TIMIRTTE 50
Intte Soo Asay Ufayttanaadan Ay Oottana Danddayeetii?—SHaaho 2
Naati Yihoowa imota. I he imotaa aawaynne aayyiyaa loytti oyqqanaadan koyees. Yihooway yelidaageeti hegaadan oyqqanawu maaddiya loˈˈo zoriyaa yootiis. A zoree so asay ufayttanaadan naati oottana danddayiyoobaakka qonccissees.
1. Yihooway yelidaageeta ay zorii?
Yihooway yelidaageeti bantta naata siiqanaadaaninne etaara daro wodiyaa aattanaadan koyees. I yelidaageeti bantta naati qohettenna mala naaganaadaaninne Geeshsha Maxaafay yootiyo maaraa kaallidi eta loohissanaadan koyees. (Leemiso 1:8) I aawata, “Intte intte naata Godaa . . . zoriyan [dichchite]” yaagees. (Efisoona 6:4 nabbaba.) Yihooway yelidaageeti bantta naata dichchiyo wode he aawatettaa hara urawu immennan, A zoriyaa kaallikko ufayttees.
2. Yihooway naata ay zorii?
Yihooway naata, “Inttena yelidaageetuyyo ubbaban azazettite” giidi azazees. (Qolasiyaasa 3:20 nabbaba.) Naati banttana yelidaageetuyyo azazettiyo wodenne eta bonchchiyo wode, Yihoowakka banttana yelidaageetakka ufayssoosona. (Leemiso 23:22-25) Yesuusi naatettan loˈˈo leemiso gidiyaabaa oottiis. I wottiyoobi baynnaagaa gidikkonne, bana yelidaageetuyyo azazettiisinne eta bonchchiis.—Luqaasa 2:51, 52.
3. Intte so asay Xoossaara dabbotaa minttanawu waatana danddayii?
Neeni aawa woy aayo gidikko, ne naati neegaadan Yihoowa siiqanaadan koyiyoogee qoncce. Hegaa waata polana danddayay? Geeshsha Maxaafay, “Neeni ne naata [Yihoowa qaalaa] tamaarissa; neeni ne son uttiyo wode, ogiyan hemettiyo wode, . . . etabaa haasaya” giyoogaadan oottikko, polana danddayaasa. (Zaarettido Wogaa 6:7) “Tamaarissa” giya qaalay “zaaretta” geetettanakka danddayees. Ne naati issibaa hassayanaadan zaara zaara yootana koshshiyoogaa erennan aggakka. Ha xiqisee neeni Yihoowabaa ne naatuura ubbatoo haasayana bessiyoogaa qonccissees. So asay saaminttan saaminttan Geeshsha Maxaafaa issippe xannaˈanawu wodiyaa bazziyoogee loˈˈo. Neeni naˈa yelana xayikkonne, wodiyaa bazzada Geeshsha Maxaafaa saaminttan saaminttan xannaˈiyoogee maaddana.
LOYTTA AKEEKA
So asa ubbay woppu giidinne ufayttidi deˈana mala maaddiya zoriyaa akeeka.
4. Ne naata siiquwan tamaarissa
Naˈa tamaarissiyoogee metana danddayees. Hegawu Geeshsha Maxaafay waati maaddii? Yaaqooba 1:19, 20 nabbabite; yaatidi ha oyshata tobbite:
-
Yelidaageeti bantta naata waatidi siiquwan haasayissana danddayiyoonaa?
-
Yelida asi yiilloti uttidi ba naata seerana bessennay aybissee? a
5. Ne naati qohettennaadan naaga
Ne naata naaganawu, etawu huuphiyan huuphiyan inddaa woy asho gaytettaabaa yootanawu bessees. Hegee yeellayana danddayees. BIIDUWAA beˈite; yaatidi kaallidi deˈiya oyshata tobbite.
-
Yelida issoti issoti inddaa gaytettaabaa bantta naatussi yootanawu metootiyoy aybissee?
-
Issi issi aawatinne aayeti inddaa gaytettaabaa bantta naatussi waati yootidonaa?
Seexaanaa alamee hiraagan odettidaagaadan kaseppe iiti iiti bees. Naaˈˈantto Ximootiyoosa 3:1, 13 nabbabite; yaatidi ha oyshaa tobbite:
-
Paydo 13y yootiyo iita asatuppe amaridaageeti inddaa gaytettan naata qohoosona. Hegaa gishshawu, yelidaageeti inddaa gaytettaabaanne hegan qohiyaageetuppe naagettiyo ogiyaabaa bantta naata tamaarissana bessiyoy aybissee?
Hagaa eray?
