LECCIÓN 50
Bi gonloʼ na sualho yatzayolaj lhen familia kioʼ (ta urhope)
Jeobá chi bdeʼ to ta zaakaʼ ki beneʼ notzaganake, bin kieke. Jeobá rbezeʼ xhozixhnakabi guioke lhekabi chhiaʼ. Lhekaʼ rseediene lhekeʼ nákaʼ kooke lhekabi toneza, lhezekan rguixhajeʼ ki ka bin kieke bi rhala gonkabi na kan yogokateʼ lo familia suake yatzayolaj.
1. Bi rseedie Jeobá xhozixhnaxhkuidiʼ
Jeobá rbezeʼ xhozixhnaxhkuidiʼ yekekene lhekabi lhen kueajke lataj kueke lhen lhekabi, lhezekan rheenheneʼ gonchiʼke lhen gluekseediekene lhekabi kaʼ rnhe lo Biblia (Proverbios 1:8). Jeobá rhee xhozixnaxhkuidiʼ: «Letzeaj le gluekseediekebi kaʼ [...] rnhe Jeobá» (blaba Efesios 6:4). Jeobá rdanheneʼ banachhi katiʼ xhozixhnaxhkuidiʼ rseediekene lhekabi kaʼ rnhe Xhtidzeʼ lhen ku rhokanke chhin ni lonaaʼ beneʼ yobla.
2. Bi rseedie Jeobá binxhkuidiʼ
Jeobá rhee xhkuidiʼ «le gzenaga ki xhozixhnalhe» (blaba Colosenses 3:20). Cheʼ to bin rzenagabi lhen rhombi balaʼn xhozixhnabi wegzuabi lhekeʼ yatzayolaj lhezekan Jeobá (Proverbios 23:22-25). Jesús gokeʼ to bin chhiaʼ, nikla kubi dolaxhguiaʼ guioe bzenague lhen bhenhe balaʼn xhozixhneʼ, nikla gokake beneʼ dolaxhguiaʼ (Lucas 2:51, 52).
3. Bi wazeke gon familia na suake gago lhen Jeobá
Cheʼ zua bin kioʼ nakalha rheenhelho yekekebi Jeobá kateka rhekeloneʼ lueʼ. A wazeke gonloʼ kan. Wazeke cheʼ gonloʼ kaʼ rnhe Biblia: «Rhala kseedieloʼ ka bin kioʼ [Xhtidzaʼ Jeobá] lhen ktzalajlo kie katiʼ kuelho lo yoʼo kioʼ, lhen katiʼ ga zeajlho» (Deuteronomio 6:7). Kseedieloʼ rhenheinhe lawenzi yekalobiʼ ta rheenhelho yediekebi. Nakalha nezelho rkin yekalobiʼ tazian nia ta be rheenhelho galalachhikabi. Lhekaʼ textoni rhenheinhe rhala kuealhoʼ lataj kuenda ktzalajlo ki Jeobá lhen ka bin kioʼ batatheze, lhezekan naka wen yogothelhe yedobilhe yogoxhmán na tzeanelachhilhe Jeobá lhen kseedilhe Biblia tzaxhen, na nikla ku zua bin kioʼ, cheʼ yogoxhmán kseediloʼ towelazalho gongazi lueʼ yodarhi.
KSEEDIRHA MÁSRHE KI TANÍ
Ni uyorha bi waka gonke lo familia na suake chhiaʼ lhen yatzayolaj.
4. Blueʼ yelarheke katiʼ kseedieloʼ bin kioʼ
Kseedierha bin kierha ku rhon yolaj. Nákaʼ wazeke gon rhoʼo yodarhi Biblia. Le ulaba Santiago 1:19, 20 na le ktzalaj ki taní:
-
Katiʼ xhozixhnaʼ to xhkuidiʼ ktzalajlhenke lhekabi, nákaʼ wazeke glueke yelarheke.
-
Bixhkieʼ ku rhala yigoeneza bin kieʼ katiʼ rdzeeʼ. a
5. Bhenchiʼ ka bin kioʼ
Kuenda gonchiʼlho ka bin kioʼ rhon bayochhi ktzalajlhenlo to tobiʼ ki sexo. Naka lí, ku gon yolaj gonloʼ kan. Le uyo VIDEO na le ktzalaj ki taní:
-
Bixhkieʼ rhon zeedi ki balakeʼ ktzalajke ki sexo lhen bin kieke.
-
Bi chi bhen yodarhi bala xhozixhnaxhkuidiʼ na ktzalajke ki sexo lhen ka bin kieke.
Kase gnhe Biblia, lo lichhileyo ki Satanás chi grhegazi ta malha. Le ulaba 2 Timoteo 3:1, 13 na le ktzalaj ki taní:
-
Lo versículo 13 rtzalaj ki bala beneʼ malha rkanditajke ka bindoʼ. Lhekaʼ, bixhkieʼ rhon bayochhi xhozixhna to bindoʼ ktzalajke lhen lhekabi ki sexo. Bi waka gonke na gonchiʼke lhekabi ki beneʼ malha.
