JIʼTE 51
O fing ne ghe ge mghôm mou poung bi Jéova m tchi ge ke ?
Tchwe ye Jéova le pem wôkpe a, é le ha taʼ poutchi thwatwa bi pe—é le ghe ge pe khouʼgne ne pe gôm nwe. Tchi paʼ pe ne gwim poutchi bô a be m tuôdeng bii a ? Kwaʼ nyenyô ge éé ! (Ké Yakop 1:26.) Poʼo, pe fing ne ghe ge potse tsye pe gôm a poung bi Jéova m tchi ge ke ?
1. Pe fing ne wim poutchi Jéova ne taʼ tchi pepoung m tchi ge ke ?
Bible gôm bi pe ge “pe gô pe temte wôkpe wôkpe tchetche pe, pe kwite wôkpe wôkpe tchetche pe.” (1 Tésalonika 5:11) O jye she pô pye a bo tcheng kaktuô bi pou a ? O fing ne ghe la ne ne gre ge wap youʼ pepoung ? Ghôm bi pou ge wap be mtuôdeng bou. Mouʼtchwe o fing ne ghôm bi pou ywe ye o khoung ne pou a. O fing ne sè nwe ne taʼ pap Bible, ye a fing ne ha kaktuô bi taʼ mo ye o jye é a ? Medou mkhè Bible si mye o fing ne wim a. Kamte ba ge tchi paʼ o ne gôm taʼ ywe a, fing ne tchente ha kaktuô bi pyeshe pô. Poʼo, pe goung mtchwe awè de ŋwègne ba byagne gôm nwe.—Mghôm jyenwe 15:1.
2. Pe gô waʼ ma tchi mghôm ?
Bible gôm ge : “A sôm ghôm bôkpôk ke tem shwe po.” (Ké Éféso 4:29.) A thoute ge pe te gô wim mghôm tchwepoung pe, ke gôm taʼ ghôm tchuôtuô ye a gô ghe ge taʼ mo youʼ tchwepoung a le. Pe gô pe pôm ne ghôm nwe ne pô ne taʼ tchi tchwepoung, ke ne tchwanwe ne pou le.—Ké Mghôm jyenwe 16:28.
3. Ke gô kwite wôkpe ne ghôm nwe m tchi paʼ a gô ha kaktuô bi pyeshe pô a ?
Ne boʼgwye mtchum, potse tsye pe gôm a daʼte kwaʼ ywe ye a be tchum tum pe, ba ywe ye pe bo sè a. (Loukasi 6:45) Poʼo, pe gô lagne ne pe sè nwe ne—potse tsye a be dendeng a, potse te mving, potse tsye pe mo koung ya a, ba ne potse tsye bya pe pou ghoʼte a. (Filipo 4:8) Ne ne khouʼgne ne ghe ya, a tcheng ge pe tchente tchi potse tsye pe ne fye a, ba mso pôkpe. (Mghôm jyenwe 13:20) A be a poung ba ge pe pe de tam ne ne sè nwe te gôm. Sè nwe ne ywe ye mghôm mou gô ghe ne pyeshe pô a. Bible gôm ge : “Mghôm mye pou gôm te sè a, be paʼ ne le nye shou swôpte mo a, daʼge tum pô pye wap ghe jyenwe a gre ge mo yèè.”—Mghôm jyenwe 12:18.
PING TCHENG NE GÔ DZE
Lagne tchi paʼ o fing ne ghôm nwe ne taʼ tchi ye a gô poung bi Jéova, neng ha kaktuô bi pyeshe pô a.
4. Pe dinte ywe ye o gôm a, tchwe ye o gôm ya a, ba tchi paʼ o ne gôm a
Goung yôkpe awè, pe be she mtam gôm she potse te dou diʼ. (Yakop 3:2) Ké Galata 5:22, 23, neng dou gômte ne mhente menge :
-
Te ge o khouʼgne ne pe dinte mghôm mou, o fing ne ghe priya ne ne do ge Jéova kwite o ne pe gre ma m ma, mye pou gôm nwe ne tchum mkhè menge a ? M ma bô fing ne kwite o m tchi ge ke ?
