LESOGNE 50
Tea’o ho Sambatse vao ty Keleia’o?—Fizaràgne 2
Fagnomezagne boake amy i Jehovah o ajajao. Tea’e naho mikarakara soa o fagnomezagne iohoe o rae aman-dreneo. Magnomey torohevetse soa hoahy ty rae aman-drene ty Jehovah mba hagnampeagne iareo hahavita izay. Magnomey torohevetse o ajajao ka reke mba hahavy o keleiagneo ho sambatse.
1. Ino ty torohevetse mey i Jehovah ty rae aman-drene?
Tea i Jehovah ho tea ty ana’e sady hanokagne fotoagne maro hiharoagne amy ty ana’e ty rae aman-drene. Tea’e hiaro ty ana’e ka iareo sady tea’e hampiasa ty toro lala ty Baiboly mba hampiofagnagne aze. (Ohabolana 1:8) Izao ty raha ampanoe’e ty rae: ‘Beizo amy ty fagnanara i Jehovah avao reke [ty ana’areo].’ (Vakio ty Efesianina 6:4.) Fale ty Jehovah naho magnorike ty tari-dala’e o rae aman-dreneo naho fa miteza ty ana’e sady tsy magnankigne ze andraiki’e zay amy ty ndaty hafa.
2. Ino ty torohevetse mey i Jehovah o ajajao?
Izao ty ampanoe i Jehovah o ajajao: ‘Ankatoavo ty rae aman-drene’areo.’ (Vakio ty Kolosianina 3:20.) Naho magnaja sady mankatò rae aman-drene o ajajao, le sambe ho fale ndra i Jehovah ndra i rae aman-dreney. (Ohabolana 23:22-25) Nagnomey ohatse soa miomba izay ty Jesosy tamy i reke niajaja. Ndra tie nivoririke aza reke, le nagnaja naho nankatò i rae aman-drene’e tsy voririke rey avao.—Lioka 2:51, 52.
3. Akore ty hahavy anareo keleian-draike hifandrambe soa aman’Andrianagnahare?
Naho managne anake rehe, le azo antoke fa tea’o naho tea i Jehovah manahake azo ty ana’o. Ino areke ty toko’e hatao’o? Oriho ty raha rehafe ty Baiboly toy: “Alenteho tsikedetsikede agnate ty say ty ana’o ao [ty saontsy i Jehovah] sady rehafo ama’e ndra tie mitoboke an-tragno ao rehe ndra mandeha an-dalagney ndra mandre ndra mifoha.” (Deoteronomia 6:7) Magnerenkeregne mampianatse ty dika tihoe ‘mandeteke tsikedetsikede.’ Fanta o rae aman-dreneo soa fa mila aherenkeregne mateteke ty raha raike vaho izay tadidy o ajajao. Te hirehake areke o andinin-teny iohoe fa toko’e hipay hirike hirehafagne mateteke amy ty ana’o ty miomba i Jehovah rehe. Soa ka naho manokagne fotoagne hiarahagne mianatse Baiboly nareo keleian-draike isan-keregnandro. Ndra tie tsy managne anake aza rehe, le handrambe soa avao naho manokagne fotoagne isan-keregnandro mba hianaragne ty Saontsin’Andrianagnahare.
ANDAO HANDINEKE TY PITSOPITSO’E
Hodinehentikagne ato tie ino ty hagnampe ty keleia’o ho sambatse sady ho voaro.
4. Mikezaha ho bey hatea naho fa magnitsy ty ana’o
Misy fotoagne, le tsy mora ty mampiofagne o ajajao. Ino ty toroheve ty Baiboly hagnampe azo? Vakio ty Jakoba 1:19, 20, sady iharò midineke ty fagnonteneagne retoa:
-
Akore ty ampisehoa ty rae aman-drene fa bey hatea reke naho fa mifampirehake amy ty ana’e?
-
Nagnino ty rae aman-drene ro tsy toko’e handilo ty ana’e naho mbe boseke reke? a
5. Arovo ty ana’o
Naho te hiaro ty ana’o rehe, le toko’e hirehake amy iareo miomba ty filagne atao ty lahilahy naho ty ampela. Va’e hahamegnatse ty hanao izay. Alefaso i VIDEO oy, sady iharò midineke ty fagnonteneagne retoa.
-
Nagnino ro sarotse amy ty rae aman-drene ila’e ty mirehake amy ty ana’e miomba ty filagne atao ty lahilahy naho ty ampela?
-
Akore ty atao ty rae aman-drene ila’e mba hirehafagne amy ty ana’e miomba ty filagne atao ty lahilahy naho ty ampela?
Rehafe ty Baiboly fa vao mainke miharaty ty tontolo i Satana toy. Vakio ty 2 Timoty 3:1, 13, sady iharò midineke ty fagnonteneagne toy:
-
Agnisa ty mpanao raty rehafegne amy ty andine’e 13 eo ty mpamahotse ajaja. Nagnino areke o rae aman-dreneo ro mila mampianatse ty ana’e miomba ty lahilahy naho ty ampela mifampila sady hahay hiaro ty tegna’e amy ty ndaty mpamahotse ajaja?
