CIIYO 50
Mbuti Mukwasyi Wanu Mboukonzya Kukkomana?—Cibeela 2
Bana ncipego kuzwa kuli Jehova. Uyanda kuti bazyali kabacilanganya kabotu cipego eeci. Jehova ulabapa malailile mabotu bazyali aakonzya kubagwasya kuzuzikizya mukuli ooyu. Kuyungizya waawo, lulayo lwakwe lulatondezya ncobakonzya kucita bana kutegwa kube lukkomano mumukwasyi.
1. Ndulayo nzi Jehova ndwapa bazyali?
Jehova uyanda kuti bazyali kababayanda bana babo alimwi akuti kabajana ciindi cinji cakuba ambabo. Alimwi uyanda kuti bazyali kabakwabilila bana babo kuzwa kuntenda zili zyoonse alimwi akuti kababelesya njiisyo zyamu Bbaibbele ciindi nobabayiisya. (Tusimpi 1:8) Waambila bamausyi kuti: ‘Amuzumanane kulela bana banu mululayo alwiiyo lwa Jehova.’ (Amubale Baefeso 6:4.) Jehova ulakkomana kubona bazyali batobela malailile aakwe ciindi nobakomezya bana babo alimwi akutapa muntu uumbi mukuli ooyu.
2. Ndulayo nzi Jehova ndwapa bana?
Jehova ulailila bana kuti: “Amubamvwide bazyali banu.” (Amubale Bakolose 3:20.) Ciindi bana nobabalemeka akubamvwida bazyali babo, bapa Jehova alimwi abazyali babo kukkomana. (Tusimpi 23:22-25) Jesu wakasiya cikozyanyo cibotu ciindi naakali mwana. Nokuba kuti wakalilondokede, wakali kubamvwida akubalemeka bazyali bakwe.—Luka 2:51, 52.
3. Mbuti mbomukonzya kutondezya kuti mulijisi cilongwe a Leza kamuli mukwasyi?
Kuti kamuli muzyali, cakutadooneka mulayanda kuti bana banu kabamuyanda Jehova mbubwenya mbuli ndinywe. Mbuti mbomukonzya kwiizuzikizya mbaakani eeyi? Kwiinda mukucita ncolyaamba Bbaibbele kuti: ‘Mweelede kuyiisya bana banu Jwi lya Jehova akulibandika ciindi nomukkede muŋanda yanu, aciindi nomweenda munzila.’ (Deuteronomo 6:7) “Kuyiisya” caamba kwiinduluka makani aamwi nomuyiisya. Mbubwenya buyo, andinywe mweelede kwiinduluka makani aamwi nomuyiisya bana banu kutegwa kabacikonzya kwaayeeya. Oolu lugwalo lwaamba kuti mweelede kujana ciindi cakubandika kujatikizya Jehova abana banu. Cilayandika kapati kuti banamukwasyi boonse kabazandula ciindi cakukomba mumukwasyi. Kuti kamutajisi bana, andinywe mulakonzya kugwasyigwa kwiinda mukuzandula ciindi cakwiiya Jwi lya Leza nsondo ansondo.
AMWIIYE ZINJI
Atulange-lange nzila zyacigaminina zikonzya kukwabilila mukwasyi akupa kuti kaukkomene.
4. Amubayiisye bana banu caluyando
Kuyiisya mwana tacili cuuba-uba. Mbuti Bbaibbele mbolikonzya kugwasya? Amubale Jakobo 1:19, 20, akubandika mibuzyo eeyi:
-
Mbuti bazyali mbobakonzya kutondezya luyando ciindi nobabandika abana babo?
-
Nkaambo nzi muzyali ncateelede kulaya bana ciindi nanyemede? a
5. Amubakwabilile bana banu
Kutegwa mubakwabilile bana banu, cilayandika kapati kubandika amwana umwi aumwi makani aakoonana. Pesi eeci cilajazya nsoni. Atweebelele VIDIYO, akubandika mibuzyo iitobela.
-
Nkaambo nzi ncocibakatazya bazyali kubandika abana babo makani aakoonana?
-
Muunzila nzi bazyali bamwi mobabapandulwida bana babo makani aakoonana?
Mbubwenya mbokwakasinsimwa, nyika ya Saatani iyaabwiindila buya kubija. Amubale 2 Timoteyo 3:1, 13, akubandika mubuzyo ooyu:
-
Bantu babyaabi ibaambidwe mukapango 13 balabatundulula bana mumakani aakoonana. Aboobo nkaambo nzi ncociyandika kuti bazyali babayiisye bana babo makani aakoonana alimwi akubagwasya kubona mbobakonzya kulikwabilila kuli basikubatundulula?
Sena Mulizyi?
