XCHANOBIL 50
¿Kʼuxi xuʼ xamuyubaj xchiʼuk li avutsʼ avalale? (xchaʼvokʼal)
Jaʼ jun matanal yakʼoj Jeova li alab nichʼnabiletike. Li stuke oy ta yoʼonton ti akʼo xchabi yalab xnichʼnabik li totil meʼiletike, jaʼ yuʼun chakʼbe lekil tojobtaseletik sventa spas yuʼunik. Sventa xmuyubajik noʼox li utsʼ alalile, chakʼbe tojobtaseletik xtok li alab nichʼnabiletike.
1. ¿Kʼusi tojobtasel ch˗akʼbatik yuʼun Jeova li totil meʼiletike?
Li Jeovae oy ta yoʼonton ti akʼo skʼan yalab xnichʼnabik li totil meʼiletike xchiʼuk ti xchʼakbeik yorail sventa oyuk kʼusitik jmoj spasike. Jech xtok, tskʼan ti akʼo xchabiik sventa mu kʼusi snuptanike xchiʼuk ti xchanubtasik ta smantaltak Jeovae (Proverbios 1:8). Xi ch˗albatik mantal yuʼun Dios li joliletik ta utsʼ alalile: «Tukʼibtasik me sventa xachabiik xchiʼuk albeik mantal jech kʼuchaʼal tskʼan Jeovae» (kʼelo Efesios 6:4). Lek tajek chil Jeova kʼalal jech chchanubtas yalab xnichʼnabik kʼuchaʼal chal Vivlia li totil meʼiletike xchiʼuk ti mu yanuk buchʼu chakʼbeik sbain skʼelele.
2. ¿Kʼusi tojobtasel ch˗akʼbatik yuʼun Jeova li alab nichʼnabiletike?
Xi ch˗albatik yuʼun Jeova li alab nichʼnabiletike: «Chʼunbo me smantal atot ameʼik» (kʼelo Kolosenses 3:20). Mi chichʼ ta mukʼ xchiʼuk chchʼunbe smantal stot smeʼik li alab nichʼnabiletike, ta me xmuyubaj yuʼun stot smeʼik xchiʼuk chmuyubaj yuʼunik li Jeova eke (Proverbios 23:22-25). Kʼalal kʼox toʼox li Jesuse, lek xa onoʼox ta chanbel stalelal. Akʼo mi maʼuk tukʼil krixchano li stot smeʼe, la xchʼunbe smantal xchiʼuk laj yichʼan ta mukʼ (Lukas 2:51, 52).
3. ¿Kʼusi skʼan spasik li utsʼ alaliletik yoʼ xnopajik ta stojolal Jeovae?
Mi oy avalab anichʼnabe, oy van ta avoʼonton ti akʼo skʼanik Jeova jech k’ucha’al ak’anoj eke. ¿Kʼuxi van xuʼ xakolta sventa jech spasike? Jaʼ mi chapas li kʼusi chal Vivlia liʼe: «Skʼan xavakʼbe xchan [avalab anichʼnab li Skʼop Jeovae], loʼiltabo kʼalal chachoti ta anae, kʼalal chaxanav ta bee, kʼalal chavaye xchiʼuk kʼalal chalike» (Deuteronomio 6:7). Kʼalal chavakʼbe xchan xie, jaʼ skʼan xal ti ep ta velta chavalilanbee. Aviloj xa onoʼox van ti ep ta velta skʼan xavalbe avalab anichʼnab sventa mu xchʼay ta sjolik li kʼusi chavalbee. Li kʼusi skʼan xal li teksto liʼe jaʼ ti xasabe lek yorail sventa xachanubtas ta sventa Jeova li avalab anichʼnabe. Jech xtok, lek onoʼox ti xachʼakbeik yorail jujun xemana sventa jmoj xachan Avivliaik xchiʼuk li avutsʼ avalale. Akʼo mi muʼyuk to avalab anichʼnab, lek onoʼox ti xachʼakbe yorail jujun xemana sventa xachan Avivliae.
JCHANTIK TO BATEL MAS
Jkʼeltik batel junantik tojobtaseletik sventa xmuyubajikuk noʼox li utsʼ alaliletike xchiʼuk sventa snaʼik kʼuxi xuʼ xchabi li yalab xnichʼnabike.
