Ti regalu stiʼ Jehová nga xiiñiʼ binni. Nga runi, ribézabe gapa ca padre regalu riʼ, ne rudiibe conseju galán laacaʼ para ganda gúnicaʼ ni. Laaca rudiibe conseju xiiñiʼ binni para ganda chuʼ familia sticaʼ galán.

1. ¿Xi conseju rudii Jehová ca padre?

Racalaʼdxiʼ Jehová gannaxhii binni xiiñiʼ ne cueecaʼ tiempu para laacabe. Laaca ribézabe gapa binni xiiñiʼ para cadi guizaacacaʼ xiixa cosa feu ne gusiniisicaʼ laacabe casi ná ca principiu zeeda lu Biblia (Proverbios 1:8). Sicaríʼ nga canabaʼ Dios ca ni naca xaíque ndaaniʼ familia gusiniisicaʼ xiiñicaʼ: «Lagusiniisi laacabe casi ná Jehová ne casi ná ca conseju stiʼ» (biindaʼ Efesios 6:4). Riuulaʼdxiʼ Jehová guʼyaʼ zinanda ca padre conseju stiʼ ora gusiniisicaʼ xiiñicaʼ ne qué rudiicaʼ lugar gusiniisi sti binni xiiñicaʼ.

2. ¿Xi conseju rudii Jehová xiiñiʼ binni?

Ndiʼ nga ni rinabaʼ Jehová laacabe: «Laguzuubaʼ stiidxaʼ bixhózetu ne jñaatu» (biindaʼ Colosenses 3:​20). Pa ruzuubaʼ xiiñiʼ binni diidxaʼ ne runi respetar bixhoze ne jñaa, zusiecheʼ laacabe ne laaca zusiecheʼ Jehová (Proverbios 23:​22-​25). Guizáʼ galán ejemplu bisaana Jesús, purtiʼ neca nácabe perfectu, bizuubabe stiidxaʼ bixhózebe ne jñaabe ne biʼniʼ respetarbe laacaʼ neca nácacaʼ binni ruchee (Lucas 2:​51, 52).

3. ¿Xi zanda guni ca familia para ganda chuʼcaʼ gaxha de Jehová?

Pa nápaluʼ xiiñiluʼ la? zándaca racaláʼdxiluʼ gannaxhiicabe Jehová cásica nadxiiluʼ laa. ¿Ximodo zanda gúniluʼ ni yaʼ? Ra chinándaluʼ conseju ni rudii Biblia riʼ: «Naquiiñeʼ gusiidiluʼ [Stiidxaʼ Jehová] ca xiiñiluʼ ne gábiluʼ laacabe ni nani, ora maʼ zúbaluʼ ra yoo, ora maʼ zeluʼ paxaraa» (Deuteronomio 6:7). Ne para gusiidiʼ tuuxa la? naquiiñeʼ guiníʼ ni stale biaje. Zándaca lii maʼ nánnaluʼ naquiiñeʼ gábiluʼ ca xiiñiluʼ xiixa stale biaje para ganda guietenaláʼdxicaʼ ni. Nga runi, ni ná textu riʼ nga siempre biyubi modo guiníʼneluʼ ca xiiñiluʼ de Jehová. Laaca galán cuee guiráʼ familia tiempu guiráʼ semana para guni adorarcaʼ Jehová ra gúʼndacaʼ Biblia juntu. Ne neca peʼ qué gápaluʼ xiiñiluʼ, pa guni estudiarluʼ Biblia guiráʼ semana zudiiluʼ cuenta guizáʼ zacaneni lii.

 GUIZÍʼDIRUNU JMA

 6. Biʼniʼ respetar bixhózeluʼ ne jñaaluʼ

 XI BIZÍʼDINU

Racalaʼdxiʼ Jehová gannaxhii ca padre xiiñicaʼ, gusiidicaʼ laacabe ne gápacaʼ laacabe; ne racaláʼdxibe guni respetar ne guzuubaʼ xiiñiʼ binni stiidxaʼ bixhoze ne jñaa ne guni adorar guiráʼ ni nuu ndaaniʼ familia ca laabe.

Xi biziidiluʼ

• ¿Ximodo zanda gusiidiʼ ne gapa binni xiiñiʼ?

• ¿Ximodo zanda gusihuinni xiiñiʼ binni runi respetar bixhoze ne jñaa?

• ¿Xi zabeendú ca familia ca pa cueecaʼ tiempu cada semana para guni adorarcaʼ Dios?