ITYOUGH 50
U Er Nan Ve a Saan Tsombor Wou Iyolo?—Vegher 2
Mbayev ka iyua i Yehova ne se yô. Nahan a soo ér mbamaren ve nengen sha mbayev mba un ne ve la doo doo. Yehova na i nger akaawan ken Bibilo kpishi aa wase mbamaren u eren kwagh ne yô. Shi akaa la tese mbayev kwagh u vea er ve a saan tsombor ve iyol yô.
1. Yehova wa mbamaren kwagh ér nyi?
Yehova wa mbamaren kwagh ér ve soo mbayev vev shi ve nôngo ve luun vea ve hanma shighe cii. Heela tseegh ga, a soo ér mbamaren ve kuran mbayev vev sha er kwagh a er ve u vihin ga yô, shi ve tesen ve akaawan a ken Bibilo. (Anzaakaa 1:8) A kaa a uter ér: “Za nen hemen u yesen [mbayev enev] sha . . . kwaghwan u Yehova.” (Ôr Mbaefese 6:4.) Mbamaren ka vea er kwagh u Yehova a kaa la shighe u ve lu yesen mbayev vev shi vea gema tom ve u yesen mbayev vev la vea na orgen ga yô, i saan un iyol.
2. Yehova wa mbayev kwagh ér nyi?
Yehova kaa a mbayev ér: “Ungwan nen imo i mbamaren enev.” (Ôr Mbakolose 3:20.) Mbayev ka vea naan mbamaren vev icivir shi vea ungwan imo ve yô, ve na i saan Yehova kua mbamaren vev cii iyol. (Anzaakaa 23:22-25) Yesu yange ver ikyav i dedoo shighe u lu wanye la. Yange ungwan imo i mbamaren nav shi naan ve icivir shin er ve lu a mbamyen, un di lu or u vough nahan kpaa.—Luka 2:51, 52.
3. Tsombor ua er nan ve ua seer lun kôôsôô a Yehova?
Aluer u ngu ormaren yô, ka keng u soo wer mbayev ou ve soo Yehova er we kpa u soo Yehova nahan. Kpa u er nan ve vea soo Yehova? Ka sha u eren kwagh u Bibilo i kaa ne, ér: ‘Tesen ônov ou [akaaôron a Yehova] sha gbashima je, ôron kwagh u a, zum u wea tema hen ya wou man zum u wea zenden sha gbenda’ kpaa. (Duteronomi 6:7) U “tesen” la, inja na yô, ka u ôron or kwaghmôm kwa kimbir kimbir sha u tesen nan. A shi nan kpa u fa er ka i gba u u ôr mbayev ou kwagh acin imôngo sha er a hungur ve ga yô. Nahan ivur Bibilo ne ngi kaan ér gba u u ôron mbayev ou kwagh u Yehova hanma shighe u ian i dugh cii. Nahan doo u tsombor ua ver shighe u ve cii teman imôngo, henen kwagh u Yehova hanma kasua. Aluer ne mba a mbayev ga kpa, ne fatyô u teman imôngo hanma kasua henen Mkaanem ma Aôndo, nahan kwagh la una wase ne kpishi.
HEN KWAGH I ZA SHIMI
Time sha mbamhen mba i due a mi mba vea wase hanma or hen tsombor nana lu saan saan shi ishima ia nyian nan ga yô.
4. Tesen mbayev ou sha dooshima
U tesen wanye la ka tom u kiriki ga. Bibilo ia fatyô u wasen nena? Ôr Yakobu 1:19, 20, maa lam nen sha mbampin mban:
-
Mbamaren vea er kwagh sha dooshima shighe u ve lu lamen a mbayev vev nena?
-
Er nan i doo u mayange ormaren nana tsaha mbayev mba nan shighe u ishima i lu vihin nan ga? a
5. Kura mbayev ou
Gba hange hange u u lamen a hanma wan wou sha kwagh u yavaor sha er u kura nan yô. Alaghga kunya ua kôr u u eren kwagh ne. Nenge VIDIO i i lu heen ne, maa lam nen sha mbampin mba ve dondo ne.
-
Er nan ve ka i taver mbamaren mbagen kpishi u lamen a mbayev vev sha kwagh u yavaor?
-
Mbamaren mbagen pase mbayev vev kwagh u yaven a or la nena?
Tar u Satan ne ngu vihin seer a seer er yange i tsenga ôron nahan. Ôr 2 Timoteu 3:1, 13, maa lam nen sha mpin ne:
-
Mbaaferev mbagen mba i ter ken ivur 13 la, ka mba nzughul a mbayev, yaven a ve. Sha nahan yô, er nan i gbe hange hange u mbamaren vea tese mbayev vev kwagh u yavaor, man er vea kura iyol ve sha ikyev i ior mba nzughul a ve laa?
