LESEN 50
Hau Bai Famili Bilong Yu Inap Stap Amamas?—Hap 2
Ol pikinini em presen i kam long Jehova. Em i laik bai ol papamama i lukautim gut dispela presen. Jehova i givim ol gutpela edvais we inap helpim ol papamama long mekim olsem. Tok bilong em i soim olsem ol pikinini tu inap mekim ol samting bilong helpim famili i stap amamas.
1. Jehova i givim wanem gutpela edvais long ol papamama?
Jehova i laik bai ol papamama i laikim ol pikinini na lusim bikpela haptaim wantaim ol. Na tu, em i laik bai ol papamama i banisim gut ol pikinini long ol samting nogut inap bagarapim ol, na yusim ol stiatok bilong Baibel long skulim ol. (Provep 1:8) Em i tokim ol papa: “Oltaim yupela i mas mekim bikpela long ol [pikinini bilong yupela] olsem Jehova i makim, na putim tingting bilong em long bel bilong ol.” (Ritim Efesus 6:4.) Jehova i amamas taim ol papamama i bihainim ol tok bilong em na mekim bikpela long ol pikinini, na ol i no givim dispela wok i go long narapela man.
2. Jehova i givim wanem edvais long ol pikinini?
Jehova i tokim ol pikinini: “Bihainim tok bilong papamama bilong yupela.” (Ritim Kolosi 3:20.) Taim ol pikinini i rispektim na bihainim tok bilong papamama, ol i mekim Jehova na papamama i amamas. (Provep 23:22-25) Jisas i stap gutpela piksa taim em i bin stap pikinini. Maski Jisas i gutpela olgeta, em i save bihainim tok bilong papamama na rispektim ol.—Luk 2:51, 52.
3. Hau bai yupela i ken pas gut wantaim God olsem wanpela famili?
Sapos yu wanpela papa o mama, yu laik bai ol pikinini bilong yu i laikim tru Jehova wankain olsem yu. Hau yu ken helpim ol long mekim olsem? Taim yu mekim samting Baibel i tok long en: “Yupela i mas skulim ol pikinini bilong yupela long ol [tok bilong Jehova] na tokim ol long taim yupela i stap long haus na long taim yupela i wokabaut long rot.” (Lo 6:7) Long futnot bilong Lo 6:7, dispela tok “skulim” ol inap tanim tu olsem kolim kolim gen. Yu save olsem planti taim yu mas kolim kolim gen samting long ol pikinini na bai ol i tingim. Dispela skripsa i makim olsem long olgeta taim yu mas painim rot bilong toktok wantaim ol pikinini bilong yu long Jehova. Em gutpela tingting long makim taim long olgeta wik bilong mekim famili lotu wantaim. Maski yu no gat pikinini, yu ken makim taim long olgeta wik bilong stadi long Tok Bilong God, na dispela bai helpim yu.
KISIM SAMPELA SAVE MOA
Skelim ol dispela gutpela tok we inap helpim famili long stap amamas na stap gut.
4. Mekim pasin laikim taim yu skulim ol pikinini
Wok bilong skulim pikinini i gat ol hatwok bilong en. Hau Baibel i ken helpim yu? Ritim Jems 1:19, 20, na stori long ol dispela askim:
-
Olsem wanem ol papamama i ken soim pasin laikim taim ol i toktok wantaim ol pikinini bilong ol?
-
Wai na papa o mama i no ken stretim pikinini long taim em i belhat? a
5. Banisim gut ol pikinini bilong yu
Bilong banisim ol pikinini bilong yu, em i bikpela samting long toktok wantaim wan wan pikinini long ol samting bilong maritpasin. Ating bai yu pilim hatwok long mekim olsem. Pilaim VIDIO, na stori long ol dispela askim.
-
Wai na sampela papamama i pilim hatwok long toktok wantaim ol pikinini long ol samting bilong maritpasin?
-
Long wanem ol rot sampela papamama i stori gut wantaim ol pikinini long ol samting bilong maritpasin?
Olsem Baibel i tok profet long en, dispela graun bilong Satan i wok long go nogut moa yet. Ritim 2 Timoti 3:1, 13, na stori long dispela askim:
-
Sampela bilong ol man nogut em ves 13 i kolim, ol i man bilong mekim pasin sem long ol pikinini. So wai na em i bikpela samting long ol papamama i skulim ol pikinini long ol samting bilong maritpasin na hau ol i ken banisim ol yet long ol man bilong mekim pasin sem long ol?