Raha mahaliagne
Maro ty fitaovagne naboa ty Vavolombelo i Jehovah magnampe ty rae aman-drene mba hampianaragne ty ana’e miomba ty lahilahy naho ty ampela mifampila naho hiaro iareo amo o mpamahotse ajajao. Agnisa izay retoa:
-
Arovo ty Ana’o (video)
-
“Ampianaro Miomba ty Atao Tihoe Lahilahy Naho Ampela Mifampila ty Ana’o” (Mifohaza! Nim. 5 2016)
6. Hajao ty rae aman-drene’o
Trea amy ty fomba fireha’o amy ty rae aman-drene’o tie magnaja aze rehe sa tsy magnaja aze. Alefaso i VIDEO oy, sady iharò midineke ty fagnonteneagne retoa.
-
Nagnino ro toko’e hagnaja ty rae aman-drene’e o tanorao naho fa mifampirehake amy iareo?
-
Akore ty ampisehoa o tanorao fa magnaja ty rae aman-drene’e reke naho fa mifampirehake ama’e?
Vakio ty Ohabolana 1:8, sady iharò midineke ty fagnonteneagne toy:
-
Akore ty toko’e hatao o ajajao naho o tanorao naho fa magnomey torohevetse aze ty rae aman-drene’e?
7. Manokàgna fotoagne nareo keleian-draike mba hiarahagne mianatse ty miomba i Jehovah
Manokagne fotoagne isan-keregnandro o Vavolombelo i Jehovah-o mba hiarahagne mianatse Baiboly miarake amy ty keleia’e. Atao tihoe fotoam-pivavaha ty keleiagne o fotoagne iohoe. Ino ty azo ianaragne amo o fotoam-pivavaha ty keleiagne iohoe? Alefaso i VIDEO oy, sady iharò midineke ty fagnonteneagne retoa.
-
Ino ty toko’e hatao ty keleiagne mba hahavy iareo hahavita hanao fotoam-pivavahagne isan-keregnandro?
-
Ino ty azo ty rae aman-drene atao mba hahafinaritse sady hifanandrife amy ze raha ilae ty keleia’e i fotoam-pivavahagney?—Henteo i sare am-panomboha ty lesogne toỳ.
-
Nagnino ro va’e ho sarotse amy ty keleia’o ty miarake mianatse?
Nandily ty rae aman-drene tamo o Israelita talohao ty Jehovah mba hirehake miomba ty Soratse Masigne amy ty ana iareo. Vakio ty Deoteronomia 6:6, 7, sady iharò midineke ty fagnonteneagne toy:
-
Akore ty azo’o ampiharagne o toro lalagne iohoe?
Hevetse azo dinehegne amy ty fotoam-pivavaha ty keleiagne:
-
Magnomagne ty fivoria ty fiangonagne.
-
Mamaky sady miarake midineke ze tantara tea’areo amy Baiboly ao.
-
Naho managne anake kedekede rehe, le mangalà fihisagne amy jw.org ao sady anò pirinty.
-
Naho managne anake fa beibey rehe, le mangalà lahatsoratse miomba ty tanora amy jw.org ao, le iharò’areo midineke
-
Iaraho’areo mihisa ty tantara amy Baiboly ao.
-
Magnentea video amy jw.org ao sady iharò’areo midineke.
MISY TY MIREHAKE TIE: “Tsy manam-potoagne hampianaragne Baiboly ty ana’ay zahay.”
-
Akore ty havale’o izay?
FAMINTIGNAGNE
Tea i Jehovah ho tea, hampianatse vaho hiaro ty ana’e o rae aman-dreneo. Tea’e hagnaja naho hankatò iareo ka ty ana iareo. Tea’e ka ty keleian-draike naho miarake mianatse Baiboly.
Fameregnagne
-
Akore ty azo ty rae aman-drene atao mba hampianaragne naho hiarovagne ty ana’e?
-
Akore ty ampisehoa o ajajao fa magnaja ty rae aman-drene’e reke?
-
Inogne iaby ty soa ho rambese o keleiagneo naho miarake mianatse Baiboly isan-keregnandro iareo?
FAGNAZAVAGNE FAGNAMPE’E
Ino ty toko’e hampianare o rae aman-dreneo ty ana’e mba hahavy iareo ho ndaty vagnogne?
“Raha Enegne Mila Ampianaregne o Ajajao” (Mifohaza! No. 22019)
Ino ty toro lala ty Baiboly hoahy ze mikarakara rae aman-drene fa antetse?
Henteo ato tie, ino ty nagnampe ty lahilahy raike toy hahay hiteza ty ana’e.
Ino ty torohevetse hagnampe o raeo hifandrambe soa amy ty ana’e lahilahy?
a Mifandrambe amy tihoe magnomey toromareke, tari-dalagne, sady magnitsy ty atao tihoe “magnanatse” tie amy Baiboly ao. Tsy misy ifandrambesa’e amy ty fampijaleagne ndra fagnaparagne ty habosehagne io.—Ohabolana 4:1.
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
