LESONA 50
E Faapefea Ona Maua e Lou Aiga le Fiafia?—Vaega 2
O fanau o se meaalofa mai iā Ieova. E na te faatalitalia mātua ia tausia lelei lenā meaalofa. Ua saunia e Ieova fautuaga atamai e fesoasoani i mātua e faia ai faapea. E mafai foʻi ona fesoasoani na fautuaga i le fanau, ina ia faia ai sa latou vaega i le mauaina o le fiafia i le aiga.
1. O ā fautuaga ua aumaia e Ieova i mātua?
E faatalitalia e Ieova mātua ia alolofa i fanau, ma faaalu le tele o le taimi ma i latou. E finagalo foʻi o ia e puipuia e mātua a latou fanau mai i lamatiaga, ma faaaogā mataupu silisili o le Tusi Paia e toleni ai i latou. (Faataoto 1:8) Ua fetalai mai o ia i tamā: “Ia tausia pea [lau fanau] i . . . apoapoaʻiga a Ieova.” (Faitau le Efeso 6:4.) E fiafia le finagalo o Ieova pe a mulimuli mātua i ana taʻiala i le auala e tausia ai le fanau, nai lo o le tuuina atu o lenā tiute tauave i se isi tagata.
2. O ā fautuaga ua aumaia e Ieova i fanau?
Ua faatonuina e Ieova le fanau: “Ia usiusitaʻi i o outou mātua.” (Faitau le Kolose 3:20.) Pe a faaaloalo ma usiusitaʻi le fanau i mātua, o le a latou faafiafiaina ai Ieova ma o latou mātua. (Faataoto 23:22-25) Na faataatia e Iesu se faaaʻoaʻoga lelei a o laʻitiiti. E ui na lelei atoatoa, ae sa usiusitaʻi ma faaaloalo i ona mātua.—Luka 2:51, 52.
3. E faapefea ona faalatalata atu i le Atua o se aiga?
Pe afai o oe o se matua, e mautinoa e te manaʻo ia alolofa lau fanau iā Ieova e pei foʻi o oe. E faapefea ona e ausia lenā sini? E ala i le faatatauina o le manatu lenei mai i le Tusi Paia: “Ia e matuā aʻoaʻo soo [afioga a Ieova] i lau fanau, ia e tautala ai pe a e nofo i lou fale, pe a e savali i le ala.” (Teuteronome 6:7) O le “aʻoaʻo soo” e uiga atu i le faamanatu pea o se mea. E masani lava, e tatau ona faailoa atu pea i le fanau se mea ina ia latou manatua ai. O le uiga la o lenei mau, e tatau ona e saʻili ni avanoa e te talanoa atu ai e lē aunoa i lau fanau e uiga iā Ieova. O se mea lelei la le faatulaga o se taimi i vaiaso taʻitasi, e suʻesuʻe faatasi ai le Tusi Paia o se aiga. Pe afai e leai se fanau, e mafai lava ona oulua maua aogā pe a faatulaga se taimi e suʻesuʻe ai le Afioga a le Atua i vaiaso uma.
SAʻILIʻILI ATILI
Iloilo fautuaga aogā e fesoasoani i le mauaina o se aiga fiafia ma malupuipuia.
4. Toleni lau fanau i se auala alofa
E ono avea ma luʻi le toleniina o se tamaitiiti. E faapefea ona fesoasoani le Tusi Paia? Faitau le Iakopo 1:19, 20, ona talanoa lea i fesili nei:
-
E faapefea ona faaalia e mātua le alofa a o talanoa atu i a latou fanau?
-
Aiseā e lē tatau ai i se matua ona aʻoaʻi lana fanau a o ita? a
5. Puipui lau fanau
Ina ia puipuia lau fanau, e tāua lou talanoa atu iā i latou taʻitoʻatasi e faatatau i feusuaʻiga. E ono faigatā ona e talanoa atu iā i latou i lenei mataupu. Faaali le VITIŌ, ona talanoa lea i fesili o loo mulimuli mai.
-
Aiseā e faigatā ai i nisi mātua ona talanoa i a latou fanau e faatatau i feusuaʻiga?
-
O ā ni auala ua faaaogā e nisi mātua e talanoa atu ai i a latou fanau e faatatau i feusuaʻiga?
Ua faasolo ina matuā leaga le lalolagi a Satani, e pei lava ona valoia. Faitau le 2 Timoteo 3:1, 13, ona talanoa lea i le fesili lenei:
-
O nisi tagata amioleaga o loo taʻua i le fuaiupu e 13, e latou te faaleagaina tamaiti i faiga taufeusuaʻiga. O lea, aiseā e tāua ai i mātua ona talanoa i a latou fanau e faatatau i feusuaʻiga, ma le auala e puipuia ai i latou mai i na tagata?
