OCIPAMA 50
Epata Liove li Kuata Ndati Esanju?—Onepa 2
Omãla ombanjaile yimue ya tunda ku Yehova. Eye o lavoka okuti, olonjali vi tata ciwa ombanjaile yaco. Yehova wa eca olonumbi via suapo vi kuatisa olonjali oku ci linga. Alungulo Aye a kuatisavo omãla oku tẽlisa ovikele viavo oco va kuatise epata oku kuata esanju.
1. Elungulo lipi Yehova a eca kolonjali?
Yehova o lavoka okuti, olonjali vi sola omãla vavo loku kala lavo otembo yi sukiliwa. Eye o yongolavo okuti, olonjali vi teyuila omãla vavo kohele yimue loku va pindisa lolonumbi Viembimbiliya. (Olosapo 1:8) Eye o sapuila olonjali hati: ‘Tati [omãla vene] poku . . . va pindisa ndomo ci likuata leci Yehova a popia.’ (Tanga Va Efeso 6:4.) Yehova o sanjuka calua nda olonjali vi kuama olonumbi viaye poku tata omãla vavo okuti, ka va eci ocikele caco komanu vakuavo.
2. Elungulo lipi Yehova a eca komãla?
Yehova o vetiya omãla hati: “Pokoli kolonjali viene.” (Tanga Va Kolosai 3:20.) Nda omãla va sumbila loku pokola olonjali viavo, va sanjuisa Yehova kuenda olonjali viavo. (Olosapo 23:22-25) Yesu wa sia ongangu yiwa eci a kala omõla. Ndaño okuti eye wa lipuile, pole, wa pokola kuenda wa sumbilile olonjali viaye ka via lipuile.—Luka 2:51, 52.
3. Ove lepata liove vu kuata ndati ukamba la Suku?
Nda wunjali, o yongola okuti omãla vove va sola Yehova ndeci ove. O tẽlisa ndati ocimãho caco? Poku linga eci Embimbiliya li popia hati: ‘[Olondaka via Yehova] vi soneha vovitima viomãla vove loku vi vangula eci o tumãla vonjo yove, leci endela vonjila.’ (Esinumuĩlo 6:7) Ondaka oku “vi soneha,” yi lomboloka oku longisa loku pitolola ocina cimue. Ove wa kũlĩha okuti, o sukila oku pitolola ocina cimue olonjanja vialua, oco omãla vove va ci ivaluke. Ocisonehua eci ci lomboloka okuti, olonjali vi sukila oku sanda apuluvi, oco va sapele lomãla vavo catiamẽla ku Yehova. Omo liaco, ca sunguluka oku sokiya otembo olosemana viosi oco ku lingiwe efendelo liepata. Nda ku kuete omãla, sokiya otembo olosemana viosi oco o lilongise Ondaka ya Suku.
LILONGISA ONDONGOSI
Kũlĩhĩsa olonumbi viwa vi kuatisa epata oku kuata esanju loku kolapo.
4. Pindisa omãla vove locisola
Oku pindisa omõla umue, ka ca lelukile. Embimbiliya li kuatisa ndati? Tanga Tiago 1:19, 20, noke konomuisa apulilo a kuãimo:
-
Olonjali vi lekisa ndati ocisola eci vi sapela lomãla vavo?
-
Momo lie ka ca sungulukilile konjali yimue oku pindisa omãla vaye nda yi kasi lonyeño? a
5. Teyuila omãla vove
Oco o teyuile omãla vove, sapela lavo catiamẽla kondaka yoku lipekela. Citava okuti, ci tĩla kokuove. Tala OVIDEO, noke konomuisa apulilo a kuãimo.
-
Momo lie ka ca lelukilile kolonjali vimue oku sapela lomãla vavo catiamẽla koku lipekela?
-
Lonjila yipi olonjali vimue via lomboluila komãla vavo ondaka yatiamẽla koku lipekela?
Ndomo ovitumasuku via ci popele, oluali lua Satana lu kasi oku vĩha calua. Tanga 2 Timoteo 3:1, 13, noke konomuisa epulilo li kuãimo:
-
Omanu vamue olondingaĩvi va tukuiwa kocinimbu 13, va siata oku putula omãla. Momo lie ci kuetele esilivilo olonjali oku longisa omãla vavo catiamẽla koku lipekela kuenda ndomo ovo va liteyuila ku vakuakuputula?
