Ilyo Yehova atubumbile alitupeele ica bupe icisuma, e kutila amaka ya kulanda. Bushe alabikako amano ku fyo tubomfya ici ica bupe ico atupeela? Ee alabikako amano! (Belengeni Yakobo 1:26.) Bushe kuti twabomfya shani ica bupe ca kulanda mu nshila iingalenga Yehova alesekelela?

1. Kuti twabomfya shani bwino ica bupe ca kulanda?

Baibolo itila “mulesansamushanya no kukuulana.” (1 Abena Tesalonika 5:11) Bushe namwishibako bamo abengakabila ukubakoselesha? Finshi mwingacita pa kuti mu bakoseleshe? Mulebeba ukuti balicindama kuli imwe. Nalimo kuti mwabeba ifyo mwatemwa sana pali bena. Bushe kuli ilembo ilyo mulemona ukutila kuti lyakoselesha bamo abo mwaishiba? Kwena kwaliba amalembo ayengi ayo mwingabomfya. Lelo muleibukisha ukuti inshila mwalandilamo kuti yakoselesha umuntu nelyo iyo. Kanshi lyonse mule-esha ukuba abafuuka kabili aba cikuuku ilyo mulelanda.—Amapinda 15:1.

2. Finshi ifyo tushilingile ukulanda?

Baibolo itila: “Mwileka amashiwi yabola yafume mu kanwa kenu.” (Belengeni Abena Efese 4:29.) Kanshi ici cilepilibula ukuti tatulingile ukulalanda ifyabipa nelyo ukweba abantu amashiwi ayengabakalifya. Na kabili tatufwile ukubepesha abantu ubufi, nelyo ukulanda ifyabipa pali bena.—Belengeni Amapinda 16:28.

3. Cinshi cingatwafwa ukulalanda ifingakoselesha abantu banensu?

Ilingi line ifyo tulanda filanga ifyaba mu mutima wesu e lyo ne fyo tutontonkanyapo. (Luka 6:45) Kanshi tulingile ukulaesha na maka ukulatontonkanya pa fintu ifisuma, e kutila ifyalungama, ifya mucinshi, ifyatemwikwa, e lyo no kutasha. (Abena Filipi 4:8) Pa kuti tuletontonkanya pali ifi fintu, tulingile ukulasala bwino ifya kuleseshamo icitendwe e lyo ne fibusa. (Amapinda 13:20) Na kabili tulingile ukulatontonkanishisha libela pa fyo twalalanda e lyo ne nshila twalalandilamo. Moneni ifyo amashiwi yenu yengalenga abantu bambi baumfwa bwino nelyo baumfwa ububi. Baibolo itila: “Umuntu uulanda ukwabula ukutontonkanya aba kwati lupanga ululasaula, lelo ululimi lwa ba mano lulaposha.”—Amapinda 12:18.

 SAMBILILENI NA FIMBI

4. Mulebika amano ku fyo mulefwaya ukulanda e lyo ne nshila mwalalandilamo

Bonse fye inshita shimo tulalanda ifintu ifilenga twaisalanguluka pa numa. (Yakobo 3:2) Belengeni Abena Galatia 5:22, 23, lyena lanshanyeni aya mepusho:

• Mibele nshi pali iyi iyo mwingapepelapo iingamwafwa ukulalanda ifingalenga Yehova alasekelela? Bushe iyi imibele kuti yamwafwa shani?

Belengeni 1 Abena Korinti 15:33, lyena lanshanyeni ici cipusho:

• Bushe ifya kuleseshamo icitendwe ne fibusa musala kuti fyalenga mwaba ne milandile ya musango nshi?

Belengeni Lukala Milandu 3:1, 7, lyena lanshanyeni ici cipusho:

• Ni lilali cingaba bwino ukwikala tondolo nelyo ukulolela inshita iisuma iya kulanda?

 5. Mulelanda ifisuma pa bantu banenu

6. Muleba ne cikuuku ilyo mulelanda na balupwa lwenu

 IFYO MUSAMBILILE

Ifyo tulanda kuti fyakoselesha abantu nelyo ukubakalifya. Kanshi tulingile ukutontonkanyapo bwino pa fyo twalalanda, inshita twalalanda, e lyo ne nshila twalalandilamo.

Ukupitulukamo

• Kuti mwabomfya shani ica bupe ca kulanda ku kwafwa abantu?

• Mashiwi ya musango nshi ayo mushilingile ukulanda?

• Finshi fingatwafwa ukulaba aba cikuuku lyonse no kulakoselesha abantu mu fyo tulanda?