I kare ma Jehovah ocweyowa, en ominiwa mic mo mamwonya adada—kero me lok. Tika kit ma watiyo kwede ki mic meno pire tek bote? Ada, pire tek! (Kwan Yakobo 1:26.) Dong watwero tic ki kerowa me lok i yo ma yomo cwiny Jehovah nining?

1. Watwero tic ki mic me lok i yo maber nining?

Baibul wacciwa ni: ‘Wucuk cwinywu kekenwu, dok wukonnye bene kekenwu wek wudong i yo me cwiny.’ (1 Jo Tecalonika 5:11) Tika ingeyo jo mogo ma mito cukocwiny? Gin ango ma itwero timone wek guwiny maber? Waccigi ni pigi tek boti. Gwok itwero tittigi kitgi mabeco ma imaro. Tika itwero tam i kom ginacoya ma twero cuko cwiny ngat mo ma ingeyo? Tye ginacoya mapol adada ma itwero tic kwede. Wi opo ni kit ma iwaco kwede gin moni bene twero cuko cwiny jo mukene adada. Pi meno, tute me lok ki kica dok ki mwolo.—Carolok 15:1.

2. Kodi lok mene ma myero pe waloki?

Baibul waco ni: “Lok mo marac myero pe okatti ki i dogwu.” (Kwan Jo Epeco 4:29.) Man te lokke ni myero pe wati ki leb maraco nyo leb mabit me cwero cwiny ngat mo. Myero bene wagwokke ki kwoto nying nyo balo nying dano.—Kwan Carolok 16:28.

3. Gin ango ma twero konyowa me loko lok mabeco ma dongo dano?

Pol kare jami ma wawaco nyuto gin ma tye i cwinywa. (Luka 6:45) Pi meno, myero wapwonnye me keto cwinywa i kom jami mabeco—gin ducu ma tye atir, maleng, mamwonya, ki ma dano pwoyo. (Jo Pilipi 4:8) Me keto cwinywa i kom jami meno, myero wati ki ryeko ka watye ka yero luremwa ki dong jami ma wagalo ki wangwa. (Carolok 13:20) Pire tek bene ni wakwany kare me tam ma peya waloko. Tam i kom kit ma lokki bigudo kwede jo mukene. Baibul waco ni: “Lok pa ngat ma pe ki tam winnye malit macalo pala lucwan ka ocobo dano, ento lok ma a ki i leb ngat maryek twero cango dano.”—Carolok 12:18.

 NONG NGEC MATUT

4. Gwokke ki gin ma iwaco nyo kit ma iloko kwede

I kine mukene wawaco jami mogo ma wakoko iye ange lacen. (Yakobo 3:2) Kwan Jo Galatia 5:22, 23, ci wunyam lapeny man:

• Kit mene i kin kit magi ma imito ni ileg pire wek okonyi me gwokke ki gin ma iwaco nyo kit ma iloko kwede? Kit magi twero konyi nining?

Kwan 1 Jo Korint 15:33, ci wunyam lapeny man:

• Luremi ki galowang ma iyero twero gudo kit ma iloko kwede nining?

Kwan Latitlok 3:1, 7, ci wunyam lapeny man:

• Awene ma twero bedo ber me ling alinga nyo me kuro kare maber me lok?

 5. Lok lok maber i kom jo mukene

6. Lok ki kica bot jo me gangwu

 WOT WIYE WIYE

Lok tye ki teko. Pi meno, myero wagwokke ki gin ma waloko, kare ma waloko iye ki dong kit ma waloko kwede.

Ngo ma ipwonyo?

• I yo mene ma itwero tic kwede ki mic me lok me konyo jo mukene?

• Kodi lok mene ma myero pe waloki?

• Gin ango ma twero konyowa me lok ki kica dok i yo ma dongo dano?