E te silafia?
Ua saunia e Molimau a Ieova le tele o meafaigaluega e fesoasoani i mātua, pe a talanoa i le fanau e faatatau i feusuaʻiga, ma le auala e puipuia ai i latou mai i le faaleagaina. Mo se faataʻitaʻiga, tagaʻi i le:
-
“Aʻoaʻo Lau Tama e Faatatau i Feusuaʻiga” (Ala Mai! Nu. 5 2016)
6. Faaaloalo i ou mātua
E faaalia e fanau ma talavou le faaaloalo i mātua, i le auala e talanoa atu ai iā i latou. Faaali le VITIŌ, ona talanoa lea i fesili o loo mulimuli mai.
-
Aiseā e tāua ai i le fanau ona talanoa atu i mātua i se auala faaaloalo?
-
E faapefea ona talanoa atu le fanau i mātua i se auala faaaloalo?
Faitau le Faataoto 1:8, ona talanoa lea i le fesili lenei:
-
O le ā le auala e tatau ona tali atu ai le fanau pe a maua faatonuga mai i mātua?
7. Tapuaʻi iā Ieova o se aiga
E faatulaga e aiga Molimau a Ieova se taimi i vaiaso taʻitasi, e tapuaʻi faatasi atu ai iā Ieova. E faapefea ona faia lenei tapuaʻiga a le aiga? Faaali le VITIŌ, ona talanoa lea i fesili nei:
-
O le ā e fesoasoani ina ia faia ai e lē aunoa le Tapuaʻiga a le Aiga?
-
O le ā e mafai ona fai e mātua ina ia maua ai aogā mai le tapuaʻiga a le aiga, ma avea o se mea e fiafia ai?—Tagaʻi i le ata i luga aʻe o le matua o lenei lesona.
-
O le ā se mea e ono faigatā ai mo lou aiga ona suʻesuʻe faatasi?
I Isaraelu anamua, na faatalitalia e Ieova aiga e talanoa e lē aunoa e faatatau i Tusitusiga Paia. Faitau le Teuteronome 6:6, 7, ona talanoa lea i le fesili lenei:
-
E faapefea ona e faatatauina lenei mataupu silisili?
Mea e mafai ona fai i le tapuaʻiga a le aiga:
-
Sauniuni mo sauniga.
-
Faitau ma talanoa i se tala mai i le Tusi Paia o le a fiafia ai lou aiga.
-
Pe afai e iai sau fanau lāiti, ia kopi pe lolomi se mataupu o loo i mea e fai e tamaiti i le jw.org.
-
Pe afai e iai sau fanau talavou, talanoa i se mataupu mo talavou o loo i le jw.org.
-
Faatino se tala o le Tusi Paia faatasi ma lau fanau.
-
Matamata ma talanoa i se vitiō mai le jw.org.
UA FAAPEA MAI NISI: “E faigatā ona malamalama tamaiti i le Tusi Paia.”
-
O le ā sou manatu?
AOTELEGA
E finagalo Ieova ia alolofa, toleni, ma puipuia e mātua a latou fanau, ia faaaloalo ma usiusitaʻi le fanau i o latou mātua, ma ia tapuaʻi faatasi atu iā te ia o se aiga.
Fesili Autalu
-
E faapefea ona toleni ma puipuia e mātua a latou fanau?
-
E faapefea ona faaalia e fanau le faaaloalo i o latou mātua?
-
O ā aogā o le faatulaga o se taimi i vaiaso taʻitasi e fai ai le tapuaʻiga a le aiga?
MANATU FAAOPOOPO
O ā lesona e fesoasoani e sauniunia ai lau tama i le avea ma tagata matua?
“Lesona e Ono e Manaʻomia Ona Aʻoaʻoina e le Fanau” (Ala Mai! Nu. 2 2019)
Mātau fautuaga aogā mai le Tusi Paia mo i latou o loo tausia mātua ua matutua.
“O le ā le Manatu o le Tusi Paia e Faatatau i le Tausia o Mātua ua Matutua?” (Mataupu i le jw.org)
Mātau pe na faapefea ona taulau se tamā e leʻi iloa muamua le auala e tausia ai se fanau.
Mātau pe faapefea ona faamalosia le faiā a se tamā ma lona atalii.
“E Faapefea Ona Vavalalata Tamā i o Latou Atalii?” (Le Olomatamata, Novema 1, 2011)
a I le Tusi Paia, e faasino atu le “aʻoaʻi” i faatonuga, taʻitaʻiga, ma faasaʻoga. E lē uiga atu i le faileagaina po o le sauāina.—Faataoto 4:1.
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
