ADZESUA 51
Ibesi Dɛn Ama Kwan A Efa Do Kasa No Asɔ Jehovah N’enyi?
Jehovah bɔɔ hɛn no, ɔmaa hɛn akyɛdze soronko bi. Dɛm akyɛdze no nye dɛ, yetum kasa. Ana kwan a yɛfa do dze dɛm akyɛdze no yɛ edwuma no ho hia Jehovah? Nyew, ohia no papaapa! (Kenkan James 1:26.) Ɔnodze, yebesi dɛn ama kwan a yɛfa do nye afofor kasa no ama Jehovah n’enyi agye?
1. Yebesi dɛn dze akyɛdze a Jehovah dze ama hɛn no edzi dwuma wɔ kwan pa do?
Bible no hyɛ hɛn nkuran dɛ ‘yɛnhyɛ hɛnho nkuran nkorkor, na yɛmboa hɛnho nkorkor.’ (1 Thessalonicafo 5:11, Baebor) Ana inyim nyimpa binom a wohia nkuranhyɛ? Ebɛnadze na ibotum ayɛ dze aboa hɔn? Ma wonhu dɛ hɔn asɛm hia wo papaapa. Adze a w’enyi gye ho paa wɔ hɔnho no, ɔyɛ a ka kyerɛ hɔn. Aso ibotum apɛ kyerɛwsɛm bi a ɔhyɛ nkuran paa, na aakenkan akyerɛ hɔn? Kyerɛwnsɛm a ibotum akenkan dze ahyɛ afofor dzen dze, ɔnnyɛ na koraa. Sɛ asɛm a ebɛka no da nkyɛn a, mma wo werɛ mmfir dɛ, ɔkwan a ebɛfa do aka no so ho hia paa. Ntsi sɛ erekasa a, ɔyɛ a tɔ wo bo ara, na ma nkorɔfo nhu dɛ edwen hɔnho.—Mbɛbusɛm 15:1.
2. Ebɛn nsɛm na onnyi dɛ opue fi hɛn anomu?
Bible no ka dɛ: “Mma kasa fun biara mmfi hom anomu.” (Kenkan Ephesusfo 4:29.) Iyi kyerɛ dɛ ɔnnsɛ dɛ yɛka kasafi, na sɛ yɛnye obi so rekasa a, ɔnnsɛ dɛ yɛka nsɛm bi a obotum epira no anaa nsɛm a ɔyɛ yaw kyerɛ no. Dɛmara so na ɔnnsɛ dɛ yedzi anokum, anaa yɛsɛɛ nkorɔfo dzin.—Kenkan Mbɛbusɛm 16:28.
3. Ebɛnadze na obotum aboa hɛn ma yaaka nsɛm a ɔhyɛ nkuran?
Mpɛn pii no, ndzɛmba a yɛka ho asɛm no ma afofor hu dza ɔwɔ hɛn akoma anaa hɛn adwen mu. (Luke 6:45) Dɛm ntsi ɔsɛ dɛ yɛbɔ mbɔdzen dɛ yɛbɔdwendwen ndzɛmba pa nkotsee ho, kyerɛ dɛ, ndzɛmba a ɔtsen, no ho tsew, ɔyɛ fɛw, na ɔsɛ ayɛyi. (Philippifo 4:8) Sɛ yebotum adwendwen ndzɛmba pa ho a, nna ɔno ɔsɛ dɛ yɛdze ndzɛmba pa gyegye hɛn enyi, na yɛhwɛ hɛn anyɛnkofa so yie. (Mbɛbusɛm 13:20) Afei so, yɛrebɛkasa a, ɔsɛ dɛ yɛdwen dza yɛrebɛka no ho yie paa ansaana yɛaka. Yebotum ebisa hɛnho dɛ, ‘Nkorɔfo bɛtse nka dɛn wɔ asɛm a merebɛka yi ho?’ Bible no ka dɛ: ‘Obi wɔ hɔ a ɔkasa bumbum dɛ nkrantse no nwowɔe, naaso onyansafo ne tɛkyerɛma dze ɔsa yarba.’—Mbɛbusɛm 12:18.
PƐNSAPƐNSA MU KƆ EKYIR
Ma yɛnhwɛ mbrɛ ibesi ama wo kasaa ho atsew na Jehovah n’enyi aagye, nye mbrɛ ibesi dze wo kasaa ahyɛ afofor nkuran.
4. Hwɛ w’ano kasa yie
Ɔtɔfabi a, yetum ka asɛm bi, naaso ekyir yi, nna yeenu hɛnho. (James 3:2) Ma yɛnkenkan Galatiafo 5:22, 23, na yensusu nsɛmbisa yi ho:
-
Suban ahorow a wɔabobɔ dzin yi mu hendze na ibotum aserɛ Jehovah dɛ ɔmma wo bi, ama eetum ahwɛ wo kasaa yie? Dɛm suban ahorow yi besi dɛn aboa wo?
