XIDONDZRO 50
Xana Ndangu Waku Wu Nga Va Lowu Nyonxiki Hi Ndlela Yini?—Xiyenge 2
Vana i nyiko leyi pfaka ka Yehovha. A yimela leswaku vapswele va yi tamela hi ndlela leyinene nyiko leyi. Yehovha a nyika vapswele swilayu swa wutlhazri leswi nga va pfunaka ku yentxa leswo. Swilayu swake swi nga tlhela swi komba leswi a vana va nga swi yentxaka akuva ndangu wu va lowu nyonxiki.
1. He xini xilayu lexi Yehovha a xi nyikaka vapswele?
Yehovha a djula leswaku vapswele va zrandzra vanavu va tlhela va heta nkama wunyingi hi lani va nga kotaka ha kone na vone. Nakone a djula leswaku vapswele va sizrelela vanavu ka leswi nga va vavisaka ni ku va dondzrisa hi ku tizrisa Bibele. (Amaproverbia 1:8) A va byela leswi vapapayi: ‘Wundlani [vana venu] . . . hi madondzrisela ya Hosi [Yehovha].’ (Dondzra Ba-le-Efesa 6:4.) Yehovha awa nyonxa loko vapswele va landzra nkongomiso wake loko va li ku kuliseni ka vana a matsrhan’wini ya ku nyika mhunu mumbeni wutiyanguleli lebyi.
2. He xini xilayu lexi Yehovha a xi nyikaka vana?
Yehovha a va leleta leswi vana: ‘Yingisetani vapswele venu.’ (Dondzra Ba-le-Kolosa 3:20.) Loko vana va hlonipha ni ku yingiseta vapswele vavu, va nyonxisa Yehovha ni vapswele vavu. (Amaproverbia 23:22-25) Loko Yesu a ha li ntsrongwana, a beke xikombiso lexinene. Nambileswi a a hetisekile, a yingisete ni ku hlonipha vapswele vake.—Luka 2:51, 52.
3. Xana mi nga tsrhindzrekela hi ndlela yini ka Xikwembu Nkulukumba swanga ndangu?
Loko u li mupswali, a swi ganaganekisi leswaku u djula kuva vanaku va zrandzra Yehovha hi lani na wene u mu zrandzraka ha kone. Xana u nga dzri tlhaselisa kuyini kungu ledzri? Hi ku yentxa leswi Bibele dzri swi hlayaka: ‘U ta ma dondzrisa [mazritu ya Yehovha] vana vaku, u ta kanela ha wone a ku tsrhameni kwaku a ndlwini yaku, ni le ku fambeni kwaku a ndleleni.’ (Deuteronoma 6:7) Ku ‘dondzrisa’ swi hlaya ku byela mhunu ntxhumu wa kukazri hi ku phindaphinda. Swi nga yentxeka u swi tiva leswaku, akuva n’wanaku a dzrimuka ntxhumu wa kukazri swi djula u mu dondzrisa hi ku phindhaphindha. Tsralwa ledzri dzri tlhamuxela leswaku u fanela ku va minkama hinkwayu u djula mikhandlu ya ku bula ni n’wanaku ha Yehovha. I swinene kuva ndangu wu tibekela nkama vhiki ni vhiki akuva wu gandzrela Yehovha xikan’we. Nambi u nge na vana, u ta pfuneka loko u tibekela nkama vhiki ni vhiki akuva u dondzra Zritu dzra Xikwembu Nkulukumba.
KELISISA
Kambisisa swidzringanyeto leswi nga yentxaka ndangu wu nyonxa ni ku sizreleleka.
4. Dondzrisa vanaku hi lizrandzru
Ku dondzrisa n’wana swi nga ha kazrata. Bibele dzri nga ku pfunisa kuyini? Dondzrani Yakob 1:19, 20, mi gama mi bulisana hi swivutiso leswi:
-
Xana vapswele va nga kombisa lizrandzru loko va bula ni vanavu hi ndlela yini?
-
Ha yini mupswali a nga fanelanga a laya n’wana loko a hlundzrukile? a
5. Sizrelela vanaku
Akuva u sizrelela vanaku, i swa lisima ngopfu ku bula ni n’wana ha mun’wemun’we hi timhaka ta tinkuku. Swi nga ha voneka swi kazrata. Vonani VHIDIYU, mi gama mi bula hi swivutiso leswi landzrelaka.
-
Ha yini vapswele vambeni swi va kazratela ku bula ni vanavu hi timhaka ta tinkuku?
-
Vapswele vambeni va ti tlhamuxelisa kuyini timhaka ta tinkuku ka vanavu?
Hi lani swi profetiwiki ha kone, misava ya Sathana yi ya yi biha ngopfu swinene. Dondzrani 2 Timoteo 3:1, 13, mi gama mi bulisana hi xivutiso lexi:
-
Van’we ka lavamfani lava tlhamuxeliwaka ka ndzrimana 13, va pfinya vana. Hi ndlela leyo, ha yini swi li swa lisima kuva vapswele va dondzrisa vanavu mayelanu ni timhaka ta tinkuku ni ndlela ya ku tisizrelela ka vapfinyi va vana?
