SAMBIRU 50
Kumbi Mungachita Wuli Kuti Mukondwengi mu Banja Linu?—Chigaŵa 2
Ŵana ndi mphasu yakutuliya kwaku Yehova. Iyu wakhumba kuti apapi ayiphweriyengi ukongwa mphasu yeniyi. Yehova wapereka ulongozgi wo ungawovya apapi kuti afiski udindu wawu wenuwu. Ulongozgi waki utovya so ŵana kuti aziŵi vo angachita kuti ŵanthu wosi mu banja lawu akondwengi.
1. Kumbi Yehova watiŵapaska ulongozgi wuli apapi?
Yehova wakhumba kuti apapi ayanjengi ŵana ŵawu kweniso ayesesengi kusaniya nyengu yakucheze nawu. Iyu wakhumba so kuti apapi avikiliyengi ŵana ŵawu ku vinthu viheni ndipuso kuti agwiriskiyengi ntchitu fundu za mu Bayibolu asani atiŵasambiza. (Nthanthi 1:8) Yehova wakambiya anthulumi wo ŵe ndi ŵana kuti: “Lutirizgani kuŵalera [ŵana ŵinu] . . . nge mo Yehova wakhumbiya.” (Ŵerengani Aefeso 6:4.) Yehova wakondwa ukongwa asani apapi alondo ulongozgi waki pakulera ŵana ŵawu kweniso asani asiliya munthu munyaki cha udindu wawu wakulera ŵana ŵawu.
2. Kumbi Yehova watiŵapaska ulongozgi wuli ŵana?
Yehova wakambiya ŵana kuti: “Muvwiyengi apapi ŵinu.” (Ŵerengani Akolose 3:20.) Asani ŵana atumbika kweniso avwiya apapi ŵawu, akondwesa Yehova ndipuso apapi ŵawu. (Nthanthi 23:22-25) Yesu wangulongo chakuwoniyapu chamampha pa nyengu yo wenga mwana. Iyu wenga wakufikapu, kweni waŵavwiyanga ndipuso waŵatumbikanga apapi ŵaki chinanga kuti ŵenga ambula kufikapu.—Luka 2:51, 52.
3. Kumbi mungachita wuli kuti banja linu losi liyanjengi Chiuta?
Asani ndimwi mpapi, tikayika cha kuti mukhumbisiska kuti ŵana ŵinu amuyanjengi ukongwa Yehova nge mo yimwi muchitiya. Kumbi mungachita wuli kuti muŵawovyi? Mukhumbika kuchita vo Bayibolu likamba kuti: “[Mazu ngaku Yehova] ungasambizengi ku ŵana ŵaku mwakuwerezawereza. Ungakambengi asani waja pasi munyumba yaku, [ndipuso] asani utenda munthowa.” (Dotoronome 6:7) Kusambiza “mwakuwerezawereza,” kung’anamuwa kukamba chinthu cho kaŵikaŵi. Tikayika cha kuti muziŵa kali kuti mukhumbika kuŵakambiya chinthu mwakuwerezawereza ŵana ŵinu kuti achikumbukengi. Lemba ili ling’anamuwa kuti mukhumbika kuyesesa kusaniyanga nyengu yakukambiyaku ŵana ŵinu vakukwaskana ndi Yehova. Mbumampha kupatuwanga nyengu sabata yeyosi kuti musopiyengi limoza nge banja. Asani mulivi ŵana, mupatuwengi mbwenu nyengu kuti musambirengi Mazu ngaku Chiuta.
SAMBIRANI VINANDI
Wonani fundu zo zingawovya kuti ŵanthu wosi mu banja linu ajivwengi kuti mbakuvikilirika ndipuso kuti akondwengi.
4. Musambizengi ŵana ŵinu mwachanju
Kusambiza mwana nkhwakusuzga. Kumbi fundu za mu Bayibolu zingakuwovyani wuli? Ŵerengani Yakobe 1:19, 20, pavuli paki kambiskanani mafumbu yanga:
-
Kumbi apapi angalongo wuli chanju asani akambiskana ndi ŵana ŵawu?
-
Ntchifukwa wuli mpapi wakhumbika cha kulanga mwana waki asani wakwiya? a
5. Muvikiliyengi ŵana ŵinu
Kuti muvikiliyi ŵana ŵinu, mukhumbika kukambiskana ndi mwana weyosi nkhani zakukwaskana ndi kugonana. Venivi vingaŵa vakuchitiska soni. Woneriyani VIDIYO, pavuli paki kambiskanani mafumbu yanga:
-
Ntchifukwa wuli apapi anyaki asuzgika kukambiskana ndi ŵana ŵawu nkhani za kugonana?
-
Kumbi apapi anyaki achita wuli kuti aŵakonkhoske ŵana ŵawu nkhani zakukwaskana ndi kugonana?
Nge mo Bayibolu likukambiya, charu chaku Satana ichi chilutirizga kunangika ukongwa. Ŵerengani 2 Timote 3:1, 13, pavuli paki kambiskanani fumbu ili:
-
Ŵanthu anyaki aheni wo akambika mu vesi 13, akolere ŵana. Sonu muwona kuti ntchifukwa wuli apapi akhumbika kusambiza ŵana ŵawu nkhani zakukwaskana ndi kugonana ndipuso mo angajivikiliya ku ŵanthu ŵenaŵa?
