LONGESO 51
Kuchi Muhasa Kuvwisa Yehova Kuwaha Kupalikila mu Yuma Yize Wakuhanjika?
Muze Yehova atutangile, yatwaha chimwe chawana chilemu—uhashi wa kuhanjika. Shina iye kakulemesa chize twakuzachisa chawana chacho? Ewa! (Tanga Tiangu 1:26.) Mba kuchi mutuhasa kuzachisa uhashi wa kuhanjika mu jila yize muyivwisa Yehova kuwaha?
1. Kuchi mutuhasa kuzachisa chawana cha kuhanjika?
Mbimbiliya yakutulweza hanga ‘tulishinjile umwe ni mukwo ni kulikolesa umwe ni mukwo.’ (1 A-Tesalonika 5:11) Nyonga hali waze anafupiwa utakamiso. Asolwele ngwe o kali alemu kuli yena. Muhasa kwalweza yuma yize wakuzanga hali ayo. Muhasa kunyonga ha chimwe chisoneko chize muchihasa kutakamisa akwenu. Kuli yisoneko yinji yize muhasa kusakula. Iwuluka nawa ngwe, mulali uze muhanjikilamo chimwe chuma muuhasa kutakamisa akwenu. Mashimbu eswe muhanjika, sako tachi hanga uhanjike ni zango.—Yishima 15:1.
2. Yuma yika kutwatambile kuhanjika?
Mbimbiliya yinambe ngwo: “Nilimwe liji lia kupihisa kanda lituhuka mu makanwa jenu.” (Tanga A-Efwesu 4:29.) Chino chinalumbunuka ngwo, kutwatambile kuhanjika yuma ya luchisa, hanji kuhanjika yuma yize muyilemeka akwetu ku mbunge. Kutwatambile nawa kuhanjika mahuza ni kumwanga sango ja akwetu.—Tanga Yishima 16:28.
3. Yika muyitukwasa kuhanjika yuma yize muyitakamisa akwetu?
Kanji-kanji yuma yize twakuhanjika, yakusolola chize twakunyonga. (Luka 6:45) Kashika twatamba kulifumba hanga tulihulikile ha yuma yipema—ya ululi, yitoma, yize yatela kufwila ni yize ya lufuma mupema. (A-Fwilipu 4:8) Twatamba kusakula kanawa yiheho ni masepa jetu mba tuhase kulihulikila ha yuma yipema. (Yishima 13:20) Chino muchitukwasa nawa kunyonga kanawa shimbu kanda tuhanjika. Nyonga ha chize akwenu mevwa ha yize muwamba. Mbimbiliya yakwamba ngwo: “Kwali mukwa kuhanjika kalusulusu ngwe kutuwa cha katana; alioze limi lia mukwa mana kuliakuwuka.”—Yishima 12:18.
NYINGIKA NAWA
Lilongese kuhanjika mu jila yize muyivwisa Yehova kuwaha ni kutakamisa akwenu.
4. Nyonga kanawa ha yize muhanjika
Ha mashimbu amwe, tulieswe twakuhanjika yuma yimwe mba kulutwe mutuliseha. (Tiangu 3:2) Tanga A-Ngalashia 5:22, 23, mba nushimutwine yihula yino:
-
Yitanga yika watamba kwita mu yilemba yize muyikukwasa kunyonga kanawa shimbu kanda uhanjika? Kuchi yitanga yino muyihasa kukukwasa?
Tanga 1 A-Korindu 15:33, mba nushimutwine chihula chino:
-
Kuchi masepa ni yiheho yize wakusakula muyihasa kukwata ha yuma yize wakuhanjika?
Yika muyihasa kupihisa mulali wa kuhanjika che?
Tanga Chilumbununyi 3:1, 7, mba nushimutwine chihula chino:
-
Ha mashimbu aka twatamba kuhola hanji kuhanjika?
5. Hanjika yuma yipema hali akwenu
Kuchi mutuhasa kwehuka kulemeka akwetu ku mbunge hanji kuhanjika yuma yipi hali ayo? Tala CHINEMA, mba nushimutwine yihula yinahateho.
-
Kulita ni chinema, mumu liaka ndumbwetu azangile kwalumuna mulali wakuhanjikilamo ni akwo?
-
Yika iye alingile mba alumune mulali wenyi wakuhanjika?
Tanga Chilumbununyi 7:16, mba nushimutwine chihula chino:
-
Yuma yika twatamba kwiwuluka muze mutuzanga kuhanjika yuma yipi hakutwala kuli umwe mutu?
Tanga Chilumbununyi 7:21, 22, mba nushimutwine chihula chino:
-
Kuchi versu jino mujihasa kukukwasa kuhona kwivwa uli muze akwenu makwamba yuma yipi?
6. Hanjika ni zango mu usoko we
Yehova kanazange hanga tuhanjike ni asoko jetu ni zango. Tala CHINEMA, mba nushimutwine chihula chinahateho.
-
Yika muyihasa kukukwasa kuhanjika ni zango ni asoko je?
Tanga A-Efwesu 4:31, 32, mba nushimutwine chihula chino:
-
Maliji aka akukolesa usoko?
Yehova kasolwele chize akwivwa hali Mwanenyi, Yesu. Tanga Mateu 17:5, mba nushimutwine chihula chino:
-
Kuchi muhasa kwimbulula Yehova mu mulali uze muhanjikilamo ni asoko je?
Zachisa uhashi weswe muopwa nawo hanga uchichimieke akwenu
ATU AMWE KAKWAMBA NGWO: “Nakuhanjika yize nakunyonga, kashika nyi akwetu keshi kuzanga yize nakwamba, mulonga niwo.”
-
Shina nyonga ali linalite? Mumu liaka wakumbulula chocho?
YIZE WALILONGESA
Maliji kakwete ndundo. Kashika twatamba kunyonga kanawa yize mutwamba, shimbu lize mutuyamba ni chize mutuyamba.
Kuhitulula
-
Mu majila aka mutuhasa kutakamishinamo akwetu muze tunahanjika?
-
Yuma yika yize kutwatambile kuhanjika?
-
Yika muyihasa kutukwasa kuhanjika ni zango?
HENGWOLA NAWA
Yika muyihasa kutukwasa kuhanjika yuma yize muyitakamisa akwetu?
Nyingika yize muyihasa kukukwasa kwehuka kuhanjika yuma yipi.
“Shina Chili Lume Chipi Kuhanjika Maliji a Sonyi?” (Lusango wa ha internet)
Tala chize muhasa kwehuka kwamba yuma yize muyilemeka akwenu ku mbunge.
Nyingika chize Yehova akwashile umwe lunga kwecha kuhanjika yuma ya sonyi.
“Comecei a pensar no rumo que minha vida estava tomando” (Kaposhi wa Kutalila 1 wa Agosto, 2013)
