YE TI MANDA 50
Tongana nyen la sewa ti mo apeut ti duti na ngia? Mbage 2
Amolenge ayeke mbeni cadeau so alondo na Jéhovah. Lo ye si ababâ na amama abâ lege ti cadeau so nzoni. Jéhovah amû awango ti ndara na ababâ na amama ti aidé ala ti sara ni. Awango so lo mû apeut nga ti aidé amolenge ti sara si sewa aduti na ngia.
1. Wango wa la Jéhovah amû na ababâ na amama?
Jéhovah aye ti tene ababâ na amama aye amolenge ti ala nga ala mû ngoi mingi ti duti na terê ti ala. Lo ye nga ti tene ababâ na amama abata amolenge ti ala si sioni asi na ala ape nga ala sara kua na amama-ndia ti Bible ti fa ye na ala (aProverbe 1:8). Lo tene na ababâ, lo tene: “Ala ngbâ ti bata [amolenge ti ala] alingbi . . . na wango ti gbotongo mê so alondo na Jéhovah.” (Diko aÉphésien 6:4.) A yeke nzere na Jéhovah mingi tongana ababâ na amama asara ye alingbi na fango lege ti lo ti bata amolenge ti ala nga ala mû kua ni so na mbeni zo nde ape.
2. Wango wa la Jéhovah amû na amolenge?
Jéhovah ahunda na amolenge ti “mä yanga ti ababâ na amama ti ala”. (Diko aColossien 3:20.) Tongana amolenge ane ababâ na amama ti ala nga ala mä yanga ti ala, ala yeke zia ngia na bê ti Jéhovah nga na ababâ na amama ti ala (aProverbe 23:22-25). Na ngoi so Jésus ade lani molenge, lo zia nzoni tapande. Atâa so lo yeke mbilimbili-kue, lo mä lani yanga ti babâ na mama ti lo nga lo ne ala.—Luc 2:51, 52.
3. Tongana nyen la sewa ti mo apeut ti ga nduru mingi na Nzapa?
Tongana mo yeke na amolenge, kite ayeke dä ape so mo ye ti tene ala ye Jéhovah tongana ti so mo ye lo. Tongana nyen la mo peut ti fa na ala ti ye Jéhovah? Sara ye alingbi na ye so Bible ahunda so: ‘Sara si atënë ti Jéhovah awara place na yâ ti bê ti amolenge ti mo, na mo fa ni na ala na ngoi so mo yeke duti na da ti mo, na ngoi so mo yeke tambela na lege.’ (Deutéronome 6:7). Ti “sara si a wara place na yâ ti bê” aye ti tene ti fa mbeni ye fani mingi. Peut-être mo kue mo hinga so ti tene amolenge ti mo agirisa mbeni tënë ape, mo doit ti kiri fani mingi na ndö ni. Versê so aye ti tene so a lingbi mo gi alege kue so azi ti sara tënë na amolenge ti mo na ndö ti Jéhovah. A yeke nzoni ti zia mbeni ngoi nde yenga oko oko ti tene ala voro Nzapa na yâ ti sewa. Tongana mo yeke na molenge ape, mo yeke wara nga aye ti nzoni tongana yenga oko oko mo manda Bible mo wani.
GI TI HINGA AYE MINGI
Gbu li na ndö ti anzoni wango so apeut ti sara si azo ti yâ ti sewa ti mo kue aduti na ngia nga ala duti nzoni.
4. Fa ye na amolenge ti mo na ndoye
Ti fa ye na amolenge apeut ti duti kete ye ape. Bible apeut ti aidé mo tongana nyen? Diko Jacques 1:19, 20, na pekoni kiri tënë na ahunda so:
-
Tongana nyen la ababâ na amama apeut ti sara ye na ndoye na ngoi so ala yeke sara lisoro na amolenge ti ala?
-
Ngbanga ti nyen la a yeke nzoni mbeni babâ wala mama afa lege na amolenge ti lo lâ oko ape na ngoi so ngonzo asara lo? a
5. Bata amolenge ti mo
Ti bata amolenge ti mo, a yeke kota ye ti sara lisoro na ala na ndö ti bungbingo koli na wali, atâa so a peut ti sara mo kamene. Zia VIDÉO ni, na pekoni kiri tënë na ahunda so:
-
Ngbanga ti nyen la a yeke ngangu na ambeni babâ na mama ti sara tënë na amolenge ti ala na ndö ti bungbingo koli na wali?
-
Ambeni babâ na mama asara lisoro na amolenge ti ala na ndö ti bungbingo koli na wali na lege wa?
Tongana ti so aprophétie afa, dunia ti Satan ayeke ga gï sioni sioni. Diko 2 Timothée 3:1, 13, na pekoni kiri tënë na ahunda so:
-
Ambeni sioni zo so versê 13 asara tënë ti ala alango na amolenge na ngangu. Tongaso, ngbanga ti nyen la a yeke kota ye ti tene ababâ na amama afa ye na amolenge ti ala na ndö ti bungbingo koli na wali? Tongana nyen la ala peut ti fa na ala ti bata terê ti ala si a lango na ala na ngangu ape?