Ma yɛnkenkan 1 Corinthfo 15:33, na yensusu asɛmbisa yi ho:
-
Ebɛn kwan do na hɛn anyɛnkofo nye ndzɛmba a yɛdze gyegye hɛn enyi no botum asesa dɛ mbrɛ yesi kasa?
Ebɛn ndzɛmba na obotum ama hɛn kasaa aayɛ tan anaa wɔayɛ dɛw?
Ma yɛnkenkan Ɔsɛnkafo 3:1, 7, na yensusu asɛmbisa yi ho:
-
Ebɛn aber na ɔbɛyɛ papa dɛ eyɛ dzinn anaa etweɔn kesi ber pa bi ansaana akasa?
5. Ka nkorɔfo ho asɛm pa
Ebɛnadze na ɔbɔboa hɛn amma yaannhyehyɛ ahorba anaa yaannka nsɛm a ɔyɛ yaw annkyerɛ nkorɔfo? Ma yɛnhwɛ VIDEO yi, na yensusu nsɛmbisa a odzidzi do no ho.
-
Nna ebɛnadze ntsi na onua a ɔwɔ video no mu no pɛ dɛ ogyaa mbrɛ osi ka nkorɔfo ho asɛm no?
-
Ebɛn anamɔn na otui mbrɛ ɔbɛyɛ a ɔbɛsesa dɛm suban no?
Ma yɛnkenkan Ɔsɛnkafo 7:16, na yensusu asɛmbisa yi ho:
-
Sɛ tsebea bi a ɔbɛma yɛaka obi ho asɛm bɔn soɛr a, ebɛnadze na ɔsɛ dɛ yɛkaa?
Ma yɛnkenkan Ɔsɛnkafo 7:21, 22, na yensusu asɛmbisa yi ho:
-
Sɛ obi ka woho asɛm bɔn a, kyerɛwsɛm yi besi dɛn aboa wo amma wo bo eemmfuw dzendzenndzen?
6. Sɛ enye w’ebusuafo rekasa a, ma wonhu dɛ edwen hɔnho
Sɛ yɛnye hɛn ebusuafo rekasa a, Jehovah pɛ dɛ yedzi hɔn nyi na yɛma wohu dɛ yɛdɔ hɔn. Ma yɛnhwɛ VIDEO yi, na yensusu asɛmbisa a odzi do no ho.
-
Sɛ enye w’ebusuafo rekasa a, ebɛnadze na ɔbɔboa wo ma eedzi hɔn nyi?
Ma yɛnkenkan Ephesusfo 4:31, 32, na yensusu asɛmbisa yi ho:
-
Sɛ yɛpɛ dɛ hɛn ebusuafo hu dɛ yɛdwen hɔnho a, ebɛn kwan do na ɔsɛ dɛ yɛnye hɔn kasa?
Mbrɛ nna Jehovah tse nka wɔ ne Ba Jesus ho no, ɔkae ma nkorɔfo tsee. Ma yɛnkenkan Matthew 17:5, na yensusu asɛmbisa yi ho:
-
Sɛ enye w’ebusuafo rekasa a, ibesi dɛn esuasua Jehovah?
Sɛ afofor yɛ adze a, ɔyɛ a kamfo hɔn
BINOM KA DƐ: “Emidze, meka m’adwen o. Sɛ meka na wɔaannyɛ wo dɛw a, ɔmmfa moho.”
-
Enye hɔn a wɔka dɛm asɛm yi yɛ adwen? Ebɛnadze ntsi a?
DZA ESUA
Nsɛm a yɛka no botum ahyɛ obi nkuran anaa woepira no. Ntsi sɛ yerubobue hɛn ano aka asɛm bi a, ɔsɛ dɛ yɛdwen dza yɛrebɛka, ber a ɔsɛ dɛ yɛka, nye kwan a yɛbɛfa do aka no ho yie paa.
Mbobɔdo
-
Akwan a ibotum afa do dze w’anomu nsɛm aboa afofor no bi nye dɛn?
-
Ebɛn nsɛm na emmpɛ dɛ opue fi w’anomu ba?
-
Ebɛnadze na obotum aboa hɛn ma hɛn kasaa aayɛ dɛw na wɔaahyɛ afofor nkuran?
HWEHWƐ PII KA HO
Ebɛnadze na obotum aboa hɛn ma yaaka nsɛm a ɔhyɛ nkuran?
Hwɛ dza obotum aboa wo amma aannka kasafi.
Hwɛ dza ɔbɔboa wo amma eenndzi anokum.
Hwɛ mbrɛ Jehovah boaa papa bi a nna ɔyɛ dzen ma no dɛ obegyaa kasafi ka no ma ogyaae.
“Mususuu M’abrabɔ Ho Yie, Osiandɛ Nna Ɔbra A Morobɔ No Yɛ Hu” (Ɔweɔn-Aban, August 1, 2013)
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
