ISOMO 50

Eka Yaawe n’Esobora Eta Kubamu Okusemererwa?—Ekicweka 2

TEKAHO

Abaana kisembo kuruga hali Yahwe. N’agonza abazaire barolerre kurungi ekisembo eki. Yahwe aha abazaire obuhabuzi oburabakonyera kukikora. Obuhabuzi bwe bwoleka abaana ekibasemeriire kukora kuleeta okusemererwa omu ka.

1. Buhabuzi ki Yahwe obwarukuha abazaire?

Yahwe n’agonza abazaire bagonze abaana baabo kandi bamale nabo obwire nk’oku kirukusoboka. Ekindi, n’agonza abazaire balinde abaana baabo batahikwaho akabi kandi babatendeke nibasigikiirra ha misingi ya Baibuli. (Enfumo 1:8) N’agambira ba taata ati: ‘Abaana banyu mubalerege omu . . . kugambirirwa kwa Mukama.’ (Soma Abefeso 6:4.) Kisemeza Yahwe, abazaire obubahondera oburagirizi bwe obubarukuba nibakuza abaana baabo kandi bakatwara obujunanizibwa kubekuliza batabuhaire omuntu ondi.

2. Buhabuzi ki Yahwe obwarukuha abaana?

Yahwe aragira abaana ati: “Muhurrege ababazaire.” (Soma Abakolosai 3:20.) Abaana obubatekamu ekitiinisa abazaire baabo kandi bakaborobera, basemeza Yahwe n’abazaire baabo. (Enfumo 23:22-25) Yesu akatekaho ekyokurorraho ekirungi obw’akaba akyali muto. N’obukiraaba ngu akaba ahikiriire, akorobera abazaire be kandi yabatekamu ekitiinisa.—Luka 2:51, 52.

3. Nimusobora muta kwirra haihi na Ruhanga nk’eka?

Obworaaba oli muzaire, hataroho kugurukyagurukya n’ogonza abaana baawe bagonze Yahwe nk’oku iwe orukumugonza. N’osobora ota kuhikiriza ekigendererwa kinu? Kurabira omu kukora Baibuli ekyegamba: “[Ebigambo bya Yahwe] oyekambege okubyegesa abana bawe, kandi obazege hali ebi obwoikarra omu nju yawe, kandi obwogenda omu muhanda.” (Ekyebiragiro 6:7) Okwegesa kunu nikutwarramu kwikara n’obagarukiramu eby’obegeseze. N’osobora kuba okimanyire ngu kyetaagisa kwikara n’ogarukiramu abaana baawe ekintu nukwo bakiijukege. Ekyahandiikirwe kinu nikimanyisa ngu osemeriire kukozesa akagisa koona ak’oratunga kwegesa abaana baawe hali Yahwe. Kirungi kutaho obwire obw’okuramya hamu nk’eka buli wiiki. N’obumurukuba mutaine abaana, nabwo nimwija kugasirwa obumuratunga obwire obw’okwesomesa Ekigambo kya Ruhanga buli wiiki.

YEGA EBIRUKUKIRAHO

Tekerezaaho amagezi ganu agasobora kuleetera eka kubamu okusemererwa n’obulinzi.

4. Tendeka abaana baawe n’okugonza

Tikyanguhire kutendeka omwana. Baibuli n’esobora kukukonyera eta? Musome Yakobo 1:19, 20, hanyuma mubazeeho ebikaguzo binu:

Abazaire nibasobora bata kwoleka okugonza obubarukuba nibabaza n’abaana baabo?
Habwaki omuzaire atasemeriire kuhana abaana be aine ekiniga? a

5. Linda abaana baawe

Kusobora kulinda abaana baawe, kikuru muno obazeeho na buli mwana ebirukukwata ha kuterana. Kinu nikisobora kuzooka nk’ekirukuswaza. Mutekeho VIDIYO, hanyuma mubazeeho ebikaguzo binu.

VIDIYO: Linda Abaana Baawe Batahikwaho Akabi (2:58)

Habwaki abazaire abamu kibagumira kubaza n’abaana baabo ha kuterana?
Abazaire abamu basoboire bata kusoborra abaana baabo ebirukukwata ha kuterana?