Yelidaageeti bantta naata inddaa gaytettaabaa tamaarissanawunne qohiyaabaappe naaganawu maaddiya daro xuufeta Yihoowa Markkati giigissoosona. Leemisuwawu, kaallidi deˈiyaageeta beˈite:
-
Intte Naata Naagite (biiduwaa)
-
“Asho Gaytotettaabaa Intte Naˈaa Tamaarissite” (Beegottite! Paydo 4 2016)
6. Ne aawaanne aayyiyo bonchcha
Panttatettan deˈiya naatinne guutta naati banttana yelidaageetuura haasayiyo wode eta bonchchiyoogaa bessana danddayoosona. BIIDUWAA beˈite; yaatidi kaallidi deˈiya oyshata tobbite.
-
Issi yelagay ba aawaanne aayyiyo haasayissiyo wode bonchchiyoogee maaddiyoy aybissee?
-
Issi yelagay ba aawaanne aayyiyo haasayissiyo wode bonchchiyoogaa waati bessana danddayii?
Leemiso 1:8 nabbabite; yaatidi ha oyshaa tobbite:
-
Issi yelagay bana yelidaageeti issibaa oottanaadan A azaziyo wode woygi zaarana koshshii?
7. Geeshsha Maxaafaa issippe xannaˈanawu wodiyaa bazzite
Yihoowa Markka gidida so asay issippe saaminttan saaminttan Geeshsha Maxaafaa xannaˈanawu wodiyaa bazzees. He xinaatiyaa wode ay oottana danddayeetii? BIIDUWAA beˈite; yaatidi kaallidi deˈiya oyshata tobbite.
-
So asay ubbatoo Geeshsha Maxaafaa xannaˈanawu waatana danddayii?
-
Yelida asi so asay Geeshsha Maxaafaa xinaatiyan goˈettanaadaaninne ufayttanaadan ay oottana danddayii?—Ha timirttiyaa doomettan deˈiya misiliyaa xeella.
-
Intte so asay issippe xannaˈennaadan metana danddayiyaabay aybee?
Beni Israaˈeelan so asay Geeshsha Maxaafaa qofaa ubbatoo tobbanaadan Yihooway yootiis. Zaarettido Wogaa 6:6, 7 nabbabite; yaatidi ha oyshaa tobbite:
-
Ha maaraadan waata oottana danddayay?
So asaa goynuwan xannaˈanabata:
-
Galchchaa shiiquwawu giigettite.
-
Intte so asaa ufayssiyaabaa Geeshsha Maxaafaappe nabbabitenne tobbite.
-
Neeyyo guutta naati deˈikko, naati oottiyoobaa jw.org saytiyaappe wotta woy attama.
-
Neeyyo panttatettan deˈiya naati deˈikko, jw.org sayttiyan etawu giigida qofaa tobbite.
-
Neeninne ne naati Geeshsha Maxaafaa taarikiyan odettida asatudan hanite.
-
Issi biiduwaa jw.org saytiyaappe beˈidi tobbite.
ISSI ISSI ASAY HAGAADAN GEES: “Naati Geeshsha Maxaafan deˈiya ubbabaa erana koshshenna.”
-
Woygada zaaruutee?
AY AKEEKADII?
Yihooway yelidaageeti bantta naata siiqanaadan, loohissanaadaaninne tamaarissanaadan, naati eta bonchchanaadaaninne etawu azazettanaadan, qassi so asay issippe awu goynnanaadan koyees.
Zaaretuwaa
-
Yelidaageeti bantta naata waati loohissananne naagana danddayiyoonaa?
-
Naati banttana yelidaageeta bonchchiyoogaa waati bessana danddayiyoonaa?
-
So asay saaminttan saaminttan Geeshsha Maxaafaa issippe xannaˈanawu wodiyaa bazziyoogaa goˈˈay aybee?
PILGGA
Ne naˈay gastta asa gidanawu giigettanaadan ay tamaariyoogee maaddii?
“Naati Tamaarana Koshshiyo Usuppun Timirtteta” (Beegottite! Paydo 2 2019)
Banttana yelida cimidaageeta heemmiyaageetussi Geeshsha Maxaafay yootiyo maaddiya zoriyaa akeeka.
“Cima Aawaanne Aayyiyo Waati Heemmanaadan Geeshsha Maxaafay Zorii?” (Nu websaytiyan deˈiyaaba)
Ba naata waati dichchanaakko erenna bitanee waani loˈˈo aawa gididaakko akeeka.
Nu Naata Waati Dichchanaakko Yihooway Nuna Tamaarissiis (5:58)
Aawati bantta attuma naatuura dabbotaa waati minttana danddayiyaakko akeeka.
a Geeshsha Maxaafan “seeray” azaziyoogaa, kaalettiyoogaanne suurissiyoogaa bessees. Hegee qohiyoogaa woy meqettaa iitiyoogaa bessenna.—Leemiso 19:18.
Hageeta Beˈadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaˈissiyoy Ayba Ogiyaanee?
Yihoowa Markkati miishsha qanxxissennan xannaˈissiyo prograamiyan, Geeshsha Maxaafaa birshshettaa awugaakka goˈettana danddayaasa. Ne so asa ubbaynne ne laggetikka nenaara xannaˈanaadan shoobbana danddayaasa.
