MATAUPU 50
E Mafai Pefea o Fia‵fia Tou Kāiga?—Vaega 2
A tama‵liki ne meaalofa mai i a Ieova. E fakamoemoe a ia ke tausi faka‵lei ne mātua te meaalofa tenā. Ne tuku mai ne Ieova a pati fakatonutonu aoga ke fesoasoani atu ki mātua. E aoga foki ana pati fakatonutonu ki tama‵liki ke fesoasoani atu i te faiga o te kāiga ke fiafia.
1. Ne a pati fakatonutonu ne tuku atu ne Ieova ki mātua?
E fakamoemoe a Ieova ke a‵lofa a mātua ki olotou tama‵liki kae ke fakamāumāu a taimi e uke fakatasi mo latou. E manako foki a ia ke puipui ne mātua olotou tama‵liki mai mea fakalogo‵mae kae ke fakaaoga foki a akoakoga fakavae i te Tusi Tapu ke akoako ei latou. (Faataoto 1:8) E fai atu a ia ki tamana: “Ke puti aka faeloa [otou tama‵liki] i . . . fakatakitakiga a Ieova.” (Faitau te Efeso 6:4.) E fiafia a Ieova māfai e tau‵tali a mātua ki te fakatonuga tenā i te putiakaga o olotou tama‵liki, kae e se tuku atu te tiute tenā ki se isi tino.
2. Ne a pati fakatonutonu ne tuku atu ne Ieova ki tama‵liki?
Ne fakatonu atu a Ieova ki tama‵liki: “Ke faka‵logo ki otou mātua.” (Faitau te Kolose 3:20.) Kafai e āva kae faka‵logo a tama‵liki ki olotou mātua, ko fai ne latou ke fiafia a Ieova, penā foki olotou mātua. (Faataoto 23:22-25) Ne tuku mai ne Iesu se fakaakoakoga ‵lei i te taimi koi foliki ei a ia. E tiga eiloa e ‵lei katoatoa a ia, ne fakalogo kae ne āva a ia ki ana mātua.—Luka 2:51, 52.
3. E momea aka pefea te ‵pili o te va o koutou mo te Atua e pelā me se kāiga?
Kafai koe se mātua, e mautinoa me e manako koe ke a‵lofa malosi au tama‵liki ki a Ieova e pelā eiloa mo koe. E fakataunu pefea ne koe te mea tenei? Mai te faiga o mea kolā e fai mai i te Tusi Tapu: “E ‵tau mo koutou o akoako atu a [muna a Ieova] ki otou tama‵liki kae sau‵tala ki ei māfai e saga‵saga koutou i otou fale kae penā foki māfai e sa‵sale koutou i te auala.” (Teutelonome 6:7) A te “akoako” e fakauiga ki te ‵toe fakafokifoki atu o se mea. Kāti e iloa ne koe me e ‵tau o fakafokifoki atu faeloa ne koe se mea ki au tama‵liki ko te mea ke masaua ne latou. E fakauiga te tusi faitau tenei, me e ‵tau mo koe o ‵sala faeloa ki avanoaga ke faipati atu ki au tama‵liki e uiga ki a Ieova. Se mea gali ke fakatoka se taimi i vaiaso takitasi ke tapuaki atu e pelā me se kāiga. Kafai e seai ne au tama‵liki, ka aoga eiloa ke fakaaoga se taimi i vaiaso takitasi ke sukesuke ki te Muna a te Atua.
KELI MALOSI IFO
Mafaufau ki manatu aoga kolā ka fesoasoani atu ke maua se kāiga fiafia kae tokagamalie.
4. Akoako au tama‵liki mo te alofa
E mafai o faigata a te akoakoga o se tamaliki. E mafai pefea o fesoasoani atu a te Tusi Tapu? Faitau te Iakopo 1:19, 20, ko sau‵tala ei ki fesili konei:
-
E mafai pefea o fakaasi atu ne mātua a te alofa māfai ko fai‵pati mo olotou tama‵liki?
-
Kaia e se ‵tau ei mo se mātua o polopoloki ana tama‵liki i te taimi koi kaitaua ei a ia? a
5. Puipui au tama‵liki
Ke puipui au tama‵liki, se mea tāua ke faipati koe ki tama‵liki taki tokotasi e uiga ki faifaiga fakatauavaga. E mafai o fai fakaa‵tea a te mea tenei. Pei te VITIO, ko sau‵tala ei ki fesili konei.
-
Kaia e faigata ei ki nisi mātua ke fai‵pati ki olotou tama‵liki e uiga ki faifaiga fakatauavaga?
-
Ne a auala ne fakamatala atu ei ne nisi mātua a faifaiga fakatauavaga ki olotou tama‵liki?