A wu swi tiva?
Timboni ta Yehovha ti humesa switizro swinyingi leswi pfunaka vapswele ku dondzrisa vanavu hi timhaka ta tinkuku ni ku va sizrelela ka ku pfinyiwa. Hi xikombiso, vona:
-
Sizrelela Vanaku (vhidiyu)
-
“Dondzrisa N’wanaku Hi Timhaka Ta Tinkuku” (Pfukani! No 5 2016)
6. Hlonipha vapswele vaku
Vana ni vampshwa va nga hlonipha vapswele vavu hi ndlela leyi va vulavulaka na vone ha yone. Vonani VHIDIYU, mi gama mi bulisana hi swivutiso leswi landzrelaka.
-
Ha yini swi pfuna kuva mumpshwa a bulisana ni vapswele vake hi ndlela ya xitxhavu?
-
Xana mumpshwa a nga bulisa kuyini ni vapswele vake hi ndlela ya xitxhavu?
Dondzrani Amaproverbia 1:8, mi gama mi bulisana hi xivutiso lexi:
-
Xana mumpshwa a fanela ku yangulisa kuyini loko vapswele vake va mu byela leswi a fanelaka ku swi yentxa?
7. Gandzrelani Yehovha swanga ndangu
Mindangu ya Timboni ta Yehovha yi tibekela nkama wa kukazri vhiki ni vhiki akuva yi gandzrela xikan’we. Xana wugandzreli lebyi bya ndangu byi nga yentxisiwa kuyini? Vonani VHIDIYU, mi gama mi bula hi swivutiso leswi landzrelaka.
-
Xana ndangu wu nga tihambelisa kuyini xiyimiso xa ku va ni wugandzreli bya ndangu vhiki ni vhiki?
-
Xana nhloko ya ndangu yi nga yentxisa kuyini leswaku wugandzreli bya ndangu byi dondzrisa byi tlhela byi nyonxisa?—Vona xifaniso lexi nga ku sunguleni ka xidondzro lexi.
-
I yini lexi nga yentxaka swi kazrata kuva mi tlhangana mi dondzra hi ndangu?
A Israyeleni wa khale, Yehovha a a yimele leswaku mindangu yi bula nkama ni nkama hi Matsralwa. Dondzrani Deuteronoma 6:6, 7, mi gama mi bulisana hi xivutiso lexi:
-
U nga wu tizrisa hi ndlela yini nsinya lowu wa nawu?
Leswi mi nga swi dondzraka ka wugandzreli bya ndangu:
-
Lulamiselani mintlhanganu ya bandla.
-
Dondzrani dzrungula dzra kukazri dzra Bibele ledzri ndangu waku wu taka dzri nyonxela mi gama mi bulisana ha dzrone.
-
Loko u ni vana lavatsrongo, imprimira kumbe u baxara tidondzro leti nga ka jw.org.
-
Loko u ni vampshwa, bulani hi tinhlokomhaka ta vampshwa leti nga ka jw.org.
-
Hambani drama dzra dzrungula dzra kukazri dzra le Bibeleni kun’we ni vanaku.
-
Hlalelani vhidiyu ka jw.org mi gama mi bula ha dzrone.
VAN’WE VA LI: “Vana a va nge dzri twisisi Bibele.”
-
Wene ke, u li yini?
NKATSRAKANYU
Yehovha a djula leswaku vapswele va zrandzra vanavu, va va dondzrisa va tlhela va va sizrelela; a vana va hlonipha ni ku yingiseta vapswele vavu; nakone a djula leswaku mindangu yi mu gandzrela kun’we.
Mpfuxeto
-
Xana vapswele va nga dondzrisa vanavu va tlhela va va sizrelela hi ndlela yini?
-
Xana vana va nga kombisa vapswele vavu xitxhavu hi ndlela yini?
-
He wani mabindzru ya kuva ndangu wu tibekela nkama wa ku gandzrela Yehovha kun’we vhiki ni vhiki?
HANDZRISISA
He tini tindondzro leti nga lulamiselaka n’wanaku akuva a va ni wutiyanguleli loko a kulile?
“6 Wa Tindondzro Leti N’wanaku A Fanelaka Ku Ti Dondzra” (Pfukani! No 2 2019)
Dondzra swilayu leswi pfunaka, leswi Bibele dzri swi nyikaka lava hlayisaka vapswele lava duhwaliki.
“Xana Bibele Dzri Li Yini Hi Ku Hlayisa Vapswele Lava Duhwaliki?” (Leswi kumekaka ka jw.org)
Vona ndlela leyi wanuna lweyi a a nga yi tivi ndlela ya ku kulisa vana a humeleliki ha yone.
Vona ndlela leyi vapapayi va nga tiyisaka ha yone wuxaka byavu ni madjaha yavu.
a A Bibeleni, ku “laya” swi hlaya ku dondzrisa, ku kongomisa ni ku wolola. A swi tlhamuxeli ku xanisa kumbe ku mu tshinya hi tihanyi.—Amaproverbia 4:1.
