LIJIGANYO 50
Yampaka Atende Kuti Liŵasa Lyawo Liŵeje Lyakusangalala—Mbali 2
Ŵanache uli mtuka wakutyochela kwa Yehofa. Myoyo, Yehofa akusasaka kuti achinangolo ŵasamalileje chenene ŵanacheŵa. Jwalakwe akusiŵasalilaga achinangolo yampaka atende pakwasamalila ŵanache ŵawo. Yehofa akusiŵasalilagasoni ŵanache yakusosekwa kutenda yampaka yikamuchisye liŵasa kuŵa lyakusangalala.
1. Ana Yehofa akusiŵasalilaga achinangolo kuti atendeje chichi?
Yehofa akusasaka kuti achinangolo ŵanonyeleje ŵanache ŵawo soni kuti apateje ndaŵi jakwanila jakuŵa nawo yimpepe. Jwalakwe akusasakaga kuti achinangolo ŵachenjeleje ŵanachewo ku yindu yampaka yijonanje umi wawo. Akusasakasoni kuti achinangolo akamulichisyeje masengo mfundo sya m’Baibulo pakwajiganya ŵanache. (Misyungu 1:8) Yehofa akusiŵasalilaga mwanja baba kuti: ‘Ŵaleleje chenene [ŵanache ŵawo] . . . soni kwajiganyaga mwa Klistu.’ (Aŵalanje Aefeso 6:4.) Yehofa akusasangalalaga naga achinangolo akukuya yakusasaka jwalakwe pakwalela ŵanache ŵawo. Jwalakwe akusasangalalagasoni naga achinangolo ngakwapa ŵane udindo wakulela ŵanache ŵawo.
2. Ana Yehofa akusiŵasalilaga ŵanache kuti atendeje chichi?
Yehofa akusiŵasalila ŵanache kuti: ‘Ŵapikanileje achinangolo ŵawo.’ (Aŵalanje Akolose 3:20.) Yehofa ni achinangolowo akusasangalalaga, ŵanache pakwachimbichisya soni kwapikanila achinangolo ŵawo. (Misyungu 23:22-25) Yesu paŵaliji mwanache jwalosisye chisyasyo chambone pangani jakwapikanila achinangolo. Atamose kuti jwalakwe jwaliji jwamlama, nambope jwapikanilaga soni kwachimbichisya achinangolo ŵakwe.—Luka 2:51, 52.
3. Ana liŵasa mpaka litende yamtuli kuti liŵe paunasi wakulimba ni Mlungu?
Naga ali nangolo, mwangakayichila akusasaka kuti ŵanache ŵawo amnonyeleje Yehofa mpela mwakusatendela wawojo. Nambo ana mpaka atende yeleyi mwamtuli? Naga akukuya yajikusasalaga Baibulo, yakuti: “Mkajiganye ŵanache ŵenu gele malamusigo mwakuwilisyawilisya, pamalo gali gose gatimkatame. Mkasalileje ya malamusigo ndaŵi syosyope, kanga mli mnyumba mwenu, kanga mli mkwenda mwitala.” (Detulonomo 6:7) Mwangakayichila achinangolo akusamanyililaga kuti mwanache akusakumbuchilaga yindu naga akumjiganya mwakuwilisyawilisya. Myoyo lilembali likutukamuchisya kumanyilila kuti achinangolo akusosekwa kupataga ndaŵi jakwajiganya ŵanache ŵawo ya Yehofa. Ni ligongo lyakwe mpaka luŵe lunda kuti liŵasa lyosope likoleje ndaŵi pa wiki jakulijiganya Baibulo pampepe. Naga ŵangali ŵanache mpaka yakamuchisyesoni naga akusalijiganyaga Maloŵe ga Mlungu wiki jilijose.
KULIJIGANYA YEJINJI
Chitulijiganye yampaka liŵasa litende kuti liŵeje lyakusangalala soni yampaka atende pakulichenjela liŵasa lyawo ku yindu yakusakala.
4. Ŵajiganyeje ŵanache ŵawo mwachinonyelo
Kumjiganya mwanache mpaka kuŵe kwasawusya. Nambo ana Baibulo mpaka jakamuchisye mwamtuli? Aŵalanje Yakobo 1:19, 20, kaneko akambilane yiwusyo ayi:
-
Ana achinangolo mpaka alosye chamtuli kuti akusaŵanonyelaga ŵanache ŵawo pakuŵecheta nawo?
-
Ligongo chichi nangolo jwatumbile ngakusosekwa kumjamuka mwanache? a
5. Ŵachenjeleje ŵanache ŵawo
Yili yakusosekwa mnope kuti ŵasalileje ŵanache ŵawo ngani jakwayana ni kugonana kuti ŵachenjele. Nganiji mpaka jiŵe jakutesya sooni. Alolele FIDIYO, kaneko akambilane yiwusyo ayi.
-
Ligongo chichi yikusaŵaga yakusawusya kwa achinangolo ŵane kuŵechetana ni ŵanache ŵawo ngani syakwayana ni kugonana?
-
Ana achinangolo ŵane akusaŵecheta mwamtuli nganisi kwa ŵanache ŵawo?
Mwakamulana ni yajasasile Baibulo, chilambochi chikupitilisya kuŵa chakusalaka mnope. Aŵalanje 2 Timoteo 3:1, 13, kaneko akambilane chiwusyo achi:
-
Ŵane mwa ŵandu ŵakusakala ŵakwasala mu vesi 13 ni aŵala ŵakusiŵagona ŵanache. Ana ligongo chichi yili yakusosekwa kuti achinangolo ŵasalileje ŵanache ngani syakwamba kugonana pakusaka kwachenjela ŵanache kwa ŵanduŵa?
