SIFUNDVO 50
Yini Lengenta Umndeni Wakho Ujabule?—Incenye 2
Bantfwana basipho lesivela kuJehova futsi ulindzele kutsi batali babo babanakekele. Jehova uniketa batali seluleko lesingabasita kuloku. Leseluleko sisita nebantfwana bati kutsi yini lokufanele bayente kuze imindeni yakubo ijabule.
1. Ngusiphi seluleko Jehova lasiniketa batali?
Jehova ufuna kutsi batali batsandze bantfwana babo futsi bacitse sikhatsi lesinyenti nabo. Ufuna nekutsi babavikele etintfweni letingabalimata, baphindze basebentise timiso teliBhayibheli kuze babaceceshe. (Taga 1:8) Utjela bobabe kutsi ‘bachubeke bakhulisa [bantfwana babo] . . .ngesicondziso saJehova.’ (Fundza Kubase-Efesu 6:4.) Jehova uyajabula nangabe batali balandzela sicondziso sakhe futsi batikhulisela bantfwana babo, hhayi nabakhuliselwa ngulomunye umuntfu.
2. Ngusiphi seluleko Jehova lasiniketa bantfwana?
Jehova uyala bantfwana utsi: “Lalelani batali benu.” (Fundza KubaseKholose 3:20.) Bantfwana nabahlonipha futsi balalela batali babo, bajabulisa Jehova kanye nabo batali babo. (Taga 23:22-25) Jesu wabeka sibonelo lesihle ngesikhatsi asengumntfwana. Walalela batali bakhe ngisho nobe bebanesono, kantsi yena bekete.—Lukha 2:51, 52.
3. Ningasondzela njani kuNkulunkulu njengemndeni?
Nangabe ungumtali, siyaciniseka kutsi ufuna bantfwana bakho bamtsandze kakhulu Jehova njengawe. Ungawufeza kanjani lowo mgomo? Ngekwenta loko lokushiwo liBhayibheli nalitsi: “[Emavi aJehova] kufanele niwanamatselise emadvodzaneni enu, nikhulume ngawo nanihleti etindlini tenu, nanihamba endleleni.” (Dutheronomi 6:7) ‘Kunamatselisa,’ kusho kufundzisa lokutsite ngekukuphindzaphindza. Kungenteka uyati kutsi kufanele uphindzaphindze lokutsite kuze bantfwana bakho bakukhumbule. Ngako lombhalo usho kutsi kufanele uhlale ufuna ematfuba ekukhuluma nebantfwana bakho ngaJehova. Kuhle kutsi nibeke sikhatsi eceleni njalo ngeliviki kuze nikhonte Jehova ndzawonye njengemndeni. Nangabe ute bantfwana, nawe ungazuza ngekubeka sikhatsi eceleni njalo ngeliviki kuze utadishe liVi laNkulunkulu.
CHUBEKA UFUNISISA
Cabanga ngetintfo umndeni longatenta kuze utive uvikelekile futsi ujabulile.
4. Cecesha bantfwana bakho ngelutsandvo
Kumatima kucecesha umntfwana, kodvwa liBhayibheli lingakusita njani? Fundza Jakobe 1:19, 20, bese nicoca ngalemibuto:
-
Batali bangalukhombisa njani lutsandvo nabakhuluma nebantfwana babo?
-
Umtali nakakwatile, kungani kungakafaneli ajezise umntfwana wakhe? a
5. Vikela bantfwana bakho
Kuze uvikele bantfwana bakho, kubalulekile kutsi ukhulume nemntfwana ngamunye ngetindzaba tekuya ecansini. Loko kungahle kube matima. Dlala le-VIDEO, bese nicoca ngalemibuto lelandzelako.
-
Yini leyenta kube lukhuni kulabanye batali kukhuluma nebantfwana babo ngetindzaba tekuya ecansini?
-
Ngutiphi letinye tindlela labanye batali labatisebentisile kuze bachazele bantfwana babo ngetindzaba tekuya ecansini?
Njengobe kwaphrofethwa, lelive laSathane liya liba libi kakhulu. Fundza 2 KuThimothi 3:1, 13, bese nicoca ngalombuto:
-
Labanye balabantfu lokukhulunywa ngabo kuvesi 13 bahlukubeta bantfwana ngekwelicansi. Ngako yini leyenta kubaluleke kutsi batali bafundzise bantfwana babo ngetindzaba tekuya ecansini, nekutsi bantfwana bangativikela njani kubantfu labahlukubetana ngekwelicansi?
