NGUDO 50
Ndi Mini Zwine Zwa Nga Ita Uri Muṱa Waṋu U Takale?—Tshipiḓa 2
Vhana ndi tshifhiwa tshi bvaho kha Yehova. Yehova u lavhelela uri vhabebi vha ṱhogomele tshenetshi tshifhiwa. Yehova u ṋea vhabebi nyeletshedzo ine ya nga vha thusa uri vha ite nga u ralo. Nyeletshedzo yawe i dovha ya thusa vhana uri vha vhone uri vha nga ita mini uri muṱa u takale.
1. Yehova u ṋea vhabebi nyeletshedzo ifhio?
Yehova u ṱoḓa uri vhabebi vha fune vhana vhavho na uri vha fhedze tshifhinga tshinzhi navho nga hune zwa nga konadzea ngaho. U ṱoḓa uri vhabebi vha tsireledze vhana vhavho kha vhathu vhane vha nga vha huvhadza na uri vha shumise zwe vha zwi guda Bivhilini u itela u gudisa vhana vhavho. (Mirero 1:8) U vhudza vhokhotsi uri: “[Alusani vhana vhaṋu nga] . . . u vha ṱuṱuwedzela zwa Yehova.” (Vhalani Vhaefesa 6:4.) Yehova u a takala musi vhabebi vha tshi tevhela yeneyo nyeletshedzo, vha tshi alusa vhana vhavho nahone vha sa hwesi muṅwe muthu vhuḓifhinduleli havho.
2. Yehova u ṋea vhana nyeletshedzo ifhio?
Yehova u vhudza vhana uri: “Dzulani ni tshi thetshelesa vhabebi vhaṋu.” (Vhalani Vhakolosa 3:20.) Musi vhana vha tshi ṱhonifha na u thetshelesa vhabebi vhavho, vha ita uri Yehova na vhabebi vhavho vha takale. (Mirero 23:22-25) Yesu o vhetshela vhana tsumbo yavhuḓi musi a tshi kha ḓi vha muṱuku. Naho Yesu o vha e si na tshivhi, o vha a tshi thetshelesa na u ṱhonifha vhabebi vhawe vhe vha vha vhe na tshivhi.—Luka 2:51, 52.
3. Muṱa u nga sendela hani tsini na Mudzimu?
A zwi timatimisi uri sa mubebi, ni ṱoḓa uri vhana vhaṋu vha fune Yehova nga nḓila ine na mu funa ngayo. Zwenezwo ni nga zwi itisa hani? Nga u ita zwine Bivhili ya zwi amba musi i tshi ri: “U a ṅwale [maipfi a Yehova] mbiluni dza vhana vhau, u ambe nga hao musi wo dzula nḓuni yau [na] musi u tshi khou tshimbila.” (Dotoronomio 6:7) U a ‘ṅwala’ zwi amba u gudisa nga u dovholola tshithu lunzhi-lunzhi. Zwo ḓowelea uri ni dovholole tshiṅwe tshithu lunzhi-lunzhi u itela uri vhana vhaṋu vha tshi humbule. Heyi vese i amba uri ni fanela u dzula ni tshi wana tshifhinga tsha u amba na vhana vhaṋu nga ha Yehova tshifhinga tshoṱhe. Ndi zwavhuḓi uri muṱa u ḓivhetshele tshifhinga vhege iṅwe na iṅwe u itela u guda nga ha Yehova. Naho ni si na vhana, na inwi ni nga ḓivhetshela tshifhinga tsha uri ni gude Ipfi ḽa Mudzimu vhege iṅwe na iṅwe.
GUDANI ZWO ENGEDZEAHO
Gudani nga ha nyeletshedzo dzine dza nga thusa vhoṱhe muṱani uri vha ḓipfe vho tsireledzea nahone vho takala.
4. Gudisani vhana vhaṋu nga lufuno
U gudisa ṅwana a zwo ngo leluwa. Bivhili i nga ni thusa hani? Vhalani Yakobo 1:19, 20, ni kone u fhindula mbudziso dzi tevhelaho:
-
Vhabebi vha nga sumbedza hani lufuno musi vha tshi khou amba na vhana vhavho?
-
Ndi ngani mubebi a songo tea u kaidza vhana vhawe o sinyuwa? a
5. Tsireledzani vhana vhaṋu
U itela u tsireledza vhana vhaṋu, ndi zwa ndeme nga maanḓa uri ni ambe navho nga mafhungo a zwa vhudzekani. Ni nga pfa zwi tshi ni konḓela u amba na vhana vhaṋu nga zwa vhudzekani. Ṱalelani VIDIO, ni kone u fhindula mbudziso dzi tevhelaho.
-
Ndi ngani zwi tshi konḓela vhaṅwe vhabebi u amba na vhana vhavho nga mafhungo a zwa vhudzekani?
-
Vhaṅwe vhabebi vho ṱalutshedza hani vhana vhavho mafhungo a zwa vhudzekani?
Samusi zwo porofitiwa Bivhilini, shango ḽa Saṱhane ḽi khou ṋaṋa u vha ḽivhi ḽi tshi ya. Vhalani 2 Timotheo 3:1, 13, ni kone u fhindula mbudziso i tevhelaho:
-
Vhaṅwe vhathu vhavhi vhe ha ambiwa nga havho kha vese 13 vha tambudza vhana nga zwa vhudzekani. Ndi ngani zwi zwa ndeme uri vhabebi vha gudise vhana vhavho nga mafhungo a zwa vhudzekani na nḓila ine vha nga ḓitsireledza ngayo kha vhathu vhane vha nga vha tambudza?
Naa no vha ni tshi zwi ḓivha?