Yu save long dispela?
Ol Witnes Bilong Jehova i wokim planti pablikesen we i helpim ol papamama long skulim ol pikinini long ol samting bilong maritpasin, na bilong banisim ol long ol man nogut. Olsem, lukim:
-
Kisim Skul Long Bikpela Tisa, sapta 10 na 32
-
“Skulim Pikinini Bilong Yu Long Samting Bilong Maritpasin” (Kirap! No. 5 2016)
6. Rispektim papamama bilong yu
Ol liklik pikinini na ol tineja i ken soim rispek long ol papamama bilong ol long wei ol i toktok long ol. Pilaim VIDIO, na stori long ol dispela askim.
-
Wai na em i gutpela samting long yangpela i toktok wantaim papamama long pasin rispek?
-
Hau bai yangpela i ken toktok wantaim papamama long wei i soim olsem em i givim ona long ol?
Ritim Provep 1:8, na stori long dispela askim:
-
Yangpela i mas mekim wanem taim papamama i tokim em long samting em i mas mekim?
7. Famili i lotuim Jehova wantaim
Ol famili bilong ol Witnes Bilong Jehova i save makim wanpela taim long olgeta wik bilong mekim lotu wantaim. Yupela i ken mekim wanem long taim bilong famili lotu? Pilaim VIDIO, na stori long ol dispela askim.
-
Olsem wanem ol famili inap mekim famili lotu long olgeta taim?
-
Papa o mama i ken mekim wanem ol samting na bai famili lotu i helpim famili na givim amamas long ol?—Lukim fes piksa bilong dispela lesen.
-
Wanem samting inap mekim na i hatwok long yupela i stadi wantaim?
Long Israel bilong bipo, Jehova i laik bai ol famili i toktok wantaim long tok bilong Baibel long olgeta de. Ritim Lo 6:6, 7, na stori long dispela askim:
-
Olsem wanem yupela inap bihainim dispela stiatok?
Sampela rot bilong mekim famili lotu:
-
Redim ol miting bilong kongrigesen.
-
Ritim na toktok wantaim long wanpela stori bilong Baibel we famili bai amamas long en.
-
Sapos yu gat ol liklik pikinini, daunlodim o prinim wanpela ektiviti bilong ol pikinini i stap long jw.org.
-
Sapos yu gat ol tineja pikinini, stori wantaim ol long ol atikol bilong ol tineja i stap long jw.org.
-
Yupela wantaim ol pikinini i ken ektim wanpela stori bilong Baibel.
-
Watsim na stori long wanpela vidio long jw.org/tpi.
SAMPELA MAN I TOK: “Tok bilong Baibel i hatwok long ol pikinini i kliagut long en.”
-
Bai yu tok wanem?
OL BIKPELA POIN
Jehova i laik bai ol papamama i laikim, skulim, na banisim gut ol pikinini bilong ol; em i laik ol pikinini i rispektim na bihainim tok bilong papamama; na em i laik ol famili i mas lotuim em wantaim.
Riviu
-
Olsem wanem ol papamama i ken skulim na banisim ol pikinini?
-
Hau ol pikinini inap soim ona long papamama bilong ol?
-
Wanem gutpela samting inap kamap taim famili i makim taim bilong mekim lotu wantaim long olgeta wik?
MEKIM WOK PAINIMAUT
Wanem ol lesen bai redim ol pikinini bilong yu taim ol i kamap bikpela?
Kisim save long ol gutpela edvais em Baibel i givim bilong helpim lain i lukautim ol lapun papamama.
“Baibel i Tok Wanem Long Wok Bilong Lukautim Lapun Papamama?” (Atikol long websait)
Lukim hau wanpela man husat i no save long mekim bikpela long ol pikinini i kamap wanpela gutpela papa.
Skelim hau ol papa inap strongim pasin bilong pas gut moa wantaim ol pikinini man bilong ol.
“Olsem Wanem Ol Papa i Ken Pas Gut Wantaim Pikinini Man Bilong Ol?” (Wastaua, Novemba 1, 2011)
a Long Baibel, dispela tok “stretim” i makim pasin bilong skulim, stiaim, na helpim pikinini long senisim ol tingting na pasin kranki bilong em. Em i no makim hatpela pasin o paitim nogut tru pikinini.—Provep 4:1.
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
