FIANARA 50
Akory ty Hahasambatsy ty Fianakavianao? Fizarà 2
Fanomeza baka amy Jehovah ty anaky. Mitamà Jehovah fa hikarakara soa ani-fanomeza io ty ray aman-dreny. Manome torohevitsy afaky manampy an-drozy hahavita ani-zay ie. Volanini-Jehovah koa ty raha azoni-anaky atao mba hahasambatsy ty fianakavian-drozy.
1. Ino ty torohevitsy ameani-Jehovah ty ray aman-dreny?
Mitamà Jehovah fa ho tea ty anakiny ty ray aman-dreny sady hanoka fotoa ampy soa ho an-drozy. Teany hiaro ty anakiny koa ty ray aman-dreny sady teany hampiasa ty torolalani-Baiboly mba hampianara an-drozy. (Ohabolana 1:8) Ho zao ty volaniny amy ty lahilahy manan’anaky: ‘Tezao avao araky ze atoroni-Jehovah ty anakinareo.’ (Vakio Efesianina 6:4.) Falifaly Jehovah lafa manoriky ty tari-dalany ty ray aman-dreny lafa miteza ty anakin-drozy sady tsy manoraky ani-andraikitsin-drozy zay amin’olo hafa.
2. Ino ty torohevitsy ameani-Jehovah ty anaky?
Ho zao ty ampanaovini-Jehovah ty anaky: ‘Oriho ty safàni-ray aman-dreninareo.’ (Vakio Kolosianina 3:20.) Laha manaja noho manoriky ty safàni-ray aman-dreniny ty anaky, le ho falifaly Jehovah sady ho falifaly koa ty ray aman-dreniny. (Ohabolana 23:22-25) Nanome modely soa Jesosy tamy ie mbo ni-ajà. Olombelo lavorary ie, fe nanaja noho nanoriky ty safàni-ray aman-dreniny avao.—Lioka 2:51, 52.
3. Ino ty hanampy anareo fianakavia raiky hifandramby soa amy Jehovah?
Laha manan’anaky iha, le azo antoky fa teanao laha tea ani-Jehovah manahaky anao koa ty anakinao. Ino ty azonao atao mba hahavità ani-zay? Mila ataonao raha volanini-Baiboly toy: “Alenteho tsikelikely an-tsaini-anakinao ao [ty safàni-Jehovah] ka resaho na mipetraky an-tranonao ao iha, na mandeha an-dala eny.” (Deoteronomia 6:7) Ty hoe ‘mandentiky tsikelikely’ le midika hoe mampimpolimpoly mampianatsy. Haini-ray aman-dreny soa fa mila ampolimpoly ty raha raiky zay vo tiaroni-ajà reo. Ta hivola zany andinin-teny io hoe tokony hila fomba hiresaha matetiky amy ty anakinao mikasiky ani-Jehovah iha. Tena soa laha manoka fotoa sankerinandro nareo trano raiky mba hianara mikasiky ani-Jehovah. Ndre mbo tsy manan’anaky nareo morovaly, le hahasoa anareo avao ty manoka fotoa sankerinandro mba hianara ty Safà-Ndranahary.
DINIHO LALIKY
Hodinihintsika hoe ino ty torohevitsy hanampy ty fianakavianao ho sambatsy noho ho voaaro.
4. Ampianaro amim-pitiava ty anakinao
Tsy mora kindraiky ty mampianatsy ajà. Ino ty torohevitsini-Baiboly afaky manampy anao? Vakio Jakoba 1:19, 20, bakeo iaraho midiniky fanontanea retoa:
-
Akory ty ampisehoani-ray aman-dreny hoe be fitiava rozy lafa miresaky amy ty anakin-drozy?
-
Manino ty ray aman-dreny ro tsy tokony hanasazy ty anakiny laha mbo meloky? a
5. Arovo ty anakinao
Laha teanao harova ty anakinao, le mila miresaky mikasiky firaisa aminy iha. Fe mety hahamenatsy raha zay. Alefaso VIDEO toy, bakeo iaraho midiniky fanontanea reo.
-
Manino ro sarotsy amy ty ray aman-dreny sisany ty miresaky mikasiky firaisa amy ty anakiny?
-
Ino ty nataoni-ray aman-dreny sisany mba hiresaha mikasiky firaisa amy ty anakiny?
Miharaty avao tontoloni-Satana toy araky ty fa nivolanini-Baiboly. Vakio 2 Timoty 3:1, 13, bakeo iaraho midiniky fanontanea toy:
-
Anisani-olo raty fanahy resahy amy andininy faha-13 ao io ty olo mpandrava ajà. Manino zany ty ray aman-dreny ro tena mila miresaky amy ty anakiny mikasiky firaisa noho mampianatsy azy hiaro ty vatany amy mpandrava ajà?