E pelā mo te mea ko oti ne ‵valo mai, ko gasolo aka eiloa o masei a te lalolagi a Satani. Faitau te 2 Timoteo 3:1, 13, ko sau‵tala ei ki te fesili tenei:
-
A nisi tino amio ma‵sei kolā e fakasino ki ei i te fuaiupu e 13, e maneanea sāle ne latou a tama‵liki. Tela la, kaia e tāua ei ke akoako ne mātua olotou tama‵liki e uiga ki faifaiga fakatauavaga mo te auala ke puipui latou mai i tino maneanea tama‵liki?
E iloa ne koe?
E uke a tusi ne fakatoka ne Molimau a Ieova ke fesoasoani ki mātua ke akoako olotou tama‵liki e uiga ki faifaiga fakatauavaga kae puipui ei latou mai te maneaneaga ne tino. E pelā me se fakaakoakoga, ke onoono ki te:
-
Puipui Otou Tama‵liki (vitio)
-
“Akoako Au Tama‵liki e Uiga ki Faifaiga Fakatauavaga” (Ala Mai! Napa 5 2016)
6. Āva ki otou mātua
E mafai o fakaasi atu ne tama‵liki mo talavou a te āva ki olotou mātua mai i te auala e fai‵pati atu ei ki a latou. Pei te VITIO, ko sau‵tala ei ki fesili konei.
-
Kaia e aoga ei ke faipati atu mo te āva se talavou ki ana matua?
-
E mafai pefea o faipati atu se talavou ki ana mātua i se auala āva?
Faitau te Faataoto 1:8, ko sau‵tala ei ki te fesili tenei:
-
E ‵tau o pefea a faifaiga a se talavou māfai ko fakatonu a ia ne ana mātua?
7. Tapuaki atu ki a Ieova e pelā me se kāiga
E fakatoka ne kāiga Molimau a Ieova se taimi i vaiaso takitasi ke tapuaki fakatasi latou. E fai pefea a te vaegā tapuakiga a kāiga tenei? Pei te VITIO, ko sau‵tala ei ki fesili konei.
-
E mafai pefea o fakatumau ne se kāiga te lotou Tapuakiga a Kāiga?
-
Ne a mea e mafai o fai ne se mātua ke aoga kae gali se tapuakiga a kāiga?—Onoono ki te ata i te kamataga o te mataupu tenei.
-
Ne a mea e mafai o fakafaigata ei ke suke‵suke fakatasi e pelā me se kāiga?
I Isalaelu mua, ne fakamoemoe a Ieova ke sau‵tala fakatasi faeloa a kāiga e uiga ki te Tusi Tapu. Faitau te Teutelonome 6:6, 7, ko sau‵tala ei ki te fesili tenei:
-
E fakagalue pefea ne koe te akoakoga tenei?
Manatu mō tapuakiga a kāiga:
-
Fakatoka ki fakatasiga a te fakapotopotoga.
-
Faitau kae sau‵tala ki se tala mai te Tusi Tapu telā ka gali ki tou kāiga.
-
Kafai e isi ne au tama‵liki, ke ‵kopi io me ke ‵lomi se mea mō tama‵liki mai i te jw.org.
-
Kafai e isi ne au tama‵liki talavou, sau‵tala ki se mataupu mō talavou tai fo‵liki i te jw.org.
-
Ke fai fakatasi ne koutou mo tama‵liki se koniseti ki se tala mai te Tusi Tapu.
-
Onoono kae sau‵tala fakatasi ki se vitio i te jw.org.
MEA E FAI MAI NE NISI TINO: “Ko to ‵mafa te Tusi Tapu ki tama‵liki.”
-
Ne a au pati ka fai atu?
MANATU AOGA
E manako a Ieova ko mātua ke a‵lofa, akoako, kae puipui olotou tama‵liki; tama‵liki ke āva kae faka‵logo ki olotou mātua; mo kāiga ke tapuaki fakatasi atu ki a ia.
Fesili
-
E mafai pefea ne mātua o akoako kae puipui olotou tama‵liki?
-
E mafai ne tama‵liki o fakaasi atu te āva ki olotou mātua?
-
Ne a mea aoga ka maua māfai e fakatoka se taimi i vaiaso takitasi ke tapuaki fakatasi e pelā me se kāiga?
NISI FAKAMATALAGA
Ne a akoakoga ka fakatoka ei tau tamaliki māfai ko matua?
“Akoakoga e Ono e ‵Tau o Tauloto ne Tama‵liki” (Ala Mai! Napa 2 2019)
Ke tauloto ki pati fakatonutonu mai te Tusi Tapu mō tino tausi.
“Ne a Pati i te Tusi Tapu e Uiga ki te Tausiga o Mātua Kolā ko Ma‵tua?” (Mataupu i te neti)
Onoono ki te auala ne manuia ei se tamana telā ne seki iloa ne ia o puti aka a tama‵liki .
Mafaufau ki auala e mafai ne tamana o fakamalosi aka te lotou fesokotakiga mo olotou tamaliki tā‵gata.
a I te Tusi Tapu, e fakasino atu a “polopolokiga” ki te akoako, takitaki, mo te fakatonutonu. E se fakauiga eiloa ki te ‵ta io me ko te fai fakamasei.—Faataoto 4:1.
