LESEN 51

Ifa Usun Kopwe Apwapwaai Jiowa lón Óm Kapas?

PLAY

Atun Jiowa a férikich, a fang ngenikich eú mettóch mi amwarar, ina ach tufichin fós. Mi pwal áfánni ifa usun sia áeá ena liffang? Ewer, mi fókkun áfánni! (Álleani James 1:26.) Iwe, ifa usun sia tongeni áeá ach tufichin fós lón ewe esin napanap epwe apwapwaai Jiowa?

1. Ifa usun sipwe áeá ach tufichin fós, liffangach we me ren Jiowa?

Iei met Paipel a pesei ngenikich: “Oupwe apöchökülafengenikemi o alilisfengen lefilemi.” (1 Tesalonika 5:11) Ka tongeni ekieki ié kewe mi lamot ngeniir kapasen apéchékkúl? Met ka tongeni féri pwe kopwe apéchékkúler? Ereniir pwe ka fókkun chúngúúr. Eli ka tongeni ereniir popun ka fókkun aúcheaniir. A wor eú wokisin ka ekieki pwe epwe apéchékkúla emén ka sissilei? A wor chómmóng wokisin ka tongeni filatá. Nge kopwe pwal chemeni pwe napanapen óm apasa och mettóch a tongeni apéchékkúla emén. Ina minne, fansoun meinisin kopwe achocho le fós pwetete fiti kirekiréch.—Än Salomon Fos 15:1.

2. Met sókkun fós sipwe ttiisenikich?

Ewe Paipel a apasa: “Esap wor kapas mi ngau epwe towu seni lon awemi.” (Álleani Efisos 4:29.) Weween, sisap okkoun are apasa och mettóch mi ngaw me ésúfélúngaw epwe ámeteki letipen emén. Sisap pwal uwofós me pweni aramas.—Álleani Än Salomon Fos 16:28.

3. Met epwe álisikich le eáni kapas mi apéchékkúla aramas?

Lape ngeni ekkewe mettóch sia kan fós usun ra pwári masouen letipach me met sia kan ekieki usun. (Lukas 6:45) Ina popun a lamot sipwe aéér ngenikich ach sipwe nefótófót wóón met mi aúchea, pwúng, liméch, me ésúfél. (Filipi 4:8) Ren ach sipwe tongeni nefótófót wóón ekkena sókkun mettóch, a lamot sipwe kefiléch ach minen apwapwa me kunou me ié kewe sipwe chiechi ngeniir. (Än Salomon Fos 13:20) A pwal álilliséch ach sipwe akkomw ekiek mwen sipwe fós. Ekieki met meefien ekkewe ekkóch ren met sia kan apasa. Iei met Paipel a erá: “Mi wor aramas ra fos, nge resap ekieki och. Ekei sokun fos ra akinasa aramas, usun efoch ketilas a akinasa eman. Nge än ekewe chon tipachem kapas ra atoto pöchökül.”—Än Salomon Fos 12:18.

KÚTTAFICHI

Ppii ifa usun ka tongeni fós lón ewe esin napanap epwe apwapwaai Jiowa me apéchékkúla ekkewe ekkóch.

4. Nemenifichi óm kapas

Fán ekkóch, oukich meinisin sia apasa och mettóch sia kan niamameló ren mwirin. (James 3:2) Álleani Kalatia 5:22, 23, me mwirin pwóróusfengen wóón ekkeei kapas eis:

Menni lein ekkena napanap kopwe tingorei Jiowa an epwe álisuk ren pwe kopwe tongeni nemenifichi óm kapas? Ifa usun ekkena napanap ra tongeni álisuk?

Álleani 1 Korint 15:33, me mwirin pwóróusfengen wóón ei kapas eis:

Met sókkun fós kopwe eáni ika ka kefilingaw chiechiom me óm minen apwapwa me kunou?

Met a tongeni angawaló napanapen óm fós?

Álleani Än Salomon Afalafal 3:7, me mwirin pwóróusfengen wóón ei kapas eis:

Ineet atun eli epwe éch óm kopwe chék fanafaneló are witi eú fansoun mi fich kopwap pwal fós?

5. Eáni kapas mi múrinné fán iten aramas

Ifa usun sipwe túmúnú ach sisap apasa och mettóch mi ngaw fán iten emén are ámeteki letipan? Fichi ei VIDEO, me mwirin pwóróusfengen wóón ekkeei kapas eis.

VIDEO: Speak “What Is Good for Building Up” Others (4:07)

Lón ewe video, pwata ewe Chón Kraist mwán a mochen siwili napanapen an fós usun ekkewe ekkóch?
Met a féri pwe epwe tongeni siwil?

Álleani Rom 14:10, me mwirin pwóróusfengen wóón ei kapas eis:

Met a lamot sipwe chechchemeni ika sia kúna sóssótun ach sipwe apasa och mettóch mi ngaw usun emén?

Álleani Än Salomon Afalafal 7:21, 22, me mwirin pwóróusfengen wóón ei kapas eis:

Ifa usun ekkena wokisin ra tongeni álisuk óm kosap song atun emén a apasa och mettóch mi ngaw fán itom?

6. Pwári kirekiréch lón óm kapas ngeni chón óm famili

Jiowa a mochen ach sipwe fós ngeni chón ach famili fán tong me kirekiréch. Fichi ei VIDEO, me mwirin pwóróusfengen wóón ei kapas eis.

VIDEO: Tong me Súfél Ra Etipeeúfengeni Famili (3:08)

Met epwe álisuk le kapas ngeni chón óm famili fán kirekiréch?

Álleani Efisos 4:31, 32, me mwirin pwóróusfengen wóón ei kapas eis:

Met sókkun fós epwe apéchékkúla chón óm famili?

Jiowa a pwáraaló meefian usun Néún we, Jesus. Álleani Mateus 17:5, me mwirin pwóróusfengen wóón ei kapas eis:

Ifa usun ka tongeni áppirú Jiowa lón óm fós ngeni chón óm famili?

Kútta alen óm kopwe apúnga ekkewe ekkóch

EKKÓCH RA ERÁ: “Ua chék apasawu met a nóm lón ekieki. Use pwal ekieki ika emén ese sani met ú apasa.”

Ka tipeeú ngeni ena? Pwata ka erá ena?

MENLAPAN

Minne sia apasa a tongeni ámeteki are álisi ekkewe ekkóch. A lamot ach sipwe akkomw ekieki met sipwe apasa, ineet sipwe kapas, me napanapen ach apasawu.