ZƐŊ-LƐƐI 50
Ikaayɔɔi A Pɔri Kɛi Leŋ Lii-nɛ̃ɛ Su?—Veerɛi 2
Nĩa-pɛlɛɛ dikaa a sama-sɛŋ nyii kula Ziova yeei. A ŋwɛlii a gɛɛ loŋ-kaa-ɓela di dimɛi kaa a nɛlɛɛ. Ziova a lia-woo lɛlɛɛ-ŋa tɛɛ loŋ-kaa-ɓela pɔ nyii a pɔri kpɔnii dia a gɛɛ di nyiŋi kɛ. Ŋɔlia-woo-ŋai a pɔri ŋɔnɔ kpɔŋ maa tɛɛi nĩa-pɛlɛɛ pɔ a gɛɛ di mɛnii kɔlɔŋ da pɔri gɛi a gɛɛ dikaayɔɔi e kɛ lii-nɛ̃ɛ su.
1. Lia-woo kɛɛ leŋ ɓe Ziova e dɛɛ loŋ-kaa-ɓela pɔi?
Ziova a ŋwɛlii a gɛɛ loŋ-kaa-ɓela di dinĩa-pɛlɛɛi wɛli, di tãi tamaa siɣe gie ma. A ŋɔnɔ ŋwɛlii a gɛɛ loŋ-kaa-ɓela di dinĩa-pɛlɛɛi maa kɔ̃ɔ mɛni nyɔmɔɔ-ŋa yeei, di tii kɛ a Ŋala-kɔlɔi ŋɔtɔ̃ya-ŋuŋ-ŋai da kɛ sɛŋ lɛi dia. (Tare-woo-ŋa 1:8) E mo loŋ-kaa-naŋ-ŋa dia nyɛɛi: “Ka [kanĩa-pɛlɛɛi tɔɔ Ziova] . . . ŋɔsɛŋ-lɛɛi da ŋɔyao-maai su.” (Ifisiɛŋ 6:4 lono.) Ziova lii a nɛ̃ɛ a kɛ loŋ-kaa-ɓela da sia a nia-wooi ŋi a pa dinĩa-pɛlɛɛi tɔɔ mɛni ma, dife di tɛɛ nua takpɛni-ŋa pɔ a gɛɛ di di tɔɔ.
2. Lia-woo kɛɛ leŋ ɓe Ziova e dɛɛ nĩa-pɛlɛɛ pɔi?
Ziova e mo nĩa-pɛlɛɛ dia nyɛɛi: “Ka kakaa-ɓela woo mɛni.” (Kolasiɛŋ 3:20 lono.) Nĩa-pɛlɛɛ da ɓaa-kɛ-maa tɛɛ dikaa-ɓela pɔ, di diwoo mɛni, da Ziova da dikaa-ɓela lii nɛ̃ɛ. (Tare-woo-ŋa 23:22-25) Zisɛ e mɛni-kɔɔŋ-maa lɛlɛɛ lɛ gɛɛ a loloŋ. Berei maŋ e kɛ la a nuu maa waai, e gaa-ɓela woo mɛni e ɓaa-kɛ-maa tɛɛ dipɔ berei maŋ dife kɛ ni la a maa waa-ɓelai.—Luu 2:51, 52.
