LESON 50

In fami ereu (parti 2)

ÉKOUT AN

Bann zanfan lé in kado Jéova. Jéova i demann bann paran pran bien soin zot bann zanfan. Pou èd azot, Jéova i donn bann paran bann konsèy. Li di osi bann marmay sak zot i pe fé, pou ke zot fami lé ereu.

1. Kèl konsèy Jéova i donn pou bann paran ?

Jéova i ve ke bann paran i ièm zot zanfan é i pas le plus le tan posib èk banna. Li ve osi ke bann paran i protèj zot zanfan é ke zot i utiliz bann prinsip la Bib pou éduk banna (Provèrb 1:8). Li di èk bann papa : « Kontinué fé grandi azot dapré bann vérité biblik é bann zavèrtisman Jéova » (lir Éfézien 6:4). Jéova lé kontan kan bann paran i suiv konsèy la, é kan zot i donn pa pèrsonn le résponsabilité éduk zot marmay.

2. Kèl konsèy Jéova i donn pou bann zanfan ?

Jéova i demann bann zanfan : « Obéi zot bann paran » (lir Kolosien 3:20). Bann zanfan ki réspèk zot bann paran é ki obéi banna i fé plézir Jéova é osi zot bann paran (Provèrb 23:22-25). Jézu la donn in bon légzanp kan li lété marmay. Mèm si li lété parfé, li té obéi son bann paran é li té réspèk banna (Luk 2:51, 52).

3. Koman out fami i pe èt plu proch koté Bondieu ?

Si ou lé paran, lé sur ou ve ke out marmay i ièm Jéova, kom ou ièm Jéova. Koman ou pe èd out marmay ? Ala sak la Bib i di : « I fodra ke ou ansègn sa [bann parol Jéova] toultan out bann garson é ke ou koz ladsu kan ou sra asiz dan out kaz é kan ou va march dann chemin » (Detéronom 6:7). « Ansénié » i ve dir répèt in nafèr. Ou koné ke ou doi souvan répèt in nafèr out bann marmay pou ke zot i rapèl azot de sa. Donk vèrsé la i ve dir ke ou doi rod souvan bann zokazion, koz de Jéova èk out bann zanfan. Lé bien rézèrv le tan tou lé semèn pou étudié la Bib an fami—oubien out touseul, si ou la poin zanfan.

ALON APRANN PLUS

Alon voir sak tout domoun dan la fami i pe fé, pou èt ereu é an sékurité.

4. Éduk out bann marmay avèk amour

Éduk in zanfan lé pa toujour fasil. Koman la Bib i pe èd aou ? Lir Jak 1:19, 20 é koz su bann késtion la :

Koman bann paran i pe mont ke zot i ièm zot zanfan, kan zot i koz èk banna ?
Poukosa nou doi jamé korij a nout marmay èk la kolèr ?

5. Protèj out bann marmay

Pou protèj out bann marmay, lé inportan koz de séksualité èk chak marmay. Sa i pe petèt jèn anou. Gard le VIDÉO, é koz su bann késtion ki vien apré.

VIDÉO : Protèj nout bann zanfan kont « Sak lé mové » (2:58)

Poukosa detroi paran lé jéné koz de séksualité èk zot bann zanfan ?
Koman bann paran la fé, pou koz de séksualité èk zot bann zanfan ?

Kom bann profési té anons, le monn Satan i devien ankor plus méchan. Lir 2 Timoté 3:1, 13 é koz su késtion la :

Anparmi bann moun méchan ki trouv dan le vèrsé 13 néna bann zagréseur séksuèl. Donk poukosa lé inportan ke bann paran i koz de séksualité avèk zot bann marmay, é i ésplik banna koman protèj azot kont bann moun méchan la ?

Ou té koné sa ou ?

Bann Témoin Jéova i donn bann paran in bonpe zouti, pou èd azot koz de séksualité avèk zot bann zanfan é pou protèj bann marmay kont bann zagrésion. Ala detroi :

Protèj zot marmay (vidéo)
Écoute le grand Enseignant, chapit 10 é 32
« Parler de sexualité à son enfant » (Réveillez-vous ! n^o 5 2016)

6. Réspèk out bann paran

Bann zanfan é bann jeun i mont ke zot i réspèk zot bann paran par le fason zot i koz èk zot paran. Gard le VIDÉO, é koz su bann késtion ki vien apré.

VIDÉO : Koman koz èk mon bann paran ? (2:19)

Kèl lavantaj in jeun néna, kan li koz èk son bann paran avèk réspé ?
Koman in jeun i pe mont ke li onor son bann paran, kan li koz èk banna ?

Lir Provèrb 1:8 é koz su késtion la :

Koman in jeun i devré réaji, kan son bann paran i donn ali in konsèy ?

7. Ador Jéova an fami

Bann fami Témoin Jéova i prévoi in moman prési tou lé semèn pou zot ladorasion an fami. Kosa i éspas dan in ladorasion an fami ? Gard le VIDÉO, é koz su bann késtion ki vien apré.

VIDÉO : Ladorasion an fami : bann difikulté é bann joi (8:04)

Koman in fami i pe fé, pou fé zot ladorasion an fami tou lé semèn ?
Kosa in paran i pe fé pou rann ladorasion an fami util é gayar ? (gard le zimaj o débu le leson).
Kosa i pouré anpèch aou étudié an fami ?

Jéova té ve ke bann fami israélit té koz souvan su son Parol. Lir Detéronom 6:6, 7 é koz su késtion la :

Koman ou pe mèt an pratik prinsip la ?

Detroi zidé pou ladorasion an fami :

Prépar bann rénion.
Lir é koz su in zistoir dan la Bib.
Si ou néna bann ti marmay, télécharj oubien inprim bann zaktivité pou bann zanfan su jw.org.
Si ou néna bann jeun marmay, koz su bann zartik su jw.org pou bann jeun.
Joué inn ti piès téat su in zistoir dan la Bib.
Gard é koz su in vidéo su jw.org.

NADFOI DOMOUN I DI : « La Bib lé tro konpliké pou bann marmay. »

Kosa ou noré réponn ?

SAK NOU LA APRANN

Jéova i ve ke bann paran i ièm, i éduk, é i protèj zot bann marmay. Li ve osi ke bann zanfan i réspèk é i obéi zot bann paran, é ke tout la fami i ador ali ansanm.