Hwenu e Jehovah dá mǐ é ɔ, é na mǐ nǔnina jiwǔ ɖé: é wɛ nyí nǔwukpíkpé xóɖiɖɔ tɔn. Lee mǐ nɔ zán nǔnina enɛ gbɔn é ka nɔ ɖu ayi mɛ n’i à? É ɖò wɛn ɖɔ é nɔ ɖu ayi mɛ n’i! (Xà Jaki 1:26.) Enɛ wu ɔ, nɛ̌ mǐ ka sixu zán nǔwukpíkpé xóɖiɖɔ tɔn mǐtɔn b’ɛ na hɛn xomɛ Jehovah tɔn hun gbɔn?

1. Nɛ̌ mǐ ka ɖó na zán nǔnina xóɖiɖɔ tɔn ɔ gbɔn?

Biblu ɖɔ nú mǐ ɖɔ mǐ ni nɔ ‘na akɔ́nkpinkpan mǐɖée, bo dó wusyɛn lanmɛ nú mǐɖée.’ (1 Tɛsalonikinu lɛ 5:11) Ayi towe ka yì mɛɖé lɛ jí bɔ ye ɖó hudo akɔ́nkpinkpan tɔn à? Etɛ a ka sixu wà bɔ ye na mɔ yeɖée mɛ ganji? Nǎ ganjɛwu ye ɖɔ nǔ yetɔn nɔ ɖu ayi mɛ nú emi. Vlafo a sixu nɔ ɖɔ nǔ yetɔn e nɔ nyɔ́ nukún towe mɛ é nú ye. Ayi towe ka yì wemafɔ e na dó wusyɛn lanmɛ nú mɛ e a tuùn é ɖé jí à? Wemafɔ gegě wɛ ɖè bɔ a sixu sɔ́ ee jló we é ɖ’emɛ. Lɛ̌ flín ɖɔ lee a nɔ ɖɔ xó nú mɛ ɖevo lɛ gbɔn é sixu dó wusyɛn lanmɛ nú ye tawun. Enɛ wu ɔ, nɔ tɛ́n kpɔ́n bo nɔ ɖɔ xó nú mɛ kpo xomɛnyínyɔ́ kpo, kpodo gbè fífá kpo hwebǐnu.—Nǔnywɛxó 15:1.

2. Xó alɔkpa tɛ lɛ mǐ ka ɖó na nyi alɔ na?

Biblu ɖɔ: “Xó nyanya ɖebǔ ma nɔ tɔ́n sín nu mitɔn mɛ ó” (Xà Efɛzinu lɛ 4:29.) Enɛ xlɛ́ ɖɔ mǐ kún na nɔ zán xógbe masɔgbe lɛ alǒ xógbe nyanya lɛ, kpo xógbe ɖěɖee nɔ sɔ́ hwǎn mɛ alǒ nɔ d’azɔn mɛ lɛ é kpo ó. Mǐ ɖó na lɛ́ nyi alɔ nú mɛnúɖiɖɔ kpo xókpadómɛnu kpo.—Xà Nǔnywɛxó 16:28.

3. Etɛ ka na d’alɔ mǐ bɔ mǐ na nɔ ɖɔ xó e na nɔ dó wusyɛn lanmɛ nú mɛ lɛ é?

Hwɛhwɛ ɔ, nǔ e mǐ nɔ ɖɔ lɛ é nɔ ɖè nǔ e ɖò ayi mǐtɔn mɛ tawun é, alǒ nǔ e ɖò linlin mǐtɔn mɛ tawun é xlɛ́. (Luki 6:45) Enɛ wu ɔ, mǐ ɖó na kplɔ́n mǐɖée bo na nɔ sɔ́ ayi ɖó nǔ ɖagbe lɛ jí, ye wɛ nyí ‘nǔ e sɔgbe é, nǔ e mɛ́ é, nǔ e nɔ nyɔ́ mɛ nukúnmɛ é kpodo nǔ e wlí yɛ̌yi é kpo.’ (Filipunu lɛ 4:8) Bonu mǐ na sɔ́ ayi ɖó nǔ enɛ lɛ jí ɔ, mǐ ɖó na nɔ cyan ayiɖeɖayǐ mǐtɔn lɛ kpo xɔ́ntɔn mǐtɔn lɛ kpo, kpo nǔnywɛ kpo. (Nǔnywɛxó 13:20) Enɛ nɔ lɛ́ d’alɔ mǐ bɔ mǐ nɔ yì agbɔ̌n jí, bo nɔ lin tamɛ cobo nɔ ɖɔ xó. Nɔ gbéjé lee nǔ nɔ cí nú mɛ ɖevo lɛ dó xó towe lɛ wu é kpɔ́n. Biblu ɖɔ: “Mɛ e nɔ ɖɔ xó dín ɔ, xó tɔn nɔ gblewǔ mɛ hwǐ ɖɔhun; mɛ e ka ɖó nǔnywɛ ɔ, xó tɔn nɔ gbɔ azɔn.”—Nǔnywɛxó 12:18.

 BA DÒ NÚ NǓ D’EJI

4. Nɔ kpɔ́n xó e a nɔ ɖɔ lɛ é

Hweɖelɛnu ɔ, mǐ bǐ nɔ ɖɔ xó ɖé lɛ b’ɛ nɔ wá vɛ́ nú mǐ. (Jaki 3:2) Xà Galatinu lɛ 5:22, 23, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Jijɔ enɛ lɛ ɖětɛ lɛ a ka sixu byɔ ɖò ɖɛ mɛ, bɔ ye na d’alɔ we bonu a na nɔ kpɔ́n xó cobo ɖɔ? Nɛ̌ jijɔ enɛ lɛ ka sixu d’alɔ we gbɔn?

Xà 1 Kɔlɛntinu lɛ 15:33, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ xɔ́ntɔn e a nɔ cyan lɛ é kpo ayiɖeɖayǐ e a nɔ cyan lɛ é kpo ka sixu wà nǔ dó lee a nɔ ɖɔ xó gbɔn é wu gbɔn?

Xà Nǔnywɛtɔ́xó 3:1, 7, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Hwetɛnu é ka sixu nyí nǔnywɛnú ɖɔ è ni cí xwíi, alǒ nɔte kpɔ́n hwenu ɖagbe ɖé cobo ɖɔ xó?

 5. Nɔ ɖɔ xó ɖagbe dó mɛ ɖevo lɛ wu

6. Nɔ nyɔ́ xomɛ hwenu e a ɖò xó ɖɔ nú xwédo towe wɛ é

 ETƐ LƐ A KA KPLƆ́N?

Xó ɖó agbɔ̌n. Hǔn, mǐ ɖó na nɔ lin tamɛ kpɔ́n ganji dó nǔ e ɖɔ gbé mǐ ja é, hwenu e mǐ na ɖɔ é kpo lee mǐ na ɖɔ gbɔn é kpo jí.

Vɔ̌gbɔnji

• Ali tɛ lɛ nu mɔ̌ a ka sixu ɖɔ xó dó d’alɔ mɛ ɖevo lɛ ɖè?

• Xó alɔkpa tɛ lɛ a ka jló na nyi alɔ na?

• Etɛ ka sixu d’alɔ mǐ bɔ xó mǐtɔn lɛ na nɔ nyɔ́ sè, bo na nɔ lɛ́ dó wusyɛn lanmɛ nú mɛ hwebǐnu?