LĒSONI 50
ʻE Lava Fēfē ke Fiefia Ho Fāmilí?—Konga 2
Ko e fānaú ko ha meʻaʻofa meia Sihova. ʻOkú ne ʻamanekina ʻa e ngaahi mātuʻá ke tokangaʻi lelei ʻa e meʻaʻofa ko iá. ʻOku tokonaki mai ʻe Sihova ʻa e faleʻi fakapotopoto ke lava ʻa e ngaahi mātuʻá ʻo fai ia. ʻOku toe hā ʻi heʻene faleʻí ʻa e meʻa ʻoku lava ke fai ʻe he fānaú ke tokoni ki he fiefia ʻa e fāmilí.
1. Ko e hā ʻa e faleʻi ʻoku ʻoange ʻe Sihova ki he ngaahi mātuʻá?
ʻOku ʻamanekina ʻe Sihova ʻa e ngaahi mātuʻá ke ʻofa ʻi heʻenau fānaú pea fakamoleki ʻa e taimi lahi taha ʻe ala lavá mo kinautolu. ʻOkú ne toe loto ki he ngaahi mātuʻá ke maluʻi ʻenau fānaú mei he fakatamakí pea ngāueʻaki ʻa e ngaahi tefitoʻi moʻoni ʻo e Tohi Tapú ko ha makatuʻunga ki hono akoʻi kinautolú. (Palōveepi 1:8) ʻOkú ne tala ange ki he ngaahi tamaí: “Hokohoko atu hono ʻohake kinautolú ʻi he akonaki mo e enginaki ʻa Sihová.” (Lau ʻa e ʻEfesō 6:4.) ʻOku hōifua ʻa Sihova ʻi he muimui ʻa e ngaahi mātuʻá ki heʻene fakahinohinó pea ʻohake ʻenau fānaú kae ʻikai ʻoange ʻa e fatongia ko iá ki ha taha kehe.
2. Ko e hā ʻa e faleʻi ʻoku ʻoange ʻe Sihova ki he fānaú?
ʻOku fekauʻi ʻe Sihova ʻa e fānaú: “Mou talangofua ki hoʻomou mātuʻá.” (Lau ʻa e Kolose 3:20.) ʻI he fakaʻapaʻapa mo talangofua ʻa e fānaú ki heʻenau ngaahi mātuʻá, ʻoku nau ʻai ai ʻa Sihova mo ʻenau ngaahi mātuʻá ke fiefia. (Palōveepi 23:22-25) Naʻe fokotuʻu ʻe Sīsū ha faʻifaʻitakiʻanga lelei ʻi he taimi naʻá ne kei siʻi aí. Neongo naʻá ne haohaoa, naʻá ne talangofua mo fakaʻapaʻapa ki heʻene ongo mātuʻá.—Luke 2:51, 52.
3. ʻE lava fēfē ke mou ʻunuʻunu ofi ange ki he ʻOtuá ko ha fāmili?
Kapau ko ha mātuʻa koe, ʻoku ʻikai ha veiveiua te ke loto ke hoko hoʻo fānaú ʻo ʻofa kia Sihova ʻo hangē pē ko koé. ʻE lava fēfē ke ke fakahoko ʻa e taumuʻa ko ení? ʻAki hono fai ʻa e meʻa ʻoku leaʻaki ʻe he Tohi Tapú: “Kuo pau ke ke faʻa akonakiʻaki ia ki ho ngaahi fohá pea leaʻaki ia ʻi hoʻo tangutu ʻi ho falé pea ʻi hoʻo lue ʻi he halá.” (Teutalōnome 6:7) Ke “faʻa akonakiʻaki” ʻoku ʻuhingá ke akoʻi ʻaki hono toutou leaʻaki ha meʻa. ʻOku moʻoni, ʻokú ke ʻilo kuo pau ke ke toutou leaʻaki ha meʻa ki hoʻo fānaú kae lava ke nau manatuʻi ia. ʻOku ʻuhinga ʻa e konga Tohi Tapu ko ení ʻoku totonu ke ke kumi ki ha faingamālie he ʻaho kotoa pē ke talanoa ki hoʻo fānaú fekauʻaki mo Sihova. Ko ha meʻa lelei ia ke vaheʻi ha taimi ʻi he uike taki taha ke ako ʻa e Tohi Tapú ko ha fāmili. Kapau ʻoku ʻikai ke ʻi ai haʻo fānau, te ke kei maʻu ʻaonga pē mei hono vaheʻi ha taimi ʻi he uike kotoa pē ke ako ʻa e Folofola ʻa e ʻOtuá.
