KAPITE 51
Ko Ni Māsau Ke Fakakololiaʼi Ai a Seova
I lotātou fakatupu e Seova, na soli mai e ia se neʼa alofa fulumālie ko le māsau. Ko ia, e maʼuiga kiate ia latātou faʼasiga fakaʼaogaʼi o le neʼa alofa lenā. (Lau Sakopo 1:26.) Tou tioʼi pe fefeʼaki latātou fakakololiaʼi a Seova i atātou māsau.
1. E fefeʼaki latātou fakaʼaogaʼi fakamālielie o lotātou alelo?
E pati i le Tosi-Tapu: “Kotou fefakapelepeleaki ia koutou ti kotou fefaufauaki ia koutou.” (1 Tesalonika 5:11) E ke iloa ko ia se tasi e ʼaoga ki ai se fakalotomakeke? E fefeʼaki a lau ʼaga o fakalotomakekeʼi? E mafai faʼi ke ke pati ake, e maʼuiga aia kiate koe ti mo fakasā ake le neʼa leia e ke mālieʼia iate ia. E ke iloa ko ia se vaega e mafai ke ke fakalotomakekeʼi ai se tasi? E matala ia e lasi ʼai. Manatuʼi e mafai ki le faʼasiga fai o au māsau ke fakalotomakekeʼi ai a ʼiki. Ko ia, ke ke māsau tuʼumaʼu i le agamalū mo le agamālie.—Taagapati 15:1.
2. Koā a māsau e tonu ke tou tiʼaki?
E pati i le Tosi-Tapu: “Ke aua na vilo fua mei lokoutou gutu se masau veli.” (Lau Efeso 4:29.) Ko ia, e tonu ke tou tiʼaki a māsau veli pe ko māsau e mafai ke fakamamaeʼi ai se tasi. Ti e tonu ke tou toe tiʼaki le fatufatu mo le fiatuʼu.—Lau Taagapati 16:28.
3. E fefeʼaki latātou fai ni māsau fakalotomakeke?
I le agamāsani, ko neʼa alā e tou manatu mo māsau ki ai e au mei lotātou loto. (Luka 6:45) Ko ia, e maʼuiga ke tou maʼua ni manatu e mālie mo totonu, mo meʼā, mo tusa mo le alofa ti gali mo le vikiʼi. (Filipe 4:8) E mālie ke tou filifili fakamālielie atātou fakafiafia mo otātou kauneʼa, ke mafai ai ke tou fai le koga lenā. (Taagapati 13:20) E toe mālie ke tou fakakaukau i muʼa o latātou māsau pe malave fefeʼaki loa ki ʼiki. E pati i le Tosi-Tapu, ko “māsau fakafuanoa, e fakalavea ia le loto ofaipe se seleta, kae ko le alelo o le kau poto e ave ia le faitoo.”—Taagapati 12:18.
MANATU LOLOTO
Ta tioʼi ni ʼiki ake manatu e sā ai i atātou faʼasiga māsau, e tou fakakololiaʼi ai a Seova ti mo fakalotomakekeʼi ni ʼiki.
4. E fefeʼaki le lolomi o lotātou alelo?
E tou fai fuli ni māsau e tou fakasemala ai ki muli ake. (Sakopo 3:2) Lau Kalate 5:22, 23, ti fai a vesili anei:
-
Koā a agaaga i leinei, e mafai ke tou kole kia Seova ke tokoi mai ke tou puleʼi ai lotātou alelo?
Lau 1 Kolinito 15:33, ti fai le vesili leinei:
-
E fefeʼaki loa au māsau mo kāpau e ke fakatasi tuʼumaʼu mo ni ou kauneʼa e leʼese alofa kia Seova mo fai ni neʼa e leʼese mālie kiate ia?
Koā anoʼaga e fakatupu veli ai loa ki lau faʼasiga māsau?
Lau Ekelesiasi 3:1, 7, ti fai le vesili leinei:
-
Ko anoʼaga fea alā e mālie ke kita nofo fakalologo ai pe ke talitali ki le temi mālie ke māsau ai?
5. Fai ni māsau mālie o uiga mo ʼiki
Koleā e tonu ke tou fai ke leʼaise tou fai ai ni māsau e malave veli pe leʼaise mālie? Tioʼi le GĀ ʼATA, ti fai a vesili e soa atu ki ai.
-
Koleā leia na tokagaʼi e le taina la?
-
Koleā na fai e ia ke fetogi ai lana aga?
Lau Ekelesiasi 7:16, ti fai le vesili leinei:
-
Ka kita kamata māsau veli o uiga mo se tasi, koleā e tonu ke kita manatuʼi?
Lau Ekelesiasi 7:21, 22, ti fai le vesili leinei:
-
E tokoi fefeʼaki atu a vaega anei ke ʼaua na ke ʼita mo kāpau e māsau veli a se tasi o uiga mo koe?
6. Ka ke māsau ki lou fāmili fai mo le agamālie
E loto Seova ke tou femāsauʼaki i le agamālie i lotātou gā fāmili. Tioʼi le GĀ ʼATA, ti fai le vesili e soa atu ki ai.
-
Koleā ka tokoi atu loa ke ke māsau ki lou fāmili i le agamālie?
Lau Efeso 4:31, 32, ti fai le vesili leinei:
-
Ko faʼasiga māsau fefeʼaki e mālieʼia loa e lou fāmili?
Na fakasā tuʼumaʼu e Seova a neʼa alā na logoʼi e ia o uiga mo lona Alo ko Sesu. Lau Mateo 17:5, ti fai a vesili anei:
-
E fefeʼaki a lau ʼaga o faifaitakiʼi a Seova i lau faʼasiga māsau mo lou fāmili?
Afa a faigamālie fuli ke ke vikiʼi ai a ni ʼiki
E PATI A ʼIKI: “Ko au, e kau avatu le neʼa leia e kau manatu ki ai. Kāpau e ʼita a ʼiki, ti faitalisa atu lātou.”
-
Koleā lau manatu? Ti koleā lona tupuʼaga?
MANATU TĀFITO
E mafai ki māsau alā e tou fai ke fakalotomakekeʼi pe fakalotomamaeʼi ai se tasi. Ko ia e tonu ke tou fakakaukauʼi atātou māsau, mo filifili le temi leia ke tou māsau ai ti mo le faʼasiga ave o māsau anā.
Fakamanatu
-
Fakasā ni anoʼaga e ke fakaʼaogaʼi fakamālielie ai lou alelo?
-
Koā a faʼasiga māsau e tonu ke ke ʼaga o tiʼaki?
-
Koleā e tokoi atu loa ke ke fai ni māsau e mālie ti mo fakalotomakeke?
A ʼIKI MANATU
Ni tokoi e tolu ke kita maʼua ai ni manatu e mālie.
E fefeʼaki a lau ʼaga o tuku le pati veli.
Ni tokoi ke leʼaise tou fatufatu ai.
Na tokoi fefeʼaki a Seova ki se tagata ke puleʼi e ia lona alelo?
“Na kau fakakaukau ki neʼa alā na kau fai i le temi kua sili” (Tule Leʼo, aso 1 o Akusito 2013)