LEKSYON 50
Paonan-o Magigin Malipayon an Imo Pamilya?—Bahin 2
An mga anak regalo tikang kan Jehova. Naglalaom hiya nga aatamanon hin maopay han mga kag-anak ito nga regalo. Naghahatag hi Jehova hin maaramon nga mga sagdon nga mabulig ha mga kag-anak basi mabuhat ito. Iginpapakita liwat han iya mga sagdon kon ano an puydi himoon han mga anak basi makabulig nga magin malipayon an ira pamilya.
1. Ano nga sagdon an iginhatag ni Jehova ha mga kag-anak?
Karuyag ni Jehova nga higugmaon han mga kag-anak an ira mga anak ngan maggahin hin damu nga panahon kaupod nira tubtob nga posible. Karuyag liwat niya nga proteksyonan han mga kag-anak an ira mga anak tikang ha peligro ngan gamiton an mga prinsipyo ha Biblia sugad nga basihan han pagbansay ha ira. (Proberbios 1:8) Nagsiring hiya ha mga tatay: “Padayon nga padakua [an iyo mga anak] ha . . . sagdon ni Jehova.” (Basaha an Efeso 6:4.) Nalilipay hi Jehova kon ginsusunod han mga kag-anak an iya instruksyon ha pagpadaku ha ira mga anak ngan diri iginpapasa ito nga responsabilidad ha iba.
2. Ano nga sagdon an iginhatag ni Jehova ha mga anak?
Hi Jehova nagsusugo ha mga anak: “Magin masinugtanon kamo ha iyo mga kag-anak.” (Basaha an Colosas 3:20.) Kon ginrirespeto ngan ginsusugot han mga anak an ira mga kag-anak, napapalipay nira hi Jehova ngan an ira mga kag-anak. (Proberbios 23:22-25) Hi Jesus nagpakita hin maopay nga susbaranan han bata pa hiya. Bisan kon perpekto hiya, ginsugot ngan ginrespeto niya an iya mga kag-anak.—Lucas 2:51, 52.
3. Paonan-o kamo magigin mas duok ha Dios sugad nga pamilya?
Kon usa ka nga kag-anak, sigurado nga karuyag mo nga higugmaon han imo mga anak hi Jehova sugad han imo paghigugma ha iya. Paonan-o mo ito mahihimo? Pinaagi ha pagbuhat hini nga ginsisiring han Biblia: ‘Kinahanglan imo ipasilsil an mga pulong ni Jehova ha imo mga anak ngan ig-istorya ito kon nalingkod ka ha imo balay ngan kon naglalakat ka ha kalsada.’ (Deuteronomio 6:7) An ‘pagpasilsil’ nangangahulogan hin pagtutdo pinaagi ha pag-uroutro han usa nga butang. Sigurado nga maaram ka nga basi mahinumdoman han imo mga anak an usa nga butang, kinahanglan mo ito uroutruhon ha ira. Ini nga teksto nagpapasabot nga kinahanglan pirme ka mamiling hin higayon nga makaistorya an imo mga anak mahitungod kan Jehova. Maopay nga maggahin hin panahon kada semana para ha pagsingba han pamilya. Kon waray ka mga anak, magpapahimulos ka la gihapon pinaagi ha paggahin hin panahon kada semana basi adman an Pulong han Dios.
DUGANG NGA USISAHA
Usisaha an praktikal nga mga suhestyon nga mabulig ha ngatanan nga membro han pamilya nga magin malipayon ngan talwas.
4. Mahigugmaon nga bansaya an imo mga anak
An pagbansay hin anak diri pirme masayon. Paonan-o makakabulig an Biblia? Basaha an Santiago 1:19, 20, katapos, hisguti niyo ini nga mga pakiana:
-
Paonan-o an mga kag-anak makakapakita hin gugma kon nakikiistorya hira ha ira mga anak?
-
Kay ano nga diri gud angay disiplinahon han kag-anak an iya mga anak kon nasisina hiya? a
5. Proteksyuni an imo mga anak
Basi maproteksyonan an imo mga anak, importante gud nga makiistorya ka ha tagsa ha ira mahitungod ha sex. Bangin makuri ito. I-play an VIDEO, katapos, hisguti niyo an masunod nga mga pakiana.
-
Kay ano nga nakukurian an pipira nga kag-anak nga makiistorya ha ira mga anak mahitungod ha sex?
-
Paonan-o iginsaysay han pipira nga kag-anak ha ira mga anak an mahitungod ha sex?
Sugad han igintagna, an kalibotan ni Satanas mas nagtitikaraot. Basaha an 2 Timoteo 3:1, 13, katapos, hisguti niyo ini nga pakiana:
-
An pipira han magraot nga tawo nga gin-unabi ha bersikulo 13 seksuwal nga nan-aabuso hin bata. Salit kay ano nga importante nga tutdoan han mga kag-anak an ira mga anak mahitungod ha sex ngan kon paonan-o puproteksyonan an ira kalugaringon tikang ha mga nan-aabuso?