Bewati yini?
BoFakazi BaJehova banemathulusi lamanyenti langasita batali bafundzise bantfwana babo ngetindzaba tekuya ecansini nendlela labangabavikela ngayo kubantfu labangabahlukubeta. Nasi sibonelo, hlola:
-
Bavikele Bantfwana Bakho (i-video)
-
“Ukufundisa Ingane Yakho Ngocansi” (Phaphama! No. 5 2016 letfolakala ngesiZulu)
6. Hlonipha batali bakho
Bantfwana labancane nalabaseminyakeni yekutfomba bangakhombisa kutsi bayabahlonipha batali babo ngendlela labakhuluma ngayo nabo. Dlala le-VIDEO, bese nicoca ngalemibuto lelandzelako.
-
Kungani kubalulekile kutsi bantfwana bakhulume nebatali babo ngenhlonipho?
-
Bantfwana bangakhuluma njani nebatali babo ngendlela lekhombisa kutsi bayabahlonipha?
Fundza Taga 1:8, bese nicoca ngalombuto:
-
Yini lokufanele yentiwe bantfwana nangabe batali babo bafuna bente intfo letsite?
7. Khontani Jehova njengemndeni
Imindeni yaBoFakazi BaJehova ibekela sikhatsi eceleni njalo ngeliviki kuze ibe nekukhonta kwemndeni ndzawonye. Kuba njani lokukhonta kwemndeni? Dlala le-VIDEO, bese nicoca ngalombuto lolandzelako.
-
Umndeni ungaba njani neluhlelo lweKukhonta Kwemndeni lokuchubeka njalo?
-
Yini umtali langayenta kuze ente kukhonta kwemndeni kuzuzise futsi kujabulise?—Buka sitfombe lesisekucaleni kwalesifundvo.
-
Yini lengenta kube matima ngemndeni wakho kutsi ufundze ndzawonye?
Ka-Israyeli wasendvulo, Jehova bekalindzele kutsi imindeni ihlale ikhuluma ngemiBhalo njalo. Fundza Dutheronomi 6:6, 7, bese nicoca ngalombuto:
-
Ungasisebentisa njani lesimiso?
Leningakwenta ekukhonteni kwemndeni:
-
Lungiselelani imihlangano yelibandla.
-
Fundzani futsi nicoce ngendzaba leseBhayibhelini umndeni wenu longayijabulela.
-
Naninebantfwana labancane, titsatseleni nobe niphrinte tintfo tebantfwana letiku-website letsi jw.org.
-
Nangabe ninebantfwana labaseminyakeni yekutfomba, cocani ngetihloko tebantfu labasha letiku-website letsi jw.org.
-
Yentani umdlalo ngendzaba letsite leseBhayibhelini futsi nitente labantfu lokukhulunywa ngabo kuleyondzaba.
-
Bukelani futsi nicoce nge-video leku-website letsi jw.org.
LABANYE BANTFU BATSI: “LiBhayibheli limatima kutsi bantfwana bangalicondza.”
-
Wena ungatsini?
LOKO LESICOCE NGAKO
Jehova ufuna kutsi batali batsandze, baceceshe futsi bavikele bantfwana babo. Bantfwana bona bahloniphe futsi balalele batali babo. Ufuna nekutsi umndeni umkhonte ndzawonye.
Yini Loyifundzile?
-
Batali bangabacecesha futsi babavikele njani bantfwana babo?
-
Bantfwana bangabakhombisa njani batali babo kutsi bayabahlonipha?
-
Kusita ngani kubekela sikhatsi eceleni njalo ngeliviki kuze nikhonte Jehova ndzawonye njengemndeni?
LOKUNYE LONGAKUHLOLA
Ngutiphi tifundvo letitawusita umntfwana wakho alungele kuba ngumuntfu lomdzala?
“Izinto Eziyisithupha Okufanele Zifundiswe Izingane” (Phaphama! No. 2 2019 letfolakala ngesiZulu)
Fundza ngeteluleko letingasetjentiswa ngulabo labanakekela batali babo lasebakhulile.
“Litsini LiBhayibheli Ngekunakekela Batali Lasebakhulile?” (Sihloko lesiku-internet)
Buka kutsi lenye indvodza yaba njani ngubabe lokahle ngisho nobe beyingati kutsi kufanele ibakhulise njani bantfwana bayo.
Fundza kutsi bobabe bangabucinisa njani buhlobo labanabo nemadvodzana abo.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