3. Ikaayɔɔi a pɔri lɛɣɛi leŋ a Ɣala?
A kɛ ikaa a loŋ-kaa-nuu, zu ponoɔɔi a gɛɛ ya ŋwɛlii inĩa-pɛlɛɛi di Ziova wɛli yɛɛ berei I ŋwɛlini lai. Ya pɔri nyiŋi kɛi leŋ? Ya pɔri nyiŋi kɛi a siaa a Ŋala-kɔlɔi ŋɔlia-wooi ŋi: “Ka [Ziova woo] lɛ kalonii dia. Ka doo dikili-ŋa tãi ka kɛ seeni la ka pɛrɛ-ŋai lai, ka kɛ siai bere-ŋai su.” (Dutɛrɔnome 6:7) ‘Sɛŋ-lɛɛ’ sukulai ɓa, sɛŋ ta lɛɛ nuu ta ma a tãi tamaa. Tãi ta, ya kpiŋ I gɔlɔŋ a gɛɛ maa nɛ̃ɛi I sɛŋ ta lɛ inĩa-pɛlɛɛi dia a tãi tamaa a gɛɛ e lɛɛ dikili-ŋa. Ŋala-kɔlɔ-kpuai ŋi sukulai ɓa, I tãi takpɛni-ŋa kɔri a tãi kelee a gɛɛ I lono inĩa-pɛlɛɛi pɔ e pilaŋ Ziova ma. Gaa a mɛni lɛlɛɛ a gɛɛ ka tãi siɣe a lɔɔ-kuu kelee a gɛɛ ka kaayɔɔ Ɣala-kɔlɔ maa-kɔriɛ kɛ gie ma. A kɛ nĩa-pɛlɛɛ fe iyeei, ya pɔri nii tãi siɣei a lɔɔ-kuu kelee a gɛɛ I Ŋala-kɔlɔi maa-kɔri.
MƐNI TAMAA MAA-KƆRI
Lia-woo lɛlɛɛ-ŋa kaa nyii a pɔri gɛi a gɛɛ gaayɔɔi su-ɓela kelee lii e kɛ a nɛ̃ɛ.
4. Inĩa-pɛlɛɛi tɔɔ a wɛli-kɛ-maa pere
Nĩa-pɛlɛɛ tɔɔ kaa a tii kpanaŋ. Ŋala-kɔlɔi a pɔri kpɔŋ maa tɛɛi leŋ ipɔ? Zĩi 1:19, 20 lono, gɛ ni ka lono e pilaŋ mare-kɛɛ-ŋai ŋi dia:
-
Loŋ-kaa-ɓela da pɔri wɛli-kɛ-maa lɛi leŋ da kɛ lonoi dinĩa-pɛlɛɛi pɔ?
-
Le mɛni ɓe maa fe nɛ̃ɛ ni la a gɛɛ loŋ-kaa-ɓela di dinĩa-pɛlɛɛi kula-maa kɛ dilii a kɛ a ŋwanaa? a
5. Inĩa-pɛlɛɛi maa kɔ̃ɔ
A gɛɛ I inĩa-pɛlɛɛi maa kɔ̃ɔ, maa nɛ̃ɛi I lono dipɔ tɛitɛi e pilaŋ nɛni mɛni da surɔŋ mɛni ma. Nyiŋi kɛi a pɔri kɛi a gbanaŋɔɔ. VILOI su kaa, gɛ ni ka lono e pilaŋ mare-kɛɛ-ŋai ŋi dia.
-
Le mɛni ɓe a kɛ la a gbanaŋɔɔ a gɛɛ loŋ-kaa-ɓela taŋa di lono dinĩa-pɛlɛɛi pɔ e pilaŋ nɛni mɛni da surɔŋ mɛni ma?
-
Pere sii kɛɛ leŋ ɓe loŋ-kaa-ɓela taŋa daa lono la dinĩa-pɛlɛɛi pɔ e pilaŋ nɛni mɛni da surɔŋ mɛni ma?
Yɛɛ berei Ŋala-kɔlɔi e mo la naa-tuɛi, ŋeniɛi ŋi nyii gaa Setɔŋ yee mui a nyɔnii a ŋanaa a ɣele kelee. 2 Temete 3:1, 13 lono, gɛ ni ka lono e pilaŋ mare-kɛɛ ŋi ma:
-
Ŋwana-lɔɔ-ɓelai nyii ŋoo-kpua 13 e lono e pilaŋ diai, di taŋa da tee-perei kɛ a nĩa-pɛlɛɛ kpaa di dikara. Le mɛni ɓe maa nɛ̃ɛi la loŋ-kaa-ɓela di sɛŋ lɛ dinĩa-pɛlɛɛi dia e pilaŋ nɛni mɛni da surɔŋ mɛni ma da berei da pɔri dikpiŋ maa kɔ̃ɔi la ŋwana-lɔɔ-ɓelai ŋi yeei?
