapuigunamanda rimaichi:
-
¿Imarasha ali an shu malta paihua yayaunahua respetuhua rimachu?
-
¿Imara rurasha shu malta paihua yayaunara respetura ricuchin?
Leaichi Proverbios 1:8, huasha catij tapuimanda rimaichi:
-
¿Imara rurana an shu malta paihua yayauna caita rai nijpi?
7. Familiahua Jehovara aduraichi
Jehovahuaj testigoguna caran semana lugarda llucchinun familiahua gunlla Jehovara adurangaj. ¿Imasnara familiahua Jehová Diosta aduranun? VIDEORA ricuichi, huasha catij tapuigunamanda rimaichi:
-
¿Imara yanapanga caran semana ailluhua aduranara mana saquingaj?
-
¿Imasnara yayauna familiahua aduranaunara gustu yachanalla rurana ushanun? (Punda fotora ricui).
-
¿Ima arcaiguna charishcangui familiahua pariju Diosta adurangaj?
Ñaupa huatauna Jehová munaca israelita ailluuna Diospa Shimimanda cuintanunuchu. Leaichi Deuteronomio 6:6, 7, huasha catij tapuimanda rimaichi:
-
¿Imasnara cai camachishcara can pactachina ushangui?
Familiahua adurangaj iyaiguna:
-
Tandarinaunai yachanara ñaupara estudiaichi.
-
Bibliai rimashca runaunamanda leasha cuintanunuichi.
-
Ichilla huahuaunara charishaga internetpi jw.org nishcai huahuaunara yachachingaj yanapaigunara llucchingui.
-
Shunguyujcunara charishaga internetpi jw.org nishcai shunguyujcunara yachachingaj yanapaigunara llucchingui.
-
Biblia cuintashcara pariju ricuchisha yachaichi.
-
JW.ORG puistui tiaj videogunara ricusha cuintanuichi.
RUNAUNA CASNA NINUJPI: “Bibliamanda yachangaj huahuaunaj shinzhimi”.
-
Can ¿imara iyangui?
IMARA YACHASHCANGUI
Jehová munanmi yayauna paiguna huahuaunara llaquinuchu, cuiranuchu, yachachinuchumbas shinallara huahuauna yayaunara respetanuchu, casunuchu, intiru familia gunlla paita aduranuchumbas munanmi.
Iyaringaj
-
¿Imasnara yayauna paiguna huahuaunara yachachisha cuirana anun?
-
¿Ima rashara huahuauna paiguna yayaunara respetanun?
-
¿Imasnara yanapan caran semana familiahua aduranara charina?
RICUNGUI
¿Maican temaguna camba churira puruntuchin shunguyashcai causangaj?
“6 temaguna shunguyashcai ali causangahua” (¡Despertad!, núm. 2 2019)
Rucuyashca yayaunara cuirangaj camachishcaunara leai.
“¿Imara Biblia nin rucuyashca yayaunara cuiranamanda?” (jw.org partii tiaj tema)
Shu runa paihua huahuaunara iñachinara mana yachashas imasna ali yaya tucushcara ricui.
Jehová Dios ñucanchi huahuaunara yachachingaj yachachica (5:58)
Imasna shu yaya paihua huahuaunahua amigo tucushcara leai.
a Bibliai libachina shimimanda rimasha intindichin ricuchisha ali yachachina, camachina, alira causangahua yanapanas. Cai mana nisha ninzhu yayauna chijnijhua o piñarishcahua huahuaunara huactanara (Proverbios 19:20).