GURUY NI 50
Uw Rogon Nrayog ni Nge Felfelan’ e Tabinaw Rom?—Guruy ni 2
Bitir e reb e tow’ath ni ke pi’ Jehovah. Baadag ni nge ayuweg e piin gallabthir e re tow’ath ney nib fel’ rogon. Ke pi’ e fonow ni bay e gonop riy nrayog ni nge ayuweg e piin gallabthir ni ngar rin’ed e re n’ey. Pi fonow ni ke pi’ e ku be dag rogon nrayog ni nge yibnag e piin bitir e felfelan’ nga lan e tabinaw rorad.
1. Mang e fonow ni ke pi’ Jehovah ngak e piin gallabthir?
Baadag Jehovah ni nge t’ufeg e piin gallabthir pi fakrad mu ur rin’ed boch ban’en u taabang. Ku baadag ni nge ayuweg e piin gallabthir pi fakrad ndabi buch ban’en nib kireb rorad, mar fanayed e pi kenggin e motochiyel u Bible ni ngar skulnaged yad. (Proverbs 1:8) Be gaar ngak e pi matam: “Ngam chuguluyed [pi fakmed] . . . mi gimed fonownagrad nrogon girdien Kristus.” (Mu beeg e Efesus 6:4.) Ma felfelan’ Jehovah ni faanra fol e piin gallabthir ko fonow rok u nap’an ni yad be chuguliy pi fakrad, ma dab ra pied e biney e maruwel nib milfan ngorad ngak be’ ni nge rin’.
2. Mang e fonow ni ke pi’ Jehovah ngak e piin bitir?
Be gaar Jehovah ngak e piin bitir: “Thingar um folgad ko thin rok e gallibthir romed.” (Mu beeg e Kolose 3:20.) Faanra i tay e piin bitir fan e gallabthir rorad ma yad be fol rorad, ma aram e ra felfelan’ Jehovah nge gallabthir rorad. (Proverbs 23:22-25) I dag Jesus e kanawo’ nrayog ni ngan folwok riy u nap’an ni kab bitir. I fol ko gallabthir rok ma be tay farow ni yugu aram rogon nib flont.—Luke 2:51, 52.
3. Uw rogon nrayog ni ngam chugurgad chon e tabinaw rom ngak Got?
Faanra gur reb e gallabthir, ma dariy e maruwar riy ni ga baadag ni nge t’uf Jehovah rok pi fakam ni bod gelngin nib t’uf rom. Uw rogon nrayog ni ngam rin’ e re n’ey? Aram e ngam rin’ e n’en be yog e Bible ni be gaar: “Um filed [e thin rok Jehovah] ngak pi fakmed; um weliyed murung’agen ngorad ko ngiyal’ ni gimed bay u tabinaw nge ngiyal’ ni gimed be milekag.” (Deuteronomy 6:7) Fare thin ni “um filed” e be yip’ fan ban’en ni ngaun sul u daken. Dabisiy ni ga manang nthingar um sul u daken ban’en ya nge yag ni par u laniyan’ pi fakam. Re thin ney e be yip’ fan nsusun e ngaum gay boch e kanawo’ ni ngam fil murung’agen Jehovah riy ngak pi fakam ni gubin ngiyal’. Ba fel’ ni ngam ted ba ngiyal’ u lan e wik ni ngaum filed e Bible riy u taabang. Mus nra dariy e bitir rom, ma faan ka ga ra tay ba ngiyal’ u gubin e wik ni ngaum fil e Thin rok Got riy, ma ra yib angin ngom.
KUM FIL BOCH BAN’EN U MURUNG’AGEN
Mu fil boch e fonow nra ayuweg girdien e tabinaw ni ngar pared nib pagan’rad ma yad ba felfelan’.
4. Mu skulnag pi fakam u fithik’ e t’ufeg
Ba mo’maw’ ni ngan skulnag e bitir. Ere uw rogon nrayog ni nge pi’ e Bible e ayuw? Mu beegew e James 1:19, 20, mi gimew weliy e fulweg ko gal deer ni baaray:
-
Uw rogon nrayog ni nge dag e piin gallabthir e t’ufeg u nap’an ni yad be non ngak pi fakrad?
-
Mang fan nsusun e dabi fonownag reb e gallabthir pi fak ko ngiyal’ nib damumuw? a
5. Mu ayuweg pi fakam ndabi buch ban’en rorad
Ra ngam ayuweg pi fakam ndabi buch ban’en rorad, ma rib ga’ fan ni ngam weliy murung’agen e par ko pumoon nge ppin ngorad ni yad gubin. Rayog nib mo’maw’ e re n’ey. Mu yaliyew e re VIDEO ney, mi gimew weliy e fulweg ko gal deer ni baaray.
-
Mang fan nib mo’maw’ ngak boch e gallabthir ni ngar weliyed murung’agen e par ko pumoon nge ppin ngak pi fakrad?
-
Mang boch e kanawo’ ni ke yag rok boch e gallabthir ni ngar weliyed murung’agen e par ko pumoon nge ppin riy ngak pi fakrad?
Be gel e kireb ko re fayleng rok Satan ney ni bod ni kan yiiynag. Mu beegew e 2 Timothy 3:1, 13, mi gimew weliy e fulweg ko re deer ni baaray:
-
Bay boch e pi girdi’ nib kireb ney ni kan weliy murung’agrad ko verse 13 ni yad ma kol e bitir u gelngirad. Ere mang nib ga’ fan ni nge weliy e piin gallabthir murung’agen e par ko pumoon nge ppin ngak pi fakrad nge rogon ni ngar ayuweged yad rok e piin yad ma kol e bitir u gelngirad?