I mɛnii kɔlɔŋ?
Ziova Ŋɔsere-faa Kɛ-ɓelai daa kɔlɔ-ŋa kpaa vilo-ŋa kpɛtɛ nyii-ŋai a kpɔŋ maa tɛɛ loŋ-kaa-ɓela pɔ a gɛɛ di sɛŋ lɛ dinĩa-pɛlɛɛi dia e pilaŋ nɛni mɛni da surɔŋ mɛni ma da berei da pɔri dikpiŋ maa kɔ̃ɔi la. Gɔɔŋ-maa taŋa ɓa:
6. Ɓaa-kɛ-maa tɛɛ ikaa-ɓela pɔ
Nĩa-pɛlɛɛ da nuu-tɔɔ-ŋa da pɔri ɓaa-kɛ-maa tɛɛi dikaa-ɓela pɔ a berei da lono la dipɔi. VILOI su kaa, gɛ ni ka lono e pilaŋ mare-kɛɛ-ŋai ŋi dia.
-
Le mɛni ɓe nɛlɛɛi la a gɛɛ nuu-tɔɔ e lono a ɓaa-kɛ-maa pere gaa-ɓela pɔ?
-
Nuu-tɔɔ a pɔri lonoi leŋ a ɓaa-kɛ-maa pere gaa-ɓela pɔ?
Tare-woo-ŋa 1:8 lono, gɛ ni ka lono e pilaŋ mare-kɛɛ ŋi ma:
-
Maa nɛ̃ɛi nuu-tɔɔ e tua leŋ a kɛ gaa-ɓela da nia-woo ɓo?
7. Ka ikaayɔɔi ka Ziova fɛli gie ma
Ziova Ŋɔsere-faa Kɛ-ɓelai da tãi siɣe a lɔɔ-kuu kelee a gɛɛ di dikaayɔɔ Ɣala-kɔlɔ maa-kɔriɛ kɛ gie ma. Gaayɔɔ Ɣala-kɔlɔ maa-kɔriɛ ŋi kɛ pere a kɛ leŋ? VILOI su kaa, gɛ ni ka lono e pilaŋ mare-kɛɛ-ŋai ŋi dia.
-
Kaayɔɔ a pɔri Gaayɔɔ Ɣala-kɔlɔ Maa-kɔriɛ kɛi leŋ a tãi kelee?
-
Le ɓe loŋ-kaa-ɓela da pɔri gɛi a gɛɛ gaayɔɔ Ɣala-kɔlɔ maa-kɔriɛ e kɛ a nɛlɛɛ, nuu kelee e ŋaa-nɛ̃ɛ kula?—Zɛŋ-lɛɛ ŋi kɔɔ pilanii fotooi kaa.
-
Le ɓe a pɔri gɛi a gbanaŋɔɔ a gɛɛ ka ikaayɔɔi ka Ŋala-kɔlɔi maa-kɔri gie ma?
Eezuɛ-ŋai ditãi ma, Ziova e kɛ ŋwɛlii a gɛɛ kaayɔɔ-ŋa di lono a tãi kelee e pilaŋ Ŋala-kɔlɔi ma. Dutɛrɔnome 6:6, 7 lono, gɛ ni ka lono e pilaŋ mare-kɛɛ ŋi ma:
-
Ya pɔri tii kɛi leŋ a dɔ̃ya-ŋuŋ ŋi?
Lia-woo-ŋa kaayɔɔ Ɣala-kɔlɔ maa-kɔriɛ mɛni ma:
-
Ka kakpiŋ kpɛtɛ goyaŋ-ŋai mɛni ma.
-
Ka ikaayɔɔi ka mɛni-pɔlɔ-ŋai Ŋala-kɔlɔi sui nyii ŋwɛli ka kaai, tɔnɔ lono ka lono e pilaŋ ma.
-
A kɛ nĩa-pɛlɛɛ ka iyeei, mɛni-ŋai nĩa-pɛlɛɛ mɛni mai dɔnɔ dãanloo kɛ kpaa I ŋɔprint kɛ jw.org fãai ŋa.