U fa kpa?
Mbashiada mba Yehova gber ityakeda shi er uvidio kpishi mba vea wase mbamaren u tesen mbayev vev kwagh u yavaor, shi kuran ve sha er or a nzughul a ve ga yô. Ikyav i tesen yô, nenge:
6. Naan mbamaren ou icivir
Mbayev man agumaior vea fatyô u nan mbamaren vev icivir sha gbenda u ve lamen a ve la. Nenge VIDIO i i lu heen ne, maa lam nen sha mbampin mba ve dondo ne.
-
Er nan ve i doo u wanye shin gumor nana lamen a mbamaren mba nan sha iciviri?
-
Gumor nana lam a mbamaren mba nan nena ve a lu sha iciviri?
Ôr Anzaakaa 1:8, maa lam nen sha mpin ne:
-
Shighe u mbamaren ve kaa a wanye ér nana er kwagh yô, doo u nana er nena?
7. Civir nen Yehova hen tsombor
Icombor i i lu Mbashiada mba Yehova yô, ka ve ver shighe u teman imôngo henen Bibilo hanma kasua. Ka nyi ne fatyô u eren shighe u ne lu eren mcivir u hen tsomboro? Nenge VIDIO i i lu heen ne, maa lam nen sha mbampin mba ve dondo ne.
-
Tsombor ua er nan ve ua eren Mcivir u hen Tsombor hanma shighe?
-
Ormaren nana er nan ve nana er mcivir u hen tsombor sha gbenda u ua wase mba hen tsombor shi a saan hanma or iyolo?—Nenge foto u a lu ken mhii u ityough kin la.
-
Ka nyi ia na ve alaghga a taver tsombor wou u teman imôngo eren mcivir u hen tsomboro?
Yehova yange kaa a icombor i ken Iserael u sha yange a tsuaa ér, ve lamen sha akaa a ken Ruamabera sha hanma shighe. Ôr Duteronomi 6:6, 7, maa lam nen sha mpin ne:
-
U dondo kwaghwan ne nena?
Akaa a ne fatyô u eren shighe u ne lu eren mcivir u hen tsombor yô:
-
Wan iyol sha mbamkombo mba tiônnongo.
-
Ôron ma ijiir ken Bibilo i ia doo tsombor wou yô, shi lamen sha mi.
-
Aluer u ngu a mbayev mbakiriki yô, za danlood gayô gber ma kwagh u i er sha ci u mbayev sha jw.org yô.
-
Aluer u ngu a mbayev mba ve lu agumaior yô, lam nen sha ma ngeren u i gber sha ci u agumaior sha jw.org yô.
-
Er nen iniumbe sha ma kwagh u ken Bibilo.
-
Nenge nen vidio i sha jw.org shi lam nen sha mi.
IOR MBAGENEV KA VE KAA ÉR: “Bibilo ka kwagh u mbayev ga, i taver gande ve.”
-
We u nenge nena?
KA NYI U HENE?
Yehova soo ér mbamaren ve soo mbayev vev, nahan ve tesen ve shi ve kuran ve kpaa, mbayev di ve naan mbamaren vev icivir shi ve ungwan imo ve, shi a soo ér icombor i teman imôngo i civir un.
Mbampin mba umbur kwagh u i hen yô
-
Mbamaren vea tese mbayev vev shi vea kura ve nena?
-
Mbayev vea na mbamaren vev icivir nena?
-
Aluer tsombor ver shighe u teman imôngo hanma kasua henen Bibilo yô, kwagh la una wase ve nena?
SEER HENEN KWAGH
Ka akaa a nyi nahan wan wou una fatyô u henen a aa wase un shighe u una wa ikyondo laa?
“Akaa a Ataratar a I Gbe u Mbayev Vea Hen Yô” (Awake! Namba 2 2019)
Hen akaa a injaa a Bibilo i we mba ve nengen sha mbamaren vev mbabeenyol la.
“Ka Nyi Bibilo i Ôr sha Kwagh u Tom u Nengen sha Mbamaren Mbabeenyolo?” (Ngeren u sha Intanet)
Nenge er orgen u yange fa er una yese mbayev nav ga yô, va hingir ter u dedoo yô.
Nenge er uter vea fatyô u seer lun kôôsôô a mbayev vev mba nomso yô.
“Uter Vea Za Hemen u Lun Ikyua a Ônov Vev Mba Nomso Nena?” (Iyoukura, Janawari 1, 2012)
a Ken Bibilo yô, ishember i “tsaha” la, ka u tesen wanye man u wan nan kwagh kua u kôôm mhen shin ieren i nan i bo. Mayange ka u nzughul a nan shin eren a nan sha tswam ga.—Anzaakaa 4:1.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