Kumbi muziŵa?
Akaboni aku Yehova atuzga mabuku ndipuso mavidiyo nganandi ngo ngatovya apapi kusambiza ŵana ŵawu nkhani zakukwaskana ndi kugonana kweniso mo ŵana ŵawu angajivikiliya ku ŵanthu wo angaŵakolere. Mwakuyeruzgiyapu wonani:
-
“Sambizani Ŵana Ŵinu Nkhani Zakukwaskana ndi Kugonana” (Jani Masu! Na. 5 2016)
6. Mutumbikengi apapi ŵinu
ana kweniso achinyamata angalongo kuti atumbika apapi ŵawu asani alongoro nawu mwaulemu. Woneriyani VIDIYO, pavuli paki kambiskanani mafumbu.
-
Ntchifukwa wuli mwana wakhumbika kukambiskana mwaulemu ndi apapi ŵaki?
-
Kumbi mwana wangachita wuli kuti wakambiskanengi ndi apapi ŵaki mwaulemu?
Ŵerengani Nthanthi 1:8, pavuli paki kambiskanani fumbu ili:
-
Kumbi mwana wakhumbika kuchita wuli asani apapi ŵaki atimupaska ulongozgi?
7. Musopengi Yehova limoza nge banja
Banja lelosi la Akaboni aku Yehova lisankha zuŵa ndipuso nyengu kuti lisopiyengi pamoza sabata yeyosi. Kumbi ndi vinthu wuli vo vichitika pa nyengu yeniyi? Woneriyani VIDIYO, pavuli paki kambiskanani mafumbu yanga:
-
Kumbi banja lingachita wuli kuti lichitengi Kusopa kwa Pabanja nyengu zosi?
-
Kumbi mpapi wangachita wuli kuti ŵanthu wosi mubanja akondwengi kweniso ayanduwengi ndi kusopa kwa pabanja?—Wonani chithuzi cho che pakwamba pa sambiru ili.
-
Kumbi ndi vinthu wuli vo vingatondekesa banja linu kusope limoza?
Mu nyengu ya Ayisirayeli, Yehova wakhumbanga kuti mabanja ngakambiskanengi kaŵikaŵi fundu za mu Malemba. Ŵerengani Dotoronome 6:6, 7, pavuli paki kambiskanani fumbu ili:
-
Kumbi yimwi mungaligwiriskiya wuli ntchitu lemba ili?
Vo mungachita pa kusopa kwa pabanja:
-
Munganozgeke maunganu nga mpingu.
-
Mungaŵerenga ndi kukambiskana nkhani za mu Bayibolu zo ŵanthu a mubanja linu angakondwa nazu.
-
Asani mwe ndi ŵana anamana, mungapanga dawunilodi vakuti ŵana achiti pa jw.org.
-
Asani mwe ndi achinyamata, mungakambiskana nkhani za achinyamata zo zisanirika pa jw.org.
-
Mungachita seŵeru la nkhani ya mu Bayibolu limoza ndi ŵana ŵinu.
-
Mungawonere ndi kukambiskana vidiyo ya pa jw.org.
ŴANTHU ANYAKI AKAMBA KUTI: “Bayibolu ndakusuzga ukongwa, ŵana angalivwisa cha.”
-
Kumbi yimwi muwona wuli?
KUMBI MWASAMBIRANJI?
Yehova wakhumba kuti apapi ayanjengi, asambizengi ndipuso avikiliyengi ŵana ŵawu. Wakhumba so kuti ŵana atumbikengi ndi kuvwiya apapi ŵawu kweniso kuti mabanja ngamusopiyengi limoza.
Kuweriyanu
-
Kumbi apapi angasambiza wuli ŵana ŵawu kweniso kuŵavikiliya?
-
Kumbi ŵana angalongo wuli kuti atumbika apapi ŵawu?
-
Kumbi kuchita kusopa kwa pabanja sabata yeyosi kutovya wuli?
FUFUZANI
Kumbi ndi fundu nizi zo zingawovya mwana winu kuti wakuwengi ndi nkharu yamampha?
“Vinthu 6 vo Ŵana Akhumbika Kusambira” (Jani Masu! Na. 2 2019)
Wonani ulongozgi wo Bayibolu lipereka ku ŵanthu wo aphwere apapi ŵawu akukota.
“Kumbi Bayibolu Likambanji pa Nkhani ya Kuphwere Apapi Akukota?” (Nkhani ya pa webusayiti)
Wonani mo munthu munyaki wangulere umampha ŵana ŵaki chinanga kuti pakwamba waziŵanga cha mo wangalere ŵana.
Yehova Ndiyu Wangutiwovya Kuti Tiŵaleri Umampha Ŵana Ŵidu (5:58)
Wonani vo ada angachita kuti akoliyanengi ukongwa ndi ŵana ŵawu anthulumi.
a Mu Bayibolu mazu ngakuti, “kulanga” ngang’anamuwa kusambiza, kupereka ulongozgi ndipuso kuchenya. Kweni ngang’anamuwa kuŵachitiya nkhaza cha ŵana.—Nthanthi 23:13.
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