-
A kɛ nuu-tɔɔ-ŋa kaa iyeei, ka lono e pilaŋ mɛni-ŋuŋ-ŋai dɔnɔ ma nyii bilaŋɔi nyaŋkpa-ŋa dia jw.org fãai ŋa.
-
Ka inĩa-pɛlɛɛi ka mɛni-pɔlɔ-ŋai Ŋala-kɔlɔi sui tɔnɔ maa mɛni pɔɔkɔɔŋ kɛ.
-
Ka vilo ta su kaa jw.org fãai ŋa, ka lono e pilaŋ ma.
NUA TAŊA DA MO DIYƐƐI: “Tii tamaa kaa ma, mve pɔrii Ŋala-kɔlɔi ŋa lɛi ŋanĩa-pɛlɛɛi dia.”
-
Le ɓe ya pɔri moi?
MƐNI-ŊUŊ-ŊAI YAA MAA-KƆRII
Ziova a ŋwɛlii a gɛɛ loŋ-kaa-ɓela di dinĩa-pɛlɛɛi wɛli, di sɛŋ lɛ dia, di dimaa kɔ̃ɔ. A ŋwɛlii a gɛɛ nĩa-pɛlɛɛ di dikaa-ɓela woo mɛni; a ŋɔnɔ ŋwɛlii a gɛɛ kaayɔɔ-ŋa di vɛli gie ma.
Gili-too-ŋa mare-kɛɛ-ŋai
-
Loŋ-kaa-ɓela da pɔri dinĩa-pɛlɛɛi tɔɔi leŋ, di dimaa kɔ̃ɔ?
-
Nĩa-pɛlɛɛ da pɔri ɓaa-kɛ-maa tɛɛi leŋ dikaa-ɓela pɔ?
-
Mɛni lɛlɛɛ-ŋa kɛɛ leŋ ɓe kaayɔɔ su-ɓela da zɔlɔ ɓo da tãi siɣe a lɔɔ-kuu kelee a gɛɛ di kaayɔɔ Ɣala-kɔlɔ maa-kɔriɛ kɛ?
MƐNI TAKPƐNI-ŊA MAA-KƆRI
Mɛni-ŋuŋ-ŋa kɛɛ leŋ ɓe pai kpɔŋ maa tɛɛi inĩa-pɛlɛɛi pɔ a gɛɛ di dikpiŋ kpɛtɛ kpawo-laa mɛni ma?
“Mɛni-ŋuŋ Lɔɔlu-mɛi-da Nyii Maa Nɛ̃ɛi Nĩa-pɛlɛɛ Di Maa-kɔrii” (Kɛ-a-iŋɛi! No. 2 2019)
Lia-woo lɛlɛɛ-ŋa kaa nyii Ŋala-kɔlɔi e dɛɛ diai di nuu pɔlɔ-ŋai mɛi kaai pɔ.
Berei kaa naloŋ tɔnɔ nyii ve kɛ ni a berei kɔlɔŋɔɔ a pɔri ŋɔnĩa-pɛlɛɛi tɔɔi lai e kɛ la a naŋ-nuu lɛlɛɛ.
Berei kaa loŋ-kaa-naŋ-ŋa da pɔri dilaoi-laai su kpananii la a dilonii sinaai.
“Loŋ Kaa-naŋ-ŋa Da Pɔri Laoi-laa Lɛlɛɛ Kɛi Leŋ a Dilonii Sinaai?” (Nyeŋkeŋ, Bɔrɔŋ-kpalai 1, 2011)
a Ŋala-kɔlɔi su, nĩa-pɛlɛɛ kula-maa kɛɛ sukulai ɓa I sɛŋ lɛ dia, I diteniŋ tɔɔ kpaa I kpɔŋ maa tɛɛ dipɔ a gɛɛ di ditua-pere kpaa dikili-ŋa-siai maa faleŋ. Zukulai fa a gɛɛ I tua nyɔmɔɔ kpaa ŋwana-lɔɔ mɛni kɛ a dia.—Tare-woo-ŋa 4:1.