Baaray murung’agen ban’en
Boor e babyor ni ma ngongliy e Pi Mich Rok Jehovah nra ayuweg e piin gallabthir ni ngar weliyed murung’agen e par ko pumoon nge ppin ngak pi fakrad mar ayuweged yad ndabi kolrad be’ u gelngin. Mu guy e:
-
Protect Your Children (video)
-
“Teaching Your Child About Sex” (Awake! No. 5 2016)
6. Mu tayfan e gallabthir rom
Rayog ni nge dag e piin bitir nge piin fel’ yangaren ni yad be tayfan e gallabthir rorad u rogon ni yad ma non ngorad. Mu yaliyew e re VIDEO ney, mi gimew weliy e fulweg ko gal deer ni baaray.
-
Mang nib ga’ fan ni nga i non reb e bitir ngak e gallabthir rok u fithik’ e tayfan?
-
Uw rogon nrayog ni nge non reb e bitir ngak e gallabthir rok u reb e kanawo’ nra m’ug riy ni be tay farow?
Mu beegew e Proverbs 1:8, mi gimew weliy e fulweg ko re deer ni baaray:
-
Mang e susun ni nge rin’ reb e bitir u nap’an nra yog e gallabthir rok e n’en nge rin’?
7. Mu liyorgad chon e tabinaw rom ngak Jehovah
Tabinaw ko Pi Mich Rok Jehovah e yad ma tay ba ngiyal’ u gubin e wik ni ngaur liyorgad riy u taabang. Mang e rayog ni ngan rin’ u nap’an e fol Bible ni tabinaw? Mu yaliyew e re VIDEO ney, mi gimew weliy e fulweg ko pi deer ni baaray.
-
Uw rogon nrayog ni nga i tay reb e tabinaw e Fol Bible ni Tabinaw ni gubin ngiyal’?
-
Mang e rayog ni nge rin’ reb e gallabthir ya nge yag ni puluw e n’en yibe fil u nap’an e fol Bible ni tabinaw ngak e piin bitir mar felfelan’gad ngay?—Mu guy e sasing u tabolngin e re guruy ney.
-
Mang e rayog ni nge mo’maw’nag ngomed ni ngam filed e Bible u taabang?
Kakrom u Israel e baadag Jehovah ni nga i weliy chon e tabinaw e thin ni bay u lan e Babyor nib Thothup u taabang ni gubin ngiyal’. Mu beegew e Deuteronomy 6:6, 7, mi gimew weliy e fulweg ko re deer ni baaray:
-
Uw rogon nrayog ni ngam fol ko re kenggin e motochiyel ney?
Boch ban’en nrayog ni ngan rin’ u nap’an e fol Bible ni tabinaw:
-
Ngan fal’eg rogoy ko muulung.
-
Mu beeged ban’en u Bible nra adag chon e tabinaw rom mi gimed weliy u taabang.
-
Faanra bay e bitir rom nib achichig, mag downloadnag ara mu printnag bang e babyor ni fan ko bitir ni bay ko jw.org.
-
Faanra bay e bitir rom ni ke fel’ yangaren, mi gimed weliy u taabang reb e article ni fan ko piin fel’ yangaren ni bay ko jw.org.
-
Mmarod u yaan ban’en ni bay murung’agen u Bible.
-
Mu yaliyed reb e video ni bay ko jw.org mi gimed weliy u taabang.
MA GAAR BOCH E GIRDI’: “Kaygi mo’maw’ ko bitir ni ngar nanged fan e Bible.”
-
Mang e ga ra yog?
N’EN KAN FIL
Baadag Jehovah ni nge t’ufeg e piin gallabthir pi fakrad, mar skulnaged yad, mu kur ayuweged yad ndabi buch ban’en rorad; ma piin bitir e ngar ted fan e gallabthir rorad mar folgad rorad; ma chon e tabinaw e ngar liyorgad ngak u taabang.
Ngan Sul u Daken
-
Uw rogon nrayog ni nge skulnag e piin gallabthir pi fakrad mar ayuweged yad ndabi buch ban’en rorad?
-
Uw rogon nrayog ni nge tay e piin bitir fan e gallabthir rorad?
-
Mang angin nra yib riy ni faanra i tay chon e tabinaw ba ngiyal’ u gubin e wik ni ngaur filed e Bible riy u taabang?
MU GAY MURUNG’AGEN
Mang boch ban’en nrayog ni nge fil fakam nra ayuweg u nap’an ni ke ilal?
Mu beeg boch e fonow ni be pi’ e Bible ni fan ko piin yad be ayuweg e gallabthir rorad ni ke pilibthir.
“What Does the Bible Say About Caregiving for Elderly Parents?” (Article ni bay ko website)
Mu yaliy rogon ni yag rok be’ nib pumoon nde nang rogon i chuguliy e bitir ni nge mang reb e matam nib manigil.
Mu beeg rogon nrayog ni nge chugurnag e pi matam e tha’ u thilrad pi fakrad ni pagel.
a Fare bugithin ni “fonownag” ni kan fanay u Bible e be yip’ fan ni ngan skulnag be’, min pow’iy, min yal’uweg. Der yip’ fan ni ngan gafgownag be’.—Proverbs 19:18, BT.
