දරුවෝ යෙහෝවාගෙන් ලැබුණ තෑග්ගක්. ඒ තෑග්ග ආදරෙන් රැකබලා ගනියි කියලා යෙහෝවා දෙමාපියන්ගෙන් බලාපොරොත්තු වෙනවා. ඒක හොඳින් කරන්න ඕනෙ කරන මඟ පෙන්වීමුත් ඔහු දීලා තියෙනවා. පවුලක් විදිහට සතුටින් ඉන්න දරුවන්ගේ පැත්තෙන් කරන්න පුළුවන් දේවල් ගැනත් ඔහු කියලා දීලා තියෙනවා.

1. යෙහෝවා දෙමාපියන්ට දීලා තියෙන්නේ මොන වගේ මඟ පෙන්වීම්ද?

දෙමාපියන් දරුවන්ට ආදරේ කරයි කියලත් එයාලා එක්ක පුළුවන් තරම් කාලේ ගත කරයි කියලත් යෙහෝවා බලාපොරොත්තු වෙනවා. දරුවන්ව ආරක්ෂා කරගන්න, බයිබලයේ තියෙන ප්‍රතිපත්ති කියලා දීලා එයාලව පුහුණු කරන්න කියලා යෙහෝවා දෙමාපියන්ට කියලා තියෙනවා. (හිතෝපදේශ 1:8) ඔහු තාත්තලාට කියන්නේ ‘දරුවන්ව ඇතිදැඩි කරද්දී නිතරම යෙහෝවා දෙවි සිතන ආකාරයට සිතන්න එයාලට උගන්වන්න’ කියලයි. (එෆීස 6:4 කියවන්න.) යෙහෝවා කැමති නැහැ ඔහු දෙමාපියන්ට දීලා තියෙන වගකීම එයාලා වෙන කාටවත් දෙනවාට. ඔහු දීලා තියෙන මඟ පෙන්වීම්වලට කීකරු වෙලා දරුවන්ව ඇතිදැඩි කරද්දී යෙහෝවා හුඟක් සතුටු වෙනවා.

2. යෙහෝවා දරුවන්ට දීලා තියෙන්නේ මොන වගේ මඟ පෙන්වීම්ද?

යෙහෝවා දරුවන්ට කියන්නේ “දෙමාපියන්ට කීකරු වෙන්න” කියලයි. (කොලොස්සි 3:20 කියවන්න.) දරුවෝ දෙමාපියන්ට ගෞරව කරද්දී, කීකරු වෙද්දී යෙහෝවා වගේම දෙමාපියනුත් ගොඩක් සතුටු වෙනවා. (හිතෝපදේශ 23:22-25) යේසුස් දරුවන්ට හොඳ ආදර්ශයක් තිබ්බා. ඔහු පරිපූර්ණ කෙනෙක් වුණත් පොඩි වයසේ ඉද්දී ඔහුගේ දෙමාපියන්ට ගෞරව කරලා එයාලට කීකරුව හිටියා.—ලූක් 2:51, 52.

3. යෙහෝවාට තව ළං වෙන්න පවුලේ හැමෝටම පුළුවන් කොහොමද?

ඔයා අම්මා කෙනෙක්, තාත්තා කෙනෙක් නම් ඔයාට ඕනෙ ඔයා යෙහෝවාට ආදරේ කරනවා වගේ ඔයාගේ දරුවනුත් ඔහුට ආදරේ කරනවා දකින්න. ඒකට දරුවන්ට උදව් කරන්න පුළුවන් විදිහ ගැන බයිබලයේ මෙහෙම කියනවා. ‘[යෙහෝවා කියලා තියෙන දේවල්] ඔබේ දූපුතුන්ගේ සිත්වලට කාවද්දන්න. නිවසේ සිටින විටත් ගමන්බිමන් යන විටත් ඒ දේවල් ගැන කතා කරන්න.’ (ද්විතීය කතාව 6:7) “කාවද්දනවා” කියන්නේ දෙයක් නිතර නිතර කියන එකට. දෙමාපියන් දන්නවා සමහර දේවල් නිතර නිතර කිව්වාම තමයි දරුවන්ට ඒවා මතක හිටින්නේ කියලා. ඒ පදයේ කියන්නේ ඔයාගේ දරුවන් එක්ක යෙහෝවා ගැන කතා කරන්න අවස්ථාවන් හොයාගන්න කියලයි. හැම සතියේම පවුලේ නමස්කාරය කරන එක හොඳ දෙයක්. ඔයාට දරුවෝ නැති වුණත් හැම සතියකම බයිබලය අධ්‍යයනය කරන්න කාලේ වෙන් කරගන්න.

 තවත් හොයමු

 6. දෙමාපියන්ට ගෞරව කරන්න

 ඉගෙනගත්ත දේ

දරුවන්ට ඕනෙ කරන ආදරය, පුහුණුව, ආරක්ෂාව දෙන්න කියලත් දෙමාපියන්ට ගෞරව කරන්න සහ කීකරු වෙන්න කියලත් පවුලේ නමස්කාරය කරන්න කියලත් යෙහෝවා කියනවා.

ඔයා හිතන්නේ මොකක්ද?

• දරුවන්ව පුහුණු කරන්න සහ ආරක්ෂා කරන්න දෙමාපියන්ට පුළුවන් කොහොමද?

• දෙමාපියන්ට ගෞරව කරන්න දරුවන්ට පුළුවන් කොහොමද?

• පවුලේ නමස්කාරය කරන්න හැම සතියකම වෙලාව වෙන් කරගන්න එකේ තියෙන ප්‍රයෝජන මොනවාද?