A nesloʼ.
Testigos ki Jeobá chi gleajke tazian ta gon yodarhi xhozixhnaxhkuidiʼ na ktzalajlhenke lhekabi ki sexo lhen gonchiʼke lhekabi ki beneʼ malha. Ni zua bala:
-
Legon sigorha ka bin kielhe (video)
-
«Nákaʼ ktzalajlo ki sexo lhen bin kioʼ» (¡Despertad!, núm. 5 2016)
6. Bhen balaʼn xhozixhnalho
Ka bindoʼ lhen binxhkuidiʼ rhala gonkabi balaʼn xhozixhnakabi na rhala gakabheʼ katiʼ rledzakabi lhekeʼ. Le uyo VIDEO na le ktzalaj ki taní:
-
Bixhkieʼ naka chhiaʼ to binxhkuidiʼ gluebi balaʼn katiʼ ktzalajlhenbi xhozixhnabi.
-
Nákaʼ wazeke gluebi rhombi balaʼn xhozixhnabi.
Le ulaba Proverbios 1:8 na le ktzalaj ki taní:
-
Nákaʼ rhala gon to binxhkuidiʼ katiʼ xhosbi o xhnabi yeeke lhebi ta rhala gombi.
7. Le tzeajnelachhi Jeobá tzaxhen
Ka testigo ki Jeobá rbeajke kieze to dza kuenda tzeajnelachhike Jeobá tzaxhen. Nákaʼ rheajnelachhike Jeobá tzaxhen. Le uyo VIDEO na le ktzalaj ki taní:
-
Bi gon yodarhi na gonke adoración en familia yogoxhmán.
-
Nákaʼ wazeke gonke na adoración en familia dzaxhenkene yogotheke lhen siʼke banheza (byo foto da ga rzolho).
-
A rhekelho dia ta rzaga kseediloʼ tzaxhen lhen familia kioʼ. Nobí.
Tinaate, Jeobá rbezeʼ ka familia israelita tzooloke ktzalajke ki Xhtidzeʼ. Le ulaba Deuteronomio 6:6, 7 na le ktzalaj ki taní:
-
Nákaʼ wazeke gonloʼ kaʼ rnhe texto blabarha.
Kaʼ waka gonloʼ adoración en familia:
-
Le kseedi lhen le kpaʼ ki reunión.
-
Le ulaba kan le ktzalaj to ta zaa lo Biblia ta dzaxhenhele yogothelhe.
-
Cheʼ dza kioʼ bindoʼ bixhaj, bxhexhaj lhen gleaj ta waka gonka bindoʼ bingoʼ lo jw.org.
-
Cheʼ dza kioʼ binxhkuidiʼ, beguilhaj lo jw.org ta rhaxhenkebi.
-
Legon noʼ ziʼ rhakathe to ta rtzalaj lo Biblia.
-
Le uyo lhen le ktzalaj ki to video ki jw.org.
BALAKEʼ RNHEKE: «Rhongazi zeedi tzeajniʼ bindoʼ bingoʼ tan rtzalaj lo Biblia».
-
Bi rnhelhoʼ lueʼ.
TA CHI BYEDIERHA
Jeobá rheenheneʼ ka beneʼ zua bin kieke yekekene, kseediekene lhen gonchiʼke lhekabi, lhezekan rbezeʼ bin kieke yekekebi lhen gonkabi balaʼn xhozixhnakabi, kan rheenheneʼ yogokateʼ tzeajnelachhike leʼ.
A rhanelho
-
Nákaʼ wazeke kseedieloʼ lhen gonchiʼlho bin kioʼ.
-
Nákaʼ wazeke ka binxhkuidiʼ gluekabi rhonkabi balaʼn xhozixhnakabi.
-
Bi banheza siʼlhe cheʼ kuajlhe lataj yogoxhmán kuenda kseedile ki Jeobá tzaxhen.
BYEDIE MÁSRHE
Bi wazeke gon yodarhi bin kioʼ katiʼ yeenibiʼ.
«Xhopa ta rhon bayochhi yedie ka bin kioʼ» (¡Despertad!, núm. 2 2019)
Blaba ta gon yodarhi beneʼ ryoke to beneʼ waka.
«A rbeza Dios uyorha xhozixhnarha katiʼ chi bgolhakeʼ» (Artículo ki jw.org)
Byo nákaʼ to beneʼ ku nezene gzenieʼ bin kieʼ bchhin byediene uyoeʼ lhekabi chhiaʼ.
Byedie nákaʼ ikualhe chhiaʼ lhenka bin kielhe.
«Bi waka gonle na ku sualhe zitoʼ ki bin kielhe» (La Atalaya, 1 ki noviembre ki 2011)
a Katiʼ Biblia rtzalaj ki yigoorha toneza rhenheinhe kseedierha chhiadi, ku rhenheinhe ugagodzaarha o ksakarha nakathezi (Proverbios 4:1).