Nk’oku kyarangirwe kara, ensi ya Sitaani n’eyeyongera kusisikara. Musome 2 Timoseo 3:1, 13, hanyuma mubazeeho ekikaguzo kinu:

Bamu h’abantu abarukubazibwaho omu rukarra 13 basobyaho abaana. Nahabweki, habwaki kikuru abazaire kwegesa abaana baabo ebirukukwata ha kuterana kandi n’omulingo basobora kwerinda abo abasobora kubasobyaho?

Obaire okimanyire?

Abakaiso ba Yahwe baturukya ebintu bingi ebikonyera abazaire kwegesa abaana baabo ebirukukwata ha kuterana hamu n’okubalinda batabasobyaho. Ekyokurorraho, rora:

Linda Abaana Baawe (vidiyo)
Learn From the Great Teacher, esuura 10 na 32
“Kwegesa Abaana Baawe Ebirukukwata ha Kuterana” (Awake! Na. 5 2016)

6. Tekamu abazaire baawe ekitiinisa

Abaana abakyali bato hamu n’ensiganto nibasobora kwoleka ngu nibatekamu abazaire baabo ekitiinisa kurabira omu mulingo babazaamu nabo. Mutekeho VIDIYO, hanyuma mubazeeho ebikaguzo ebirukuhonderaho.

VIDIYO: Nsobora Nta Kubaza n’Abazaire Bange? (2:19)

Habwaki kiri kirungi omwana kubaza na bazaire be omu mulingo ogw’ekitiinisa?
Omwana n’asobora ata kubaza n’abazaire be omu mulingo ogurukwoleka ngu n’abatamu ekitiinisa?

Musome Enfumo 1:8, hanyuma mubazeeho ekikaguzo kinu:

Omwana asemeriire kwetwaza ata bazaire be obubamugambira eky’okukora?

7. Muramye Yahwe nk’enka

Buli wiiki amaka g’Abakaiso ba Yahwe gataho obwire obw’embaganiza obw’okuramiza hamu nk’eka. Biki ebisobora kukorwa omu kuramya kw’eka? Mutekeho VIDIYO, hanyuma mubazeeho ebikaguzo ebirukuhonderaho.

VIDIYO: Okuramya kw’Eka—Obulemeezi n’Ebirungi Ebirugamu (8:04)

Eka n’esobora eta kuba n’entekaniza ey’Okuramya okw’Eka butoosa?
Kiki abazaire ekibasobora kukora kurora ngu okuramya kw’eka kwasemera kandi kwagasira buli omu?—Rora ekisisani ekiri ha kutandika kw’isomo linu.
Kiki ekisobora kulemesa eka kuba n’okuramya kw’eka?

Omu Isaleri eya kara, Yahwe yagonzaga amaka kubazaaho Ebyahandiikirwe butoosa. Musome Ekyebiragiro 6:6, 7, hanyuma mubazeeho ekikaguzo kinu:

N’osobora ota kuteeka omusingi gunu omu nkora?

Ebimusobora kukora omu kuramya kw’eka:

Mutekanize ensorrokano z’ekitebe.
Musome kandi mubazeeho ebyahandiikirwe ab’omu ka yaawe ebibarayegondezaamu.
Obumuraaba mwine abaana abato, nimusobora kuhanura rundi kupuritinga orupapura kuruga ha jw.org oruroho ebikaguzo by’abaana.
Obumuraaba mwine abaana abakyali nsinganto, mubazeeho kimu ha bicweka by’ensiganto ebiri ekiri ha jw.org.
Muzaane emizaano ey’erukusigikirra ha Baibuli.
Murole vidiyo kuruga ha jw.org kandi mugibazeeho.

ABANTU ABAMU BAGAMBA: “Baibuli egumire muno abaana tibasobora kugyetegereza.”

Wakugarukiremu ota?

OYEGERE KI?

Yahwe n’agonza abazaire bagonze abaana baabo, babatendeke kandi babalinde. N’agonza abaana batekemu abazaire baabo ekitiinisa kandi baborobere. Ekindi n’agonza ab’omu maka bamuramize hamu.