ROSO 50
Maate Hagiirru Noota Assiˈra Dandaatto Gara—Gafa 2
Ooso Yihowa eltooti. Yihowa annuwunna amuuwu tenne elto seekkite towaattara hasiˈranno. Isi annuwunna amuuwu oosonsa towaattanno gede kaaˈlitannota kaajja amaale uyino. Yihowa aanno amaale, oosono maate hagiirru noota ikkitanno gede assa dandiitanno gara kultannote.
1. Yihowa annuwanna amuuwa mayyee amaalino?
Yihowa, annuwunna amuuwu oosonsa baxxaranna dandaami deerrinni insa ledo lowo yanna sayissara hasiˈranno. Qoleno oosonsa gawajjanno coyiwiinni agartansaranna Qullaawu Maxaafi biddishshi garinni qajeelsitansara hasiˈranno. (Lawishsha 1:8) Isi annuwate togo yaanno biddishsha uyino: “Oosoˈne Mootichu amaalenni seejjitinanni lossensa.” (Efesooni Sokka 6:4 nabbawi.) Annuwunna amuuwu oosonsa qajeelsitanno woyite Yihowa biddishsha harunsitannoha ikkironna konne qeechansa wolu mannira sayisse aantenni insa uminsa wonshitannoha ikkiro isi hagiidhanno.
2. Yihowa ooso mayyee amaalino?
Yihowa ooso “Iltinoˈnerira hajajammensa” yee amaalino. (Qolasiyaasi Sokka 3:20 nabbawi.) Ooso annansanna amansa ayirrissannohanna hajajantannonsaha ikkiro, Yihowa hagiirsiissanno; anninsanna amansano hagiidhanno. (Lawishsha 23:22-25) Yesuusi shiinqu noo yannara oosote dancha lawishsha ikkino. Isi guuta ikkirono, annisiranna amasira hajajamino hattono ayirrisinonsa.—Luqaasi 2:51, 52.
3. Maatete deerrinni Yihowawa shiqa dandiitinannihu hiittoonniiti?
Ooso iltinoonniha ikkiro, oosoˈne kiˈnente gede Yihowa baxxannore ikkitara hasidhinanniti dihuluullissannote. Oosoˈne Yihowa baxxannore ikkitanno gede kaaˈla dandiitinannihu hiittoonniiti? Aante noota Qullaawu Maxaafi amaale harunsatenniiti: “Oosoˈnerano [Yihowa qaale] rosiissensa. Mineˈne ofoltinanni woyite, doogo hadhinanni woyiteno . . . hajajoˈyare kula agurtinoonte.” (Marro 6:7) Oosoˈne mitto coye qaaggara hasidhiniro, hakkoye coye marro marro higgine kultinanninsati egennantinote. Kuni qummeeshshi, oosoˈnera Yihoware ganyitine kultinanninsa faro duuchanka woyite hasiˈra hasiissannoˈneta kulannoho. Lamalate kiiro maateˈne ledo Yihowa magansidhinanni yanna gaaˈma danchate. Ooso iltinoonnikkiha ikkirono, lamalate kiiro Maganu Qaale mitteenni xiinxallate yanna gaaˈmaˈne kaaˈlitannoˈne.
LEDDE XIINXALLI
Maate hagiirru noota ikkitanno gedenna teesse heedhanno gede kaaˈlitanno amaale xiinxalli.
4. Oosoˈne baxillunni qajeelsensa
Ooso qajeelsa shota ikka hooggara dandiitanno. Qullaawu Maxaafi tennera kaaˈlannohu hiittoonniiti? Yaiqoobi 1:19, 20 nabbabbe; hakkiinni aante noo xaˈmuwa hasaabbe:
-
Annuwunna amuuwu oosonsa ledo hasaabbanno woyite baxxannonsata leellisha dandiitannohu hiittoonniiti?
-
Annu woy ama hanqite heedhe oosonsa seejja hasiissannonsakkihu mayiraati? a
5. Oosoˈne gawajjannonsa coyiwiinni agarre
Oosoˈne gawajjanno coyiwiinni agarate, mittu mittunku qaaqqira siimu xaadooshshi daafira rosiisaˈne lowo geeshsha hasiissannote. Hatto assa saalfachishshannoˈneha ikkara dandaanno. VIIDIYO laˈe; hakkiinni aante noo xaˈmuwa hasaabbe.
-
Mitu annuwiranna amuuwira oosonsara siimu xaadooshshi daafira kula qarra ikkitannonsahu mayiraati?
-
Mite annuwanna amuuwi oosonsara siimu xaadooshshi daafira kula dandiitinohu hiittoonniiti?
Balanxe masaalloonninte gede, Sheexaanu alame roore bushshanni hadhino. Layinki Ximootewoosi 3:1, 13 nabbabbe; hakkiinni tenne xaˈmo hasaabbe:
-
Kiiro 13 kulloonnihu bushu manni giddo mitootu qaaqquulle bushiishshannoreeti. Tenne hendiro, annuwunna amuuwu qaaqquullinsara siimu xaadooshshi daafira kulanna insaneeto togoo manniwiinni agadhitanno gara rosiisa hasiissannonsahu mayiraati?
Ati tenne afootto?