Mo hinga?
A-Témoin ti Jéhovah asigi na gbâ ti ambeti nga na avidéo ti aidé ababâ na amama ti fa ye na amolenge ti ala na ndö ti bungbingo koli na wali nga ti bata ala si a lango na ala na ngangu ape. Na tapande, bâ:
-
Bata amolenge ti mo nzoni (vidéo)
-
“Fa ye na molenge ti mo na ndö ti bungbingo koli na wali” (Zingo na lango! N° 5 2016)
6. Ne babâ na mama ti mo
Amolenge nga na amaseka apeut ti fa so ala ne babâ na mama ti ala na lege ti fason so ala yeke sara tënë na ala. Zia VIDÉO ni, na pekoni kiri tënë na ahunda so:
-
Ngbanga ti nyen la a yeke nzoni mbeni maseka ane babâ na mama ti lo na ngoi so lo yeke sara lisoro na ala?
-
Tongana nyen la mbeni maseka apeut ti fa so lo ne babâ na mama ti lo na ngoi so lo yeke sara tënë na ala?
Diko aProverbe 1:8, na pekoni, kiri tënë na hunda so:
-
A yeke nzoni mbeni maseka asara ye tongana nyen na ngoi so babâ na mama ti lo ayeke fa na lo mbeni ye ti sara?
7. Voro Jéhovah legeoko na sewa
Asewa ti aTémoin ti Jéhovah ayeke zia mbeni ngoi nde yenga oko oko ti voro Nzapa. Vorongo Nzapa na yâ ti sewa ni apeut ti duti tongana nyen? Zia VIDÉO ni, na pekoni kiri tënë na hunda so:
-
Tongana nyen la mbeni sewa apeut ti leke kapa ti voro Nzapa na yâ ti sewa lakue?
-
Nyen la mbeni babâ wala mama apeut ti sara ti tene vorongo Nzapa na yâ ti sewa aduti pendere nga anzere?—Bâ foto so ayeke na tongo nda ti ye ti manda so.
-
Nyen la apeut ti sara si a yeke ngangu ti tene azo ti sewa ti mo kue amanda ye ndo oko?
Na Israël ti ândö, Jéhovah ahunda na asewa ti sara lisoro lakue na ndö ti mbeti ti lo. Diko Deutéronome 6:6, 7, na pekoni kiri tënë na hunda so:
-
Tongana nyen la mo peut ti sara ye alingbi na mama-ndia so?
Ambeni ye ti sara na ngoi ti vorongo Nzapa na yâ ti sewa:
-
Ala leke abungbi ti congrégation.
-
Ala diko nga ala sara lisoro na ndö ti mbeni mbaï ti Bible so ayeke nzere na ala.
-
Tongana mo yeke na akete molenge, téléchargé wala imprimé mbeni ye ti sarango ni ndali ti amolenge, so ayeke na ndö ti jw.org.
-
Tongana mo yeke na amaseka, sara lisoro na ala na ndö ti mbeni article so a sara ni ndali ti amaseka, so ayeke na ndö ti jw.org.
-
Mo na amolenge ti mo asara scénette ti mbeni mbaï ti Bible.
-
Ala bâ mbeni vidéo so ayeke na ndö ti jw.org nga ala sara lisoro na ndö ni.
AMBENI ZO ATENE: “A yeke ngangu mingi na amolenge ti mä yâ ti atënë ti Bible.”
-
Mo yeke tene nyen na ala?
NA NDURU TËNË
Jéhovah aye ti tene ababâ na amama aye amolenge ti ala, ala fa ye na ala nga ala bata ala; lo ye ti tene amolenge ane ababâ na amama ti ala nga ala mä yanga ti ala; nga lo ye ti tene asewa avoro lo ndo oko.
Dango bê
-
Tongana nyen la ababâ na amama apeut ti fa ye na amolenge ti ala nga ti bata ala?
-
Tongana nyen la amolenge apeut ti fa so ala ne ababâ na amama ti ala?
-
Tongana sewa azia mbeni ngoi nde ti voro Nzapa na yâ ti sewa yenga oko oko, nzoni ti nyen la ala yeke wara dä?
GI NDA TI YE
Aye ti manda wa la ayeke leke molenge ti mo ndali ti ngoi so lo yeke ga kota?
“Aye omene so a lingbi a fa ni na molenge” (Zingo na lango! N° 2 2019)
Gi ti hinga anzoni wango so Bible amû na azo so ayeke bâ lege ti ababâ na amama ti ala so aga mbakoro.
Bâ tongana nyen la mbeni koli so ahinga ti bata amolenge ape aga mbeni nzoni babâ.
Bâ tongana nyen la ababâ apeut ti kpengba songo ti ala na amolenge ti ala ti koli.
a Na yâ ti Bible, “ti fa lege na” molenge aye ti tene ti fa ye na lo nga ti aidé lo ti changé asioni pensé nga na asioni sarango ye ti lo. A doit ti sara ni lâ oko ape ahon ndö ni wala ti sioni ni.—aProverbe 4:1.
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
