LDJONDZO 50
U Nga Yentxa Yini Swaku Ndjangu Wa Wena Wu Tshama Na Wu Tsakile? — Xiyenge 2
Vana i nkateko lowu taka hi ka Yehovha. A lava swaku vapsali va va hlayisa kahle vana va vona. Yehovha a va nyika minawu leyi nga va pfunaka swaku va yentxa leswo. Naswona minawu leyi yi nga pfuna ni vana ku vona leswi va nga swi yentxaka swaku wutomi li tsakisa andjangwini.
1. I mpsini leswi Yehovha a lavaka swaku vapsali va swi yentxa?
Yehovha a lava swaku vapsali va rhandza vana va vona va tlhela va heta nkama wa wunyingi na va li na vona. A lava swaku vapsali va vhikela vana va vona va tlhela va tirhisa minawu ya Bibele swaku va va djondzisa. (Swivuriso 1:8) A byela vapapayi a ku: ‘Kulisani [vana va n’wina] hi . . . ku va djondzisa minawu ya Yehovha.’ (Lerha Vaefeza 6:4.) Yehovha wa tsaka loko vapsali va yentxa leswi yena a swi lavaka, ku nga ku djondzisa vana va vona hi voxe, va nga va nyikeli ka vanhu van’wana swaku va va djondzisa.
2. I mpsini leswi Yehovha a lavaka swaku vana va swi yentxa?
Yehovha a byela vana a ku: “Yingisani vapsali va n’wina”. (Lerha Vakolosa 3:20.) Loko vana va hlonipha vapsali va vona, Yehovha wa tsaka funtshi ni vapsali va vona va tsaka. (Swivuriso 23:22-25) Yesu a a li xikombiso xa xinene nkama na a li mutsongo. Hambileswi a a nga na xidjoho a a yingisa vapsali va yena a tlhela a va hlonipha. — Luka 2:51, 52.
3. Wu nga yentxa yini ndjangu swaku wu va ni wunghanu la ku tiya ni Xikwembu?
Loko u li mupsali ha tiyiseka swaku u lava leswaku vana va wena va rhandza Yehovha ku fana na wena. Kambe u nga swi kotisa ku yini leswo? Hi ku yentxa leswi Bibele li swi vulaka, lona li li: “[Marito ya Yehovha] u fanele u ma djondzisa vana va wena hi ku phindhaphindha, ni ku vulavula hi wona loko u tshamile kaya ka wena, ni loko u famba andleleni”. (Deteronoma 6:7) Minkama yin’wana swi lava u phindhaphindha leswi u djondzisaka vana va wena swaku va nga swi khohlwi. Ndzimana leyi yi kombisa swaku minkama hinkwayu u fanele u lavetela tindlela ta ku vulavula ni vana va wena hi Yehovha. I swinene swaku ndjangu hinkwawu wu tinyika nkama vhiki ni vhiki swaku wu djondza Bibele xikan’we. Ni loko u nga na vana, i swinene swaku u tinyika nkama wa ku djondza Bibele vhiki ni vhiki.
DJONDZA SWIN’WANA
Vona leswi nga pfunaka ndjangu wa wena swaku wu tsaka wu tlhela wu hlayiseka.
4. Djondzisa vana va wena hi lirhandzu
Ku djondzisa vana swi nga ha karhata. Kambe Bibele li nga ku pfunisa ku yini? Lerhani Yakobo 1:19, 20, mi gama mi bula hi swivutiso leswi landzelaka:
-
Vapsali va nga vulavulisa ku yini hi lirhandzu ni vana va vona?
-
Hi mhaka muni vapsali va nga fanelanga va laya vana va vona na va va kwatelile? a
5. Vhikela vana va wena
Leswaku u vhikela vana va wena i swa lisima hintamu ku vulavula na vona hi swa masangu. Phela leswi swi nga ha danisa kambe swa laveka. Sixtirani VHIDIYO, mi gama mi bula hi swivutiso leswi landzelaka.
-
Hi mhaka muni swi karhata swaku vapsali va vulavula ni vana va vona hi swa masangu?
-
Vapsali van’wana va va tlhamuselisa ku yini vana va vona hi swa masangu?
Hi lani Bibele li nga vula hi kona, misava leyi ya Sathana yi ya yi biha hintamu. Lerhani 2 Timotiyu 3:1, 13, mi gama mi bula hi xivutiso lexi landzelaka:
-
Vanhu van’wana va ku biha lava ku vulavuliwaka hi vona ka ndzimana 13 va pfinya swivanana. Se hi mhaka muni swi li swa lisima swaku vapsali va djondzisa vana va vona hi swa masangu ni swaku va nga tivhikelisa ku yini ka vanhu lava pfinyaka swivanana?