Maaram ka ba?
An mga Saksi ni Jehova nagtatagana hin damu nga publikasyon nga mabulig ha mga kag-anak nga tutdoan an ira mga anak mahitungod ha sex ngan proteksyonan an mga anak tikang ha pag-abuso. Pananglitan, kitaa ini:
-
Proteksyuni an Iyo mga Anak (video)
-
Mahibaro Tikang ha Bantogan nga Magturutdo, kapitulo 10 ngan 32
-
“Pagtutdo ha Imo Anak Mahitungod han Sex” (Pagpamata! Num. 5 2016)
6. Respetoha an imo mga kag-anak
Maipapakita han mga kabataan ngan tin-edyer an ira respeto ha ira mga kag-anak ha paagi han ira pakiistorya ha ira. I-play an VIDEO, katapos, hisguti niyo an masunod nga mga pakiana.
-
Kay ano nga mapulsanon para ha usa nga batan-on nga makiistorya hin matinalahuron ha iya mga kag-anak?
-
Paonan-o an usa nga batan-on makikiistorya ha iya mga kag-anak ha matinalahuron nga paagi?
Basaha an Proberbios 1:8, katapos, hisguti niyo ini nga pakiana:
-
Ano an angay himoon han usa nga batan-on kon ginsisidngan hiya han iya mga kag-anak han iya bubuhaton?
7. Singbaha hi Jehova sugad nga pamilya
An mga pamilya nga mga Saksi ni Jehova naggagahin hin espisipiko nga panahon kada semana para ha pagsingba han pamilya. Ano an puydi himoon durante hini nga pagsingba han pamilya? I-play an VIDEO, katapos, hisguti niyo an masunod nga mga pakiana.
-
Paonan-o an usa nga pamilya magkakaada regular nga Pagsingba han Pamilya?
-
Ano an puydi himoon han kag-anak basi magin praktikal ngan makalilipay an ira pagsingba han pamilya?—Kitaa an retrato ha tinikangan hini nga leksyon.
-
Ano an posible nga rason nga nakukurian an imo pamilya nga magkaada pagsingba han pamilya?
Ha kadaan nga Israel, hi Jehova naglalaom nga an mga pamilya regular nga mag-iistorya mahitungod ha Kasuratan. Basaha an Deuteronomio 6:6, 7, katapos, hisguti niyo ini nga pakiana:
-
Paonan-o mo maiaaplikar ini nga prinsipyo?
Mga suhestyon para ha pagsingba han pamilya:
-
Pag-andam para ha mga katirok ha kongregasyon.
-
Basaha ngan hisguti an usa nga istorya ha Biblia nga ma-i-enjoy han iyo pamilya.
-
Kon may-ada ka bata pa nga mga anak, pag-download o pag-print hin activity para ha kabataan ha jw.org.
-
Kon may-ada ka tin-edyer nga mga anak, paghisgot kamo hin artikulo para ha mga tin-edyer ha jw.org.
-
Ig-akting an usa nga istorya ha Biblia kaupod an imo mga anak.
-
Kitaa ngan hisguti niyo an usa nga video ha jw.org.
AN IBA NASIRING: “An Biblia makuri gud maintindihan han kabataan.”
-
Ano an imo masisiring?
SUMARYO
Karuyag ni Jehova nga higugmaon, bansayon, ngan proteksyonan han mga kag-anak an ira mga anak; karuyag niya nga respetuhon ngan sugton han mga anak an ira mga kag-anak; ngan karuyag niya nga an mga pamilya magsingba ha iya hin urosa.
Repaso
-
Paonan-o mababansay ngan mapuproteksyonan han mga kag-anak an ira mga anak?
-
Paonan-o maipapakita han mga anak an respeto ha ira mga kag-anak?
-
Ano an mga kapulsanan han paggahin hin panahon kada semana para ha pagsingba han pamilya?
DUGANG NGA IMPORMASYON
Ano nga mga leksyon an mag-aandam ha imo anak pagdaku niya?
“Unom nga Leksyon nga Angay Hibaroan han Kabataan” (Pagpamata! Num. 2 2019)
Hibaroi an mga sagdon han Biblia ha mga nag-aataman ha lagas na nga mga kag-anak.
“Ano an Ginsisiring han Biblia Mahitungod ha Pag-ataman ha Lagas Na nga mga Kag-anak?” (Web article)
Kitaa kon paonan-o naglampos an usa nga lalaki nga diri maaram magpadaku hin mga anak.
Gintutdoan Kami ni Jehova Kon Paonan-o Papadakuon an Amon mga Anak (5:58)
Usisaha kon paonan-o mapaparig-on han tatay an iya relasyon ha iya anak nga lalaki.
a Ha Biblia, an “disiplina” nagtutudlok ha pagtutdo, paggiya, ngan pagsaway. Diri gud ito nangangahulogan hin pag-abuso o pagin mapintas.—Proberbios 4:1.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
