DYONDZO 50
I Yini Lexi Nga Endlaka Ndyangu Wa Wena Wu Tsaka?—Xiyenge 2
Vana i nyiko leyi humaka eka Yehovha. U lava leswaku vatswari va yi khoma kahle nyiko yoleyo. Yehovha u nyika vatswari xitsundzuxo xa vutlhari lexi nga va pfunaka ku endla tano. Xitsundzuxo xakwe xi tlhela xi pfuna ni vana leswaku va endla swo karhi leswaku ndyangu hinkwawo wu tsaka.
1. Hi xihi xitsundzuxo lexi Yehovha a xi nyikaka vatswari?
Yehovha u lava leswaku vatswari va rhandza vana va vona va tlhela va tinyika nkarhi wo va na vona hilaha va nga kotaka hakona. Nakambe u lava leswaku vatswari va sirhelela vana va vona eka makhombo ni ku va kurisa hi milawu ya Bibele. (Swivuriso 1:8) U byela vatatana a ku: “[Kurisani vana va n’wina] hi swileriso swa Yehovha.” (Hlaya Vaefesa 6:4.) Yehovha wa tsaka loko vatswari va landzela nkongomiso wakwe loko va kurisa vana va vona naswona va nga nyiki munhu un’wana vutihlamuleri bya vona bya ku va kurisa.
2. Hi xihi xitsundzuxo lexi Yehovha a xi nyikaka vana?
Yehovha u lerisa vana a ku: “Yingisani vatswari va n’wina.” (Hlaya Vakolosa 3:20.) Loko vana va xixima vatswari va vona va tlhela va va yingisa, va tsakisa Yehovha swin’we ni vatswari va vona. (Swivuriso 23:22-25) Yesu u ve xikombiso lexinene emhakeni leyi loko a ha ri n’wana. Hambileswi a a hetisekile, u yingise vatswari vakwe a tlhela a va xixima.—Luka 2:51, 52.
3. Mi nga tshinela njhani eka Xikwembu mi ri ndyangu?
Loko u ri mutswari, a swi kanakanisi leswaku u lava leswaku vana va wena va rhandza Yehovha hilaha u n’wi rhandzaka hakona. U nga swi endla njhani sweswo? Hi ku endla leswi Bibele yi swi vulaka: “U fanele u ma dyondzisa vana va wena [marito ya Yehovha] hi ku phindhaphindha naswona u vulavula ha wona loko u tshamile ekaya niloko u ri endleleni.” (Deteronoma 6:7) A swi kanakanisi leswaku wa swi tiva leswaku mikarhi yo tala u fanele u phindhaphindha swilo eka vana va wena leswaku va ta swi tsundzuka. Tsalwa leri ri vula leswaku nkarhi ni nkarhi u fanele u lava tindlela to dyondzisa vana va wena hi Yehovha. I swinene leswaku ndyangu hinkwawo wu tivekela nkarhi vhiki ni vhiki wo dyondza Bibele. Loko mi nga ri na vana, na n’wina mi ta vuyeriwa loko mi tinyika nkarhi wo dyondza Rito ra Xikwembu vhiki ni vhiki.
ANAKANYISISA
Xiya swiringanyeto leswi pfunaka hinkwavo endyangwini leswaku va titwa va sirhelelekile naswona va tsakile.
4. Letela vana va wena hi ndlela ya rirhandzu
Ku letela vana swi nga tika. Bibele yi nga ku pfuna njhani? Hlaya Yakobo 1:19, 20, ivi mi bula hi swivutiso leswi:
-
Vatswari va nga swi kombisa njhani leswaku va va rhandza vana va vona loko va vulavula na vona?
-
Hikwalaho ka yini mutswari a nga fanelanga nikatsongo a tshinya n’wana wakwe a hlundzukile? a
5. Sirhelela vana va wena
Leswaku u sirhelela vana va wena, i swa nkoka leswaku u vulavula ni n’wana ha un’we hi timhaka ta masangu. Sweswo swi nga ha ku tikela. Tlanga VHIDIYO, ivi mi bula hi swivutiso leswi landzelaka.
-
Hikwalaho ka yini swi va tikela vatswari van’wana ku vulavula ni vana va vona hi timhaka ta masangu?
-
Vatswari van’wana va va hlamusele njhani vana va vona hi timhaka ta masangu?
Hilaha ku profetiweke hakona, misava ya Sathana yi ya yi nyanya ku biha. Hlaya 2 Timotiya 3:1, 13, ivi mi bula hi xivutiso lexi:
-
Van’wana va vanhu vo homboloka lava ku vulavuriwaka hi vona eka ndzimana 13 va xanisa vana hi timhaka ta masangu. Kutani, hikwalaho ka yini swi ri swa nkoka leswaku vatswari va dyondzisa vana va vona hi timhaka ta masangu ni ndlela leyi va nga tisirhelelaka ha yona eka lava xanisaka van’wana hi timhaka ta masangu?