Wa ci kũlĩha?
Olombangi Via Yehova via siata oku sandeka alivulu alua a kuatisa olonjali oku longisa omãla vavo catiamẽla koku lipekela kuenda oku va teyuila koku putuiwa. Ndeci, tala:
-
Teyuila Omãla Vove (ovideo)
-
““Longisa Omãla Vove Catiamẽla Koku Lipekela” (Omasuli! No. 5 2016)
6. Sumbila olonjali viove
Omãla vatito kuenda amalẽhe, va pondola oku lekisa esumbilo kolonjali viavo konjila ndomo va vangula lavo. Tala OVIDEO, noke konomuisa apulilo a kuãimo.
-
Momo lie ci kuetele esilivilo kumalẽhe umue oku sapela lolonjali viaye lesumbilo?
-
Umalẽhe poku sapela lolonjali viaye, o lekisa ndati okuti wa vi sumbila?
Tanga Olosapo 1:8, noke konomuisa epulilo li kuãimo:
-
Ocituwa cipi umalẽhe umue a sukila oku lekisa eci olonjali viaye viu lungula?
7. Fendela Yehova lepata liove
Apata Olombangi Via Yehova, olosemana viosi a sokiya otembo yoku linga efendelo liepata. Efendelo liaco li lingiwa ndati? Tala OVIDEO, noke konomuisa apulilo a kuãimo.
-
Epata li kuata ndati esokiyo lioku linga Efendelo Liepata olonjanja viosi?
-
Nye isia umue a sukila oku linga oco efendelo liepata li kale epuluvi liesanju hailio li kuatisa? —Tala elitalatu kefetikilo liocipama cilo.
-
Nye ci pondola oku vu tateki oku lilongisila kumosi?
Ko Isareli yosimbu, Yehova wa handelekele okuti apata a sapela olonjanja viosi catiamẽla Kovisonehua. Tanga Esinumuĩlo 6:6, 7, noke konomuisa epulilo li kuãimo:
-
O kapako ndati onumbi eyi?
Olonumbi viefendelo liepata:
-
Pongiyi olohongele viekongelo.
-
Tangi loku konomuisa ulandu umue Wembimbiliya okuti u sanjuisa epata liove.
-
Nda o kuete omãla vatito, tapa ale kopiyala upange umue woku kongela u sangiwa vo jw.org.
-
Nda o kuete omãla okuti amalẽhe, konomuisi ocipama cimue catiamẽla kamalẽhe ci sangiwa vo jw.org.
-
Lingi lomãla vove ocindekaise comanu va tukuiwa vulandu Wembimbiliya.
-
Tali noke konomuisi ovina wa moli vovideo yimue yo jw.org..
OMANU VAMUE VA POPIA VATI: “Ka ca lelukile komãla oku kuata elomboloko Liembimbiliya.”
-
Nda wa popia nye?
NYE WA LILONGISA?
Yehova o yongola okuti olonjali vi sola, vi pindisa, loku teyuila omãla vavo; omãla va sukila oku sumbila loku pokola kolonjali viavo; kuenda apata a fendelele kumosi.
Oku Pitulula
-
Olonjali vi pindisa ndati loku teyuila omãla vavo?
-
Omãla va lekisa ndati esumbilo kolonjali viavo?
-
Onima yipi yi tunda koku sokiya otembo olosemana viosi oco ku lingiwe efendelo liepata?
OCO O KŨLĨHE OVINA VIKUAVO
Ovituwa vipi vi ka pongiya omõlove oku kula lolondunge?
“Ovituwa Epandu o Sukila Oku Longisa Komõlove” (Omasuli! No. 2 2019)
Kũlĩha olonumbi Embimbiliya li eca ku vana va tata olonjali via kuka.
Tala ndomo ulume umue ka kũlĩhĩle ndomo a tata omãla vaye eya oku kuata onima yiwa.
Kũlĩhĩsa ndomo olonjali vi pamisa ukamba wavo lomãla vavo.
a Vembimbiliya ondaka “epindiso” yi kuete elitokeko londaka oku longisa, oku eca onumbi kuenda oku lungula. Ka yi lomboloka oku tata lãvi, ale ungangala. —Olosapo 4:1.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
