ውሉዳት፡ ውህበት የሆዋ እዮም። የሆዋ ድማ ንወለዲ፡ ንደቆም ጽቡቕ ገይሮም ኪሕዝዎም ይጽበዮም እዩ። ከምኡ ንምግባር ዜኽእል ጽቡቕ ምኽሪ ኸኣ ይህብ እዩ። ብዘይካዚ፡ ውሉዳት ንሓጐስ ስድራ ቤቶም ኣበርክቶ ኺገብሩ ዜኽእል ምኽሪ እውን ይህብ እዩ።

1. የሆዋ ንወለዲ እንታይ ምኽሪ እዩ ሂብዎም፧

የሆዋ ንወለዲ፡ ንውሉዳቶም ኬፍቅሩን ብእተኻእሎም መጠን ምሳታቶም ነዊሕ ግዜ ኼሕልፉን ይጽበዮም እዩ። ንደቆም ካብ ጕድኣት ኬዕቍብዎምን ብስርዓታት መጽሓፍ ቅዱስ ኬሰልጥንዎምን እውን ይደልዮም እዩ። (ምሳሌ 1:8) ንኣቦታት፡ “ንውሉዳትኩም ብተግሳጽን ብምዕዶን የሆዋ . . . ኣዕብይዎም” ኢሉ ተማሕጺንዎም ኣሎ። (ኤፌሶን 6:4 ኣንብብ።) ወለዲ ኣብ ኣተዓባብያ ደቆም መምርሒ የሆዋ እንተ ስዒቦም፡ ሓላፍነቶም ከኣ ንኻልእ ኣሕሊፎም እንተ ዘይሂቦም፡ የሆዋ በዚ ይሕጐስ እዩ።

2. የሆዋ ንውሉዳት እንታይ ምኽሪ እዩ ሂብዎም፧

የሆዋ ንውሉዳት፡ “ንወለድኹም . . . ተኣዘዝዎም” ዚብል ትእዛዝ ሂብዎም ኣሎ። (ቈሎሴ 3:20 ኣንብብ።) ውሉዳት ንወለዶም ዜኽብሩን ዚእዘዙን እንተ ዀይኖም፡ ንየሆዋን ንወለዶምን የሐጕስዎም እዮም። (ምሳሌ 23:22-25) የሱስ ቈልዓ ኣብ ዝነበረሉ እዋን፡ ሰናይ ኣብነት ሓዲጉ እዩ። ፍጹም እኳ እንተ ነበረ፡ ንወለዱ ተኣዚዝዎምን ኣኽቢርዎምን እዩ።—ሉቃስ 2:51, 52።

3. ብስድራ ቤት ንኣምላኽ ብዝያዳ እትቐርብዎ ብኸመይ ኢኹም፧

ወላዲ እንተ ዄንካ፡ ውሉዳትካ ኸማኻ ንየሆዋ ኼፍቅሩ ኸም እትደሊ ኣየጠራጥርን እዩ። ነዚ ሸቶ እዚ ብኸመይ ክትወቕዖ ትኽእል፧ ነዚ ሸቶ ንምውቃዕ፡ ነዚ ዚስዕብ ትእዛዝ መጽሓፍ ቅዱስ ተግብር፦ “ንደቅኻ ድማ [ቃላት የሆዋ] ቅረጸሎም፡ ኣብ ቤትካ ኾፍ ምስ በልካን ኣብ መገዲ ኽትከይድ ከለኻን . . . ከኣ ብዛዕባኡ ተዛረብ።” (ዘዳግም 6:7) “ቅረጸሎም” ኪብሃል ከሎ፡ ብምድግጋም ትምህሮም ማለት እዩ። ደቅኻ ሓደ ነገር ምእንቲ ኺዝክሩ፡ ደጋጊምካ ኽትነግሮም ከም ዜድሊ መሸም ፍሉጥ እዩ። እዛ ጥቕሲ እዚኣ ድማ፡ ኣዘውቲርካ ንደቅኻ ብዛዕባ የሆዋ ኽትነግሮም ከም ዚግባእ እያ እትሕብር ዘላ። እምበኣር፡ ኣብ ሰሰሙን ብስድራ ቤት ኣምልኾ እትገብሩሉ ግዜ ምምዳብ ጽቡቕ እዩ። ውሉዳት እንተ ዘይብልካ፡ ኣብ ሰሰሙን ንመጽናዕቲ ቓል ኣምላኽ ግዜ ብምምዳብ ክትጥቀም ትኽእል ኢኻ።

 ኣዕሚቝካ ዅዓት

 6. ወለድኻ ኣኽብር

 ጽማቝ

የሆዋ ንወለዲ፡ ንደቆም ኬፍቅሩን ኬሰልጥኑን ኬዕቍቡን፡ ንውሉዳት ድማ ንወለዶም ኬኽብሩን ኪእዘዙን ይደልዮም እዩ፣ ስድራ ቤታት ከኣ ብሓባር ኬምልኽዎ ይደሊ እዩ።

ክለሳ

• ወለዲ ንደቆም ብኸመይ ኬሰልጥንዎምን ኬዕቍብዎምን ይኽእሉ፧

• ውሉዳት ንወለዶም ብኸመይ ኬኽብርዎም ይኽእሉ፧

• ንኣምልኾ ስድራ ቤት ዚኸውን ሰሙናዊ መደብ ምግባር እንታይ ጥቕሚ ኣለዎ፧