Ana akumanyilila?
Ŵa Mboni sya Yehofa akopwesye yindu yejinji yakwakamuchisya achinangolo kuti ŵasalileje ŵanache ŵawo ngani syakwayana ni kugonana soni kuti ŵachenjeleje kwa ŵandu ŵangalwe. Kuti amanyilile yejinji alole ngani asi:
-
Mwachenjeleje Ŵanache Ŵenu (fidiyo)
-
“Ŵalondecesyeje Cenene Ŵanace Ŵawo Pakwamba Yagonana” (Ajimuche! Na. 5 2016)
6. Ŵachimbichisyeje achinangolo ŵawo
Ŵanache soni ŵachinyamata mpaka alosye kuti akusiŵachimbichisya achinangolo ŵawo kupitila mu kaŵechete kawo. Alolele FIDIYO, kaneko akambilane yiwusyo ayi.
-
Ligongo chichi yili yakusosekwa kuti ŵanache ŵachimbichisyeje achinangolo ŵawo pakuŵechetana nawo?
-
Ana mwanache mpaka alosye chamtuli kuti akusiŵachimbichisya achinangolo ŵakwe pakuŵecheta?
Aŵalanje Misyungu 1:8, kaneko akambilane chiwusyo achi:
-
Ana mwanache akusosekwa kutenda chichi achinangolo pamsalile yakutenda?
7. Tumlambileje Yehofa yalumo ni liŵasa lyetu
Wiki jilijose maŵasa ga ŵa Mboni sya Yehofa gakusasagula ndaŵi jakuti gakambilaneje maloŵe ga Mlungu. Ana gakusatenda yeleyi chamtuli? Alolele FIDIYO, kaneko akambilane yiwusyo ayi.
-
Ana liŵasa mpaka litende yamtuli kuti litendeje Kulambila kwa Peŵasa mwakutamilichika?
-
Ana nangolo mpaka atende chichi kuti kulambila kwa peŵasa kuŵeje kwakamuchisya soni kwakusangalasya?—Alole chiwulili chachili kundanda kwa lijiganyoli.
-
Ana ni chichi champaka chilepelekasyeje kulijiganya maloŵe ga Mlungu yalumo ni liŵasa lyawo?
Kalakala ku Isalaeli, Yehofa jwasakaga kuti liŵasa lililyose lilijiganyeje Maloŵe ga Mlungu. Aŵalanje Detulonomo 6:6, 7, kaneko akambilane chiwusyo achi:
-
Ana mpaka akuye chamtuli yayili palilembapa?
Yampaka atende pakulambila kwa peŵasa:
-
Akosecheleje misongano ja mpingo.
-
Aŵalanje soni akambilane ngani ja m’Baibulo jampaka jasangalasye ŵamwiŵasamo.
-
Naga akwete ŵanache atende dawunilodi kapena kupulita yindu yakwayana ni ŵanache pa jw.org.
-
Naga akwete ŵachinyamata, akambilane ngani syakwayana ni ŵachinyamata pa jw.org.
-
Atende sewelo pangani ja m’Baibulo ni ŵanache ŵawo.
-
Alole soni akambilane mafidiyo ga pa jw.org.
YAKUSAŴECHETA ŴANDU ŴANE: “Baibulo jili jakusawusya kuti ŵanache ajipikanichisye.”
-
Ana akuti uli ni nganisyo syelesi?
YALIJIGANYISYE
Yehofa akusasaka kuti achinangolo ŵanonyeleje, kwajiganya soni kwachenjela ŵanache ŵawo. Akusasakasoni kuti ŵanache ŵachimbichisyeje soni kwapikanila achinangolo ŵawo. Akusasakasoni kuti liŵasa lililyose limlambileje.
Yiwusyo Yakuwilisya
-
Ana achinangolo mpaka ŵajiganye soni kwachenjela ŵanache ŵawo chamtuli?
-
Ana ŵanache mpaka alosye chamtuli kuti akusiŵachimbichisya achinangolo ŵawo?
-
Ana pana umbone wamtuli naga liŵasa likusapataga ndaŵi jakumlambila Mlungu wiki jilijose?
YAKULINGA YINESONI
Ana ni yindu yapi yampaka ŵajiganye ŵanache ŵawo yayichakamuchisya pachachikulapo?
“Yindu 6 Yakusosekwa Kulijiganya Ŵanace” (Ajimuche! Na. 2 2019)
Alijiganye yindu yampaka yakamuchisye ŵandu ŵakusiŵasamalilaga achinangolo ŵachekulupe.
Alole yaŵatesile jwamlume jwine kuti aŵe mtati jwambone.
Yehofa Ŵatukamucisye Kuti Tukombole Kwajiganya Ŵanace Ŵetu (5:58)
Alijiganyeje yampaka achitati atende kuti aŵe paunasi wambone ni ŵanache ŵawo.
a M’Baibulo, maloŵe gakuti “chamuko” gakusagopolela kwiganya, kumlongolela soni kumkamuchisya mundu kuti achenje kaganisye kapena ndamo jakulemwecheka. Maloŵega gangagopolela kumlagasya mundu kapena kumtendela ngalwe.—Misyungu 4:1, NWT.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