KELI LOLOTO ANGE
Lāulea ki he ngaahi fokotuʻu ʻaonga ʻokú ne pouaki ʻa e fiefia mo e malu ʻo ha fāmili.
4. Akoʻi hoʻo fānaú ʻi he ʻofa
ʻOku lava ke faingataʻa hono akoʻi ha kiʻi tama. ʻOku lava fēfē ke tokoni ʻa e Tohi Tapú? Lau ʻa e Sēmisi 1:19, 20, pea lāulea leva ki he ongo fehuʻi ko ení:
-
ʻE lava fēfē ʻe he ngaahi mātuʻá ʻo fakahaaʻi ʻa e ʻofá ʻi heʻenau talanoa mo ʻenau fānaú?
-
Ko e hā ʻoku ʻikai totonu ai ki ha mātuʻa ke akonakiʻi ʻene fānaú lolotonga ʻene ʻitá? a
5. Maluʻi hoʻo fānaú
Ke maluʻi hoʻo fānaú, ʻoku mātuʻaki mahuʻinga ke ke talanoa ki he kiʻi tama taki taha fekauʻaki mo e fehokotaki fakasinó. ʻE ongo faingataʻa nai ení. Huluʻi ʻa e VITIOÓ, pea lāulea leva ki he ongo fehuʻi hokó.
-
Ko e hā ʻoku faingataʻa ai ki he ngaahi mātuʻa ʻe niʻihi ke talanoa ki heʻenau fānaú fekauʻaki mo e fehokotaki fakasinó?
-
ʻI he founga fē kuo fakamatalaʻi ai ʻe he ngaahi mātuʻa ʻe niʻihi ʻa e fehokotaki fakasinó ki heʻenau fānaú?
Hangē ko ia naʻe kikiteʻí, ko e māmani ʻo Sētané ʻoku ʻalu mei he kovi ki he kovi ange. Lau ʻa e 2 Tīmote 3:1, 13, pea lāulea leva ki he fehuʻi ko ení:
-
Ko e niʻihi ʻo e kakai fulikivanu ʻoku lave ki ai ʻi he veesi 13 ʻoku nau ngaohikoviʻi fakaefehokotaki fakasino ʻa e fānaú. Ko ia ai, ko e hā ʻoku mahuʻinga ai ki he ngaahi mātuʻá ke akoʻi ki heʻenau fānaú fekauʻaki mo e fehokotaki fakasinó pea mo e founga ke maluʻi ai kinautolu mei he faʻahinga ʻoku nau feinga ke ngaohikovia kinautolú?
Naʻá ke ʻiloʻi?
ʻOku faʻu ʻe he Kau Fakamoʻoni ʻa Sihová ʻa e ʻū tohi mo e ngaahi vitiō lahi ke tokoniʻi ʻa e ngaahi mātuʻá ke akoʻi ki heʻenau fānaú fekauʻaki mo e fehokotaki fakasinó pea ke maluʻi kinautolu mei hano ngaohikovia. Ko e fakatātaá, sio ʻi he:
-
Maluʻi Hoʻo Fānaú (vitiō)
-
“Akoʻi Hoʻo Tamá Fekauʻaki mo e Fehokotaki Fakasinó” (Toʻo mei he ʻĀ Hake!)
6. Fakaʻapaʻapaʻi hoʻo mātuʻá
ʻOku lava ʻa e fānaú mo e toʻutupú ke fakahaaʻi ʻenau fakaʻapaʻapa ki heʻenau ngaahi mātuʻá ʻi he founga ʻenau lea kiate kinautolú. Huluʻi ʻa e VITIOÓ, pea lāulea leva ki he ongo fehuʻi hokó.
-
Ko e hā ʻoku mahuʻinga ai ki he fānaú ke fetuʻutaki ʻi he fakaʻapaʻapa mo ʻenau ngaahi mātuʻá?
-
ʻE lava fēfē ʻe ha toʻutupu ʻo lea ki heʻene mātuʻá ʻi ha founga ʻoku hā mei ai ʻene fakaʻapaʻapá?
Lau ʻa e Palōveepi 1:8, pea lāulea leva ki he fehuʻi ko ení:
-
ʻOku totonu ke fēfē ʻa e fakafeangai ʻa ha toʻutupu ʻi hono ʻoange ʻe heʻene ongo mātuʻá ʻa e fakahinohinó?
7. Ako ʻa e Tohi Tapú ko ha fāmili
Ko e ngaahi fāmili ʻo e Kau Fakamoʻoni ʻa Sihová ʻoku nau vaheʻi ha taimi pau ʻi he uike taki taha ke lotu fakataha. Ko e hā ʻe lava ke ke fai lolotonga ʻa e lotu fakafāmilí? Huluʻi ʻa e VITIOÓ, pea lāulea leva ki he ngaahi fehuʻi hokó.
