TOƁƁERE 51
Ko honno konnguɗi men ɗin weltinirta Yahuwah Alla ?
Fewndo ko Yahuwah Alla tagi en, o okkuno en dokkal moƴƴal : ɗun ko waawugol wowlude. No huutorten ngal dokkal non no hittani Yahuwah Alla ? Pellet, no hittani mo ! (Janngee Yaaquuba 1:26). Ko honno huutorten ɗenngal men ngal fii weltingol Yahuwah Alla ?
1. Ko honno huutorten ngal dokkal no moƴƴiri ?
Deftere Alla nden wi’i : « wakkilindiree, tiiɗindiron, wano wonɗon warrude non fewndo ɗoo » (1 Tesalonii 5:11). Hiɗon anndi hatonjiniiɗo e wakkilineede ? Ko honɗun waɗoton fii wakkilingol mo ? On haalanay mo himo hittani on e anndintina mo ko welata on kon e makko. Hiɗon anndi aaya mo huutorton fii wakkilingol goɗɗo mo annduɗon ? No woodi aayeeje buy ɗe suɓotoɗon. Annditee kadi, no haalirton non battinay woɓɓe goo moƴƴa wa konnguɗi ɗi huutorton ɗin. Ko ɗun waɗi, wakkilee soono woo yewtugol ɓe doy e hoore newaare (Tindi 15:1, VPFJ).
2. Ko konnguɗi honɗi haanuɗen wikkaade ?
Deftere Alla nden wi’i : « Wota on accu kongol barminoowol woo yalta ka hunduko mon » (janngee Efeesi 4:29). Ɗun no firi en haanaa huutorde konnguɗi bonɗi maa barminayɗi. Hiɗen haani wikkaade kadi ɲo’ugol e tooɲugol goɗɗo (janngee Tindi 16:28, VPFJ).
3. Ko honno huutorten konnguɗi men ɗin fii wakkilingol woɓɓe ?
Wonnde, ko wowleten kon no holla ko miijiɗen maa ko woni ka nder ɓernde men (Luuka 6:45). Ko ɗun waɗi, hiɗen haani wakkilaade miijagol fii ‘piiji feewuɗi, laaɓuɗi e labaaɗi, maa hannduɗi e kuljeede maa manteede’ (Filipii 4:8). Fii waɗugol ɗii piiji, hiɗen haani suɓaade moƴƴa weldiɓɓe men ɓen e no feƴƴinirten saa’i men on non (Tindi 13:20, VPFJ). Wallay en kadi miijitagol moƴƴa fii konnguɗi ɗi haaleten ɗin e no haalirten non. Anndee no konnguɗi mon ɗin battinirta woɓɓe goo. Deftere Alla nden wi’i : « Konguɗi mo miijitotaako si wowla no barminira wa kaafa, kono konguɗi faamuɗo no ɲawnda » (Tindi 12:18, VPFJ).
LUGGINEE
Anndee no haalirton non weltinirta Yahuwah Alla e wakkilinirta woɓɓe goo.
4. Wattanee yila e no haalirton non
Wonnde, mo kala e men no wowla piiji ko ninsata (Yaaquuba 3:2). Janngee Galaasi 5:22, 23 e yewton fii ɗee lanndaale :
-
Ko honɗi e ɗii sifaaji torotoɗon Alla fii wallugol on wattangol yila e no haalirton non ? Ko honno ɗii sifaaji wallirta on ?
Janngee 1 Korenti 15:33 e yewton fii ngal lanndal :
-
Ko honno weldiɓɓe mon ɓen e no feƴƴinirton saa’i mon on non battinirta no haalirton non ?
Ko honɗun battinta no haalirton non ?
Janngee Waajotooɗo on 3:1, 7 e yewton fii ngal lanndal :
-
Ko saa’i hommbo ɓuri moƴƴude fii deƴƴugol maa habbagol saa’i moƴƴo fii haalugol ?
5. Haalee ko moƴƴi fii woɓɓe goo
Ko honno waɗirten fii wota en yennu woɓɓe goo maa haalen konnguɗi bonɗi ? Fijinee VIDIO on e yewton fii lanndaale jokkituɗe ɗen.
-
E nder vidio on, fii honɗun oo musiɗɗo ka dewal no faalaa waylude no o haalirta non fii woɓɓe goo ?
-
Ko honɗun o waɗunoo fii waylugol ɗun ?
Janngee Waajotooɗo on 7:16 e yewton fii ngal lanndal :
-
Ko honɗun haanuɗen annditude si en faalaama haalude ko boni fii goɗɗo ?
Janngee Waajotooɗo on 7:21, 22 e yewton fii ngal lanndal :
-
Ko honno ɗee aayeeje wallirta on fii wota on mono si goɗɗo haalii ko boni fii mon ?
6. Yewtiree ɓeynguure mon nden newaare
Yahuwah Alla no faalaa yo en yewtir ɓeynguure men nden newaare e giggol. Fijinee VIDIO on e yewton fii lanndal jokkitungal ngal.
-
Ko honɗun wallata on yewtirgol ɓeynguure mon nden newaare ?
Janngee Efeesi 4:31, 32 e yewton fii ngal lanndal :
-
Ko konnguɗi honɗi moƴƴani ɓeynguure mon nden ?
Yahuwah Alla holluno no o miijornoo non fii annabi Iisaa, Ɓiɗɗo makko on. Janngee Matta 17:5 e yewton fii ngal lanndal :
-
Ko honno ɲemmbirton Yahuwah Alla no yewtirton non ɓeynguure mon nden ?
Ndaaree no waawirton wakkilinde woɓɓe goo.
WOƁƁE GOO NO WI’A : « Min, mi haalii ko mi miijii kon. Mi haajaaka ko woɓɓe goo miijii si ɓe yiɗaa ko mi haali kon. »
-
On jaɓay ɗun ? Fii honɗun ?
RAWNOODE
Konnguɗi no mari doole. Hiɗen haani miijaade moƴƴa ko haaleten, saa’i mo haaleten e no haalirten non.
Ndartannde
-
Ko honno haalirton fii wallugol woɓɓe goo ?
-
Ko konnguɗi honɗi faaleteɗon wikkaade ?
-
Ko honɗun wallata on soono woo haalugol konnguɗi newiiɗi e moƴƴinayɗi ?
TASKEE
Ko honɗun wallata en haalugol ko wakkilinta woɓɓe goo ?
Anndee ko wallata on wikkagol konnguɗi bonɗi.
« Haray yennugol ko ko boni tigi tigi ? » (Winndannde ka jw.org)
Anndee no gerdirton fii wota on haalu ko boni fii woɓɓe goo.
Anndee no Yahuwah Alla barkirniri wakkilaare gorko goo fii accugol huɗagol.
« Mi fuɗɗino miijaade moƴƴa ko honno ngurndan an ɗan wa’irta » (Suudu Aynirdu ndun, 1 ut 2013)