Jehová Diosajj parlirwa jaqenakar lurawayistu, ukajj mä suma regalowa. ¿Kunjamsa uka regalo apnaqtan ukajj Jehová Diosatakejj importanteti? Jïsa, wali importantewa (Santiago 1:26 liytʼäta). Ukhamajj ¿kunjamsa parlatasampejj Jehová Diosarojj kusisiysna?

1. ¿Kunjamsa Diosajj churkistu uka regalo sum apnaqsna?

Bibliajj akham sistuwa: “Maynit maynikam chʼamañchtʼasisipkakim, maynit maynikamas yanaptʼasisipkakim” sasa (1 Tesalonicenses 5:11). ¿Khitis chʼamañchtʼatäñ muni uk yattati? ¿Kunsa jupar chʼamañchtʼañatakejj lurasma? Jumatakejj kunja importantesa ukwa jupar sasma, kunja suma chuymanisa uksa sarakismawa. ¿Llakitanakarojj kawkïr textompis chʼamañchtʼasma? Ukatakejj walja textonakaw utji. Kunjamtï parlkäta ukajj maynir chʼamañchtʼaspawa, jan ukajj aynachtʼayaspawa, uk janipuniw armañamäkiti. Ukhamasti suma arunakampi munasiñampi parlañatakiw chʼamachasiñama (Proverbios 15:1).

2. ¿Kunanaksa jan parlañasäki?

Bibliajj akham siwa: “Jumanakan lakanakamatjja jan kuna jan wali arus mistpanti” sasa (Efesios 4:29 liytʼäta). ¿Kamsañsa ukajj muni? Mayninakar chuym ustʼayañatakejj janiw jan wali arunaksa, usuchjir arunaksa, jiskʼachir arunaksa parlañasäkiti. Janirakiw arunak apnaqerïñasäkiti, ni yaqhanakarus ina chʼusat kʼarintañasäkiti (Proverbios 16:28 liytʼäta).

3. ¿Kunas mayninakar chʼamañchtʼkiri arunak sañatakejj yanaptʼistaspa?

Jilapartejja kuntï amuyktan, kunatï chuymasan utjki ukanakwa parltanjja (Lucas 6:45). Ukhamasti taqe kunatejj cheqapäki, qʼomäki, munkañäki, jachʼañchkañäki ukanak piensañatakiw chʼamachasiñasa (Filipenses 4:8). Ukatakejja kunanakampis kusistʼañäni uk sumwa ajlliñasa, suma amigonakwa thaqañasaraki (Proverbios 13:20). Ukatjja janïr arskasajj kuna arunaksa sañ muntan, kunjamsa sañ muntan ukwa amuytʼañasa. Kuntï siskañäni ukajja, mayninakarojj yanaptʼaniti janicha uksa amuytʼañasarakiwa. Bibliajj akham siwa: “Jan amuytʼasis arsut arunakajja espadampi usuchjañamp sasiwa, ukampis amuytʼasir jaqen arunakapajj heridanak qolltʼiriwa” sasa (Proverbios 12:18).

 JUKʼAMP YATJJATAÑÄNI

4. Wali amuyumpiw parlañama

Awisajja, mä kun arsusajj qhepatakwa arrepentisiñ yattanjja (Santiago 3:2). Gálatas 5:22, 23 liytʼasajja aka toqetwa parltʼapjjäta:

• Liytʼktan uka textonakarjamajja, ¿kunsa parlañäni kunjamsa parlañäni uk amuytʼasiñatakejj kunjam chuymanïñsa Diosar mayisisma? ¿Kunjamsa ukham chuymanïñajj yanaptʼiristam?

1 Corintios 15:33 liytʼasajja aka toqetwa parltʼapjjäta:

• Amigonakamasa kunanakampitï jumajj kusistʼañ amtkta ukasa, ¿kunjamsa parlatamarojj yanaptʼaspa jan ukajj jan waltʼayarakispa?

Eclesiastés 3:1, 7 liytʼasajja aka toqetwa parltʼapjjäta:

• ¿Kunapachas amuktʼañajj wakisispa jan ukajj parlañas wakisispa?

 5. Mayninakat sum parlañamawa

6. Familiamarojj munasiñampiw parlañama

 ¿KUNSA YATEQAWAYTAN?

Arunakasajj maynir yanaptʼaspawa jan ukajj chuymapwa ustʼayaspa. Ukatwa kamsañänisa, kunapachas parlañäni, kunjamsa parlañäni uka toqenakat amuytʼañasa.

Amtañataki

• ¿Kunjamsa mayninakarojj parlatamampejj yanaptʼasma?

• ¿Kunjam parlañas jumarojj jan gustkiristam?

• ¿Kunas mayninakar chʼamañchtʼkiri suma arunakamp parlañatakejj yanaptʼistaspa?