-
ʻE lava fēfē ha fāmili ʻo fokotuʻu ha polokalama Lotu Fakafāmili tuʻumaʻu?
-
Ko e hā ʻe lava ke fai ʻe ha mātuʻa ke ʻai ʻa e lotu fakafāmilí ke ʻaonga mo fakafiefiá?—Sio ki he ʻuluaki fakatātā ʻi he lēsoni ko ení.
-
Ko e hā te ne ʻai ke faingataʻa nai ki ho fāmilí ke ako fakatahá?
ʻI ʻIsileli ʻo e kuonga muʻá, naʻe ʻamanekina ʻe Sihova ʻa e ngaahi fāmilí ke talanoa maʻu pē fekauʻaki mo e Folofolá. Lau ʻa e Teutalōnome 6:6, 7, pea lāulea leva ki he fehuʻi ko ení:
-
ʻE lava fēfē ke ke ngāueʻaki ʻa e tefitoʻi moʻoni ko ení?
Ngaahi fokotuʻu ki he lotu fakafāmilí:
-
Teuteu ki he ngaahi fakataha ʻa e fakatahaʻangá.
-
Lau pea lāulea ki ha fakamatala Fakatohitapu ʻe fiefia ai ho fāmilí.
-
Kapau ʻoku ʻi ai haʻo fānau iiki, hiki pe pulusi ha ngāue maʻá e fānaú mei he jw.org.
-
Kapau ʻoku ʻi ai haʻo toʻutupu, lāulea ki ha kupu maʻá e toʻutupú ʻi he jw.org.
-
Fakatātāʻi ha talanoa Fakatohitapu mo hoʻo fānaú.
-
Sio pea lāulea ki ha vitiō ʻi he jw.org.
ʻOKU PEHĒ ʻE HE NIʻIHI: “Ko e kau taki fakalotú ʻoku nau maʻu ʻa e fatongia ke akoʻi ʻa e Tohi Tapú ki heʻema fānaú.”
-
Ko e hā te ke leaʻakí?
FAKANOUNOU
ʻOku loto ʻa Sihova ki he ngaahi mātuʻá ke nau ʻofa, akoʻi pea maluʻi ʻenau fānaú, pea ki he fānaú ke nau fakaʻapaʻapa mo talangofua ki heʻenau ngaahi mātuʻá, pea ki he ngaahi fāmilí ke lotu fakataha kiate ia.
Fakamanatu
-
ʻE lava fēfē ʻa e ngaahi mātuʻá ʻo akoʻi mo maluʻi ʻenau fānaú?
-
ʻE lava fēfē ʻa e fānaú ʻo fakahāhā ʻa e fakaʻapaʻapá ki heʻenau ngaahi mātuʻá?
-
Ko e hā ʻa e ngaahi ʻaonga ʻo hono vaheʻi ʻa e taimi ʻi he uike taki taha ke ako ʻa e Tohi Tapú ko ha fāmili?
AKO LAHI ANGE
Ko e hā ʻa e ngaahi lēsoni ʻe teuteuʻi ai hoʻo kiʻi tamá ki he fuʻu lahí?
“Lēsoni ʻe Ono ʻOku Fiemaʻu ke Ako ʻe he Fānaú” (ʻĀ Hake! Fika 2 2019)
Ako ʻa e ngaahi faleʻi ʻaonga ʻoku ʻomai ʻe he Tohi Tapú ki he faʻahinga ʻoku nau tokangaʻi ʻenau ngaahi mātuʻa taʻumotuʻa.
Sio ki ha tangata naʻe ʻikai ke ne ʻilo ʻa e founga ke ʻohake ai ʻene fānaú pea hoko ko ha tamai lavameʻa.
Sio ki he ngaahi founga ke fakaivimālohiʻi ai ʻe he ngaahi tamaí honau vahaʻangatae mo honau ngaahi fohá.
“ʻE Lava Fēfē ke Nofo Ofi ʻa e Ngaahi Tamaí ki Honau Ngaahi Fohá?” (Ko e Taua Leʻo, Sanuali 1, 2012)
a ʻI he Tohi Tapú, ko e “akonaki” ʻoku ʻuhingá ko e akoʻi mo e tataki ha kiʻi tama pea tokoniʻi ia ke liliu ʻene fakakaukaú pe tōʻonga halá. ʻOku ʻikai ʻaupito ke ʻuhingá ko e ngaohikoviʻi pe anga-fefeká.—Palōveepi 4:1.
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