4. Ta slekiluk avoʼonton xachanubtas avalab anichʼnabik
Vokol onoʼox ta albel mantal o ta chanubtasel li alab nichʼnabiletike. Pe ¿mi xuʼ van skoltaot li Vivliae? Kʼelik Santiago 1:19, 20 xchiʼuk albeik skʼoplal li sjakʼobiltak liʼe:
-
¿Kʼuxi xuʼ xavakʼ ta ilel slekil avoʼonton kʼalal chachiʼin ta loʼil li avalab anichʼnabe?
-
¿Kʼu yuʼun skʼan mu ta skʼakʼaluk avoʼonton xavalbe mantal li avalab anichʼnabe? a
5. Chabio avalab anichʼnabik
Sventa xachabi li avalab anichʼnabike, tsots me skʼoplal ti xavalbeik smelolal ta sventa li chiʼinejbail ta vayele. Melel onoʼox ti kʼexlal sba kʼalal chichʼ albel skʼoplale. Kʼelik li VIDEOE xchiʼuk albeik skʼoplal li sjakʼobiltak liʼe:
-
¿Kʼu yuʼun oy jlom totil meʼiletik vokol chaʼiik yalbel yalab xnichʼnabik ta sventa li chiʼinejbail ta vayele?
-
¿Kʼusitik stunesojik junantik totil meʼiletik sventa xalbeik skʼoplal chiʼinejbail ta vayel li yalab xnichʼnabike?
Jech kʼuchaʼal yaloj xa onoʼox li Vivliae, yantik xa sok batel li sbalumil Satanase. Kʼelik 2 Timoteo 3:1, 13 xchiʼuk albeik skʼoplal li sjakʼobiltak liʼe:
-
Li ta versikulo 13, chal ti oy junantik viniketik ti toj chopolike chilbajinik o chutsʼintaik li kʼoxetike. Jaʼ yuʼun chaʼa, ¿kʼu yuʼun skʼan xalbeik skʼoplal sventa chiʼinejbail ta vayel yalab xnichʼnabik li totil meʼiletike? ¿Kʼusi xuʼ xapasik sventa mu xlajik ta ilbajinel li avalab anichʼnabike?
¿Mi chakʼan to chachan mas?
Li stestigotak Jeovae slokʼesojik vunetik, videoetik ti jtunel yuʼun totil meʼiletik yoʼ xalbe yalab xnichʼnabik ta sventa li chiʼinejbail ta vayele xchiʼuk ti mu xlajik ta ilbajinele. Liʼe jaʼ junantik:
-
Chabio avalab anichʼnabik (video)
-
Jchanbetik li mukʼta jchanubtasvaneje, kapitulo 10 xchiʼuk 32
-
«¿Kʼuxi chavalbe avalab anichʼnab ta sventa li chiʼinejbail ta vayele?» (¡Vikʼiluk me jsatik!, num. 5 2016)
6. Ichʼo ta mukʼ atot ameʼ
Li ololetik xchiʼuk li kerem tsebetike skʼan me xichʼ ta mukʼ li stot smeʼike. Taje jaʼ te chakʼik ta ilel ti kʼu yelan chchiʼinik ta loʼile. Kʼelik li VIDEOE xchiʼuk albeik skʼoplal li sjakʼobiltak liʼe:
-
¿Kʼu yuʼun skʼan xichʼ ta mukʼ stot smeʼ li jun kerem o tseb kʼalal chchiʼin ta loʼile?
-
¿Kʼuxi xuʼ xakʼ ta ilel jun kerem o jun tseb ti chichʼ ta mukʼ li stot smeʼe?
Kʼelik Proverbios 1:8 xchiʼuk albeik skʼoplal li sjakʼobil liʼe:
-
¿Kʼusi sk’an spas jun kerem o tseb kʼalal ch˗albat mantal yuʼun stot smeʼe?