Fa nihainao va?
Fa maro ty lahatsoratsy noho video naboakini-Vavolombeloni-Jehovah mba hanampea ty ray aman-dreny hiresaky amy ty anakiny mikasiky firaisa noho hiaro ani-ajà reo amy mpandrava ajà. Retoa ty sisany amy raha rezay:
-
Arovo ty Anakinao (video)
-
“Ahoana no Iresahanao Momba ny Firaisana Amin’ny Zanakao?” (Mifohaza! No. 5 2016)
6. Hajao ty ray aman-dreninao
Hita amy fomba firesahani-ajà na tanora raiky amy ty ray aman-dreniny ty fanajany an-drozy. Alefaso VIDEO toy, bakeo iaraho midiniky fanontanea reo.
-
Ino ty ho vokany laha mahay manaja ray aman-dreny ty anaky lafa miresaky amin-drozy?
-
Akory ty ampisehoa ty tanora noho ty ajà hoe manaja ray aman-dreny rozy lafa miresaky?
Vakio Ohabolana 1:8, bakeo iaraho midiniky fanontanea toy:
-
Ino ty tokony hataoni-tanora lafa mananatsy azy ty ray aman-dreniny?
7. Miaraha mianatsy Baiboly amy ty fianakavianao
Sankerinandro, le manoka fotoa hianara Baiboly miaraky, ty fianakavia Vavolombeloni-Jehovah. Kaihy hoe fotoam-pivavahani-fianakavia raha zay. Manao akory fotoam-pivavahani-fianakavia zao? Alefaso VIDEO toy, bakeo iaraho midiniky fanontanea reo.
-
Ino ty azo atao laha ta hahavita Fotoam-pivavahani-Fianakavia avao sankerinandro?
-
Ino ty azoni-ray aman-dreny atao mba ho azoni-anakin-drozy tavy ty fotoam-pivavahani-fianakavia sady hifanaraky amy ty raha ilàn-drozy?—Henteo sary amy fanombohani-fianara toy.
-
Manino ro mety ho sarotsy amy fianakavianao ty miaraky mianatsy?
Teani-Jehovah hiresaky matetiky mikasiky ty Soratsy Masy ty fianakavia israelita. Vakio Deoteronomia 6:6, 7, bakeo iaraho midiniky fanontanea toy:
-
Akory ty azonao anoriha ani-torolala io?
Ino ty azo atao amy fotoam-pivavahani-fianakavia?
-
Manoma fivoriani-fiangona.
-
Mamaky noho miaraky mandiniky ze tantara teanareo amy Baiboly ao.
-
Laha manan’anaky mbo kelikely iha: Mangalà fisafisà amy jw.org ao, le ataovo printy.
-
Laha manan’anaky tanora iha: Milà lahatsoratsy mikasiky tanora amy jw.org ao, le iaraho midiniky aminy.
-
Ataovo sahala tantara an-tsehatsy rey ty tantara amy Baiboly ao.
-
Manentea video raiky baka amy jw.org ao, le iaraho midiniky raha zay bakeo.
MIERITSERITSY TY OLO SISANY HOE: “Tsy manam-potoa hampianara Baiboly ani-ajà reo zahay, fa sahira amy velomam-po.”
-
Ino ty hovolaninao?
FAMINTINA
Teani-Jehovah ho tea, hampianatsy, noho hiaro ty anakiny ty ray aman-dreny. Teany koa laha miaraky mianatsy Baiboly ty fianakavia.
Famerena
-
Ino ty azoni-ray aman-dreny atao mba hampianara noho hiarova ty anakin-drozy?
-
Akory ty ampisehoani-anaky hoe manaja ty ray aman-dreniny ie?
-
Ino iaby ty soa ho azoni-fianakavia laha manoka fotoa hianara Baiboly sankerinandro rozy?
DINIHO KOA RETOA
Ino ty mila ampianary ani-ajà reo mba hanomàna an-drozy amy fiainan-drozy afarafara ao?
“Zavatra Enina Mila Ampianarina ny Ankizy” (Mifohaza! No. 2 2019)
Ino ty torohevitsy ameani- Baiboly ho an’olo mikarakara ray aman-dreny be tao?
Ho hitanao ato hoe ino ty nanampy ty lahilahy raiky, ka nahavy azy ho baba mahay miteza.
Ino ty torohevitsy afaky manampy ty baba mba hahay hifandramby amy ty anakilahiny?
a Ty hoe manasazy amy Baiboly ao, le mifandramby amy hoe manome toromariky, mitari-dala, noho mananatsy. Tsy misy resaky fampijalea mihintsy amy raha reo.—Ohabolana 4:1.