Indje a wu swi tiva?
Timboni ta Yehovha ti ni mabuku ni mavhidiyo ya manyingi lawa ma nga pfunaka vapsali swaku va djondzisa vana va vona hi swa masangu va tlhela va va vhikela swaku va nga pfinyiwi. Vona swikombiso swin’wana:
6. N’wina vana, hloniphani vapsali va n’wina
Vana ni majovhem va nga kombisa swaku va hlonipha vapsali va vona hi mavulavulelo ya vona. Sixtirani VHIDIYO, mi gama mi bula hi swivutiso leswi landzelaka.
-
Hi mhaka muni swi li swa lisima swaku vana va tikarhatela ku vulavula ni vapsali?
-
Vana va nga vulavulisa ku yini ni vapsali va vona hi ndlela ya xihlonipho?
Lerhani Swivuriso 1:8, mi gama mi bula hi xivutiso lexi landzelaka:
-
Vana va fanele va yentxa yini loko vapsali va va byela leswi va faneleke va swi yentxa?
7. Gandzelani Yehovha hi ndjangu
Mindjangu ya Timboni ta Yehovha yi veka nkama vhiki ni vhiki swaku yi gandzela Yehovha xikan’we. Li yentxisiwa ku yini wugandzeli lolelo la ndjangu? Sixtirani VHIDIYO, mi gama mi bula hi swivutiso leswi landzelaka.
-
Ndjangu wu nga yentxa yini swaku wu va ni wugandzeli la ndjangu vhiki ni vhiki?
-
Vapsali va nga yentxa yini swaku wugandzeli la ndjangu li tsakisa li tlhela li djondzisa? — Vona foto leli nga kusunguleni ka djondzo leyi.
-
I mpsini swi nga yentxaka swaku swi karhata ku va mi djondza xikan’we?
Aminkameni ya Vayisrayele, Yehovha a a lava swaku mindjangu yi bula hi Matsalwa nkama ni nkama. Lerhani Deteronoma 6:6, 7, mi gama mi bula hi xivutiso lexi landzelaka:
-
Hi nga yi tirhisisa ku yini ndzimana leyi?
Leswi mi nga swi yentxaka ka wugandzeli la ndjangu:
-
Lunghiselelani mintlhanganu ya bandla.
-
Lerhani mhaka leyi nga ka Bibele leyi ndjangu wa n’wina wu yi rhandzaka mi gama mi bula hi yona.
-
Loko mi ni vana va vatsongo, baxarani kumbe mi imprimira mintirho leyi djondzisaka vana leyi nga ka site la jw.org.
-
Loko mi ni vana va majovhem bulani hi tinhlokomhaka ta majovhem leti nga ka site la jw.org.
-
Hambani drama la Bibele ni vana va n’wina.
-
Sixtirani mi tlhela mi bula hi vhidiyo leli nga ka site la jw.org.
VAN’WANA VA LI: “A vana a va nge li twisisi Bibele hikusa la karhata.”
-
Wena a wu ta ku yini?
LESWI HI NGA SWI DJONDZA
Yehovha a lava swaku vapsali va rhandza vana va vona, va va djondzisa va tlhela va va vhikela, a lava swaku vana va hlonipha va tlhela va yingisa vapsali va vona, ni swaku mindjangu yi mu gandzela na yi li xikan’we.
Ku kambela leswi hi nga swi djondza
-
Vapsali va nga yentxa yini swaku va djondzisa va tlhela va vhikela vana va vona?
-
Vana va nga va hloniphisa ku yini vapsali va vona?
-
Hi mhaka muni swi li swa lisima swaku ndjangu wu va ni wugandzeli la ndjangu vhiki ni vhiki?
LOKO U LAVA KU TIVA SWIN’WANA
Hi tini tidjondzo leti nga pfunaka n’wana wa wena loko a ta kula?
“6 wa Swilo Leswi Vana Va Faneleke Va Djondzisiwa Swona” (Khindlimuka! wa N.º 2 wa 2019)
Djondza leswi Bibele li nga va pfunisaka xiswona lava hlayisaka vapsali va vona lava se va nga guga.
Vona leswi nga pfuna wanuna mun’we swaku a va papayi wa munene hambileswi a a nga swi tivi swaku a nga va kulisisa ku yini vana va yena.
Vona swaku vapapayi va nga yentxa yini swaku va twana ni vana va vona va madjaha.
a Ka Bibele, ‘ku laya’ swi vula ku djondzisa, ku kongomisa n’wana ni ku mu pfuna swaku a txintxa mapimiselo ya ku biha ni mahanyelo ya ku biha. A swi vuli ku mu khatisa hi ndlela ya mona kumbe ku mu hlupha. — Swivuriso 4:1.