Ké 1 Korinto 15:33, neng gômte ne hente yenge :
-
Mso pou ba potse tsye o ne de tam a, fing ne ghe la ne you tchi ne tchwe ?
Ke fing ne ghe ywe ne tchi paʼ o ne gôm nwe a ?
Ké Ékléziaste 3:1, 7, neng gômte ne hente yenge :
-
Nweke a fing ne pe ne ghe jyenwe, be ye pe tchwe ge kaam, ke byap taʼ tam pepoung te ne gôm nwe a le ?
5. Ghôm potse pepoung ne pyeshe pô
Pe fing ne pôm ne yemte pyeshe pô ke gôm potse tchwepoung ne pou le m tchi ge ke ? Yô VIDÉO, neng dou gômte ne mhente menge.
-
Tchum vidéo, nweke fe yôkpe tcheng ne kwyepgne ye tchi ne gôm nwe ne pyeshe pô ?
-
É ghe la ne ne kwyepgne ?
Ké Ékléziaste 7:16, neng gômte ne hente yenge :
-
Pe gô kamte ke tchwe ye pe bo sè ne ghôm nwe tchwepoung ne mo a ?
Ké Ékléziaste 7:21, 22, neng gômte ne hente yenge :
-
Mkhè menge fing ne kwite o ne tchyete yèloung, tchwe ye mo gôm potse tchwepoung ne o a m tchi ge ke ?
6. Le koungne gôm nwe bi pô toundye o
Jéova gôm bi pe ge pe le koungne ba ŋwègne gôm nwe bi pô toundye yôkpe. Yô VIDÉO, neng gômte ne hente yenge.
-
Ke gô kwite o ne le koungne gôm nwe bi pô toundye o ?
Ké Éféso 4:31, 32, neng gômte ne hente yenge :
-
Ma tchi mghôm fing ne ghe ge pô toundye o youʼ ge o khoung wap ?
Jéova le ghôm ge é khoung Mou é, Yéso. Ké Matio 17:5, neng gômte ne hente yenge :
-
O fing ne foʼte Jéova m tchi ge ke, tchum you tchi ne gôm nwe, ba ne potse tsye o gôm bi pô toundye o a ?
Po tcheng msô ne gôm bi pyeshe pô ge ywe ye wap gre a poung
SHE PÔ GÔM GE : “Ge gôm ywe ye ge sè a. A te dé a m sômywe, be ye pyeshe pô te khoung ywe ye ge gôm a pe.”
-
O bing ya a ? Nweke ?
YE NE KHAMTE
Ywe ye pe gôm a fing ne kwite pô, ke gre ywe tchwepoung ne pou le. Poʼo, a tcheng ge pe pe tchente sè nwe ne ywe ye pe gôm a, tchwe ye pe gôm a, ba tchi paʼ pe ne gôm ya a.
O lagne ke ?
-
O fing ne wim mghôm mou ne kwite pyeshe pô m tchi ge ke ?
-
O le khète ne waʼ ma tchi mghôm ?
-
Ke gô kwite wôkpe ne pe gwim mghôm mye a daʼte koungne neng be ha kaktuô a ?
YÔ SHE POTSE NE
Ke fing ne kwite wôkpe ne ghôm nwe tchi paʼ a gô ha kaktuô bi pyeshe pô a ?
Yô ywe ye a fing ne kwite o ne waʼ mbôkbôk mghôm a.
Yô tchi paʼ o fing ne pôm ne pe gôm potse tchwepoung ne pyeshe pô a.
Yô tchi paʼ Jéova le kwite taʼ mbè ne yaʼ ne pe gôm mbôkbôk mghôm a.
“Jʼai sérieusement réfléchi à ce que je faisais de ma vie” (La Tour de Garde, 1er août 2013)