Ṱhanzi dza Yehova vha na khandiso nnzhi dzine dza thusa vhabebi u gudisa vhana vhavho nga mafhungo a zwa vhudzekani na nḓila ine vha nga ḓitsireledza ngayo kha vhathu vhane vha nga vha tambudza. Sa tsumbo ṱalelani vidio:
-
Tsireledzani Vhana Vhaṋu (vidio)
-
Gudani Kha Mufunzi Muhulu, ndima 10 na 32
-
“U Funza Ṅwana Waṋu Nga Mafhungo A Zwa Vhudzekani” (Thero i re kha Fhaṱuwani! No. 5 2016)
6. Ṱhonifhani vhabebi vhaṋu
Vhana na vhaswa vha nga ṱhonifha vhabebi vhavho nga nḓila ine vha amba ngayo navho. Ṱalelani VIDIO, ni kone u fhindula mbudziso dzi tevhelaho.
-
Ndi ngani zwi zwa ndeme uri vhana vha ambe na vhabebi vhavho nga ṱhonifho?
-
Muswa a nga amba hani na vhabebi vhawe nga nḓila ine ya sumbedza uri u a vha ṱhonifha?
Vhalani Mirero 1:8, ni kone u fhindula mbudziso i tevhelaho:
-
Muswa u fanela u ita mini musi vhabebi vhawe vha tshi mu vhudza zwine a tea u zwi ita?
7. Gwadamelani Yehova sa muṱa
Miṱa ya Ṱhanzi dza Yehova i ḓivhetshela tshifhinga tsha u guda nga ha Yehova vhege iṅwe na iṅwe. Vha nga zwi itisa hani? Ṱalelani VIDIO, ni kone u fhindula mbudziso dzi tevhelaho.
-
Muṱa u nga vha hani na Vhurabeli ha Muṱa tshifhinga tshoṱhe?
-
Mubebi a nga ita mini uri zwine vha zwi ita kha vhurabeli ha muṱa zwi shume nahone zwi takadze?—Sedzani tshifanyiso tsha u thoma kha ino ngudo.
-
Ndi mini zwine zwa nga ita uri zwi konḓe uri ni gude noṱhe sa muṱa?
Tshifhingani tsha kale Isiraele, Yehova o vha a tshi ṱoḓa uri miṱa i ambe nga ha mafhungo a re Bivhilini tshifhinga tshoṱhe. Vhalani Dotoronomio 6:6, 7, ni kone u fhindula mbudziso i tevhelaho:
-
Ni nga shumisa hani zwi re kha yeneyi vese?
Zwine na nga zwi ita kha vhurabeli ha muṱa:
-
Lugiselelani miṱangano ya tshivhidzo.
-
Vhalani nahone ni haseledze mafhungo a re Bivhilini ane muṱa waṋu wa ḓo a takalela.
-
Arali ni na vhana vhaṱuku, downloudani kana ni phirinthe mafhungo a zwithu zwine vhana vha nga zwi ita kha jw.org.
-
Arali vhana vhaṋu vhe vhaswa, haseledzani thero dzine dza amba nga ha vhaswa kha jw.org.
-
Tambani matambwa a re Bivhilini na vhana vhaṋu.
-
Ṱalelani nahone ni haseledze vidio dzi re kha jw.org.
VHAṄWE VHATHU VHA AMBA URI: “Vhana vha nga si kone u pfesesa Bivhili ngauri i a konḓa.”
-
Inwi ni nga ri mini?
NO GUDA MINI?
Yehova u ṱoḓa uri vhabebi vha fune vhana vhavho, vha vha gudise na u vha tsireledza. U ṱoḓa uri vhana vha ṱhonifhe vhabebi vhavho na u vha thetshelesa. U dovha a ṱoḓa uri miṱa i vhe na tshifhinga tsha u guda nga hae.
Ni Kha Ḓi Zwi Humbula?
-
Vhabebi vha nga gudisa na u tsireledza hani vhana vhavho?
-
Vhana vha nga ṱhonifha hani vhabebi vhavho?
-
U ḓivhetshela tshifhinga vhege iṅwe na iṅwe tsha u guda nga ha Yehova zwi nga thusa hani muṱa?
WANANI ZWO ENGEDZEAHO
Ndi ngudo dzifhio dzine dza ḓo thusa ṅwana waṋu musi a tshi khou aluwa?
“Zwithu Zwa Rathi Zwine Vhana Vha Tea U Zwi Guda” (Fhaṱuwani! No. 2 2019)
Gudani nga ha nyeletshedzo dzi shumaho dzi bvaho Bivhilini dzine dza ḓo thusa vhane vha khou ṱhogomela vhabebi vhavho vho no aluwaho?
“Bivhili I Ri Mini Nga Ha U Ṱhogomela Vhabebi Vha Re Vhalala?” (Thero i re kha jw.org)
Muṅwe munna o vha a sa ḓivhi uri u tea u alusa hani vhana vhawe. Vhonani uri ndi mini zwe zwa mu thusa uri a vhe mubebi wavhuḓi.
Vhonani uri vhokhotsi vha nga vha hani na vhushaka ho khwaṱhaho na vhana vhavho vha vhatukana.
“Vhokhotsi Vha Nga Vha Hani Na Vhushaka Ha Tsini Na Vharwa Vhavho?” (Tshiingamo, 1 January 2012)
a Bivhilini musi hu tshi ambiwa nga ha u “kaidza,” hu vha hu tshi khou ambiwa nga ha u funza, u livhisa na u khakhulula. A zwi ambi uri mubebi u tea u tambudza ṅwana wawe kana u mu fara nga nḓila ya tshiṱuhu.—Mirero 4:1.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