Xana a wu swi tiva?
Timbhoni ta Yehovha ti humesa mikandziyiso yo tala leyi pfunaka vatswari ku dyondzisa vana va vona hi timhaka ta masangu ni ku va sirhelela leswaku va nga xanisiwi. Hi xikombiso, vona:
-
Sirhelelani Vana Va N’wina (vhidiyo)
-
“Dyondzisa N’wana Wa Wena Hi Timhaka Ta Masangu” (Xalamuka! No. 5 2016)
6. Xixima vatswari va wena
Vana ni vantshwa va nga xixima vatswari va vona hi ndlela leyi va vulavulaka na vona ha yona. Tlanga VHIDIYO, ivi mi bula hi swivutiso leswi landzelaka.
-
Hikwalaho ka yini swi ri swa nkoka leswaku muntshwa a vulavurisana ni vatswari vakwe hi xichavo?
-
Muntshwa a nga vulavurisana njhani ni vatswari vakwe hi ndlela leyi kombisaka xichavo?
Hlaya Swivuriso 1:8, ivi mi bula hi xivutiso lexi:
-
Muntshwa u fanele a endla yini loko vatswari vakwe va n’wi byela leswi a faneleke a swi endla?
7. Gandzelani Yehovha mi ri ndyangu
Mindyangu ya Timbhoni ta Yehovha yi tinyika nkarhi wo gandzela Yehovha swin’we vhiki ni vhiki. Vugandzeri byolebyo bya ndyangu byi nga endliwa njhani? Tlanga VHIDIYO, ivi mi bula hi swivutiso leswi landzelaka.
-
Ndyangu wu nga endla njhani leswaku wu va ni Vugandzeri bya Ndyangu nkarhi na nkarhi?
-
Mutswari a nga endla yini leswaku vugandzeri bya ndyangu byi vuyerisa naswona byi tsakisa?—Vona xifaniso lexi nga eku sunguleni ka dyondzo leyi.
-
I yini leswi nga endlaka swi tika leswaku mi dyondza swin’we tanihi ndyangu?
Le Israyele wa khale, Yehovha a a lava leswaku mindyangu yi bula hi Matsalwa nkarhi na nkarhi. Hlaya Deteronoma 6:6, 7, ivi mi bula hi xivutiso lexi:
-
U nga swi endla njhani leswi vuriwaka hi tsalwa leri?
Leswi mi nga swi endlaka eka vugandzeri bya ndyangu:
-
Lunghiselelani tinhlengeletano ta vandlha.
-
Hlayani mi tlhela mi bula hi xitori xa le Bibeleni lexi ndyangu wa n’wina wu nga ta xi tsakela.
-
Loko mi ri ni vana lavatsongo, dawuniloda kumbe u pirinta switoloveto swa vana eka jw.org.
-
Loko mi ri ni vantshwa, bulani na vona hi nhlokomhaka yo karhi ya vantshwa leyi nga eka jw.org.
-
Tlangani xitori xa le Bibeleni ni vana va n’wina.
-
Hlalelani vhidiyo leyi nga eka jw.org ivi mi bula ha yona.
VAN’WANA VA RI: “Vana a va nge yi twisisi Bibele ya tika.”
-
A wu ta ku yini?
NKATSAKANYO
Yehovha u lava leswaku vatswari va rhandza vana va vona, va va letela va tlhela va va sirhelela; vana vona u lava va xixima vatswari va vona va tlhela va va yingisa; naswona u lava leswaku mindyangu yi n’wi gandzela swin’we.
Mpfuxeto
-
Vatswari va nga va letela njhani vana va vona va tlhela va va sirhelela?
-
Vana va nga va xixima njhani vatswari va vona?
-
Hi byihi vuyelo bya ku va ndyangu wu tinyika nkarhi wa ku gandzela Yehovha swin’we vhiki ni vhiki?
KUMA LESWI ENGETELEKEKE
Hi tihi tidyondzo leti nga endlaka n’wana wa wena a lunghekela ku va munhu lonkulu?
“Swilo Swa Tsevu Leswi Vana Va Faneleke Va Swi Dyondza” (Xalamuka! No. 2 2019)
Twana xitsundzuxo lexi Bibele yi xi nyikaka lava khathalelaka vatswari lava dyuhaleke.
“Bibele Yi Ri Yini Hi Ku Hlayisa Vatswari Lava Dyuhaleke?” (Nhlokomhaka leyi kumekaka eka website)
Vona ndlela leyi wanuna loyi a a nga swi koti ku kurisa vana a veke tatana la kotaka ku va kurisa.
Twana leswi vatatana va nga swi endlaka leswaku va hanyisana kahle ni vana va vona va majaha.
a EBibeleni, “ndzayo” yi vula ku dyondzisa, ku kongomisa ni ku lulamisa. A yi si tshama yi vula ku xanisa kumbe ku xupula hi ndlela ya tihanyi.—Swivuriso 4:1.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