Yihowa Farciˈraasine, annuwunna amuuwu oosonsara siimu xaadooshshi daafira rosiissanno gedenna bushiishannonsa manniwiinni agartannonsa gede kaaˈlannoha batinye uduunne qixxeessitino. Lawishshaho:
-
Qaaqquulleˈne Gawajjannorinni Agarre (viidiyo)
-
Bayiru Rosiisaanchi Yaannore Macciishshi (Amaaru Afoo), fooliishsho 10 hattono 32
-
“Qaaqqiˈnera Siimu Xaadooshshire Rosiisa” (Baqqi Yiiyye! (Amaaru Afoo) Kiiro 5 2016)
6. Annakkinna amakki ayirrisi
Qaaqquulluno wedellootuno annansanna amansa hasaawissanno woyite ayirrissannonsata leellisha dandiitanno. VIIDIYO laˈe; hakkiinni aante noo xaˈmuwa hasaabbe.
-
Wedellootu annansanna amansa ayirrinyunni hasaawisansa dancha ikkitinohu mayiraati?
-
Mittu wedellichi annasinna amasi ayirrisannonsata leellishanno garinni hasaawisa dandaannohu hiittoonniiti?
Lawishsha 1:8 nabbabbe; hakkiinni tenne xaˈmo hasaabbe:
-
Mittu wedellichi annisinna amasi biddishsha uyitannosi woyite maa assa hasiissannosi?
7. Yihowa maateˈne ledo mitteenni magansidhe
Yihowa Farciˈraasine ikkitino maate lamalate kiiro Yihowa mitteenni magansiˈrate yanna gaaˈmitanno. Maatete magansiˈra yannara maa maa assa dandiinanni? VIIDIYO laˈe; hakkiinni aante noo xaˈmuwa hasaabbe.
-
Maatete Magansiˈra agurrikkinni assiˈra dandiinannihu hiittoonniiti?
-
Annuwunna amuuwu maatete magansiˈra maatensara kaaˈlitannotanna hagiirsiissannota ikkitanno gede maa assa dandaanno?—Konni rosira hanafote noo misile lai.
-
Kiˈne maatera Maganu Qaale mitteenni xiinxalla qarra ikkitannoˈne gede assara dandaannori maati?
Hundi Israeele waro, Yihowa maate ganyite Qullaawa Borro daafira hasaabbara hajajino. Marro 6:6, 7 nabbabbe; hakkiinni tenne xaˈmo hasaabbe:
-
Konne xintu seera loosu aana hosiisa dandaattohu hiittoonniiti?
Maatete magansiˈrara kaaˈlitanno amaale:
-
Songote gambooshshira mitteenni qixxaabbe.
-
Maateˈne baxxara dandiitannota mitte Qullaawu Maxaafi xagge nabbabbine hasaabbe.
-
Shiimaaddu qaaqquulli nooˈneha ikkiro, jw.org aana qaaqquulleho qixxeessinoonni rosiishsha dirrisidhe woy attaˈme.
-
Wedellu ooso nooˈneha ikkiro, jw.org aana wedellootaho qixxeessinoonniha mitto birxicho hasaabbe.
-
Oosoˈne ledo mitte Qullaawu Maxaafi xagge diraamu garinni shiqishshe.
-
jw.org aaninni mitte viidiyo laˈine hasaabbe.
MITU MANNI TOGO YAANNO: “Loosu batiˈrannonke daafira, oosonkera Qullaawa Maxaafa rosiinseemmo yanna dinonke.”
-
Ati tennera mayyaatto?
XAPHISHSHA
Yihowa annuwunna amuuwu oosonsa baxxara, qajeelsitaranna gawajjannonsa coyiwiinni agartansara hasiˈranno; oosono annansanna amansa ayirrissaranna hajajantansara hasiˈranno; qoleno maate mitteenni magansidhasira hasiˈranno.
Kageeshsha Rosoottore
-
Annuwunna amuuwu oosonsa qajeelsanna gawajjannonsa coyiwiinni agara dandiitannohu hiittoonniiti?
-
Ooso annansanna amansa ayirrissannota leellisha dandiitannohu hiittoonniiti?
-
Lamalate kiiro maatete ledo mitteenni Yihowa magansiˈrate yanna gaaˈma kaaˈlitannohu hiittoonniiti?
EGENNO LEXXI
Qaaqquullu rosa hasiissannonsahu jajjabba ikkitanno woyitira kaaˈlannonsa rosi hiikkoyeti?
“Ooso Rosa Hasiissannonsaha Lee Roso” (Baqqi Yiiyye! Kiiro 2 2019)
Geedhino annanna ama towaaxxate kaaˈlitannota Qullaawu Maxaafi amaale huwati.
Alba ooso lossiˈnanni gara afinokki manchi oososi danchu garinni lossiˈra dandiinohu hiittoonniitiro wodanchi.
Annuwu labballi oosonsa ledo noonsa aante kaajjishiˈra dandiitannohu hiittoonniiti?
“Labballi Oosokki Ledo Noohe Aante Kaajjite Heedhanno Gede Assiˈra Dandaattohu Hiittoonniiti?” (Agarooshshu Shae, Bocaasa 1, 2011)
a Qullaawu Maxaafi kulanno garinni, “seejjate” yaa mitto qaaqqo rosiisate, raga leellishatenna busha hedosi woy akatasi aguranno gede kaaˈlate yaate. Kayinni seejja beebba assiˈra woy kaajjillunni gawajja horo diˈˈikkitino.—Lawishsha 4:1.
Kurino Lai
DUUCHU MANNI XAˈMANNO XAˈMO
Yihowa Farciˈraasine Qullaawa Maxaafa Xiinxallissannohu Hiittoonniiti?
Yihowa Farciˈraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiˈra dandaatto. Xiinxallokkira maatekki gudisse woy jaallakki koyisa dandaatto.