7. Jmoj xavichʼik ta mukʼ Jeova xchiʼuk avutsʼ avalal
Li stestigotak Jeovae chchʼakbeik yorail jujun xemana sventa xichʼik ta mukʼ Dios xchiʼuk yutsʼ yalalik. ¿Kʼusi tspasik kʼalal jmoj chchan Svivliaike? Kʼelik li VIDEOE xchiʼuk albeik skʼoplal li sjakʼobiltak liʼe:
-
¿Kʼusi van xuʼ xkoltavan sventa jechuk-o xichʼ pasel li yichʼel ta mukʼ Jeova ta utsʼ alalile?
-
¿Kʼusi skʼan spasik li totil meʼiletik sventa skʼupinik o stabeik sbalil li yichʼel ta mukʼ Jeova tspasike? (Kʼelo li lokʼol ta slikebale).
-
¿Mi oy kʼusi tsmakot chavaʼi sventa xachan li Avivliaik ta avutsʼ avalale? ¿Kʼusi ti tsmakote?
Li ta voʼnee, li Jeovae oy ta yoʼonton ti xchanilanik Skʼop Jeova ta yutsʼ yalalik li j˗israeletike. Kʼelik Deuteronomio 6:6, 7 xchiʼuk albeik skʼoplal li sjakʼobil liʼe:
-
¿Kʼuxi xuʼ xavakʼ ta akuxlejal li tojobtasel chal ta tekstoe?
Li kʼusitik xuʼ xapasike:
-
Chapano abaik ta sventa li tsobajeletike.
-
Kʼelik xchiʼuk albeik skʼoplal junuk loʼil ta Vivlia ti chakʼupinike.
-
Mi oy akʼoxtake, yaleso o paso imprimir li kʼusitik xuʼ spasik li ololetik ta jw.org.
-
Mi svaʼlejik xa li avalab anichʼnabike, tʼujo junuk mantal ta jw.org ta sventa li kerem tsebetike.
-
Akʼik ta ilel junuk skʼelobil junuk loʼil ta Vivlia.
-
Kʼelik xchiʼuk albeik skʼoplal junuk video li ta jw.org.
JUNANTIKE XI CHALIKE: «Toj ep kabtel, mu noʼox xixokob xchanubtasel ta Vivlia li kalab jnichʼnabe».
-
¿Kʼu xachi yaʼel li voʼote?
¿KʼUSI LA ACHAN?
Li Jeovae tsk’an ti xchanubtasik, ti xchabiik xchiʼuk ti skʼan yalab xnichʼnabik li totil meʼiletike. Jech xtok, tsk’an ti xichʼ ta mukʼ stot smeʼik li ololetike xchiʼuk ti xchʼunbeik smantalike, ti koʼol xichʼik ta mukʼ Jeovae.
Svulesobil ta joltik
-
¿Kʼuxi xuʼ xchanubtas xchiʼuk xchabi li yalab xnichʼnabike?
-
¿Kʼuxi xuʼ xakʼik ta ilel ti chichʼ ta mukʼ stot smeʼike?
-
¿Kʼusi sbalil ta jtabetik mi jmoj chkichʼtik mukʼ Dios jujun xemanae?
XUʼ TO XAKʼEL LIʼE
¿Kʼusitik xuʼ xavakʼbe xchan avalab anichʼnab ti jaʼ chkoltaat mi chʼie?
«Vaktos chanubtasel sventa li alab nichʼnabile» (¡Vikʼiluk me jsatik!, num. 2 2019)
Kʼelavil junantik tojobtaseletik ta sventa li buchʼu chchabi stot smeʼik ti malubemik xae.
«¿Mi oy ta yoʼonton Dios ti jchabi jtot jmeʼtik mi malubemik xae?» (Xuʼ te xata ta jw.org)
Kʼelavil kʼusi la spas jun vinik sventa xkʼot ta jun lekil totile.
La xchanubtasunkutik ta stsʼitesel kalab jnichʼnabkutik li Jeovae (5:58)
Kʼelavil kʼuxi xuʼ lek xil sbaik xchiʼuk xnichʼnab li totiletike.
a Kʼalal tukʼibtasel xi li Vivliae, jaʼ skʼan xal ti chichʼ chanubtasel, beiltasel li jun nichʼonil sventa xlekub li stalelale. Taje maʼuk me skʼan xal ti muʼyuk xa xkʼuxul avoʼonton chavalbe mantal o ti naka xa majel chavakʼbee (Proverbios 4:1).
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
