AYÈGÈ 51
É bibug bia ve Yéhova olugu
Éyòng Yéhova a nga tié bia, a nga ve bia sug ya mbembe éfaa: nkòbò. A ne hm nfi a mis moé na, bi yem belen ai éfaa té (Langʼa Yakòbus 1:26). Bia zu yen ayègè di akia ya bi ne semé Yéhova ai nkòbò waan.
1. Akia afé bi ne tuene belen ai oyem waan?
Bibel a dzo na “Keen osu na mina veen ngul a nyòl, mi longʼen fe mina mina” (1 Tésaloni 5:11). Ye wò yem mot zing a bele mindzug? Akia afé o ne nyè ve awono? O ne nyè dzam kat na wò wog nyè mintié, nde fe wò ding nyè asu mefulu moé. Ye wò yem éfus Bibel zing é ne vòli mot? Kan bifus bité bi ne fò abui. Te wò vuene na, king nkòbò dzoé é ne fe ai nfi abog zing aloro bibug wò belen ai biè. Nde hm, bii fulu ya kòbò ai osesa ai ébubut (Minkana 15:1).
2. Akia bibug afé kristen ya yeane saala?
Bia lang a Bibel na: “Te mbe nkòbò a kui mina a anyu” (Langʼa Éfési 4:29). Nala a tilen na bia yeane saala mvit minkòbò ai bibug bia balen. Bia yi fe saala ékokòbò ai minnal (Langʼa Minkana 16:28).
3. Akia afé bi ne bi bibug bia ve é bot bevòk awono?
Da kare kui na, é dzom mot a kòbò é ne é dzi a tsog (Lukas 6:45). Asu té ndò a ne ai nfi na, bi kare tsog é mam me ne mbeng, é mam mese me ne susuo, afûm, a ma yeane ai éding, ai é ma ba kam (Filippi 4:8). Asu yi na a bòben nala, bia yeane tuene tòb mimvomen miaan ai bemvoé baan (Minkana 13:20). A ne fe mbeng na bi kare bindi osusua yi na bia kòbò, bi siligi fe biabeben é dzom minkòbò miaan mi ne dzam bò é bot bevòk. Bibel a dzo na: “Bibug bi nyak bi ne ane ba dzi wò mimkpadi mekòng, ve oyem mimfefeg wa sò ai mvòè” (Minkana 12:18).
TUENE FAG
Bi tam yen akia afé bi ne semé Yéhova ai nkòbò waan, bi yem fe wono é bot bevòk.
4. Akia afé bi ne bò okala ai bibug biaan
Da kare bi kui na bi singi é mam bi nga dzo (Yakòbus 3:2). Langʼa Galati 5:22, 23 ai yalen minsili mi tsaa mi:
-
Asu yi na o yem bò okala ai bibug bié, mefulu mefé ya mefulu mese ma o ne dzam dzaa Yéhova na a vòli wò na o bi? Mefulu meté ma yi wò bò nfi a mezen mefé? Ai asu dzé?
Langʼa 1 Kòrinti 15:33 ai a yalen nsili hi:
-
Akia afé bemvoé boé ai mimvomen mié mi ne dzam tséndé nkòbò woé?
Mam mefé me ne dzam bò na nkòbò waan o tséndé?
Langʼa Ékklésiast 3:1, 7, ai yalen a nsili hi:
-
Mekia mebog mefé me ne mbeng na o tòbò évol ngeki na o yanga mbembe abog asu yi na o kòbò?
5. Kòbega é mam me ne mbeng asu é bot bevòk
Akia afé bi ne dzam saala metè ai bibug bia balen? Bebege VIDÉO ai yalen minsili mi tsaa mi:
-
Dzé madzang a nga kèène yem?
-
A nga bò ya asu yi na a tséndé?
Langʼa Ékklésiast 7:16 ai yalen a nsili hi:
-
Éyòng o nteleya na wò kòbò ai é mot mbòk abé, dzé wò yeane tari tsog?
Langʼa Ékklésiast 7:21, 22 ai yalen a nsili hi:
-
Nge mot a kòbò ai bia abé, akia afé bifus bi bi ne bi dzam vòli na te bia baala dò a nnem?
6. Yeme kòbò ai bot ya nda bot dzoé
Yéhova a yi na a nda bot, bot be kòbò ai osesa. Bebege VIDÉO, ai yalen a nsili hi:
-
Dzé ya yi wò vòli na o yem kòbò ai bot ya nda bot dzoé ai osesa ose?
Langʼa Éfési 4:31, 32 ai yalen a nsili hi:
-
Akia minkòbò afé mi ne dzam bò na bot ya nda bot dzoé be woren na wò ding bò?
Yéhova a ndziki wog osòn na a kat mòn woé é dzom a woren asu dié. Langʼa Matéus 17:5 ai yalen a nsili hi:
-
Akia afé bi ne dzam vu Yéhova éyòng bia lèè ai bot ya nda bot dzaan?
Dzengʼe mezen ya tamen é bot bevòk
ABUI BOT DA DZO NA: “Me ma kòbò é dzam ma tsog, nge é bot bevòk ba wog olun adzo daba.”
-
Ye o ne king ai bò? Asu dzé?
OBALBAS
Bibug bi ne ngul ya vòli nge a bali é bot bevòk. Da sili hm na, mot a tari tsog é dzom a yi kòbò, a tòb mbembe abog ai akia a yi dò kòbò.
Dzé bia baala
-
Mekia mefé bia yeane tuene belen ai oyem waan?
-
Akia bibug afé wò nòng ntsigen na wò dzogè?
-
Dzé ya yi wò vòli na o kare bi bibug bi ne mbeng, bi vaa fe awono?
O NE FE BEBE
Melebega me ne wò vòli na o bi mimbembe bibug.
Yene akia afé o ne dzam dzogè metè.
Melebega asu yi na mot a telé bikokòbò.
Yene akia ya Yéhova a nga vòli mot zing na a yem belen ai oyem woé.
“Jʼai sérieusement réfléchi à ce que je faisais de ma vie” (La Tour de Garde, 1er août, 2013)