Bakamboni ba Jehova balamwaya zibelesyo zinji zikonzya kugwasya bazyali kuyiisya bana babo makani aakoonana alimwi ambobakonzya kubakwabilila kuli basikubatundulula. Mucikozyanyo, amubone:
-
Amubakwabilile Bana Banu (vidiyo)
-
Amwiiye Ku Mwiiyi Mupati, cibalo 10 alimwi a 32
-
“Kuyiisya Mwanaanu Kujatikizya Makani Aakoonana” (Sinsimuka! No. 5 2016)
6. Amubalemeke bazyali banu
Bana alimwi abakubusi balakonzya kubalemeka bazyali babo munzila mbobaambaula ambabo. Atweebelele VIDIYO, akubandika mibuzyo iitobela.
-
Nkaambo nzi mwana naa mukubusi ncayelede kwaambaula cabulemu abazyali bakwe?
-
Mbuti mukubusi mbwakonzya kubandika munzila iitondezya bulemu?
Amubale Tusimpi 1:8, akubandika mubuzyo ooyu:
-
Mbuti mukubusi mbwayelede kucita ciindi bazyali bakwe nobamwaambila ncayelede kucita?
7. Amukombe Jehova mbuli mukwasyi
Mikwasyi ya Bakamboni ba Jehova ilazandula ciindi nsondo ansondo cakukomba antoomwe. Ino kukomba mumukwasyi ooku inga kwacitwa buti? Atweebelele VIDIYO, akubandika mibuzyo iitobela.
-
Mbuti mukwasyi mboukonzya kuba apulogilamu iisitikide ya Kukomba Mumukwasyi?
-
Ncinzi muzyali ncakonzya kucita kutegwa kukomba mumukwasyi kakugwasya ncobeni akukkomanisya?—Amubone cifwanikiso icili kumatalikilo aaciiyo eeci.
-
Ncinzi cikonzya kupa kuti cimuyumine mumukwasyi wanu kwiiya antoomwe?
Mu Israyeli yansiku, Jehova wakali kuyanda kuti mikwasyi kaijana ciindi cakubandika Magwalo lyoonse. Amubale Deuteronomo 6:6, 7, akubandika mubuzyo ooyu:
-
Mbuti mbomukonzya kwiibelesya njiisyo eeyi?
Mizeezo kujatikizya kukomba mumukwasyi:
-
Amulibambile miswaangano yambungano antoomwe.
-
Amubale akubandika cibalo camu Bbaibbele mukwasyi wanu ncouyookkomanina.
-
Kuti kamujisi bana basyoonto, amudaunilode naa kupulinta zibeela zyakucita izijanika a jw.org.
-
Kuti kamujisi bakubusi, amubandike zibalo zyabakubusi izijanika a jw.org.
-
Amucite cisobano camu Bbaibbele abana banu.
-
Amweebelele akubandika vidiyo iijanika a jw.org.
BAMWI BAAMBA KUTI: “Bbaibbele lilabakatazya kumvwisya bana.”
-
Ino nywebo muyeeya buti?
MUBUFWAAFWI
Jehova uyanda kuti bazyali kababayanda bana babo, kubayiisya alimwi akubakwabilila; bana kababalemeka akubamvwida bazyali babo; alimwi akuti mikwasyi kaikomba antoomwe.
Ncinzi Ncomwaiya?
-
Mbuti bazyali mbobakonzya kuyiisya bana babo akukwabilila?
-
Mbuti bana mbobakonzya kubalemeka bazyali babo?
-
Mbubotu nzi ibujanika kwiinda mukuzandula ciindi nsondo ansondo cakukomba mumukwasyi?
AMUZYIBE ZINJI
Nziiyo nzi zikonzya kugwasya mwanaanu kulibambila buumi bwakumbele aakukomena?
“Bube Buli 6 Mbobeelede Kwiiya Bana” (Sinsimuka! No. 2 2019)
Amwiiye kujatikizya lulayo Bbaibbele ndolipa baabo balanganya bazyali babo bacembeede.
“Ino Ncinzi Bbaibbele Ncolyaamba Kujatikizya Kulanganya Bazyali Bacembeede?” (Cibalo caaintaneti)
Amubone muzyali iwatakacizyi kukomezya bana mbwaakaba muzyali uuzwidilide.
Jehova Wakatuyiisya Mbotwakeelede Kukomezya Bana Besu (5:58)
Amubone bamausyi mbobakonzya kuyumya cilongwe abana babo basankwa.
“Ino Bamausyi Inga Bayanzana Buti Abana Babo Basankwa?” (Ngazi Yamulindizi, January 1, 2012)
a Mu Bbaibbele, “lulayo” lwaamba kulailila, kusololela alimwi akululamika. Kunyina nolwaamba kutundulula naa kupenzya.—Tusimpi 4:1.
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
